Papela dzra ku sungula ledzri yaka ka Vakorinte

2 Xileswo vamakwezru, loko ni tile halanu kwenu akuva ni ta mi zrezrela xihundla xa ku xwenga xa Xikwembu Nkulukumba, a ni tizrisanga mazritu ya ku hlamalisa kumbe ni zama ku tiyentxa ntlhazri. 2 Hikusa ni kunguhate ku vulavula na n’wine hi Yesu Kriste, ni hi ku dlayiwa kwake a mhandzrini ntsena. 3 Nakone nkama lowu ni tiki kwenu, a ni hele ntamu ni tlhela ni zruzrumela hi ku txhava; 4 loko ni vulavula ni loko ni dondzrisa, a ni tizrisanga mazritu ya ku kholwisa lama tizrisiwaka hi tintlhazri, kambe a mazritu yanga a ma kombisa ntamu wa moya wa ku xwenga 5 akuva lipfumelo dzrenu dzri nga seketeliwi ka wutlhazri bya vhanu, kambe ka ntamu wa Xikwembu Nkulukumba.

6 Hi vulavula hi wutlhazri ni vhanu lava wupfiki, kambe a hi wutlhazri bya misava leyi kumbe bya tihosi ta misava leyi,* leti taka suva. 7 Kambe hi vulavula hi xihundla xa ku xwenga, ku nga wutlhazri bya Xikwembu Nkulukumba lebyi fihliwiki. Xikwembu Nkulukumba a lulamisele xihundla lexi na misava leyi ya ku biha yi nga si na va kone, akuva hi ta tlakuxiwa. 8 Lebyi i wutlhazri lebyi a tihosi ta misava leyi* ti kalaka ti nga byi tivanga, hikusa loko a ti byi tivile, inaka ti nga yi dlayanga* Hosi yezru leyikulu. 9 Kambe hi lani swi tsraliwiki ha kone: “A tihlo a dzri swi vonanga ni ndleve a yi swi yingelanga, nakone a ku na mhunu lweyi a yi yanakanyiki mintxhumu leyi Xikwembu Nkulukumba a yi lulamiseliki lava mu zrandzraka.” 10 Hikusa Xikwembu Nkulukumba a paluxele hine mintxhumu leyi hi ku tizrisa moya wake. A moya wu kambisisa mintxhumu hinkwayu, nambi ku li mintxhumu leyi yentiki ya Xikwembu Nkulukumba.

11 Xana mhunu a nga swi kota ku tiva leswi mhunu mun’wana a swi pimisaka? Nakunene a nge swi koti. Leswo swo tiviwa ntsena hi mbilu ya mhunu yelweyo. Hi lani ku fanaka, a nga kone lweyi a tivaka miyanakanyu ya Xikwembu Nkulukumba handle ka moya wa ku xwenga. 12 A hi yamukelanga moya wa misava, kambe hi yamukele moya lowu pfaka ka Xikwembu Nkulukumba, akuva hi ta tiva mintxhumu leyi hi wunene Xikwembu Nkulukumba a hi nyikiki yone. 13 A hi tizrisi mazritu lawa hi dondzrisiwiki hi wutlhazri bya vhanu, kambe hi tizrisa mazritu lawa hi dondzrisiwiki hi moya akuva hi tlhamuxela mintxhumu ya moya.

14 Kambe mhunu lweyi a kongomisiwaka hi miyanakanyu ya vhanu* a nga yi yamukeli mintxhumu leyi paluxiwaka hi moya wa Xikwembu Nkulukumba, hikusa a yi vona na yi li wuphunta; nakone a nge swi koti ku yi twisisa, hikusa mhunu a fanela ku yi kambela na a pfuniwa hi moya wa Xikwembu Nkulukumba. 15 Nambitanu, a mhunu lweyi a kongomisiwaka hi moya* a kambela mintxhumu hinkwayu, kambe yene a nga kambeliwi hi mhunu. 16 Hikusa “i mani lweyi a tivaka miyanakanyu ya Yehovha lakakuva a nga mu dondzrisa?” Kambe hine hi ni miyanakanyu ya Kriste.