Papela dzra ku sungula ledzri yaka ka Vakorinte

5 Ni yingele leswaku a makazri kwenu ku ni lweyi a yentxaka swa tingana hi tlhelo dzra tinkuku,* a teke* nsati wa papayi wake, ku nga swiyentxo swa tingana leswi nambi ku li vamatiko va kalaka va nga swi yentxi. 2 Mo tikhuza hi leswo? Xana a mi nga fanelanga mi dzrila, akuva wanuna lweyi a yentxiki leswo a susiwa makazri kwenu? 3 Nambileswi ni nga liki halanu hi ku kongoma, a moya wanga wu kohalanu, nakone wanuna lweyi a yentxiki leswo kutani ni mu yavanyisile, ingiki hi loko ni li na n’wine halanu. 4 Loko mi hlengeletana hi vito dzra Hosi yezru Yesu, na mi tiva leswaku ni na n’wine hi le moyeni, na wo ntamu wa Hosi yezru Yesu wu na n’wine, 5 mi fanela ku nyikela mhunu yelweyo ka Sathana akuva ku susiwa nhlohlotelo wa ku biha lowu a wu tisiki bandleni, ku yentxela leswaku a moya lowunene lowu bandla dzri nga na wone wu huluxiwa hi siku dzra Hosi.

6 Leswi mi tikhuzaka ha swone a hi swinene. A mi swi tivi leswaku fermentu* dzritsrongo dzri kukumukisa mbila hinkwayu? 7 Susani fermentu dzra khale akuva mi ta va mbila leyimpshwa leyi ngeke na fermentu,* ku nga leswi nakunene mi nga swone. Hikusa nakunene, Kriste xihambana xezru xa Paxkwa a nyikeliwile swanga mhamba. 8 Xileswo a hi hambeni nkhuvu wa Paxkwa, ku nga li hi mapawu lama nga ni fermentu dzra khale, nambi hi lama nga ni fermentu dzra xidoho ni dzra wubihi, kambe a hi hambeni hi mapawu lama nga liki na fermentu, lama dumbekaka ni ya ntiyiso.

9 Ka papela dzranga ni mi tsralele leswaku mi tsrhika ku titlhanganisa* ni lava yentxaka swa tingana hi tlhelo dzra tinkuku.* 10 A ni hlayi kuva mi tsrhika ku titlhanganisa hi ku helela ni vhanu va misava leyi, lava yentxaka swa tingana hi tlhelo dzra tinkuku,* kumbe lava makwanga, kumbe vayivi, kumbe vagandzreli va swikwembu swa madzrimi. Loko a swi li xitasu, nakunene a swi ta djula kuva mi zruzra lani misaveni. 11 Kambe swoswi ni mi tsralela leswaku mi tsrhika ku titlhanganisa* ni mhunu lweyi a vitaniwaka makwezru, nakasi a yentxa swa tingana hi tlhelo dzra tinkuku,* kumbe mhunu wa makwanga, kumbe mugandzreli wa swikwembu swa madzrimi, kumbe muzruketeli, kumbe mpopswi, kumbe muyivi, nambi ku da mi nga di na yene mhunu wa ku tasu. 12 A hi wutiyanguleli byanga ku yavanyisa lava nga handle ka bandla. Kambe n’wine mi fanela ku yavanyisa lava nga ndzreni ka bandla, 13 na Xikwembu Nkulukumba a yavanyisa lava nga handle ka dzrone. “Susani mhunu lweyi a bihiki makazri kwenu.”