Madzrungula Lamanene Lama Tsraliwiki hi Luka

1 Vanyingi va tikazrateli ku hlengeleta ni ku tsrala timhaka leti hi ti dumbaka* hi ku helela, 2 hi lani hi dzrunguleliwiki ha kone hi lava ku sukela a ku sunguleni va viki timboni leti voniki timhaka leto ni ku tlhela va ti zrezra, 3 na mine, ntsrhaku ka loko ni kambisise timhaka hinkwatu ha hombe ku sukela a ku sunguleni, ni vone swi yampswa ku ku tsralela tone hi ku longoloka ka tone, wene mutxhaviseki Teyofilo, 4 akuva u ta wu twisisa ha hombe ntiyiso wa timhaka leti u dondzrisiwiki tone.

5 A masikwini ya ku fuma ka Heroda,* hosi ya Yudeya, a ku ni muprista lweyi a a vitaniwa Zakariya, wa ntlawa wa Abiya. A nsati wa Zakariya a a li mun’we wa vatukulu va Aroni, a vito dzrake a a li Elizabeti. 6 Hi wubidzri byavu a va lulamile a mahlweni ka Xikwembu Nkulukumba nakone a va nga na xa ku soliwa hi xone, a va landzra milawu ni swileleto hinkwaswu swa Yehovha. 7 Kambe a va nga na n’wana hikusa Elizabeti a a nga beleki,* nakone hi wubidzri byavu a va duhwalile.

8 Nkama lowu Zakariya a a yentxa ntizro wake wa wuprista a mahlweni ka Xikwembu Nkulukumba hi masiku lawa ntlawa wake a wu yaveliwe ku tizra ha wone, 9 hi ku landzra matizrela ya* wuprista, ku tlhase khambi dzrake dzra ku hisa muzri wa ku nun’hwela a tempeleni dzra Yehovha. 10 Hi nkama lowu a ku hisiwa muzri wa ku nun’hwela, a xitsrhungu hinkwaxu a xi li ku khongoteni hala handle. 11 Kutani ku humelela ntsrumi ya Yehovha a mahlweni kwake, yi yima ka tlhelo dzra xinene dzra altari ledzri a ku hiseliwa ka dzrone muzri wa ku nun’hwela. 12 Kambe loko Zakariya a yi vona, a sungula ku kazrateka a tlhela a txhava ngopfu swinene. 13 Nambitanu, a ntsrumi yi mu byela yi ku: “U nga txhavi Zakariya, hikusa Xikwembu Nkulukumba a swi yingelile swikombelo swaku, nakone a nsati waku Elizabeti a ta ku pswalela n’wana wa djaha, u ta mu txhula vito dzra ku Yohane. 14 U ta nyonxa ngopfu swinene, nakone vanyingi va ta nyonxa hi ku pswaliwa kwake, 15 hikusa a ta va nkulu a matihlweni ya Yehovha. Kambe a nga fanelanga a nwa vhinyu nikutsrongo kumbe byala byin’wana lebyi popswisanaka, a ta tala hi moya wa ku xwenga nambiloko a nga si na pswaliwa,* 16 nakone a ta pfuna Vaisrayele vanyingi akuva va tlhelela ka Yehovha Xikwembu Nkulukumba wavu. 17 Handle ka leswo, Xikwembu Nkulukumba a ta zranga a zruma n’wanaku, a ta mu zruma na a ni ntamu wa ku fana ni wa Eliya, akuva a txintxa timbilu ta vapswele ti fana ni ta vana ni ku pfuna lava nga yingisetiki leswaku va yentxa mintxhumu hi wutlhazri va tlhela va yentxa leswinene, akuva a va yentxa va va vhanu lava lulameliki ku tizrela Yehovha.”

18 Zakariya a byela ntsrumi a ku: “Ni nga swi kholwisa kuyini swoleswo? Hikusa ni duhwalile, na yene nkatanga a duhwalile.” 19 A ntsrumi yi mu hlamula yi ku: “Hi mine Gabriyele, ni yima mahlweni ka Xikwembu Nkulukumba nakone ni zrumiwe ku ta khanela na wene ni ku ku nyika ndzrava leyi leyinene. 20 Kambe swoswi u ta va mbheveve, a wu nge he ti swi kota ku khanela ku ya tlhasa loko mintxhumu leyi yi hetiseka, hikusa a wu ma kholwanga mazritu yanga, lawa ma taka hetiseka hi nkama lowu bekisiwiki.” 21 Hi nkama wolowo, vhanu a va tama va yimela Zakariya, nakone a va hlamalisiwa hi leswi a a hlwela ngopfu a tempeleni. 22 Loko a huma, a a nga ha swi koti ku khanela na vone, kutani va swi xiya leswaku loko a li tempeleni a vone ntxhumu lowu kalaka wu nga tolovelekanga.* A a ya mahlweni a vulavula na vone hi ku kombetela hi mavoko kambe a a tama a va mbheveve. 23 Loko a tlhanganisile masiku yake ya ku tizra a tempeleni, a muke kaya.

