Mintizro ya Vapostola
17 Va yendzra va tsremakanya hi Amfipolisi ni le Apoloniya va tlhasa a Tesalonika lani a ku ni sinagoga dzra Vayuda. 2 Kutani hi lani Pawulo a a tolovela ku yentxa ha kone, a nghena sinagogeni a yanakanyisisa na vone hi Matsralwa ku dzringana masavata mazrazru, 3 a va tlhamuxela a tlhela a va komba hi leswi tsraliwiki, leswaku a swi fanela kuva Kriste a fa a tlhela a pfuxiwa ku feni, a ku: “Kriste, i Yesu lweyi ni mi zrezrelaka mayelanu na yene.” 4 Leswo swi yentxe leswaku van’we vavu va va vapfumeli va tlhela va tipatsra na Pawulo na Silasi. Ni xitsrhungu lexikulu xa Vagriki lava a va gandzrela Xikwembu Nkulukumba xi yentxe hi lani ku fanaka kun’we ni vavasati va vanyinginyana lava a va ni ndhuma.
5 Kambe hi matsrhoho, a Vayuda va hlengeleta vavanuna va kukazri lava a va bihe timbilu lava a va fambafamba bazara, va sungula ku vanga mpfilumpfilu a doropeni. Va tlhanya muti wa Yasoni na va djuletela Pawulo na Silasi akuva va va khoma va va humesa handle va va yisa ka ntlawa wolowo. 6 Loko va nga va kumi, va kokovisela Yasoni kun’we ni vamakwezru va kukazri va va yisa ka vafumi va doropa, va tlhasa va bandlukana va ku: “Vavanuna lava va vangetelaka mpfilumpfilu a mimbangwini* hinkwayu na vone va kola, 7 nakone Yasoni a va yamukelile swanga vayeni vake. Hinkwavu vavanuna lava va lwisana ni milawu ya Khezari, va hlaya leswaku ku ni hosi yin’wana ku nga Yesu.” 8 Loko xitsrhungu ni vafumi va doropa va twa mintxhumu leyi, va kazrateka; 9 kutani ntsrhaku ka loko Yasoni ni lavan’wana va va hakele mali ya nandzru leyi va yi koxiki, va va tsrhike va famba.
10 Loko dzri pelile, vamakwezru va tekela ku zrumela Pawulo na Silasi a Bereya. Loko va tlhasa, va nghena sinagogeni dzra Vayuda. 11 A Vayuda va le Bereya a va swi zrandzra ngopfu ku dondzra ku tlula va le Tesalonika, hikusa va yamukele zritu dzra Xikwembu Nkulukumba hi timbilu tavu hinkwatu, va kambisisa Matsralwa hi wunyaminyami siku ni siku akuva va vona loko leswi va swi yingeliki hakunene a li ntiyiso. 12 Xileswo vanyingi vavu va ve vapfumeli, ku patsra ni vavasati va Vagriki va vanyinginyana lava a va hloniphiwa, kun’we ni vavanuna va kukazri. 13 Kambe loko Vayuda va le Tesalonika va twa leswaku Pawulo a le ku zrezreni ka zritu dzra Xikwembu Nkulukumba a Bereya, va ya kohala va tlhasa va hlohlotela switsrhungu akuva swi lwisana na vone. 14 Xileswo vamakwezru va tekela ku yisa Pawulo a lwandle, kambe Silasi na Timotewu va sala kolanu. 15 Nambitanu, lava heketiki Pawulo va fambe na yene ku ya tlhasa a Atena, va gama va tlhela loko a va byela leswaku Silasi na Timotewu va fanela ku kahlula hi lani va nga kotaka ha kone va mu yela.
