Mintizro ya Vapostola

20 Loko yimayima yi pumbekile, Pawulo a zrumisa leswaku ku vitaniwa vadondzrisiwa, kutani ntsrhaku ka loko a va tiyisile a tlhela a va lelela, a yendzra a ya Makedoniya. 2 Ntsrhaku ka loko a fambafambe migangeni yoleyo ni ku va tiyisa ngopfu a vadondzrisiwa lava a va li kohala, a tlhase Grikiya. 3 Kone a tsrhame tihweti tizrazru, kambe loko a djula ku suka a wela a ya Siriya a gungule leswaku a Vayuda a va kunguhate ku mu dlaya, xileswo a vona swi yampswa kuva a tlhelela a Makedoniya. 4 A a na Sopataro n’wana wa Pirosi wa le Bereya, Arixtaku na Sekundu va le Tesalonika, Gayu wa le Derbe, Timotewu, ni va xifundzra xa Aziya ku nga Tikiko na Trofimo. 5 Vavanuna lava va zrange va famba va ya hi yimela a Trowasi; 6 kambe hine hi suke a Filipiya hi boti ntsrhaku ka Nkhuvu wa Mapawu lawa ma kalaka ma nga txheliwanga Fermentu,* nakone swi hi tekele ntlhanu wa masiku akuva hi tlhasa a Trowasi lani a va li kone, kone hi tlhase hi tsrhama 7 wa masiku.

7 Hi siku dzra ku sungula dzra vhiki na hi hlengeletanile akuva hi da, Pawulo a sungule ku vulavula na vone hikusa hi mundzruku ka kone a a ta famba; a bule na vone nkama wa ku leha ku ya tlhasa makazri ka wusiku. 8 Xileswo a ku ni mimotsre ya yinyinginyana ka kwartu dzra le henhla lani a hi hlengeletani kone. 9 A djaha dzra kukazri ledzri a dzri vitaniwa Yutiku a dzri tsrhame ka janela, kutani dzri khomiwa hi wuzrongo lebyikulu na Pawulo a le ku vulavuleni, hi ku hluliwa hi wuzrongo, dzri wa hansi na dzri sukela ka andari dzra wuzrazru va gama va ya va dzri tlakula na dzri file. 10 Kambe Pawulo a xika, a tlhasa a dzri yetlelela, a dzri xingazra a gama a ku: “Tsrhikani ku kazrateka hikusa dzra hanya.” 11 Xileswo Pawulo a tlhantuka a va a sungula ku da.* A ye mahlweni a vulavula na vone ku dzringana nkama wa ku leha byi za byi xa, a gama a famba. 12 Kutani va teka djaha va famba na dzrone na dzri hanya, na va nyonxe ngopfu swinene.

13 Hine hi zrange hi khwela boti hi wela hi ya a Asosi, lani a hi ta ya teka Pawulo, hikusa yene a hlawule ku famba hi milenge a hlaya leswaku hi ta khaluta hi mu teka hi boti. 14 Kutani loko a hi kume a Asosi, hi mu teke hi boti hi famba na yene a Mitilene. 15 Hi siku ledzri landzreliki, hi wele hi suka lanu hi tlhasa a Kiyosi, kambe hi siku dzra wubidzri hi tlhase hi yimanyana a Samosi, hi gama hi siku dzra wuzrazru hi tlhasa a Mileto. 16 Pawulo a a tiyimisele ku va a nga yimi a Efesa akuva a nga luzi nkama a xifundzreni xa Aziya, hikusa a a djahele kuva loko swi koteka a tlhasa a Yerusalema hi siku dzra Nkhuvu wa Pentekoxta.