24 Ntsrhaku ka masikunyana, nkatake Elizabeti a kume nyimba, nakone a tsrhamise kaya kwake ku dzringana ntlhanu wa tihweti na a nga humahumi, a a ku: 25 “Yehovha a yentxe leswi akuva a ni pfuna. A ni dzrimukile akuva a susa tingana tanga a vhanwini.”

26 Na nyimba yake yi ni 6 wa tihweti, Xikwembu Nkulukumba a zrumeli ntsrumi Gabriyele ka doropa dzra le Galileya ledzri vitaniwaka Nazareta, 27 yi ya ka n’hwanyana* lweyi a a dumbisiwe mutxhatu hi wanuna lweyi a vitaniwaka Yosefa, wa ndangu wa Davhida, nakone a vito dzra n’hwanyana lweyo a a li Mariya. 28 Loko ntsrumi yi tlhasile lani a a li kone, yi te: “Xawani, wene lweyi a nyonxeliwaka ngopfu swinene, Yehovha a na wene.” 29 Kambe Mariya a kazrateka ngopfu hi ku twa mazritu lawo, lakakuva a tivutisa leswaku a malosela wolawo ma nga va na ma tlhamuxela swaku yini. 30 Xileswo, a ntsrumi yi mu byela yi ku: “U nga txhavi Mariya, hikusa Xikwembu Nkulukumba awa ku nyonxela. 31 Nakone swoswi u ta va ni nyimba, u ta pswala n’wana wa djaha, u ta mu txhula vito dzra ku Yesu. 32 N’wana lweyi a ta va nkulu nakone a ta vitaniwa N’wana wa Lweyi a Tlakukiki Ngopfu, Yehovha Xikwembu Nkulukumba a ta mu nyika xiluvelo xa papayi wake Davhida, 33 a ta fuma yindlu ya Yakobe hi lani ku nga helikiki, nakone a Mfumu wake a wu nge ti va ni wugamu.”

34 Kambe Mariya a vutisa ntsrumi a ku: “Xana leswo swi ta yentxekisa kuyini hikusa a ni ngi ngi sama ni yetlela ni wanuna?” 35 A ntsrumi yi mu hlamula yi ku: “A moya wa ku xwenga wu ta va henhla kwaku, nakone a ntamu wa Lweyi a Tlakukiki Ngopfu wu ta ku funeketa. Hi ndlela leyo, lweyi a taka pswaliwa a ta vitaniwa lweyi wa ku xwenga, N’wana wa Xikwembu Nkulukumba. 36 Nakone a xaka dzraku Elizabeti lweyi va liki i mhika, na yene a ni nyimba nambileswi a duhwaliki, a ta pswala n’wana wa djaha, leyi i hweti yake ya wu 6; 37 hikusa a xi kone lexi Xikwembu Nkulukumba a xi hlayaka xi taka kala xi nga hetiseki.”* 38 Kutani Mariya a ku: “Ni nandzra wa Yehovha! A swi yentxeki hi ku ya hi mazritu yaku.” Xileswo, a ntsrumi yi suka yi famba.

39 Ntsrhakunyana a masikwini wolawo, Mariya a yendzre a ya tikweni dzra tinhava a doropeni dzra Yuda, 40 a tlhasa a nghena kaya ka Zakariya kutani a losa Elizabeti. 41 Loko Elizabeti a yingela Mariya na a mu losa, a n’wana lweyi a a li khuzrini dzrake a sungula ku txhukatxhuka, kutani Elizabeti a tala hi moya wa ku xwenga, 42 a hlaya hi zritu dzra ku tlakuka a ku: “U tovokile a xikazri ka vavasati, nakone a tovokile n’wana lweyi a nga khuzrini dzraku! 43 No va mani mine akuva ni yendzreliwa hi mamana wa Hosi yanga? 44 Hikusa loko ni yingele zritu dzraku loko u ni losa, a n’wana lweyi a nga khuzrini dzranga a ntlulantlulile hi ku nyonxa. 45 Nakone awa nyonxa lweyi a kholwiki, hikusa mazritu hinkwawu lawa a byeliwiki wone hi Yehovha ma ta hetiseka hi ku helela.”

