Papela dzra ku sungula ledzri yaka ka Vatesalonika
3 Xileswo, leswi a hi nga ha gwenti ku tsrhama na hi nga tivi ndzrava yenu, hi vone swi yampswa kuva hi sala wuswezru a Atena; 2 kutani hi mi zrumelela Timotewu, makwezru tlhelo mutizreli wa Xikwembu Nkulukumba,* lweyi a twalisaka madzrungula lamanene mayelanu na Kriste, leswaku a mi tiyisa ni ku mi txhavelela akuva ku tiyisiwa lipfumelo dzrenu, 3 ku yentxela leswaku ku nga vi na mhunu lweyi a tsrekatsrekisiwaka hi mahlomulo lawa. Hikusa n’wine ha wuswenu ma swi tiva leswaku a hi nge ku tsrutsrumi ku xaniseka loku.* 4 Hikusa nkama lowu a hi li na n’wine, a hi mi byela na swi nga si na yentxeka leswaku hi ta kumana ni mahlomulo, nakone hi swoswo swi yentxekiki hi lani mi swi tivaka ha kone. 5 Hi leswo swi yentxiki leswaku hi ku va ni nga ha gwenti ku tsrhama na ni nga tivi ndzrava yenu, ni zrumela Timotewu akuva ni ta tiva hi ta ku dumbeka kwenu, hikusa swi nga ha yentxeka Diyavulosi* a mi dzringile, kutani hi va na hi tikazrate swa mahala.
6 Kambe Timotewu a ha ku tlhasa halenu na a buya hi kwahalanu, nakone a hi byele madzrungula lamanene mayelanu ni ku dumbeka kwenu ni lizrandzru ledzri mi nga na dzrone hi van’wana, ni leswaku minkama hinkwayu ma nyonxa loko mi hi dzrimuka, a tlhele a hi byela leswaku mi swi navela ngopfu ku hi vona ku fana ni leswi na hine hi swi navelaka ku mi vona. 7 Xileswo vamakwezru, ka swikazratu hinkwaswu* ni mahlomulo lawa hi kumanaka na wone, ha txhaveleleka hi mhaka yenu ni hi kola ka ku dumbeka kwenu. 8 Hikusa loko mi yima mi tiya a Hosini hi kuma ntamu.* 9 Nakunene hi mu tlangela ngopfu Xikwembu Nkulukumba hi mhaka yenu, hikusa mi hi yentxa hi nyonxa ngopfu swinene. 10 Wusiku ni nhlikanhi hi khongota swi phela akuva hi kota ku mi vona* ni leswaku hi kota ku mi pfuna hi leswi mi swi vilelaka akuva mi tiyisa lipfumelo dzrenu.
11 Ingiki Xikwembu Nkulukumba tlhelo Papayi wezru, na Hosi yezru Yesu, va nga hi pfulela ndlela ya kuva hi mi tela. 12 Handle ka leswo, ingiki a Hosi yi nga yentxa leswaku mi zrandzranana ngopfu swinene, mi tlhela mi zrandzra ni vhanu van’wana ku fana ni leswi na hine hi mi zrandzraka ngopfu, 13 hi ndlela leyi mi ta tiya a timbilwini tenu, mi nga vi na xa ku solisa nakone mi va lava xwengiki a mahlweni ka Xikwembu Nkulukumba tlhelo Papayi wezru, hi nkama wa ku va Hosi yezru Yesu a va kone ni vaxwengi hinkwavu.