16 Na Pawulo a ha va yimelile a Atena, a kazrateka hi ku vona leswaku a doropa dzre tala hi swithombe. 17 Kutani a sinagogeni a sungula ku bulisana ni Vayuda kun’we ni vhanu van’wana lava a va gandzrela Xikwembu Nkulukumba nakone siku ni siku a a bulisana ni lava a a va kuma bazara. 18 Kambe van’we lava a va li vativi va filozofiya, lava a va li Vaepikuri ni Vastoyiki, va sungula ku phikisana na yene, van’we a va ku: “Kasi mhunu lweyi o ko phuphuzruteka a djula ku hlaya swa kuyini?” Van’wana va ku: “A tikomba a li muzrezri wa swikwembu swin’wana.” Va hlaye leswi hikusa Pawulo a a zrezra madzrungula lamanene ya Yesu ni ya ku pfuka ka vafi. 19 Xileswo va mu teka va famba na yene a Areyopago, va ku: “U nga hi byela leswaku dondzro leyimpshwa leyi u vulavulaka hi yone i dondzro muni? 20 Hikusa u vulavula hi mintxhumu ya ku a hi ngi ngi sama hi yi twa, nakone hi djula ku tiva leswaku yi hlaya swa kuyini.” 21 Nakunene a Vaatena hinkwavu ni vhanu va matiko mambeni lava a va tsrhama* kolanu, a nkama wavu wa ku wisa a va wu tizrisela ntsena kuva va bula kumbe ku yingisetela mintxhumu ya nyiwana. 22 Kutani Pawulo a sekeleka a yima a Areyopago a ku:
“Vavanuna va Atena, na swi xiya leswaku ka mintxhumu hinkwayu n’wine mi tikomba mi li lava tinyiketelaka ngopfu ka ku txhava swikwembu* ku tlula vhanu vambeni. 23 Hi xikombiso, loko ni fambafamba ni lavisa mintxhumu leyi mi yi gandzrelaka, ni kume ni altari dzra kukazri lani ku tsraliwiki leswi: ‘Ka Xikwembu Nkulukumba lweyi a kalaka a nga tiviwi.’ Kutani Xikwembu Nkulukumba lweyi mi mu gandzrelaka na mi nga mu tivi, hi yelweyi ni mi zrezrelaka yene. 24 Xikwembu Nkulukumba lweyi a tumbuluxiki misava ni hinkwaswu leswi nga ka yone, leswi a nga Hosi ya tilo ni misava, a nga tsrhami ka matempele lama yentxiwiki hi mavoko ya vhanu; 25 nambi ku vilela mavoko ya vhanu akuva ma mu tizrela ingiki hi loko o pfumala ntxhumu wa kukazri, hikusa hi yene a nyikaka vhanu hinkwavu wutomi, ku hefemula ni hinkwaswu. 26 Nakone hi mhunu mun’we a hambe vhanu va tinxaka hinkwatu akuva va tsrhama a misaveni hinkwayu, a tlhela a beka minkama leyi mintxhumu yi fanelaka ku yentxeka ha yone ni mindzrelakanu ya lomu vhanu va fanelaka ku tsrhama kone, 27 ku yentxela leswaku va ta djuletela Xikwembu Nkulukumba, loko va hulumetela akuva va mu kuma, va ta mu kuma, hikusa nakunene a nga le kule ngopfu ni mun’wana ni mun’wana wezru. 28 Hikusa hi kola kwake hi ni wutomi, ha fambafamba nakone hi kone, hi lani van’we va vathokozeli* venu va hlayiki ha kone va ku: ‘Hikusa na hine hi vanake.’
29 “Kutani leswi hi nga vana va Xikwembu Nkulukumba, a hi fanelanga hi yanakanya leswaku Xikwembu Nkulukumba a fana ni woru, prata kumbe zribye, hi mu fanisa ni mintxhumu leyi vatliwiki kumbe ku yanakanyiwa hi mhunu. 30 I ntiyiso leswaku Xikwembu Nkulukumba a a nga va voni nandzru vhanu minkama leyi a va yentxa mintxhumu hi ku pfumala wutivi, kambe swoswi a zrezrela vhanu hinkwavu a mimbangwini hinkwayu leswaku va fanela ku tisola. 31 Hikusa a beke siku ledzri a tiyimiseliki ku yavanyisa misava hi ndlela ya ku lulama hi ku tizrisa wanuna lweyi a mu bekiki, a tlhela a beka xitiyisekiso xa leswo ka vhanu hinkwavu hi ku va a mu pfuxa ku feni.”
32 Loko va twa hi ta ku pfuxiwa ka vafi, van’we va sungula ku mu hleka, kasi van’wana va ku: “U ta tlhela u hi byela leswi yengetelekiki mayelanu ni mhaka leyi hi nkama wumbeni.” 33 Xileswo Pawulo a suka a famba a va siya, 34 kambe van’wana va tipatsra na yene, va va vapfumeli. A makazri kwavu a ku na Diyoniziyo lweyi a a li muyavanyisi wa le tribunali dzra Areyopago, ni wansati lweyi a vitaniwaka Damarisi, kun’we ni van’wana.