17 Nambitanu, na a li Mileto a zrumise leswaku ku vitaniwa vakulu va bandla dzra Efesa. 18 Loko va tlhasa lani a a li kone, a va byela a ku: “Mi yi tiva ha hombe ndlela leyi ni tikhomiki ha yone a makazri kwenu ku sukela siku dzra ku sungula ledzri ni kandzreteliki ha dzrone a xifundzreni xa Aziya, 19 ni tizrele Hosi hi ku titsrongahata hinkwaku nakone leswi Vayuda a va ni makungu ya ku biha mayelanu na mine ni dzrilile ni tlhela ni xaniseka. 20 Ma swi tiva ni leswaku a ni tsrhikanga ku mi byela ni ntxhumu ni wun’we lowu pfunaka nambi ku mi dondzrisa livaleni ni hi muti ni muti. 21 Kambe ni nyikele wumboni hi ku helela ka Vayuda ni Vagriki bya leswaku va fanela ku tisola va gandzrela Xikwembu Nkulukumba va tlhela va kombisa lipfumelo ka Hosi Yesu. 22 Kutani swoswi ni ya a Yerusalema hi ku kongomisiwa hi moya wa ku xwenga, nambileswi ni kalaka ni nga swi tivi leswaku i yini leswi taka ni yentxekela kohala, 23 lexi ni xi tivaka hi leswaku ka doropa dzrin’wana ni dzrin’wana a moya wa ku xwenga wu tsrhamela ku ni tiyisekisa, wu hlaya leswaku a djele ni mahlomulo swi ni yimelile. 24 Nambitanu, a ni voni wutomi byanga na byi li bya lisima kwanga, a xa lisima i kuva ni heta ku tsrutsruma kwanga* ni wutizreli lebyi ni nyikiwiki byone ha Hosi Yesu, ku nga ku zrezra hi ku helela madzrungula lamanene ya timpswalu letikulu ta Xikwembu Nkulukumba.

25 “Swoswi na swi tiva leswaku hinkwenu ni mi zrezreliki madzrungula lamanene ya Mfumu a mi nge he ti tlhela mi ni vona nikutsrongo. 26 Xileswo ni mi vitane akuva mi ta va timboni namunhla, ta leswaku ni basile a ngatini ya vhanu hinkwavu, 27 hikusa a ni mi fihlelanga ntxhumu ka hinkwaswu leswi swi nga ku zrandzra ka* Xikwembu Nkulukumba. 28 Tivonelani mi tlhela mi vonelela ntlhambi hinkwawu, lowu a moya wa ku xwenga wu mi bekiki akuva mi va valaviseli va wone, akuva mi byisa bandla dzra Xikwembu Nkulukumba, ledzri a dzri xaviki hi ngati ya N’wanake. 29 Na swi tiva leswaku loko ni fambile, a makazri kwenu ku ta sala ku nghena timbyana ta nhova leti lambhiki, a ti nge ti wu khoma ha hombe ntlhambi, 30 nakone a makazri kwenu ku ta humelela vavanuna lava taka soholota ntiyiso akuva va tikokela vadondzrisiwa.

31 “Xileswo tsrhamani na mi pfule matihlo, mi dzrimuka leswaku ku dzringana malembe mazrazru, wusiku ni nhlikanhi, a ni tsrhikanga ku dzrimuxa mun’wana ni mun’wana wenu, ni patsre ni ku dzrila loko ni vulavula na n’wine. 32 Kutani swoswi ni mi nyikela ka Xikwembu Nkulukumba ni le zritwini dzra timpswalu take letikulu, ledzri nga mi tiyisaka ni ku mi nyika pfindla a makazri ka vaxwengi hinkwavu. 33 A ni navelanga prata dzra mhunu, woru kumbe mpahla. 34 Mi swi tiva ha hombe leswaku a no titizrela akuva ni tihlayisa ni ku hlayisa lava a ni fambafamba na vone. 35 Ka mintxhumu hinkwayu, ni mi kombe leswaku mi fanela ku pfuna lava vilelaka mpfunu hi ku tizra hi lani mine ni tizriki ha kone, nakone mi fanela ku dzrimuka mazritu ya Hosi Yesu loko a te: ‘Ku hanana swi tisa ku nyonxa lokukulu ku tlula ku yamukela.’”

36 Loko a hete ku hlaya mintxhumu leyi, a khinsama na vone hinkwavu a khongota. 37 Nakunene, hinkwavu va dzrile ngopfu swinene, va gama va xingazra Pawulo* va mu n’qunta, 38 hikusa a va vavisekile, ngopfungopfu hi mhaka ya mazritu lawa a ma hlayiki ya leswaku a va nge he ti mu vona. Va gama va mu heketa botini.