Mintizro ya Vapostola

16 Kutani a tlhasa Derbe a gama a suka a ya Listra. Kone a ku ni mudondzrisiwa lweyi a vitaniwaka Timotewu, lweyi mamana wake a a li Muyuda lweyi a nga mupfumeli, kambe papayi wake a a li Mugriki, 2 nakone vamakwezru va le Listra ni va le Ikoniya a va vulavula ha hombe ha yene. 3 Pawulo a a djula ku famba na Timotewu, kutani a mu teka a mu sokisa, hikusa a Vayuda hinkwavu va le mimbangwini yoleyo a va swi tiva leswaku papayi wake a a li Mugriki. 4 Ka madoropa lawa a va khaluta hi ka wone, a va byela vamakwezru leswi tsrimbiwiki hi vapostola ni vakulu a Yerusalema ku yentxela leswaku va swi landzra. 5 Nakunene, a mabandla a ma ya mahlweni ma tiyisiwa a lipfumelweni ma tlhela ma yandzra siku ni siku.

6 Va tlhele va khaluta hi Frigiya ni le mugangeni wa Galatiya, hikusa moya wa ku xwenga wu va yalelile kuva va zrezra zritu dzra Xikwembu Nkulukumba a xifundzreni xa Aziya. 7 Handle ka leswo, loko va fulamele va tlhasa Misiya, va yentxe minzamu ya ku ya a Betaniya kambe a moya wa Yesu a wu va pfumelelanga. 8 Xileswo va khaluta hi Misiya va fulamela va ya Trowasi. 9 Ka wusiku byolebyo Pawulo a ve ni xivoniso, lani a voniki wanuna wa le Makedoniya na a yimile a mu byela a ku: “Buya halenu Makedoniya u ta hi pfuna.” 10 Ntsrhaku ka loko a vone xivoniso lexo, hi dzringise ku ya Makedoniya, na hi yanakanya leswaku Xikwembu Nkulukumba a hi vitanela ku ya va zrezrela madzrungula lamanene.

11 Xileswo hi suke Trowasi hi tsremakanya lwandle hi kongoma a Samotrake, kambe hi siku ledzri landzreliki hi ye Neyapolisi; 12 hi game hi suka lanu hi ya Filipiya, lani a ku fumiwa hi Varoma, nakone dzri nga doropa dzra lisima ngopfu dzra muganga wa Makedoniya. Hi tsrhame doropeni ledzro ku dzringana masikunyana. 13 Hi siku dzra Savata hi hume handle ka doropa hi ya tlhelweni ka nambu, lani a hi yanakanya leswaku ku ni mbangu wa ku khongota ka wone, hi tlhase hi tsrhamisa hi sungula ku vulavula ni vavasati lava a va hlengeletanile kolanu. 14 Kutani a ku ni wansati wa kukazri lweyi a a hi yingiseta, yene a a vitaniwa Lidiya, a a li muxavisi wa mpahla ya ku dula lweyi a a huma a doropeni dzra Tiyatira nakone a a li mugandzreli wa Xikwembu Nkulukumba, kutani Yehovha a mu pfula mbilu hi ku helela akuva a kholwa leswi Pawulo a a swi hlaya. 15 Loko yene ni vandangu wake va babatisiwile, a hi byele a ku: “Loko mi ni vona ni li lweyi a dumbekaka ka Yehovha, buyani mi ta tsrhama kaya kwanga.” Nakone a hi sindzrise kuva hi famba na yene.

16 Siku dzrimbeni na hi ya a mbangwini wa xikhongoto, hi tlhangane ni nandzra wa kukazri wa xisati lweyi a a ni demona dzra ku pfhumbata, a a va ganyisa ngopfu vatholi vake hi ntizro wake wa ku hlaya leswi kalaka swi nga si na yentxeka. 17 N’hwanyana lweyi a tame a hi landzrelela na a bandlukana a ku: “Vavanuna lava i malandzra ya Xikwembu Nkulukumba lweyi a tlakukiki ngopfu nakone va mi zrezrela mayelanu ni ndlela ya ku huluka.” 18 N’hwanyana lweyo a ye mahlweni a hlayetela swoleswo ku dzringana masiku manyingi. Hi wugamu Pawulo a kazrala kutani a ndzruluka a byela demona ledzro a ku: “Hi vito dzra Yesu Kriste na ku byela, huma kwake.” Kutani dzri tekela ku huma hi nkama wolowo.

