EZRA

1 Hi lembe dzra ku sungula dzra ku fuma ka Khorexe, Hosi ya Persiya, akuva ku hetiseka zritu dzra Yehovha ledzri a dzri hlayiki hi ku tizrisa Yeremiya, Yehovha a susumetele mbilu ya Khorexe Hosi ya Persiya akuva a yentxa leswaku a mfun’wini wake hinkwawu ku huweleliwa dzrungula ledzri tlheliki dzri yentxa hi ku tsraliwa, ledzri a dzri ku:

2 “Khorexe, Hosi ya Persiya, a li: ‘Yehovha, Xikwembu Nkulukumba wa matilo a ni nyike mimfumu hinkwayu ya misava, nakone a ni zrume kuva ni mu yakela yindlu a Yerusalema, a Yuda. 3 I mani kwenu lweyi a lumbaka vhanu vake? Ingiki Xikwembu Nkulukumba a nga va na yene, xileswo a a tlhantuke a ya Yerusalema, a Yuda, a ya pfuxeta* yindlu leyi a yi kumeka a Yerusalema, ku nga yindlu ya Yehovha, Xikwembu Nkulukumba wa Israyele lweyi a nga Xikwembu Nkulukumba wa ntiyiso. 4 Ingiki vapfi hinkwavu, swi nge na mhaka leswaku va tsrhama kwini, va nga yamukela ka vayakelani vavu a prata, woru, swifuyu ni mintxhumu yin’wana, ku patsra ni magandzrelo ya ku tizrandzrela akuva ma nyikeliwa ka yindlu ya Xikwembu Nkulukumba wa ntiyiso leyi a yi kumeka a Yerusalema.’”

5 A tinhloko ta mindangu ya Yuda ni ya Benjamini, kun’we ni vaprista ni Valevhi, ina, hinkwavu lava a moya wa Xikwembu Nkulukumba wu va susumeteliki, va tilulamiselile akuva va ya pfuxeta yindlu ya Yehovha leyi a yi li a Yerusalema. 6 A vayakelani vavu hinkwavu va va pfunile hi* ku va nyika swibya swa prata, swa woru, mintxhumu yavu, swifuyu ni mintxhumu yin’wana ya lisima, na ku nga hlayiwi a minyikelo hinkwayu ya ku tizrandzrela.

7 Hosi Khorexe a tlhele a leleta leswaku ku ya tekiwa swibya swa yindlu ya Yehovha, leswi Nebukadnetsara a swi susiki a Yerusalema a va a ya swi beka ka yindlu ya xikwembu xake. 8 Khorexe Hosi ya Persiya a beke Mitiredati mukhomi wa mali akuva a vonelela ku humesiwa ka swibya ni ku swi kontela, a va a swi nyiketa Xexibazari* muzrangeli wa Yuda.

9 Hi leyi nhlayu ya swibya swa kone: 30 wa swibya swa woru leswi hambiwiki swi fana ni mintsrhava, 1.000 wa swibya swa prata leswi hambiwiki swi fana ni mintsrhava, 29 wa swibya swin’wana,* 10 30 wa switijelana swa woru, 410 wa switijelana swa prata ni 1.000 wa swibya swin’wana. 11 A swibya hinkwaswu swa woru ni swa prata a swi li 5.400. Xexibazari a fambe ni swibya hinkwaswu leswo loko lava a va li wukazraweni va huma a Babilona va tlhelela a Yerusalema.

2 Lava i vhanu va le xifundzrankulu* lava humiki a Babilona ntsrhaku ka loko Hosi Nebukadnetsara a yise Vayuda a wukazraweni, va tlhelele a Yerusalema ni le Yuda, mun’wana ni mun’wana a doropeni dzrake. 2 A vazrangeli vavu a ku li Zerubabele, Yexuwa, Nehemiya, Seraya, Rehelaya, Mordekayi, Bilixani, Misipari, Bigivhayi, Rekhumu na Bahana.

