Madzrungula lamanene Lama Tsraliwiki hi Marka
13 Loko Yesu a huma tempeleni, mun’we wa vadondzrisiwa vake a mu byela a ku: “Mudondzrisi, vona ku xonga ka mazribye lawa ni miyaku leyi nga tempeleni!” 2 Nambitanu, Yesu a mu byela a ku: “Wa yi vona miyaku leyi leyikulu? Ma ta masiku lawa ku nga tiki sala zribye henhla ka zribye dzrin’wana, ma ta gilhitiwa hinkwawu.”
3 Na a tsrhame Nhaveni ya Minhlwazri, lani a swi koteka ku vona tempele, Petro, Yakobe, Yohane na Andreya va mu vutisa xihundleni va ku: 4 “Hi byeli, xana mintxhumu leyi yi ta yentxeka siku muni, nakone xi ta va xini xikombiso xa leswaku mintxhumu leyi hinkwayu yi kusuhi ni ku hela?” 5 Xileswo, Yesu a sungula ku va byela a ku: “Tivonelani leswaku mi nga hambukisiwi hi mhunu. 6 Vanyingi va ta ta hi vito dzranga va ku: ‘Hi mine Kriste’, nakone va ta hambukisa vanyingi. 7 Handle ka leswo, loko mi yingela hi ta tiyimpi a mimbangwini ya ku siyanasiyana, mi nga txhavi; a mintxhumu leyo yi fanela ku yentxeka, kambe a wugamu byi ta va na byi nga si na tlhasa.
8 “Hikusa a tiko dzri ta lwisana ni tiko dzrimbeni ni mfumu wu ta lwisana ni mfumu wumbeni; ku ta va ni ku tsrekatsreka ka misava a mimbangwini ya ku siyanasiyana, ku tlhela ku va ni ku pfumaleka ka swakuda. A mintxhumu leyi i masungulo ya mahlomulo.
9 “Kambe n’wine tivonelani. Vhanu va ta mi yisa a matribunali, mi ta biwa a masinagogeni nakone mi ta yisiwa mahlweni ka vagovhernadori ni ka tihosi hi mhaka yanga, hi ndlela leyo mi ta kota ku nyikela wumboni kwavu. 10 Nakone a madzrungula lamanene ma fanela ku zranga ma zrezriwa a matikweni hinkwawu. 11 Loko va mi khoma va mi yisa wuhosini, mi nga vileli hi leswi mi taka hlaya swone; kambe hlayani leswi mi taka nyikiwa swone hi nkama wolowo, hikusa a hi n’wine mi vulavulaka, kambe i moya wa ku xwenga. 12 Handle ka leswo, a mhunu a ta nyikela makwavu leswaku a dlayiwa, ni papayi a ta nyikela n’wanake, kasi a vana va ta pfukela vapswele va yentxa leswaku va dlayiwa. 13 Nakone mi ta nyenyiwa hi vhanu hinkwavu hi mhaka ya vito dzranga. Kambe lweyi a tiyiselaka* ku ya tlhasa wugamu a ta huluxiwa.
14 “Nambitanu, loko mi vona ntxhumu wa ku nyenyentsa lowu honetelaka na wu yimi mbangwini lowu a wu nga fanelanga ku yima ka wone (mudondzri a a zami ku swi twisisa), lava va nga Yudeya a va tsrutsrumeli a tinhaveni. 15 Lweyi a nga henhla ka yindlu a nga xiki nambi ku nghena ndlwini kwake a teka ntxhumu wa kukazri; 16 ni lweyi a nga masin’wini a nga tlheli a ya kaya a ya teka xiyambalu xake. 17 Khombo ka vavasati lava va taka va na va ni tinyimba ni lava va taka va na va nyan’wisa a masikwini wolawo! 18 Tamani mi khongota leswaku leswo swi nga yentxeki hi nguva ya wuxika; 19 hikusa masiku wolawo ma ta va masiku ya nhlomulo wa ku a wu ngi ngi sama wu va kone ku sukela loko Xikwembu Nkulukumba a tumbuluxa mintxhumu hinkwayu ku ya tlhasa nkameni wolowo, nakone a wu nge he ti tlhela wu va kone. 20 Nakunene, loko Yehovha a a nga ma pumbanga masiku wolawo, a ku na mhunu lweyi a a ta huluka. Kambe a masiku wolawo a ma pumbile hi mhaka ya vahlawuliwa lava a va hlawuliki.