19 Loko vatholi vake va vona leswaku ndlela ya ku bindzrula leyi a va dumbe yone a ya ha li kone, va khoma Pawulo na Silasi va va kokovisela a mbangwini lowu ku tlhanganaka vhanu vanyingi, va va yisa a wuhosini. 20 Va va yisa ka tihosi ta doropa va tlhasa va ti byela va ku: “Vavanuna lava va vanga mpfilumpfilu wa wukulu ngopfu a doropeni dzrezru. Vone i Vayuda, 21 va dondzrisa swihena leswi kalaka swi nga faneli kuva hi swi pfumela kumbe ku swi landzra, hikusa hine hi Varoma.” 22 Hiloko xitsrhungu xi pfukela Pawulo na Silasi kutani a tihosi ti zrumisa leswaku va susiwa mpahla va tlhela va biwa hi tinhonga. 23 Ntsrhaku ka loko va va bukutelile va va pfalela djele, va gama va byela mulaveleli wa djele leswaku a va vonelela ngopfu leswaku va nga tsrutsrumi. 24 Kutani hi kuva a byeliwe leswo, a va pfalela ka djele ledzri kumekaka ndzrenindzreni a va tsrimba milenge ka swigodo.

25 Kambe a makazri ka wusiku, Pawulo na Silasi a va khongota va tlhela va dzrumisa Xikwembu Nkulukumba hi tinsimu, nakone a swib’otxhwa a swi va yingela. 26 Ku tekela ku va ni ku tsrekatsreka lokukulu ka misava lakakuva a djele dzri tsrekatsreka. Handle ka leswo ku pfulekela swipfalu hinkwaswu, ku tlhantlheka ni matxhini lawa a va tsrimbiwe ha wone. 27 Loko mulaveleli wa djele a pfuka a vona leswaku a swipfalu swa djele swi pfulekelile, a teka xipada xake a djula ku tidlaya, na a yanakanya leswaku a swib’otxhwa swi tsrutsrumile. 28 Kambe Pawulo a huwelela a ku: “U nga tidlayi, hikusa hinkwezru hi kone la!” 29 Xileswo a kombela leswaku va mu nyiketa swa ku vaninga ha swone a gama a tsrutsruma a nghena ndzreni ka djele na a zruzrumela, a tlhasa a khinsama mahlweni ka Pawulo na Silasi. 30 A va humesa handle a gama a va vutisa a ku: “Vakulukumba, ni fanela ku yentxa yini akuva ni huluxiwa?” 31 Va mu byela va ku: “Pfumela ka Hosi Yesu, kutani u ta huluxiwa, wene ni ndangu waku.” 32 Kutani va va zrezrela zritu dzra Yehovha, yene ni hinkwavu vandangu wake. 33 A gama a va teka hi wusiku byolebyo a famba na vone a ya va hlampswa swilondzra. Ntsrhaku ka leswo, yene ni vandangu wake hinkwavu va tekela ku babatisiwa. 34 A buya na vone kaya kwake a tlhasa a lulamisela swakuda a beka menzeni, yene ni vandangu wake hinkwavu va nyonxa ngopfu swinene hi leswi va pfumeliki ka Xikwembu Nkulukumba.

35 Loko byi xile, a tihosi ta doropa ti zruma valaveleli akuva va ya mu byela va ku: “Humesa vavanuna lavo.” 36 A mulaveleli wa djele a byela Pawulo mazritu lawo a ku: “A tihosi ta doropa ti zrume vhanu akuva va ta hlaya leswaku hi mi humesa n’wine vabidzri. Xileswo humani mi tifambela hi ku zrula.” 37 Kambe Pawulo a va byela a ku: “Nambileswi hi nga Varoma, va hi be na hi voniwa hi vhanu va tlhela va hi pfalela djele na hi nga thethisiwanga.* Swoswi va djula ku hi humesa hi xihundla? A swi tizri leswo! A va buye vone hi wuswavu va ta hi humesa.” 38 A valaveleli va byela tihosi ta doropa mazritu ya Pawulo. Loko ti twa leswaku vavanuna lava i Varoma, ti sungula ku txhava ngopfu swinene. 39 Xileswo ti va yela ti ya kombela lidzrivalelo, kutani ntsrhaku ka loko ti va humesile, ti va kombela leswaku va suka doropeni. 40 Kambe Pawulo na Silasi va hume djele va ya kaya ka Lidiya. Kutani loko va tlhasa va vona vamakwezru, va va tiyisa va gama va suka va famba.