Daniyele
12 “A nkameni wolowo, Mikayele,* muzrangeli lwenkulu lweyi a yimiki akuva ku pfuneka vhanu va tiko dzraku,* a ta yentxa xa kukazri.* Nakone ku ta va ni nkama wa nhlomulo wa ku a wu ngi ngi sama wu va kone, ku sukela ka loko ku sungule ku va ni matiko ku ya tlhasa nkameni wolowo. A nkameni wolowo a vhanu va tiko dzraku va ta huluka, hinkwavu lava a mavito yavu ma tsraliwiki a bukwini. 2 Kutani vanyingi ka lava yetleliki ntsrhuzrini* va ta pfuka, van’we leswaku va va ni wutomi lebyi nga helikiki, kasi van’wana leswaku va va ni tingana ni leswaku va dzreliwa hi lani ku nga helikiki.
3 “Lava va nga ni ku twisisa va ta phatima ku fana ni ndlela leyi tilo dzri phatimaka ha yone nhlikanhini, ni lava va pfunaka vanyingi akuva va va lava lulamiki va ta phatima ku fana ni tinyeleti, hi masiku ni masiku.
4 “Loko ku li wene Daniyele, pfala buku nakone yentxa mazritu lawo ma va xihundla ku ya tlhasa nkameni wa wugamu. Vanyingi va ta kambisisa* nakone a wutivi bya ntiyiso byi ta yengeseleka ngopfu swinene.”
5 Hiloko mine Daniyele ni vona vhanu van’wana vabidzri na va yimile a nkingeni wa nambu, mun’we ka tlhelo ledzri dzra nambu, kasi lwemun’wana ka tlhelo ledzrin’wana dzra nambu. 6 Kutani mun’we wavu a vutisa wanuna lweyi a a yambale mpahla leyi a yi hambiwe hi panu ya linyu, lweyi a a yime henhla ka mati ya nambu, a ku: “Ku ta khaluta nkama wa ku gama kwini akuva mintxhumu leyo hinkwayu ya ku hlamalisa yi hetiseka?” 7 Ntsrhaku ka leswo, ni twe wanuna lweyi a a yambale mpahla leyi a yi hambiwe hi panu ya linyu, lweyi a a yime henhla ka mati ya nambu, a hlamula na a tlakuxe mavoko ha mabidzri ma ya henhla a matilweni, a funga hi Lweyi a hanyaka hi lani ku nga helikiki a ku: “Ku ta khaluta minkama yizrazru ni hamfu.* Na vaxwengi va ha ku gama ku hetiwa ntamu, a mintxhumu leyo hinkwayu yi ta hetiseka.”
8 Loko ku li mine, ni swi twile, kambe a ni swi twisisanga, xileswo ni vutise ni ku: “Hosi yanga, hi wugamu ku ta yentxeka yini?”
9 Hiloko a ku: “Famba, wene Daniyele, hikusa a mazritu lawo ma fanela ku pfaliwa ma va xihundla ku ya tlhasa a nkameni wa wugamu. 10 Vanyingi va ta tibasisa, va ta yentxa leswi lulamiki nakone va ta hanya wutomi lebyi basiki ngopfu swinene. Kutani lava ku biha va ta yentxa leswi bihiki, nakone a nga kone ni mun’we lweyi a yentxaka swa ku biha lweyi a taka twisisa mintxhumu leyi; kambe lava nga ni ku twisisa va ta yi twisisa.
11 “Nakone ku sukela ka nkama lowu vhanu va taka siveliwa ku hamba gandzrelo dzra siku ni siku, ku va ku simekiwa ntxhumu wa ku nyenyentsa lowu honetelaka, ku ta khaluta 1.290 wa masiku.
12 “Awa nyonxa lweyi a zrindzraka hi ku lehisa mbilu* ku ya tlhasa ku heleni ka 1.335 wa masiku!
13 “Loko ku li wene, tama u dumbeka ku ya tlhasa wugamu. U ta wisa, kambe a ku heleni ka masiku u ta pfuka akuva u yamukela xiyavelo xaku.”*