Yonasi
2 Hiloko Yonasi a khongota ka Yehovha Xikwembu Nkulukumba wake na a li khuzrini dzra hlampfi, 2 a ku:
“Ni khongote ka Yehovha na ni le khombyeni, nakone yene a ni hlamulile.
Na ni le kusuhi ni ku fa* ni kombele mpfunu.
Wene u yingele zritu dzranga.
3 Loko u ni txukumetele nsingeni,* a xikazri ka lwandle,
A mati ma ni mintile.
A mavimbi yaku hinkwawu ya ntamu ma ni funeketile.
4 Ni tibyele leswi: ‘Ni hlongoliwile a mahlweni kwaku!
Ni ta tlhela ni dzri lavisisa kuyini a tempele dzraku dzra ku xwenga?’
5 A ni le kusuhi ni ku fa, hikusa ni mintiwe hi mati;
Ni nyuvele a matini, ka mbangu wa ku yenta.
A swimilana swa le lwandle swi ni tsrimbelele nhloko.
6 Ni mbombomelile ni ya tlhasa hala hansi ka lwandle.*
A tinyangwa ta sizra* a to ni pfalela hi lani ku nga helikiki.
Kambe u ni humesile a xikheleni, We Yehovha, Xikwembu Nkulukumba wanga.
7 Loko ni li kusuhi ni ku fa,* ni dzrimuke Wene Yehovha.
Kutani u yingele xikhongoto xanga na u li tempeleni dzraku dzra ku xwenga.
8 Lava gandzrelaka swifaniso leswi kalaka swi nga pfuni ntxhumu va tsrhika lweyi a va kombaka lizrandzru dzra ku dumbeka.
9 Kambe loko ku li mine, ni ta ku nyika magandzrelo hi mazritu ya ku khensa.
Leswi ni swi hlambanyiki ni ta swi hetisisa,
Wene Yehovha hi wene ntsena u huluxaka.”
10 Hiloko Yehovha a leleta hlampfi yi va yi hlanta Yonasi a nkingeni wa lwandle.