A nhlayu ya vhanu va Israyele a yi patsra: 3 2.172 wa vana va Paroxi; 4 372 wa vana va Xefatiya; 5 775 wa vana va Araki; 6 2.812 wa vana va Yexuwa na Yowabu, vana va Pahati-mowabi; 7 1.254 wa vana va Elamu; 8 945 wa vana va Zatu; 9 760 wa vana va Zakayi; 10 642 wa vana va Bani; 11 623 wa vana va Bebayi; 12 1.222 wa vana va Azigadi; 13 666 wa vana va Adonikamu; 14 2.056 wa vana va Bigivhayi; 15 454 wa vana va Adini; 16 98 wa vana va Atere lava nga vatukulu va Ezekiya; 17 323 wa vana va Bezayi; 18 112 wa vana va Yora; 19 223 wa vana va Haxumi; 20 95 wa vana va Gibari; 21 123 wa vana va le Betlehema; 22 56 wa vana va Netofa; 23 128 wa vavanuna va le Anatoti; 24 42 wa vana va Azmavheti; 25 743 wa vana va le Kiriyati-yeyarimi, Khefira ni va le Beroti; 26 621 wa vana va le Rama ni va le Geba; 27 122 wa vavanuna va le Mikimasi; 28 223 wa vavanuna va le Betele ni va le Ayi; 29 52 wa vana va le Nebo; 30 156 wa vana va le Magibixi; 31 1.254 wa vana va Elamu lwemun’wana; 32 320 wa vana va Harimi; 33 725 wa vana va Lodi, Hadidi ni va Ono; 34 345 wa vana va le Yeriko; 35 ni 3.630 wa vana va le Senaya.

36 A nhlayu ya vaprista a ku li: 973 wa vana va Yedaya, va ndangu wa Yexuwa; 37 1.052 wa vana va Imeri; 38 1.247 wa vana va Paxahuru; 39 ni 1.017 wa vana va Harimi.

40 A nhlayu ya Valevhi a ku li 74 wa vana va Yexuwa ni va Kadimiyele, ka vana va Hodavhiya. 41 A nhlayu ya vayimbeleli a ku li 128 wa vana va Azafi. 42 A vana va vazrindzri va tinyangwa a ku li: vana va Xalumu, vana va Atere, vana va Talmoni, vana va Akube, vana va Hatita ni vana va Xobayi, hinkwavu a va li 139 wa vone.

43 A malandzra ya le tempeleni* a ku li: vana va Ziha, vana va Hasufa, vana va Tabawoti, 44 vana va Kerosi, vana va Siyaha, vana va Padoni, 45 vana va Lebana, vana va Hagaba, vana va Akube, 46 vana va Hagabu, vana va Salmayi, vana va Khanani, 47 vana va Gideli, vana va Gakhari, vana va Reyaya, 48 vana va Rezini, vana va Nekoda, vana va Gazamu, 49 vana va Uza, vana va Paseya, vana va Besayi, 50 vana va Asina, vana va Mewunimi, vana va Nefuxesimi, 51 vana va Bakibuki, vana va Hakufa, vana va Harihuri, 52 vana va Baziluti, vana va Mehida, vana va Harixa, 53 vana va Barikosi, vana va Sisera, vana va Tema, 54 vana va Neziya ni vana va Hatifa.

55 A vana va malandzra ya Solomoni a ku li: vana va Sotayi, vana va Sofereti, vana va Peruda, 56 vana va Yahala, vana va Darkoni, vana va Gideli, 57 vana va Xefatiya, vana va Hatili, vana va Pokhereti-hazebayimi ni vana va Ami.

58 A malandzra hinkwawu ya le tempeleni* ni vana va malandzra ya Solomoni a va li 392 wa vone.

59 A nxaxamelo wa lava va tlhantukiki na va sukela a Tela-mela, a Tela-harixa, a Kerubi, a Adoni ni le Imeri kambe va kalaka va nga swi kotanga ku tiyisekisa a lixaka dzravu ni lomu va humaka kone ni leswaku a va li Vaisrayele kumbe im-him, hi lava: 60 vana va Delaya, vana va Tobiya ni vana va Nekoda, a va li 652 wa vone. 61 Nakone ka vana va vaprista a ku li: vana va Habaya, vana va Hakozi ni vana va Barzilayi lweyi a tekiki nsati ka vana va Barzilayi lweyi wa Mugiliyadi, nakone a txhuliwe vito dzra papayi wa nsati wake. 62 Hinkwavu lava va djuletele lomu a mavito ya tinxaka tavu a ma tsraliwe kone akuva va tiyisekisa leswaku i va lixaka dzrini, kambe a va kumanga ntxhumu,* xileswo va tsrhikisiwe ku tizra swanga vaprista. 63 A govhernadori* a va byele leswaku loko ku nga si kumeka muprista wa kuva a vutisa Urimi ni Tumimi a va fanelanga va da mintxhumu ya ku xwengisisa.

