Mintizro ya Vapostola

12 Hi nkama wolowo hosi Heroda a sungula ku xanisa vhanu va kukazri va le bandleni. 2 A dlaye Yakobe makwavu wa Yohane hi xipada. 3 Loko a vona leswaku leswo swi nyonxisa Vayuda, a khoma na Petro. (Leswi swi yentxeke hi nkama wa Nkhuvu wa Mapawu lawa ma kalaka ma nga txheliwanga Fermentu.*) 4 A mu khoma a mu pfalela djele, a beka mune wa mintlawa ya masotxha akuva ma mu zrindzra ma yentxa hi ku txintxatxintxana, ntlawa ha wun’we a wu ni mune wa masotxha. A a tibyela leswaku a ta mu humesa a mu yisa mahlweni ka xitsrhungu* ntsrhaku ka Paxkwa. 5 Na Petro a pfaleliwe djele, a bandla a dzri ya mahlweni dzri mu khongotelela ngopfu swinene ka Xikwembu Nkulukumba.

6 Na Heroda a ta humesa Petro hi mundzruku ka kone, ka wusiku byolebyo Petro a a yetlele xikazri ka masotxha mabidzri na a tsrimbiwe hi matxhini mabidzri, ku tlhela ku va ni vazrindzri van’wana a nyangweni lava a va vonelela djele. 7 Kambe ku suketana ku humelela ntsrumi ya Yehovha kutani ku va ni ku vaninga a djele, yi tlhasa yi hlakahla Petro hi zreve yi mu pfuxa yi ku: “Kahlula u pfuka!” Hiloko a matxhini lawa a ma li mavokweni yake ma wa. 8 A ntsrumi yi mu byela yi ku: “Yambala mpahla u tlhela u yambala ni masandaliya.” Petro a yentxa swoswo. Hi wugamu a ntsrumi yi mu byela yi ku: “Yambala ni xiyambalu xaku* u ni landzra.” 9 Kutani a huma a yi landzra, kambe a a nga swi tivi leswaku leswi a swi yentxeka hi ku tizrisa ntsrumi liyani a swi li swa kakunene. Nakunene, a a yanakanya leswaku a o lozra.* 10 Loko va khalute vazrindzri va ku sungula ni va wubidzri, va tlhase nyangweni ya nsimbi leyi yisaka a doropeni, nakone nyangwa leyo ye yentxa hi ku tipfulekela. Loko va humile va ye mahlweni va famba hi ndlela yin’we, kolanu a ntsrumi yi famba yi mu siya. 11 Loko Petro a twisisa leswi a swi yentxeka, a ku: “Swoswi na tiyiseka leswaku Yehovha a zrumele ntsrumi yake a ni huluxa mavokweni ya Heroda ni ka hinkwaswu leswi Vayuda a va yimele kuva swi ni yentxekela.”

12 Ntsrhaku ka loko a twisise leswi, a ye kaya ka Mariya mamana wa Yohane lweyi a a vitaniwa hi vito dzra ku Marka, lani a vadondzrisiwa vanyingi a va hlengeletane kone va khongota. 13 Loko a gongondzre xipfalu xa ku nghena mutini, ku te mutizri wa xisati wa n’hwanyana lweyi a vitaniwaka Rhoda akuva a vona leswaku i mani lweyi a gongondzraka. 14 E na tsrumbula leswaku i zritu dzra Petro, a nyonxa lakakuva a tsrhika ni ku pfula xipfalu, kambe a tlhela hi ku tsrutsruma a ya va byela leswaku Petro a yime nyangweni. 15 Va ku: “Wo hlanya wene?” Kambe a n’hwanyana a tama a phikelela leswaku hi yene. Hiloko va ku: “I ntsrumi yake.” 16 Kambe Petro a tame a yima kolanu a gongondzra. Loko va pfula xipfalu va mu vona, va hlamala ngopfu swinene. 17 Kambe a va byela hi voko leswaku va miyela a va a va tlhamuxela hi wunyaminyami ndlela leyi Yehovha a mu humesiki ha yone djele, a gama a ku: “Byelani Yakobe ni vamakwezru vambeni mintxhumu leyi.” Ntsrhaku ka leswo, a suka a famba a ya mbangwini wumbeni.

18 Loko byi xile, a masotxha a ma kazrateki ngopfu, ma tivutisa leswaku ku nga va na ku yentxeki yini hi Petro. 19 Heroda a mu djuletela ngopfu swinene, leswi a a nga mu kumi, a ya thethisa vazrindzri a gama a zrumisa leswaku va khatisiwa, kutani a suka Yudeya a fulamela a ya Khezariya a ya tsrhama kone ku dzringana nkamanyana.

20 Heroda a a kwatele vhanu va le Tiri ni Sidoni. Xileswo ntsrhaku ka ku xavelela Blastu, lweyi a a li mulaviseli wa yindlu ya hosi,* va mu yela hi nkongometo wun’we, va kombela ku zrula hikusa a tiko dzrake hi dzrone a dzri pfuna matiko yavu hi swakuda. 21 Hi siku dzrin’wana ledzri a dzri bekisiwile, Heroda a yambale mpahla yake ya wuhosi a tsrhama xitsrhan’wini xa wuyavanyisi a sungula ku vulavula ni vhanu. 22 Kutani vhanu lava a va hlengeletanile va sungula ku bandlukana va ku: “Ledzri i zritu dzra xikwembu, a hi dzra mhunu!” 23 Kolanu a ntsrumi ya Yehovha yi mu ba, hikusa a nga dzrumisanga Xikwembu Nkulukumba, kutani a diwa hi swipungwana a fa.

24 Kambe a zritu dzra Yehovha dzri ye dzri hangalaka nakone vhanu vanyingi va ve vapfumeli.

25 Loko Barnaba na Sawulo va hete ntizro wavu wa ku pfuna vamakwezru a Yerusalema, va tlhelele a Antiyokiya va tlhasa va teka Yohane, lweyi a tlhelaka a vitaniwa hi vito dzra ku Marka.