Papela dzra ku sungula ledzri yaka ka Vakorinte

14 Kombananani lizrandzru, nambitanu yanani mahlweni mi tikazratela ku kuma* tinyiko ta moya, ngopfungopfu nyiko ya ku profeta. 2 Hikusa lweyi a nga ni nyiko ya ku vulavula hi lidzrimi dzrin’wana, a nga vulavuli ni vhanu kambe a vulavula na Xikwembu Nkulukumba, hikusa nambileswi a vulavulaka swihundla swa ku xwenga hi ku kongomisiwa hi moya, leswi a swi hlayaka a swi twisisiwi hi mhunu. 3 Nambitanu lweyi a profetaka, awa tiyisa, a kutxa ni ku txhavelela van’wana hi leswi a swi hlayaka. 4 Lweyi a vulavulaka tindzrimi ta ku siyanasiyana o titiyisa yene ntsena, kambe lweyi a profetaka a tiyisa bandla. 5 Kutani a ni ta navela leswaku hinkwenu mi vulavula tindzrimi ta ku siyanasiyana, kambe leswi ni swi navelaka ngopfu i kuva mi profeta. Nakunene lweyi a profetaka a tlula lweyi a vulavulaka tindzrimi ta ku siyanasiyana, handle ka loko a ngo tlhela a ndzrulutela mazritu yake akuva ku tiyisiwa bandla. 6 Kambe swoswi vamakwezru, loko ni ngo mi tela ni tlhasa ni vulavula hi tindzrimi leti mi kalaka mi nga ti tivi, swi nga mi pfuna ha yini? Mi ngo pfuneka ntsena loko ni ngo mi tela ni mazritu lama pfaka ka Xikwembu Nkulukumba kumbe ya wutivi kumbe ya ku profeta kumbe ya ku dondzrisa.

7 Swi hi lani ku fanaka ni switxhayatxhayana swa ku fana ni xitiloti* kumbe xitende.* Loko manota ma nga txintxatxintxani, a mhunu a ta swi tivisa kuyini leswi txhayiwaka hi xitiloti kumbe hi xitende? 8 Hikusa loko xipalapala* xi humesa mpfumawulu wa yimpi lowu kalaka wu nga khanyi, i mani lweyi a taka lulamela yimpi? 9 Hi lani ku fanaka, loko u nga tizrisi mazritu lawa swi nabyalaka ku ma twisisa, i mani lweyi a taka swi tiva leswi u swi hlayaka? Nakunene u ta va na wo vulavula ni moya. 10 Ku nga ha va ni tindzrimi ta ku siyanasiyana a misaveni, nambitanu a dzri kone ledzri kalaka dzri nga twisiseki. 11 Hikusa loko ni nga swi twisisi leswi hlayiwaka, ni ta va na ni li mupfi ka lweyi a vulavulaka, na yene a ta va na a li mupfi kwanga. 12 Xileswo na n’wine, leswi mi swi djulaka ngopfu ku va ni tinyiko ta moya, lwelani ku va ni tinyiko ta tinyingi leti taka tiyisa bandla.

13 Kutani lweyi a vulavulaka lidzrimi dzrin’wana, a a khongoti akuva a tiva ku ndzrulutela leswi a swi hlayaka. 14 Hikusa loko ni khongota hi lidzrimi dzrin’wana, a hi mine ni khongotaka, kambe ni khongota hi kola ka nyiko leyi ni nyikiwiki yone hi moya wa ku xwenga, nambitanu ni va na ni nga wu twisisi mongo wa leswi ni swi hlayaka. 15 Kutani ni yentxa yini? Ni ta khongota hi ku tizrisa nyiko leyi ni nyikiwiki yone hi moya wa ku xwenga, kambe ni ta tlhela ni khongota hi ndlela leyi taka ni pfuna ku twisisa mongo wa leswi ni swi hlayaka. Ni ta yimbelelela Xikwembu Nkulukumba* hi ku tizrisa nyiko leyi ni nyikiwiki yone hi ku tizrisa moya wa ku xwenga, kambe ni ta tlhela ni yimbelelela Xikwembu Nkulukumba hi ku tizrisa mazritu lawa ni ma twisisaka.* 16 Xin’wana futsrhi, loko u dzrumisa Xikwembu Nkulukumba hi ku tizrisa nyiko leyi u nyikiwiki yone hi moya wa ku xwenga, mhunu lweyi a kalaka a nga dondzranga lweyi a nga na wene, a ta hlayisa kuyini leswaku “Amen” ka xikhongoto xaku xa ku tlangela na a nga swi tivi leswi u swi hlayaka? 17 I ntiyiso leswaku u tlangela Xikwembu Nkulukumba hi ndlela leyi nga yone, kambe mhunu lwemun’wana a nga pfuneki ha swone. 18 Ni tlangela Xikwembu Nkulukumba hi leswi ni nga ni nyiko ya ku vulavula tindzrimi ta tinyingi ku tlula n’wine hinkwenu. 19 Nambi swi li tanu, a bandleni ni vona swi yampswa kuva ni vulavula ntlhanu wa mazritu lama nga twisisiwaka akuva ni dondzrisa van’wana, ku tlula kuva ni vulavula 10.000 wa mazritu hi lidzrimi ledzri kalaka dzri nga tiviwi.