64 A nhlayu ya nhlengeletanu hinkwayu a yi li 42.360, 65 na ku nga kontiwi swikazrawa swavu swa xinuna ni swa xisati, leswi a swi dzringana 7.337 wa swone; nakone a ku ni 200 wa vayimbeleli va xinuna ni va xisati. 66 A va ni 736 wa makavhalu, 245 wa mamulwa,* 67 435 wa makamela ni 6.720 wa timbongolo.

68 Loko va tlhase ka yindlu ya Yehovha a Yerusalema, van’we ka tinhloko ta mindangu va nyikele minyikelo ya ku tizrandzrela akuva ku pfuxetiwa yindlu ya Xikwembu Nkulukumba wa ntiyiso a mbangwini lowu a yi yakiwe ka wone a ku sunguleni. 69 Hi ku ya hi leswi a va li na swone, va nyikele 61.000 wa madrakma* ya woru, 5.000 wa mamina* ya prata ni 100 wa swiyambalu swa ku leha swa vaprista. Va swi nyikele lani ku bekiwaka kone wukosi bya ku pfuxeta tempele. 70 Hiloko a vaprista, Valevhi, vayimbeleli, vazrindzri va tinyangwa, vhanu van’wana, malandzra ya le tempeleni* ni Vaisrayele lavan’wana hinkwavu, va tsrhama madoropeni yavu.

3 Loko ku tlhase hweti ya wu 7 na kutani Vaisrayele* va li madoropeni yavu, va hlengeletanile a Yerusalema hi nkongometo wun’we. 2 Yexuwa n’wana wa Yehozadaki ni vapristakulobye, kun’we na Zerubabele n’wana wa Salatiyele ni vamakwavu, va sungule ku yaka altari dzra Xikwembu Nkulukumba wa Israyele, akuva va ta kota ku nyikela ka dzrone a magandzrelo ya ku hisiwa, hi lani swi tsraliwiki ha kone ka Nawu wa Moxe, nandzra wa Xikwembu Nkulukumba wa ntiyiso.

3 Nambileswi a va txhava vhanu va matiko lawa a ma va tsrandzrelile, va yake altari a mbangwini lowu a dzri yakiwe ka wone ku sunguleni va va va hisela Yehovha magandzrelo ka dzrone, magandzrelo ya ku hisiwa ya le mixweni ni ya le madambyeni. 4 Hiloko va tlangela Minkhuvu ya Mintsronga* hi lani swi tsraliwiki ha kone, nakone siku ni siku a va nyikela magandzrelo ya ku hisiwa hi ku ya hi nhlayu leyi bekiwiki. 5 Ntsrhaku ka leswo, va nyikela magandzrelo ya ku hisiwa ya siku ni siku, magandzrelo ya ku huma ka n’weti ni ya minkhuvu hinkwayu ya ku xwenga ya Yehovha, ku patsra ni magandzrelo ya ku tizrandzrela lawa a ma tisiwa hi hinkwavu lava hi ku swi zrandzra va nga nyikela magandzrelo ya ku tizrandzrela, ka Yehovha. 6 Ku sukela hi siku dzra ku sungula ka hweti ya wu 7 va sungule ku hisela Yehovha magandzrelo, nambileswi masungulo ya tempele dzra Yehovha a ma nga si na simekiwa.

7 Va teke mali va yi nyika vatsremi va mazribye ni lava a va hamba mintizro ya mavoko va va va teka swakuda, byala ni mafuzra ya minhlwazri va swi nyika Vasidoni ni Vatiri, hi kola ka leswi va va buyiseliki timhandzri ta minkedari hi le lwandle, ti suka Lebanoni ti ya Yopa, hi ku ya hi mpfumelelo lowu a va wu yamukele ka Khorexe, Hosi ya Persiya.

