Papela ledzri yaka ka Varoma

13 Hi fanela ku yingiseta wuhosi hikusa a ku na wuhosi lebyi nga vaka kone na byi nga pfumeleliwanga ha Xikwembu Nkulukumba; a tihosi leti nga kone ti bekiwe ha Xikwembu Nkulukumba a switsrhan’wini swa tone. 2 Xileswo, lweyi a yalaka ku yingiseta wuhosi* a lwisana ni lulamiselo dzra Xikwembu Nkulukumba; lava va lwisanaka ni lulamiselo dzra Xikwembu Nkulukumba va ta khatisiwa. 3 A tihosi a ti txhaviwi hi lava va yentxaka leswinene kambe ti txhaviwa hi lava va yentxaka leswi bihiki. Wa swi djula ku va u nga ti txhavi tihosi? Tama u yentxa leswinene kutani ti ta ku kulungela; 4 hikusa a tihosi ti tizrela Xikwembu Nkulukumba akuva ku pfuneka wene. Kambe loko u yentxa swa ku biha, txhava, hikusa ti nyikiwe mfanelo kun’we ni ntamu wa ku khatisa lava va yentxaka swa ku biha. Tone ti tizrela Xikwembu Nkulukumba akuva ti khatisa lweyi a yentxaka swa ku biha.

5 Xileswo ku ni swivangelo leswinene swa ku va mi yingiseta tihosi, ku nga li ntsena hi ku va mi nga djuli kuva ti mi khatisa,* kambe ni leswaku mi tama mi va ni lipfalu ledzrinene. 6 Hi leswo swi yentxaka mi hakela ni tinemba; hikusa a tihosi i malandzra ya Xikwembu Nkulukumba akuva ti tizrela vhanu. 7 Nyikani hinkwavu leswi swi va fanelaka: Lweyi a londzraka tinemba, mu nyikani tinemba; lweyi a djulaka ku hakeliwa, mu hakelani; lweyi a djulaka ku yingisetiwa, mu yingisetani; lweyi a djulaka ku kombiwa xitxhavu, mu kombani xitxhavu.

8 Mi nga devhananeni ntxhumu loko ku nga li kuva mi zrandzranana; hikusa lweyi a zrandzraka mhunu mun’wana awa wu hetisisa nawu. 9 Hikusa a milawu leyi liki: “U nga txhuki u yentxa wumbuye, u nga txhuki u dlaya, u nga txhuki u yiva, u nga txhuki u navela swa vambeni”, ni nawu wun’wana ni wun’wana lowu nga kone, yi songiwa hi mazritu lawa: “U fanela ku zrandzra vhanu van’wana hi ndlela leyi u tizrandzraka ha yone.” 10 Lweyi a nga ni lizrandzru a nga va yentxeli swa ku biha vhanu van’wana, xileswo lweyi a zrandzraka van’wana a wu landzra ha hombe nawu.

11 Yentxani leswo hikusa ma swi tiva leswaku a nkama wa kuva mi pfuka a wuzrongweni wu tlhasile, a ku huluxiwa kwezru ku kusuhi ngopfu swinene ku tlula nkama lowu hi viki vapfumeli ha wone. 12 A wusiku byi ya ku heleni; byi ya ku xeni. Xileswo a hi tsrhikeni ku yentxa mintizro ya munyama, a hi yambaleni matlhazri ya livaningu. 13 A hi hanyeni hi ndlela leyinene ku fana ni loko ku li nhlikanhi, a hi fanelanga ku nghenela minkhuvu leyi kalaka yi nga lawuleki,* ku popswa, swiyentxo swa tingana hi tlhelo dzra tinkuku ni mahanyela ya ku biha* nakone hi nga holovisananeni kumbe ku kweletana. 14 Kambe xi yetiselani ha hombe xikombiso xa Hosi Yesu Kriste, nakone mi nga kunguhati ku hetisisa ku navela ka xidoho.*