Daniyele

1 Hi lembe dzra wuzrazru dzra ku fuma ka Yehoyakimi hosi ya Yuda, Nebukadnetsara hosi ya Babilona a tlhase doropeni dzra Yerusalema a va a dzri tsrandzrela. 2 Kutani Yehovha a nyikela Yehoyakimi hosi ya Yuda a mavokweni yake, ku patsra ni swibya swa kukazri swa yindlu ya* Xikwembu Nkulukumba wa ntiyiso, a va Nebukadnetsara a famba na swone a tikweni dzra Xinara,* a ndlwini ya* xikwembu xake. A beka swibya leswo ka mbangu wa ku beka wukosi bya xikwembu xake.

3 Kutani a hosi yi leleta Axpenazi, muzrangeli wa vatizri va le ndlwini ya hosi, leswaku a buyisa Vaisrayele va kukazri,* ku patsra ni vana va le wuhosini kumbe vana va vhanu va xiyimu xa le henhla. 4 A va fanela ku va vampshwa lava* kalaka va nga na wulema, va ku xonga, lava nga ni wutlhazri, wutivi ni ku twisisa, lava nga ni wuswikoti bya ku tizra a ndlwini ya hosi. Axpenazi a a fanela ku va dondzrisa ku tsrala ni ku vulavula lidzrimi dzra Vakaldeya. 5 Handle ka leswo, a hosi yi leleta leswaku siku dzrin’wana ni dzrin’wana va nyikiwa swakuda swa xiyimu xa le henhla swa hosi ni vhinyu ledzri a yi dzri nwa. A va fanela ku dondzrisiwa* ku dzringana malembe mazrazru nakone a ku heleni ka nkama wolowo a va ta tizrela hosi.

6 Ka vampshwa lavo, a ku ni va kukazri lava a va li va lixaka dzra* Yuda, ku nga Daniyele,* Hananiya,* Mixayele* na Azariya.* 7 Kutani a muzrangeli wa vatizri va le ndlwini ya hosi a va txhula mavito man’wana:* Daniyele a mu txhula vito dzra ku Beltexatsara, Hananiya a mu txhula dzra ku Xadraki, Mixayele a mu txhula dzra ku Mixaki, nakone Azariya a mu txhula dzra ku Abedinego.

8 Kambe Daniyele a teka xiboho a mbilwini yake xa kuva a nga tinyamisi hi swakuda swa xiyimu xa le henhla swa hosi, nambi ku li hi vhinyu ledzri a yi dzri nwa. Xileswo, a kombela mpfumelelo ka muzrangeli wa vatizri va le ndlwini ya hosi, wa kuva a nga di mintxhumu leyi a yi ta mu yentxa a va lweyi a nyamiki. 9 Kutani Xikwembu Nkulukumba wa ntiyiso a yentxa leswaku muzrangeli wa vatizri va le ndlwini ya hosi a komba Daniyele wunene ni timpswalu. 10 Kambe muzrangeli wa vatizri va le ndlwini ya hosi a byela Daniyele a ku: “Ni txhava hosi yanga, leyi leletiki leswaku he swini swakuda ni swa ku nwa leswi mi fanelaka ku nyikiwa swone. Kutani ni ta ku yini loko hosi yo vona leswaku mi wondzrile a mi fani ni vampshwa lavan’wana va* tintanga tenu? Hi mhaka yaku ni ta va ni* nandzru mahlweni ka hosi.” 11 Kambe Daniyele a byela muvoneleli lweyi a muzrangeli wa vatizri va le ndlwini ya hosi a a mu bekile akuva a hlayisa Daniyele, Hananiya, Mixayele na Azariya, a ku: 12 “Na ku kombela, hamba xikambelo hi malandzra yaku ku dzringana 10 wa masiku; hi nyiki matsavu akuva hi da, ni mati akuva hi nwa. 13 Ntsrhaku ka leswo, dzringanisa ndlela leyi hi langusekaka ha yone ni ndlela leyi vampshwa lava va* daka swakuda swa xiyimu xa le henhla swa hosi va langusekaka ha yone, kutani u teka xiboho xa ndlela leyi u taka khoma malandzra yaku ha yone hi ku ya hi leswi u taka swi vona.”

14 A pfumelelane ni xikombelo xavu a va a hamba xikambelo ha vone ku dzringana 10 wa masiku. 15 Loko ku hele 10 wa masiku a va languteka ha hombe va tlhela va va ni lihanyu ledzrinene* ku tlula vampshwa* hinkwavu lava a va da swakuda swa xiyimu xa le henhla swa hosi. 16 Xileswo, a muvoneleli a a susa swakuda swa xiyimu xa le henhla ni vhinyu leswi a va buyiseliwa swone, a va a va nyika matsavu. 17 Nakone Xikwembu Nkulukumba wa ntiyiso, a nyika vampshwa* lava va mune wutivi ni wuswikoti bya ku yingelisisa hinkwaswu leswi tsraliwiki a tlhela a va nyika ni wutlhazri; nakone Daniyele a nyikiwa wuswikoti bya ku twisisa mixaka hinkwayu ya swivoniso ni milozro.

18 Loko ku hele malembe mazrazru lawa hosi a yi ma bekile leswaku va yisiwa mahlweni ka yone, a muzrangeli wa vatizri wa le ndlwini ya hosi a va yisa mahlweni ka Nebukadnetsara. 19 Loko hosi yi vulavula na vone, a ku nga na ni mun’we ka ntlawa hinkwawu lweyi a a fana na Daniyele, Hananiya, Mixayele na Azariya; kutani vone va tame va tsrhama kohala akuva va tizrela hosi. 20 Nakone nkama hinkwawu lowu hosi a yi va vutisa mayelanu ni mhaka leyi a yi djula wutlhazri ni ku twisisa, a yi va vona na va yampswa ngopfu swinene ku tlula vaprista hinkwavu va masalamusi ni vapfhumbi, lava a va li kone mfun’wini wa yone hinkwawu. 21 Nakone Daniyele a tame a va kohala ku ya tlhasa ka lembe dzra ku sungula dzra hosi Khorexe.