8 Hi lembe dzra wubidzri ka hweti ya wubidzri, ntsrhaku ka loko va tlhase kaya ka Xikwembu Nkulukumba wa ntiyiso, a Yerusalema, Zerubabele n’wana wa Salatiyele, na Yexuwa n’wana wa Yehozadaki kun’we ni vamakwavu, ku nga vaprista ni Valevhi, ni hinkwavu lava tlheleliki a Yerusalema na va buya hi le wukazraweni, va sungula ku yaka; va beke Valevhi va 20 wa malembe ku ya henhla akuva va va valaviseli va ntizro wa ku yaka a yindlu ya Yehovha. 9 Xileswo Yexuwa, vana vake ni vamakwavu, na Kadimiyele ni vana vake, lava hinkwavu a va li va lixaka dzra Yuda,* va patsranile akuva va lavisela ntizro wa ku yaka yindlu ya Xikwembu Nkulukumba wa ntiyiso, kun’we ni vana va Henadadi, vanavu ni vamakwavu, lava na vone a va li Valevhi.

10 Loko vayaki va hete ku hamba masungulo ya tempele dzra Yehovha, a vaprista, na va yambale mpahla yavu ya wuprista na va ni swipalapala,* ni Valevhi, vana va Azafi, na va ni matimbali,* va sekeleke va yima akuva va dzrumisa Yehovha hi ku landzra minkongomiso ya Davhida, Hosi ya Israyele. 11 Va sungula ku yimbelela hi ku txintxatxintxana va dzrumisa ni ku khensa Yehovha va ku: “Hikusa i munene; a lizrandzru dzrake dzra ku dumbeka ha Israyele i dzra hi lani ku nga helikiki.” Hiloko a vhanu hinkwavu va huwelela hi zritu ledzri tlakukiki va dzrumisa Yehovha, hikusa a masungulo ya yindlu ya Yehovha a ma simekiwile. 12 Vanyingi ka vaprista, ka Valevhi ni ka tinhloko ta mindangu ni vhanu lava kuliki hi ntanga lava voniki tempele dzra ku sungula, va dzrila ngopfu swinene loko va vona ku simekiwa ka masungulo ya tempele, nakasi van’wana lavanyingi a va huwelela ngopfu swinene hi ku nyonxa. 13 Xileswo, a nga kone lweyi a a kota ku hambanisa ku huwelela ka ku nyonxa ni ka ku dzrila, nakone vhanu a va huwelela ngopfu swinene lakakuva a pongwe dzravu a dzri twiwa ni le kule ngopfu swinene.

4 Loko valala va Yuda ni va Benjamini va tive leswaku lava buyiki hi le wukazraweni a va li ku yakeni ka tempele dzra Yehovha, Xikwembu Nkulukumba wa Israyele, 2 va tekela ku yela Zerubabele ni tinhloko ta mindangu, va tlhasa va va byela va ku: “Hi tsrhikani hi yaka na n’wine; hikusa na hine hi gandzrela Xikwembu Nkulukumba wenu ku fana na n’wine nakone hi nyikela magandzrelo kwake ku sukela a masikwini ya Esari-hadoni, Hosi ya Asiriya, lweyi a hi buyisiki halenu.” 3 Kambe Zerubabele na Yexuwa, kun’we ni tinhloko letin’wana ta mindangu ya Israyele, va va hlamula va ku: “A hi nge ti yaka na n’wine a yindlu ya Xikwembu Nkulukumba wezru, hikusa hi ta yaka wuswezru yindlu ya Yehovha, Xikwembu Nkulukumba wa Israyele, hi lani Khorexe Hosi ya Persiya a hi leletiki ha kone.”

