Habakuki
2 Ni ta yima mbangwini wanga wa ku zrindzrela ka wone,
Ni ta yima a henhla ka muru wa doropa.
Ni ta tama ni zrindzra ku vona leswaku i yini leswi a taka swi hlaya hi ku tizrisa mine,
Ni leswaku i yini leswi ni taka swi hlamula loko ni khwaveliwa.
2 Hiloko Yehovha a ni hlamula a ku:
“Tsrala xivoniso lexi, xi tsrale ha hombe ka swipepezrele,
Akuva lweyi a taka swi dondzra hi zritu ledzri tlakukiki a kota ku swi yentxa hi ku nabyala.
3 Hikusa a xivoniso xa ha li xa nkama lowu bekisiwiki,
Xi kahlulela ku tlhasa a wugan’wini ka xone,* a xi nge phazami.*
Nambiloko xi ngo hlwela,* tama u xi yimela!*
Hikusa nakunene xi ta hetiseka.
A xi nge xweli!
4 Lavisa lweyi a tikulisaka;*
A nga lulamanga a mbilwini yake.
Kambe lweyi wa ku lulama a ta hanya hikola ka ku dumbeka kwake.*
5 Nakunene, leswi vhinyu dzri kanganyisanaka,
Wanuna lweyi a tikulisaka a nge ti dzri tlhasela kungu dzrake.
A ha tama a hlengeleta matiko hinkwawu
Nakone a tihlengeletelela vhanu hinkwavu.
6 Xana hinkwavu a va nge ti hlaya xihlayahlaya, mazritu ya ku holovisana ni swihundla leswi lwisanaka na yene?
Va ta ku:
‘Khombo ka lweyi a hlengeletaka mintxhumu leyi nga liki yake
A ta swi yentxa ku ya tlhasa kwini?
Nakone a ya mahlweni a yengesela swikweneti swake!
7 Lava va ku txenekaka mali xana a va nge ti ku pfukela na u nga swi yimelanga?
Va ta pfuka va va va ku hlakahla hi ndlela ya tihanyi,
Nakone va ta ku yentxa u va wavu.
8 Leswi u phangiki matiko manyingi,
Vhanu hinkwavu lava va saliki va ta ku phanga.*
Hikusa u halate ngati ya vhanu
Nakone u yentxe mintxhumu ya tihanyi ku lwisana ni misava,
Ku lwisana ni madoropa ni vayaki va wone.
9 Khombo ka lweyi kaya kwake a bindzrulaka hi ndlela leyi kalaka yi nga lulamanga,
Akuva a beka xisaka xake a mbangwini lowu tlakukiki,
Akuva a huluka a mavokweni ya khombo!
10 A makungu yaku ma tisa tingana a ndangwini waku.*
Loko u helisa vhanu vanyingi wo tidohela.*
11 Hikusa zribye dzri ta bongosa hi le ndzreni ka khumbi,
Nakone a vhiga dzri ta hlamula hi le henhla ka lwangu.
12 Khombo ka lweyi a yakaka doropa hi ku halata ngati,
Nakone a simekaka doropa hi ndlela leyi kalaka yi nga lulamanga!
13 Xana a swi pfi hi ka Yehovha wa makhandzra leswaku vhanu va tizra hi ku tikazrata swi va leswi va swi tizriki swi helela ndzrilweni,
Nakone matiko ma kazrala mahala?
14 Hikusa misava yi ta tala hi wutivi bya ku phatima ka Yehovha
Swanga hi leswi mati ma funeketaka lwandle.
15 Khombo ka lweyi a kwatiki a tlhela a hlundzruka,
Nakone a nyikaka vanghanu vake swa ku nwa akuva va popswa,
Leswaku a ta va vona na va nga yambalanga ntxhumu!
16 A matsrhan’wini ya ku dzrumisiwa u ta susiwa xintsrhuti.
Na wene nwana kutani u kombisa leswaku a u sokanga.
A khambi dzraku dzra kuva na wene u nwa ka kopo ledzri nga vokweni dzra Yehovha dzra xinene, dzri ta tlhasa.
Nakone a lidzrumu dzraku dzri ta funeketiwa hi tingana;
17 Hikusa a madzolonga lawa u ma yentxiki a Lebanoni ma ta ku funeketa,
Nakone a ku honetela loku txhavisiki swihazri ku ta ku wela
Hikusa u halate ngati ya vhanu
Nakone u yentxe mintxhumu ya tihanyi ku lwisana ni misava,
Ku lwisana ni madoropa ni vayaki va wone.
18 Xi pfuna yini xithombe lexi vatliwiki*
Lexi xe ke hambiwa hi muvatli ntsena?
Xi pfuna yini xithombe lexi hambiwiki hi nsimbi ni mudondzrisi wa madzrimi,
Nambiloko muhambi wa swone a swi dumba,
A hamba swikwembu leswi nga pfunikiki ntxhumu nakone swi kalaka swi nga vulavuli?
19 Khombo ka lava va byelaka xiyenge xa xigodo, va ku: “Pfuka!”
Kumbe zribye ledzri kalaka dzri nga vulavuli va ku: “Pfuka! Hi dondzrisi!”
Waswivo! Swi yambexiwe woru ni prata,
Nakone a swi hefemuli.
20 Kambe Yehovha a le tempeleni dzrake dzra ku xwenga.
Misava hinkwayu, a yi miyeli a mahlweni kwake!’”