Papela ledzri dzri yaka ka Vaefesa
1 Mine Pawulo, mupostola wa Kriste Yesu hi ku zrandzra ka Xikwembu Nkulukumba, ni tsralela vaxwengi lava nga Efesa, lava dumbekaka, lava nga vadondzrisiwa va Kriste Yesu:
2 Ingiki mi nga va ni timpswalu letikulu ni ku zrula leswi pfaka ka Xikwembu Nkulukumba Papayi wezru ni le ka Hosi Yesu Kriste.
3 A ku dzrumisiwi Xikwembu Nkulukumba tlhelo Papayi wa Hosi yezru Yesu Kriste, hikusa a mimbangwini ya le tilweni a hi nyike matovoko ya mixaka hinkwayu lama tisiwaka hi moya wake swanga hi leswi hi nga vadondzrisiwa va Kriste, 4 a hi hlawule leswaku hi va ni wumun’we na yene* na misava yi nga si na vumbiwa, akuva hi kombisa lizrandzru, hi va lava xwengiki ni lava pfumalaka bati a mahlweni kwake. 5 Hikusa a hi hlawule khale akuva a hi yentxa vanake hi ku tizrisa Yesu Kriste, hi ku ya hi leswi swi mu nyonxisaka nakone swi nga ku zrandzra kwake, 6 ku yentxela leswaku a dzrumisiwa hi leswi a tizrisiki N’wanake lweyi a zrandzrekaka akuva a hi komba timpswalu take letikulu. 7 Hi kola ka N’wanake hi kuma ku ntsrhunxiwa hi xitizrulo hi ku tizrisa ngati yake,* ina, hi kuma ku dzrivaleliwa swidoho swezru hi kola ka ku tala ka timpswalu letikulu ta Xikwembu Nkulukumba.
8 A hi kombe timpswalu leti letikulu hi ntalu, a patsra ni ku hi nyika wutlhazri hinkwabyu ni ku twisisa 9 hi ku hi tivisa xihundla xa ku xwenga xa ku zrandzra kwake. Xone xi fambisana ni leswi swi mu nyonxisaka ni leswi ku nga nkongometo wake. 10 A nkongometo wake i wa leswaku a beka ndlela ya ku kongomisa mintxhumu nakone leswo swi ta yentxeka a ku heleni ka nkama lowu a wu bekiki, ku yentxela leswaku a hlengeleta mintxhumu hinkwayu ka Kriste, mintxhumu ya le tilweni ni ya le misaveni. Ina, kwake 11 yene lweyi hi nga ni wumun’we na yene nakone hi yaveliwiki kuva hi va vamadapfindla xikan’we na yene, hikusa hi hlawuliwe khale hi ku ya hi nkongometo wa lweyi a hetisisaka mintxhumu hinkwayu leyi a yi kunguhataka hi ku ya hi ku zrandzra kwake, 12 akuva hine hi viki va ku sungula ku va ni dumbo ka Kriste, hi yentxa leswaku Xikwembu Nkulukumba a dzrumisiwa ni ku twalisiwa. 13 Kambe na n’wine mi ve ni dumbo kwake ntsrhaku ka loko mi yingele zritu dzra ntiyiso, ku nga madzrungula lamanene mayelanu ni ku huluxiwa kwenu. Ntsrhaku ka loko mi pfumelile, Xikwembu Nkulukumba a tizrise yene akuva a mi funga hi moya wa ku xwenga lowu a wu dumbisiki, 14 lowu nga xitiyisekiso xa leswaku hi ta dzri kuma pfindla dzrezru, hi nkongometo wa kuva Xikwembu Nkulukumba a ntsrhunxa vhanu vake* hi xitizrulo akuva a dzrumisiwa ni ku twalisiwa.
15 Hi leswo swi yentxiki leswaku na mine, ku sukela ka loko ni twe hi ta lipfumelo ledzri mi nga na dzrone ka Hosi Yesu ni lizrandzru ledzri mi dzri kombisaka ka vaxwengi hinkwavu 16 ni nga tsrhiki ku tlangela Xikwembu Nkulukumba hi kola kwenu. Na ha tama ni mi patsra swikhongotweni swanga, 17 leswaku Xikwembu Nkulukumba wa Hosi yezru Yesu Kriste, Papayi lweyi a nga ni ku phatima lokukulu, a nga mi nyika moya wa wutlhazri ni wa ku twisisa mintxhumu leyi a yi tlhamuxelaka,* nkama lowu mi dondzraka akuva mi mu tiva ha hombe. 18 Xikwembu Nkulukumba a pfula timbilu tenu akuva mi kota ku vona ni ku tiva dumbo ledzri a mi nyikaka dzrone, mi tiva a mintxhumu ya yinene leyi kalaka yi nga na ku pimanisiwa ni ntxhumu, leyi a yi dumbisiki vaxwengi, 19 ni wukulu bya ntamu wake lebyi kombisiwaka ka hine vapfumeli. A wukulu lebyo bya voneka ka ndlela leyi a wu tizrisaka ha yone ntamu wake, 20 lowu a wu kombisiki ka Kriste loko a mu pfuxa ku feni a va a mu tsrhamisisa vokweni dzrake dzra xinene a mimbangwini ya le tilweni, 21 lani a nga henhla ka mimfumu hinkwayu ni wulawuli ni ntamu ni wuhosi ni mavito hinkwawu, ku nga li ntsena ka xiyimu lexi xa misava* kambe ni ka lexi xa ha taka. 22 A tlhele a beka mintxhumu hinkwayu a hansi ka minkondzro yake ni ku mu yentxa nhloko ya mintxhumu hinkwayu leyi fambisanaka ni bandla, 23 ledzri dzri nga mizri wake lowu taliki hi mintxhumu hinkwayu. Kriste hi yene a hetisisaka mintxhumu hinkwayu.