46 Kutani Mariya a ku: “Ni* dzrumisa Yehovha, 47 nakone a mbilu yanga ya nyonxa swinene hi mhaka ya leswi Xikwembu Nkulukumba, Muhuluxi wanga, a ni yentxeliki swone, 48 hikusa Xikwembu Nkulukumba a vone wusiwana byanga, mine nandzra wake. Ku sukela ka swoswi tinxaka hinkwatu ti ta hlaya leswaku ni tovokile, 49 hikusa Lweyi wa ntamu hinkwawu a ni yentxele mintxhumu ya ku hlamalisa, nakone a vito dzrake dzri xwengile, 50 futsrhi minkama hinkwayu lava mu txhavaka a va komba timpswalu. 51 A yentxe mintxhumu leyikulu ngopfu swinene hi voko dzrake, a hangalase lava tikulisaka. 52 A suse lava nga ni wulawuli a switsrhan’wini swavu, a tlakuxa lava titsrongahataka; 53 lava nga ni ndlala a va xuzrisile hi mintxhumu leyinene kasi lava ku ganya a va tlhelise na va nga na ntxhumu. 54 A pfune Israyele nandzra wake, nakone hi ku yentxa leswo a kombisi leswaku awa xi dzrimuka xidumbiso xake, 55 a dumbise leswaku a a ta kombisa timpswalu Abrahamu ni vanake* hi lani ku nga helikiki, ku nga leswi a swi byeliki vakokwana vezru.” 56 Mariya a tsrhame na Elizabeti kolomu ka tihweti tizrazru a gama a tlhelela kaya kwake.

57 Kutani ku tlhasa nkama wa kuva Elizabeti a phuluka, a va a phuluka n’wana wa djaha. 58 Loko vayakelani ni maxaka yake va yingela leswaku Yehovha a mu kombe wunene* lebyikulu, va nyonxa kun’we na yene. 59 Hi siku dzra wu 8 va ye sokisa n’wana, nakone a va djula ku mu txhula vito dzra papayi wake, Zakariya. 60 Kambe mamana wake a ku: “Im-him! A vito dzrake a ta va Yohane.” 61 Loko va twa leswo, va mu byela va ku: “Ka maxaka yaku a ku na mhunu ni mun’we a nga ni vito ledzro.” 62 Kutani va vutisa papayi wa n’wana hi ku tizrisa mavoko leswaku hi dzrini vito ledzri a djulaka leswaku a n’wana a txhuliwa dzrone. 63 Xileswo, a kombela xipulangwana a va a tsrala a ku: “A vito dzrake i Yohane.” Kutani hinkwavu va hlamala. 64 Hi nkama wolowo a lidzrimi dzrake dzri ntsrhunxeka, kutani a sungula ku vulavula a dzrumisa Xikwembu Nkulukumba. 65 A vayakelani vavu hinkwavu va sungula ku txhava, nakone hinkwaswu leswi yentxekiki swi sungula ku hangalaka a tikweni hinkwadzru dzra le Yudeya ledzri nga ni tinhava. 66 Hinkwavu lava a va swi yingela a va tama va yanakanyisisa hi swone, na va tivutisa va ku: “Kasi a n’wana lweyi a ta va yini?” Hikusa nakunene a voko dzra Yehovha a dzri li na yene.

67 Kutani Zakariya papayi wa n’wana a tala hi moya wa ku xwenga a profeta, a ku: 68 “A ku dzrumisiwi Yehovha Xikwembu Nkulukumba wa Israyele, hikusa a dzrimuki vhanu vake kutani a va huluxa. 69 A hi nyike muhuluxi* lweyi a nga ni ntamu lweyi a nga wa ndangu wa nandzra wake Davhida, 70 hi lani a hlayiki ha kone hi ku tizrisa vaprofeta vake va ku xwenga va khale, 71 akuva hi huluxiwa ka valala vezru ni le mavokweni ya hinkwavu lava hi vengaka; 72 akuva a hi kombisa timpswalu hi lani a dumbisiki vakokwana vezru ha kone ni ku dzrimuka xipfumelelanu xake xa ku xwenga, 73 ku nga xihlambanyu lexi a xi yentxeliki kokwana wezru Abrahamu, 74 xa ku va ntsrhaku ka loko a hi tizrulile a mavokweni ya valala vezru hi mu gandzrela na hi nga txhavi ntxhumu 75 hi ku dumbeka ni hi wululami, wutomi byezru hinkwabyu. 76 Kambe wene n’wananga, u ta vitaniwa muprofeta wa Lweyi a Tlakukiki ngopfu, hikusa Yehovha a ta ku zruma leswaku u zranga u ya mu lulamisela tindlela take, 77 akuva u byela vhanu vake leswaku a ta va huluxa hi ku va dzrivalela swidoho swavu, 78 hi kola ka ntwelawusiwana lowukulu wa Xikwembu Nkulukumba wezru. Xikwembu Nkulukumba a ta hi vaningela hi ntwelawusiwana wolowo ku fana ni ku huma ka dambu, 79 akuva a vaningela lava tsrhamiki munyameni ni lava nga ntsrhutini wa lifu ni ku hi komba leswi hi fanelaka ku swi yentxa akuva hi va ni ku zrula.”

80 A n’wana yelweyo a kulile a tlhela a tala hi moya wa Xikwembu Nkulukumba, nakone a tame a tsrhama a mananga ku ya tlhasa siku ledzri a humeleliki ha dzrone ka Vaisrayele.