4 Hi kola ka leswo, a vhanu va matiko ya le kusuhi a va tsrhamela ku heta Vayuda ntamu* ni ku zama ku va tsrhikisa ku yaka. 5 A va thola tindota akuva ti honetela makungu yavu a masikwini hinkwawu ya ku fuma ka Khorexe Hosi ya Persiya, ku ya tlhasa a ku fumeni ka Dariyosi Hosi ya Persiya. 6 A ku sunguleni ka ku fuma ka Ahasuwerusi, va tsrale papela dzra ku lumbeta lava tsrhamaka a Yuda ni le Yerusalema. 7 Nakone a masikwini ya Artaxerxi Hosi ya Persiya, Bixalamu, Mitiredati, Tabeyeli ni vatizrikulobye, va tsrale papela va dzri yisa ka hosi Artaxerxi. Va ndzrulutele papela ledzro hi Xiyaramayika na va tizrisa tsralela dzra Xiyaramayika.*

8 Rekhumu muzrangeli lwenkulu, na Ximixayi matsralana, va tsralele Hosi Artaxerxi papela akuva va lumbeta lava tsrhamaka a Yerusalema, hi lawa mazritu ya papela dzra kone: 9 (A papela a dzri li dzra Rekhumu muzrangeli lwenkulu na Ximixayi matsralana ni vatizrikulobye hinkwavu, ku nga vayavanyisi, malandzra ya govhernadori, vamatsralana, vhanu hinkwavu va le Erekhi, Vababilona, lava tsrhamaka a Susa, leswi liki, Vaelamu, 10 ni matiko man’wana lawa mutxhaviseki Asenapari, lweyi a a ni ndhuma a tlhela a va ni ntamu, a ma tekiki a ma yisa a wukazraweni a va a ma beka madoropeni ya Samariya ni le mimbangwini yin’wana ya muganga lowu nga ka Tlhelo dzra le Mpeladambu dzra Nambu wa Ewufrata,* kutani 11 ku landzrela mazritu ya papela ledzri va mu zrumeliki dzrone.)

“Hine malandzra yaku, lawa ma tsrhamaka ka muganga lowu nga ka Tlhelo dzra le Mpeladambu dzra Nambu wa Ewufrata, Hosi Artaxerxi hi ku tsralela leswi: 12 We hosi, tiva leswaku a Vayuda lava sukiki halanu va ta halenu mugangeni wezru, va tlhasile a Yerusalema. Va pfuxeta doropa ledzri vhanu va kone va nga vapfukeli nakone va bihiki, va hetisa mimuru nakone va lunghisa masungulo ya dzrone. 13 Kutani we hosi, tiva leswaku loko a doropa ledzri dzro pfuxetiwa ni mimuru ya dzrone yi hetiwa, a va nge he ti hakela tinemba, nambi ku li mintxhumu yin’wana leyi hosi yi taka yi djula, kutani leswo swi ta yentxa leswaku a wukosi bya wuhosi byi pumbeka. 14 Swanga hi leswi hi holeliwaka hi yindlu ya wuhosi,* a swi nge ti va swinene kuva hi khondla mavoko hi nga yentxi ntxhumu na hi vona hosi yi luzekeliwa, xileswo hi ku zrumelela madzrungula lawa, we hosi, 15 akuva ku yentxiwa wusetxhi ka mabuku ya matimu ya vakokwana vaku. A bukwini dzra matimu, we hosi, u ta gungula leswaku a doropa ledzri i doropa dzra vhanu va wupfukeli, ledzri vangaka swikazratu ka tihosi ni swifundzra ni leswaku ku sukela khale dzri ni vhanu lava hlohlotelaka wupfukeli. Hi leswi swi yentxiki leswaku a doropa ledzri dzri helisiwa. 16 We hosi, hi djula ku ku tivisa leswaku loko doropa ledzri dzro pfuxetiwa, ni mimuru ya dzrone yo hetiwa, a u nge he ti swi kota ku lawula nikutsrongo* a muganga lowu nga ka Tlhelo dzra le Mpeladambu dzra Nambu wa Ewufrata.”

