Papela ledzri dzri yaka ka Vaefesa

2 Handle ka leswo, Xikwembu Nkulukumba a mi yentxe mi hanya nambileswi a mi file hi mhaka ya swihoxo ni swidoho swenu 2 leswi mi swi yentxiki nkama na ma ha hanyisa xileswi misava leyi yi hanyisaka xiswone,* a mi landzrelela mufumi wa moya wa misava leyi, ku nga moya lowu swoswi wu tizraka ka vana lava kalaka va nga yingiseti. 3 Hinkwezru hi same hi hanya ku fana na vone, hi landzra ku navela ka nyama yezru, hi landzrelela leswi nyonxisaka nyama ni mimpimiso yezru, nakone ku sukela a ku pswaliweni kwezru a hi li vana lava faneliwaka hi mahlundzru ya Xikwembu Nkulukumba ku fana ni lavan’wana hinkwavu. 4 Kambe leswi Xikwembu Nkulukumba a taliki hi timpswalu, nakone a hi zrandzraka ngopfu swinene, 5 a hi yentxe hi hanya kun’we na Kriste, nambileswi a hi file hi mhaka ya swihoxo, (mi huluxiwile hi kola ka timpswalu letikulu). 6 Handle ka leswo, a hi yentxe hi hanya na yene a va a hi tsrhamisisa na yene a mimbangwini ya le tilweni swanga vadondzrisiwa va Kriste Yesu, 7 ku yentxela leswaku ka minkama leyi taka* Xikwembu Nkulukumba a kombisa timpswalu take letikulu hi ku hi komba wunene* swanga vadondzrisiwa va Kriste Yesu.

8 Hi kola ka timpswalu leti letikulu, mi huluxiwile hi mhaka ya lipfumelo dzrenu, nakone a lulamiselo ledzri a dzri pfi hi kola ka minzamu yenu, a matsrhan’wini ya leswo, dzrone i nyiko ya Xikwembu Nkulukumba. 9 A ku huluxiwa loku a ku pfi hi kola ka mintizro yenu, akuva ku nga vi na lweyi a kumaka xivangelo xa ku tikhuza. 10 Hine hi ntizro wa mavoko ya Xikwembu Nkulukumba,* nakone leswi hi nga vadondzrisiwa va Kriste Yesu hi vumbeliwe ku yentxa mintizro leyinene, leyi Xikwembu Nkulukumba a hi lulamiseliki yone khale akuva hi yi yentxa.

11 Xileswo dzrimukani leswaku n’wine a mi Vayuda, nakone “lava sokisiwiki” hi vhanu a va mi vitana “vhanu lava kalaka va nga sokisiwanga”. 12 A nkameni wolowo a mi nga mu tivi Kriste, a mi tsravukanisiwile ni tiko dzra Israyele, a mi nga patsriwanga ka swipfumelelanu swa xidumbiso; a mo hanya a misaveni na mi nge na dumbo nakone a mi nga mu tivi Xikwembu Nkulukumba. 13 Kambe leswi swoswi mi nga vadondzrisiwa va Kriste Yesu, n’wine lava khale a mi li kule na Xikwembu Nkulukumba, swoswi mi le kusuhi na yene hi kola ka ngati ya Kriste. 14 Hikusa hi yene a hi tiseliki ku zrula, lweyi a yentxiki leswaku mintlawa yibidzri yi va wun’we nakone a hohlotiki khumbi ledzri a dzri tsravukanisa mintlawa yoleyo. 15 Hi nyama yake a helise leswi a swi yi yentxa yi va valala, ku nga Nawu wa Moxe lowu nga ni swileleto, ku yentxela leswaku mintlawa leyibidzri ya vadondzrisiwa vake yi va ntlawa wun’we lowumpshwa* ni kuva a yentxa leswaku yi va ni ku zrula, 16 ni ku yentxa leswaku mintlawa ha yibidzri yi tlhelelana hi ku helela na Xikwembu Nkulukumba hi ku tizrisa mhandzri ya nxanisa,* akuva ha yibidzri ka yone yi va mizri wun’we, hikusa a dlaye wulala hi mizri wake. 17 Nakone a tile a ta mi zrezrela madzrungula lamanene ya ku zrula, n’wine a mi li kule na Xikwembu Nkulukumba kun’we ni lava a va li kusuhi na yene, 18 hikusa hi kola ka mhamba yake, hinkwezru hi nga va mintlawa ha yibidzri, hi nga khongota ka Papayi wa le tilweni swanga hi leswi hinkwezru hi yamukelaka moya wa ku xwenga wolowu wa wun’we.

19 Xileswo, n’wine a ma ha li vhanu va tiko dzrin’wana, kambe mi vayakitiko ni vaxwengi nakone mi swizro swa ndangu wa Xikwembu Nkulukumba. 20 Nakone n’wine mi yakiwe henhla ka masungulo ya vapostola ni vaprofeta, kasi Kriste Yesu yene i zribye dzra masungulo dzra lisima ku tlula hinkwawu. 21 A muyaku hinkwawu wu nga ni wumun’we na yene nakone a swiyenge swa wone hinkwaswu swi patsriwiki ha hombe, wa kula akuva wu va tempele dzra ku xwenga dzra Yehovha. 22 Leswi mi nga ni wumun’we na Kriste, n’wine kun’we ni vambeni mi le ku yakiweni akuva mi va mbangu lowu Xikwembu Nkulukumba a tsrhamaka ka wone hi moya wake.