Mintizro ya Vapostola
4 Loko Petro na Yohane va ha vulavula ni xitsrhungu, va tsrhindzrekeliwe hi vaprista, muzrangeli wa valaviseli va tempele kun’we ni Vasaduki. 2 A va hlundzrukile hi mhaka ya leswi vapostola a va dondzrisa vhanu va tlhela va vulavula a livaleni hi ta ku pfuxiwa ka Yesu a ku feni. 3 Kutani va va khoma va ya va pfalela djele ku ya tlhasa mundzruku ka kone hikusa a dambu a dzri pelile. 4 Nambitanu, vanyingi ka lava yingisetiki wukaneli va pfumelile, nakone nhlayu ya vavanuna a yi tlhasa kolomu ka 5.000.
5 Hi mundzruku ka kone, a vafumi vavu, vakulukumba ni vatsrali, va hlengeletana a Yerusalema, 6 kone a ku na na Anasi muprista lwenkulu kun’we na Kayafasi, Yohane, Alexandri ni maxaka hinkwawu ya muprista lwenkulu. 7 Va yimisa Petro na Yohane makazri kwavu va va vutisa va ku: “Mi swi yentxe hi ntamu wa mani kumbe hi vito dzra mani leswi?” 8 Kutani Petro, na a tale hi moya wa ku xwenga a va byela a ku:
“N’wine vafumi kun’we ni vakulukumba, 9 loko a li leswaku namunhla hi thethisiwa hi mhaka ya wunene lebyi yentxeliwiki wanuna lweyi a a limalile nakone mi djula ku tiva leswaku i mani lweyi a hanyisiki wanuna yelweyo, 10 n’wine ni vhanu hinkwavu va Israyele swi tivani leswaku wanuna lweyi a hanyisiwiki, lweyi a yimiki mahlweni kwenu, a hanyisiwe hi vito dzra Yesu Kriste wa Munazareta, lweyi mi nga mu dlaya mhandzrini kambe Xikwembu Nkulukumba a mu pfuxiki ku feni. 11 Yene i ‘zribye ledzri n’wine vayaki mi dzri bakanyiki nakone dzri ndzrulukiki zribye dzra lisima ku tlula hinkwawu.’ 12 Handle ka leswo, a ku na mumbeni lweyi a nga hi huluxaka loko ku nga li yene hikusa a ku na vito dzrimbeni ledzri nyikiwiki vhanu hansi ka tilo ledzri hi fanelaka ku huluxiwa ha dzrone.”
13 Loko va vona ndlela leyi Petro na Yohane a va vulavula na va tiyile ha yone ni ku xiya leswaku a va li vhanu lava tolovelekiki lava nambi ku dondzra a va nga dondzranga, va hlamala ngopfu swinene. Kutani va dzrimuka leswaku a va fambafamba na Yesu. 14 Leswi a va mu vona wanuna lweyi a hanyisiwiki na a yime na vone, va pfumale ni xa ku va hlamula. 15 Xileswo, va va byela leswaku va huma Sanedri, kutani va sala va vutisana hi xivone, 16 va ku: “Hi ta va yentxa yini vavanuna lava? Hikusa nakunene va yentxe ntxhumu wa ku hlamalisa, lowu tiviwiki hi vayaki hinkwavu va Yerusalema, nakone hine a hi na ndlela ya ku swi yala leswi. 17 Akuva leswi swi nga yi mahlweni swi hangalaka a vhanwini, a hi va txhaviseleni hi tlhela hi va byela leswaku va nga ha tlheli va vulavula ni mhunu hi vito ledzri.”
18 Xileswo va va vitana va va byela leswaku va nga ha txhuki va vulavula ni vhanu kumbe ku dondzrisa hi vito dzra Yesu. 19 Kambe Petro na Yohane va va hlamula va ku: “Swi kambelani ha wuswenu, leswaku swi nga va swi lulamile a mahlweni ka Xikwembu Nkulukumba kuva hi yingiseta n’wine ku tlula ku va hi yingiseta yene. 20 Kambe hine, a hi nge tsrhiki ku vulavula hi mintxhumu leyi hi yi voniki ni ku yi yingela.” 21 Xileswo ntsrhaku ka loko va tlhele va va txhavisela, va game va va ntsrhunxa, hi mhaka ya leswi va kalaka va nga kumanga ntxhumu xa ku va khatisa ha xone ni hi leswi a va txhava xitsrhungu, hikusa hinkwaxu a xi dzrumisa Xikwembu Nkulukumba hi kola ka leswi swi yentxekiki. 22 Hikusa wanuna lweyi a hanyisiwiki hi hlolana ledzro, a a ni ku tlula 40 wa malembe.