17 A hosi yi zrumela nhlamulo ka Rekhumu muzrangeli lwenkulu, na Ximixayi matsralana ni le ka vatizrikulobye lava tsrhamaka a Samariya ni le ka mimbangu yin’wana ya muganga lowu nga ka Tlhelo dzra le Mpeladambu dzra Nambu wa Ewufrata, yi ku:

“Na mi losa! 18 A papela ledzri mi nga hi zrumelela dzrone dzri dondzriwe hi ndlela ya ku khanya a mahlweni kwanga. 19 Ni lelete leswaku ku hambiwa wusetxhi, nakone ku gunguliwe leswaku a vhanu va doropa ledzri i khale na va terekela tihosi, ka dzrone ku ni wupfukeli nakone vhanu va dzrone va tsrhamela ku pfuxa mpfilumpfilu. 20 A ku ni tihosi ta ntamu a Yerusalema, leti a ti fuma muganga hinkwawu lowu nga ka Tlhelo dzra le Mpeladambu dzra Nambu wa Ewufrata, leti a ku hakeliwa ka tone a tinemba ni mintxhumu yin’wana leyi tone a ti yi djula. 21 Xileswo byelani vavanuna lavo leswaku va yima ku yaka, nakone loko ni nge si na humesa xileleto xin’wana, a doropa ledzro dzri nga pfuxetiwi. 22 Mi nga pfumeleli leswaku nawu lowu wu tluliwa, akuva a hosi yi nga luzekeliwi hi lani ku tlulisaka.”

23 Xileswo ntsrhaku ka loko a papela dzra Hosi Artaxerxi dzri dondzriwile a mahlweni ka Rekhumu na Ximixayi matsralana ni le mahlweni ka vatizrikulobye, hi ku kahlula va yela Vayuda a Yerusalema akuva va ya va sindzrisa ku yima ku yaka. 24 A ve lanu a ntizro wa ku yaka yindlu ya Xikwembu Nkulukumba a Yerusalema wu yimiki kone, nakone wu tame wu yima ku ya tlhasa ka lembe dzra wubidzri dzra ku fuma ka Dariyosi Hosi ya Persiya.

5 Ntsrhaku ka leswo muprofeta Hagayi na muprofeta Zakariya ntukulu wa Idido, va profetele Vayuda lava a va tsrhama a Yuda ni le Yerusalema hi vito dzra Xikwembu Nkulukumba wa Israyele lweyi a a li na vone. 2 Kolanu, Zerubabele n’wana wa Salatiyele na Yexuwa n’wana wa Yehozadaki va tlhela va sungulisa ku pfuxeta yindlu ya Xikwembu Nkulukumba a Yerusalema nakone a vaprofeta va Xikwembu Nkulukumba a va li na vone futsrhi a va va seketela. 3 Hi nkama wolowo, Tatenayi govhernadori wa muganga lowu nga ka Tlhelo dzra le Mpeladambu dzra Nambu wa Ewufrata, Xetari-bozenayi ni vatizrikulobye va va yela va tlhasa va vutisa va ku: “I mani lweyi a mi nyikiki mpfumelelo wa ku yaka yindlu leyi ni ku hetisa mavhiga ya yone?” 4 Va tlhela va va vutisa va ku: “He wani mavito ya vavanuna lava va tizraka ka muyaku lowu?” 5 Kambe leswi Xikwembu Nkulukumba a a seketela* vakulukumba va Vayuda, Tatenayi ni vatizrikulobye a va va yimisanga, kambe va zrumele xib’iko ka Dariyosi va va va yimela ku yamukela papela dzra ximfumu mayelanu ni mhaka leyi.

6 Ledzri i papela ledzri zrumeliwiki Hosi Dariyosi ha Tatenayi govhernadori wa muganga lowu nga ka Tlhelo dzra le Mpeladambu dzra Nambu wa Ewufrata, na Xetari-bozenayi kun’we ni vatizrikulobye ni tihosana ta muganga lowu nga ka Tlhelo dzra le Mpeladambu dzra Nambu wa Ewufrata; 7 a xib’iko lexi va mu zrumeleliki xone a xi ku:

“Ka Hosi Dariyosi:

“Ingiki a ku zrula hinkwaku ku nga va na wene we hosi! 8 Swi tive we hosi, leswaku hi ye ka yindlu ya Xikwembu Nkulukumba lweyi a tlakukiki, le xifundzreni xa Yuda, nakone yi le ku pfuxetiweni hi mazribye lamakulu ni timhandzri leti va ti bekaka makhumbini. A vhanu va hamba ntizro lowu hi ku hiseka nakone wa famba hi kola ka ku tikazrata kwavu. 9 Kutani hi vutise vakulukumba vavu hi ku: ‘I mani lweyi a mi nyikiki mpfumelelo wa ku yaka yindlu leyi ni ku hetisa mavhiga ya yone?’ 10 Hi va vutise ni mavito yavu akuva hi ku tsralela we hosi, hi ku byela leswaku i vamani vavanuna lava va zrangelaka.