20 Vamakwezru, mi nga fani ni vatsrongwana ka ndlela leyi mi twisisaka ha yone mintxhumu, kambe fanani ni vatsrongwana loko swi ta mhakeni ya ku yentxa leswi bihiki; nakone kulani hi ku helela ka ndlela leyi mi yi twisisaka ha yone mintxhumu. 21 A Nawini ku tsraliwe leswi: “‘Ni ta vulavula ni vhanu lava hi ku tizrisa tindzrimi ta vapfi ni minomu ya vhanu lava kalaka va nga va tivi, nambitanu va ta yala ku ni yingiseta’, ku hlaya Yehovha.” 22 Xileswo, a nyiko ya ku vulavula tindzrimi ta ku siyanasiyana yi tizrela ku kholwisa lava kalaka va nga li vapfumeli ku nga li ku dondzrisa vapfumeli, kambe wuprofeta i bya vapfumeli ku nga li lava kalaka va nga li vapfumeli. 23 Loko bandla hinkwadzru dzri tlhangana a mbangwini wun’we kutani hinkwenu mi sungula ku vulavula hi tindzrimi ta ku siyanasiyana, ku gama ku nghena vhanu lava kalaka va nga dondzranga kumbe lava kalaka va nga li vapfumeli, xana a va nge ti hlaya leswaku mo hlanya? 24 Kambe loko hinkwenu mi profeta ku gama ku nghena mhunu lweyi a kalaka a nga li mupfumeli kumbe mhunu lweyi a kalaka a nga dondzranga, leswi a swi yingelaka swi ta mu laya nakone swi ta yentxa leswaku a tikambela ha hombe. 25 A swihundla leswi nga mbilwini yake swi ta paluxeka, lakakuva a khinsama a langusa hansi a gandzrela Xikwembu Nkulukumba a ku: “Kunene Xikwembu Nkulukumba a na n’wine.”

26 Kutani vamakwezru, mi fanela ku yentxa yini? Loko mi tlhangana, mun’we awa yimbelela mapsalma, mun’wana awa dondzrisa, mun’wana a vulavula mazritu lama pfaka ka Xikwembu Nkulukumba, mun’wana a vulavula hi tindzrimi ta ku siyanasiyana, nakasi mun’wana a ndzrulutela leswi hlayiwiki hi tindzrimi tin’wana. Yentxani hinkwaswu leswo akuva mi tiyisanana. 27 Nakone loko mhunu wa kukazri a vulavula hi lidzrimi dzrimbeni, a a gameli ka ku hlaya mazritu mabidzri kumbe mazrazru ntsena, hi nkama wolowo, mhunu mun’wana a fanela ku ndzrulutela leswi a swi hlayiki. 28 Kambe loko ku nga na mhunu lweyi a taka ndzrulutela, a a miyeli a tivulavulela na Xikwembu Nkulukumba hi le mbilwini. 29 A ku vulavule vaprofeta vabidzri kumbe vazrazru, kutani lavan’wana a va zame ku twisisa ntlhamuxelo wa leswi hlayiwaka. 30 Kambe loko mhunu mun’wana lweyi a tsrhamiki kolanu a yamukela mazritu lama pfaka ka Xikwembu Nkulukumba, lweyi a a li ku vulavuleni a fanela ku miyela. 31 Hikusa hinkwenu mi nga swi kota ku profeta ha mun’wemun’we, akuva hinkwavu va kota ku dondzra xa kukazri ni kuva va tiyisiwa. 32 Nakone vaprofeta va fanela ku yi tizrisa ha hombe nyiko yavu ya moya. 33 Hikusa Xikwembu Nkulukumba a hi Xikwembu Nkulukumba wa mpfilumpfilu kambe i Xikwembu Nkulukumba wa ku zrula.

Hi lani swi yentxekaka ha kone a mabandleni hinkwawu ya vaxwengi, 34 vavasati va fanela ku miyela a mabandleni, hikusa a va pfumeleliwi ku vulavula. A matsrhan’wini ya leswo, va fanela ku tibeka hansi hi lani na wone Nawu wu hlayaka ha kone. 35 Loko ku ni ntxhumu lowu va djulaka ku wu tiva, va fanela ku vutisa vanuna vavu na va li kaya, hikusa swa danisa kuva wansati a vulavula a bandleni.

36 Xana a zritu dzra Xikwembu Nkulukumba dzro pfa kwenu kumbe dzre yamukeliwa hi n’wine ntsena?

37 Loko mhunu a yanakanya leswaku i muprofeta kumbe leswaku a ni nyiko ya kukazri ya moya, a fanela ku pfumela leswaku leswi ni mi tsralelaka swone i xileleto xa Hosi. 38 Kambe loko mhunu a nga swi pfumeli leswo, Xikwembu Nkulukumba a nge ti mu pfumela.* 39 Xileswo vamakwezru, tamani mi tikazratela ku kuma nyiko ya ku profeta, nambitanu mi nga siveli mhunu ku vulavula hi tindzrimi ta ku siyanasiyana. 40 Kambe a mintxhumu hinkwayu a yi yentxiwi hi ndlela leyinene ni hi ndlela leyi hlelekiki.*