Papela dzra ku sungula ledzri yaka ka Vatesalonika

5 Vamakwezru, mayelanu ni minkama ni tinguva, a swi vileli kuva mi tsraleliwa ntxhumu. 2 Hikusa n’wine mi swi tiva ha hombe leswaku a siku dzra Yehovha dzri ta ta ku fana ni muyivi lweyi a taka wusikwini. 3 Loko va ku: “Ku zrulile nakone ku sizrelelekile!” va ta helisiwa na va nga swi yimelanga ku fana ni ku lun’wa ka wansati lweyi a nga ni nyimba, nakone a va nge ti txhuka va huluka. 4 Kambe n’wine vamakwezru, a mi le munyameni lakakuva a siku ledzro dzri nga mi djuma ku fana ni leswi wuxa byi va djumisaka xiswone vayivi, 5 hikusa hinkwenu mi vana va livaningu ni vana va nhlikanhi. Hine a hi vana va wusiku nambi ku li va munyama.

6 Xileswo hi nga yetleleni ku fana ni lavan’wana hinkwavu va yetlelaka, kambe a hi tsrhameni na hi pfukile hi va hi tizrisa wuswikoti byezru bya ku yanakanya. 7 Hikusa lava va yetlelaka va yetlela wusikwini ni lava va popswaka va popswa ko wusikwini. 8 Kambe hine hi nga vana va nhlikanhi, a hi tizriseni wuswikoti byezru bya ku yanakanya, hi yambala lipfumelo ni lizrandzru swanga xisizrelelo xa xifuva, hi yambala ni kapaseti, ku nga dumbo dzra ku huluxiwa. 9 Hikusa Xikwembu Nkulukumba a nga hi hlawulelanga kuva a ta hi khatisa, kambe a hi hlawulele kuva hi ta huluxiwa hi kola ka leswi Hosi yezru Yesu Kriste a swi yentxiki. 10 Yene a hi felile, akuva nambiloko hi hanya kumbe hi fa,* hi hanya na yene. 11 Xileswo yanani mahlweni mi tiyisanana* mi tlhela mi yakana, hi lani mi buyaka na mi swi yentxa ha kone.

12 Ha mi kombela vamakwezru, leswaku mi hlonipha lava tizraka hi nkhinkhi makazri kwenu, lava mi kongomisaka* a Hosini ni ku mi kawuka. 13 Mi va nyika lisima ngopfu swinene ni ku va zrandzra hi kola ka ntizro wavu. Hanyisanani hi ku zrula. 14 Hi tlhelo dzrin’wana vamakwezru, ha mi tsratsriya leswaku mi kawuka* lava kalaka va nga yingiseti, mi txhavelela lava heliki ntamu,* mi pfuna lava tsraniki,* mi lehisela mbilu vhanu hinkwavu. 15 Ku nga vi na lweyi a tlheliselaka swa ku biha hi swa ku biha, kambe minkama hinkwayu tikazratelani ku yentxelana leswinene mi tlhela mi yentxela ni lavan’wana hinkwavu.

16 Tsrhamani na mi nyonxile. 17 Khongotani minkama hinkwayu. 18 Vanani lava tlangelaka. Leswo hi leswi Xikwembu Nkulukumba a swi yimelaka ka lava va nga valandzreli va Kriste Yesu. 19 Mi nga siveli moya wa Xikwembu Nkulukumba kuva wu tizra kwenu.* 20 Mi nga dzreli wuprofeta. 21 Kambelani mintxhumu hinkwayu; mi khomelela ka leswinene. 22 Fambelani kule ni hinkwaswu leswi bihiki.

23 Ingiki Xikwembu Nkulukumba wa ku zrula a nga mi xwengisa hi ku helela. Ingiki a moya wenu, a wutomi* byenu ni mizri wenu swi ngo hlayisiwa swi tsrhama na swi nga na xisolo, ku ya tlhasa nkama lowu Hosi yezru Yesu Kriste a taka tlhela a ta ha wone. 24 Lweyi a mi vitaniki awa dumbeka, nakunene a ta swi hetisisa.

25 Vamakwezru, yanani mahlweni mi hi khongotelela.

26 Losani vamakwezru hinkwavu hi ku n’qunta ka ku xwenga.

27 Na mi kombela hi vito dzra Hosi leswaku mi dondzrela vamakwezru hinkwavu papela ledzri.

28 A timpswalu letikulu ta Hosi yezru Yesu Kriste a ti ve na n’wine.