21 “Kutani loko mhunu wa kukazri a mi byela a ku: ‘Vonani! Hi lweyi Kriste’, kumbe a ku: ‘Vonani! Hi lwiya’, mi nga swi kholwi. 22 Hikusa ku ta humelela lava va taka hemba va hlaya leswaku hi vone Kriste nakone ku ta va ni vaprofeta va madzrimi. Va ta yentxa mahlolana ni mintxhumu ya ku hlamalisa, akuva loko swi koteka, va hambukisa vahlawuliwa. 23 Kambe n’wine tivonelani, ni mi byeli mintxhumu hinkwayu na yi nga si na yentxeka.
24 “Kambe a masikwini wolawo, ntsrhaku ka loko nhlomulo wu helile, a dambu dzri ta mphuma, a n’weti a wu nge he ti vaninga, 25 ni tinyeleti ti ta wa hi le tilweni nakone mintamu ya le tilweni yi ta tsrekatsrekisiwa. 26 Ntsrhaku ka leswo, va ta vona N’wana wa mhunu na a ta hi le matlavini na a ni ntamu lowukulu ni ku phatima. 27 Kutani a ta zruma tintsrumi ti ta hlengeleta vahlawuliwa vake lava humaka ka matlhelo hinkwawu ya misava,* ku sukela a wugan’wini bya misava ku ya tlhasa wugan’wini bya matilo.
28 “Dondzrani ka xifaniso lexi xa nsinya wa nkuwa: Loko mazrwavi ya wone ma sungula ku hluka, ma swi tiva leswaku malanga ma kusuhi. 29 Hi lani ku fanaka, na n’wine loko mi vona mintxhumu leyi hinkwayu yi yentxeka, swi tivani leswaku a le kusuhi a kola tinyangweni. 30 Kunene na mi byela leswaku a lixaka ledzri a dzri nge fi dzri hela na mintxhumu leyi hinkwayu yi nga si na yentxeka. 31 Tilo ni misava swi ta khaluta, kambe mazritu yanga ma nga ka ma nga khaluti.
32 “Mayelanu ni siku ledzro kumbe nkama wa kone a ku na lweyi a swi tivaka, nambi tintsrumi ta le tilweni nambi ko va N’wana, kambe swi tiviwa hi Papayi. 33 Tsrhamani na mi zrindzrile, tsrhamani na mi pfule matihlo, hikusa a mi wu tivi nkama lowu bekisiwiki. 34 Swi fana ni wanuna lweyi a yendzrelaka mbangwini wa le kule, lweyi a siyelaka yindlu yake vatizri vake, a nyika mun’wana ni mun’wana ntizro lowu a fanelaka ku sala a wu yentxa, a tlhela a zruma mulaviseli wa nyangwa leswaku a tsrhama na a zrindzrile. 35 Xileswo, tsrhamani na mi zrindzrile, hikusa a mi wu tivi nkama lowu n’winyi wa muti a taka ta ha wone, swi nga yentxeka a tlhasa a madambyeni, a xikazri ka wusiku, a mpundzrwini* kumbe a mixweni, 36 akuva loko a tlhasa na mi nga swi yimelanga, a nga mi kumi na mi yetlelile. 37 Kambe leswi ni mi byelaka swone, ni byela hinkwavu: Tsrhamani na mi zrindzrile.”