23 Ntsrhaku ka loko va ntsrhunxiwile, va ye kumana ni vadondzrisiwa lavan’wana kutani va va dzrungulela leswi vaprista lavakulu ni vakulukumba va va byeliki swone. 24 Loko va twa leswo, hi wumun’we va tlakuxa mazritu yavu va khongota Xikwembu Nkulukumba va ku:
“Wene Hosi Leyikulu, hi wene Lweyi u yentxiki tilo, misava, lwandle ni mintxhumu hinkwayu leyi nga ka swone, 25 nakone u lweyi hi ku tizrisa moya waku wa ku xwenga u hlayiki hi nomu wa kokwana wezru Davhida nandzra waku u ku: ‘Ha yini matiko ma ni yimayima, ni vhanu va yanakanyisisa hi mintxhumu leyi kalaka yi nga pfuni ntxhumu? 26 A tihosi ta misava ti yime mbangwini wa tone ni vafumi va hlengeletanile akuva va lwisana na Yehovha ni mutotiwa wake.’* 27 Hikusa nakunene Heroda na Pontiyu Pilatu va hlengeletanile a doropeni ledzri kun’we ni vavanuna va matiko ni vhanu va Israyele akuva va lwisana na Yesu, nandzra waku lweyi a xwengiki lweyi u mu hlawuliki, 28 va hlengeletanile akuva va yentxa leswi wene u swi profetiki khale, mintxhumu leyi yi yentxeke hi leswi u nga ni ntamu ni hi leswi yi fambisanaka ni ku zrandzra kwaku. 29 Xileswo Yehovha, twana leswi va hi txhaviselaka ha swone kutani u hi pfuna hine malandzra yaku, akuva hi ya mahlweni hi zrezra zritu dzraku na hi nga txhavi ntxhumu, 30 na u ya mahlweni u nalavuta voko dzraku akuva u hanyisa, u yentxa mahlolana ni swihlamaliso hi vito dzra Yesu nandzra waku lweyi a xwengiki.”
31 Ntsrhaku ka loko va hambe xikhongoto,* mbangu lowu a va li ka wone wu tsrekatsrekile, kutani hinkwavu va tala hi moya wa ku xwenga va sungula ku vulavula hi zritu dzra Xikwembu Nkulukumba na va nga txhavi ntxhumu.
32 Handle ka leswo, a xitsrhungu lexi pfumeliki, a xi ni mayanakanyela man’we ni matitwela man’we, nakone a nga kone ni mun’we wavu lweyi a a hlaya leswaku mintxhumu leyi a a li na yone a yi li yake wuswake, kambe a va yavelana hinkwaswu leswi a va li na swone. 33 Hi ntamu lowukulu vapostola va ye mahlweni va nyikela wumboni mayelanu ni ku pfuxiwa ka Hosi Yesu, nakone hinkwavu Xikwembu Nkulukumba a a va tovokisa ngopfu swinene.* 34 Nakunene, a nga kone ni mun’we wavu lweyi a a pfumala xa kukazri, hikusa hinkwavu lava a va ni masimu kumbe tiyindlu a va swi xavisa, kutani va buyisa mali ya kone 35 va tlhasa va nyika vapostola. Kutani va yavela mun’wana ni mun’wana hi ku ya hi xivileleko xake. 36 Yosefa, lweyi vapostola a va tlhela va mu vitana hi vito ledzri liki Barnabasi (leswi loko swi ndzruluteliwa swi liki: “N’wana wa Ntxhavelelo”), lweyi a a li Mulevhi wa le Kipra, 37 a a ni nsimu, hiloko a yi xavisa a buyisa mali ya kone a ta ta nyika vapostola.