Mpfuletelo Lowu Yamukeliwiki Hi Yohane

6 Kutani ni vona Xihambana na xi pfula xin’we xa swilemo leswiya swa 7, ku va ku twala xin’we xa swivumbiwa swa mune leswi hanyaka na xi hlaya hi zritu dzra ku fana ni ku dzruma ka tilo xi ku: “Buya!” 2 Kutani loko ni lavisa, ni vona kavhalu dzra ku basa, lweyi a a tsrhame ka dzrone a a khome a wugubu; Xikwembu Nkulukumba a mu nyika ngiyana, kutani a huma a ya hlula valala vake.

3 Loko a namula xilemo xa wubidzri, ni twa zritu dzra xivumbiwa xa wubidzri lexi hanyaka dzri ku: “Buya!” 4 Ku huma kavhalu dzrimbeni dzra ku pshwuka ku fana ni ndzrilo, lweyi a a tsrhame ka dzrone a a pfumeleliwe kuva a susa ku zrula a misaveni akuva vhanu va dlayanana, nakone a a nyikiwe xipada xa xikulu.

5 Loko a namula xilemo xa wuzrazru, ni twa zritu dzra xivumbiwa xa wuzrazru lexi hanyaka dzri ku: “Buya!” Kutani loko ni lavisa, ni vona kavhalu dzra ntima, lweyi a a tsrhame ka dzrone a a khome balansa* a vokweni dzrake. 6 Ni twa mpfumawulu wa ku fana ni zritu a xikazri ka swivumbiwa swa mune leswi hanyaka na wu ku: “A kilu* dzra trigu i denari,* a makilu mazrazru ya sevhada* i denari, u nga tlangi hi mafuzra ni vhinyu.”

7 Loko a namula xilemo xa wumune, ni twa zritu dzra xivumbiwa xa wumune lexi hanyaka dzri ku: “Buya!” 8 Loko ni lavisa, ni vona kavhalu dzra nkwalala, lweyi a a tsrhame ka dzrone a a vitaniwa Lifu. A Sizra* a dzri mu landzrelela hi le kusuhi. Kutani va nyikiwa wulawuli ka mune wa matlhelo ya misava, akuva va dlaya hi xipada xa ku leha, hi ndlala, hi ntungu lowu dlayanaka, ni hi swihazri swa nhova.

9 Loko a namula xilemo xa wuntlhanu, ni lavisa hansi ka altari kutani ni vona ngati* ya lava va dlayiwiki hi mhaka ya zritu dzra Xikwembu Nkulukumba ni hi mhaka ya wumboni lebyi va byi nyikeliki. 10 A ngati ya vhanu volavo a yi bandlukana yi ku: “Hosi Leyi Tlakukiki, wene lweyi a xwengiki nakone u nga wa ntiyiso, kasi u ta dzri tisa siku muni yavanyiso ka lava tsrhamaka a misaveni u tlhela u dzrihisela ngati yezru?” 11 Kutani mun’wana ni mun’wana wavu a nyikiwa mpahla ya ku basa ya ku leha, va gama va byeliwa leswaku va yimanyana ku ya tlhasa loko ku tlhangana nhlayu ya malandzrakulobye tlhelo vamakwavu lava a va li kusuhi ni ku dlayiwa, hi lani swi viki ha kone kwavu.

12 Ni mu vone a namula xilemo xa wu 6, kutani ku va ni ku tsrekatsreka lokukulu ka misava; a dambu dzri txintxa dzri va dzra ntima dzri fana ni mpahla ya ntima ya xidzrilo leyi hambiwiki hi mavoya ya xihazri,* ni n’weti wu txintxa wu fana ni ngati, 13 a tinyeleti ta le tilweni ti wa a misaveni ku fana ni loko a nsinya wa nkuwa wu hlakahliwa hi moya lowukulu wu wisetela makuwa na ma ha li mambisi.* 14 Kutani a matilo ma suka ingiki i buku ledzri nga ku songiweni, a tinhava hinkwatu ni swihlale hinkwaswu swi susiwa a mimbangwini ya swone. 15 Kutani a tihosi ta misava, vatizri lavakulu va le wuhosini, vazrangeli va yimpi, swipfundzri, vhanu lava ntamu, swikazrawa hinkwaswu, ni vhanu hinkwavu lava ntsrhunxekiki, va tumbela timhakweni ni le mazribyeni lamakulu ya tinhava. 16 Va byela tinhava ni mazribye lamakulu hi ku phindhaphindha va ku: “Hi welani mi hi fihla* ka wuso bya Lweyi a tsrhamiki xiluvelweni ni le ka mahlundzru ya Xihambana, 17 hikusa a siku ledzrikulu dzra mahlundzru yake dzra ta, i mani lweyi a nga hulukaka ka dzrone?”