11 “Va hi hlamule va ku: ‘Hi malandzra ya Xikwembu Nkulukumba wa matilo ni misava nakone hi pfuxeta yindlu leyi yakiwiki khale swinene hi hosi ya kukazri leyikulu ya Israyele. 12 Nambitanu, leswi vapapayi vezru va hlundzrukisiki Xikwembu Nkulukumba wa matilo, a va nyikele mavokweni ya Nebukadnetsara lweyi wa Mukaldeya, Hosi ya Babilona lweyi a gilhitiki yindlu leyi a va a teka vhanu a va yisa wukazraweni a Babilona. 13 Kambe a lembeni dzra ku sungula dzra ku fuma ka Khorexe Hosi ya Babilona, Hosi Khorexe a humese nawu wa leswaku ku pfuxetiwa a yindlu ya Xikwembu Nkulukumba. 14 Handle ka leswo, Hosi Khorexe a humese swibya swa woru ni swa prata swa yindlu ya Xikwembu Nkulukumba a tempeleni dzra le Babilona, leswi Nebukadnetsara a a swi humesile a tempeleni dzra le Yerusalema a swi yisa a tempeleni dzra le Babilona. A swibya leswi swi nyiketiwe wanuna lweyi a vitaniwaka Xexibazari* lweyi Khorexe a mu bekiki swanga govhernadori. 15 Khorexe a mu byele a ku: “Teka swibya leswi u ya swi beka a tempeleni a Yerusalema, nakone ingiki a yindlu ya Xikwembu Nkulukumba yi nga tlhela yi pfuxetiwa a mbangwini lowu a yi li ka wone.” 16 Hiloko Xexibazari a buya a va a simeka masungulo ya yindlu ya Xikwembu Nkulukumba, a Yerusalema; ya ha li ku yakiweni ku sukela hi nkama wolowo ku ta ta tlhasa ni namunhla, kambe a yi si hela.’

17 “Kutani we hosi, loko u swi zrandzra a ku hambiwe wusetxhi ka wukosi bya le wuhosini* halanu Babilona, akuva ku voniwa leswaku Hosi Khorexe a wu humesile nawu wa leswaku ku pfuxetiwa yindlu leyi ya Xikwembu Nkulukumba a Yerusalema kumbe im-him; nakone ingiki we hosi u nga hi zrumelela xiboho lexi u taka xi teka a mhakeni leyi.”

6 Ku ve kolanu Hosi Dariyosi a humesiki xileleto, kutani ku hambiwa wusetxhi a mbangwini lowu ku bekiwaka leswi tsraliwiki* a Babilona, lomu a wukosi a byi bekiwa kone. 2 Kutani ku kumiwe buku a ndlwini ya wuhosi a Ekibatana, a xifundzreni xa Medo, ledzri ka dzrone a ku tsraliwe mazritu lawa:

3 “Hi lembe dzra ku sungula dzra ku fuma ka Hosi Khorexe, Hosi Khorexe a humese nawu lowu mayelanu ni yindlu ya Xikwembu Nkulukumba leyi nga Yerusalema: ‘A ku pfuxetiwi yindlu akuva ku nyikeliwa ka yone magandzrelo, nakone ingiki a masungulo ya yone ma nga simekiwa; yi ta va ni kolomu ka 26,7 wa mametru* hi ku tlakuka ni kolomu ka 26,7 wa mametru hi ku yanama. 4 Yi ta va ni mafila mazrazru ya ku hambiwa hi mazribye lamakulu ni dzrin’we dzra ku hambiwa hi timhandzri; a madixpeza ma ta hakeliwa hi yindlu ya wuhosi. 5 Handle ka leswo, a swibya swa woru ni swa prata swa le ndlwini ka Xikwembu Nkulukumba, leswi Nebukadnetsara a swi tekiki a tempeleni a Yerusalema a swi yisa Babilona, swi ta tlhelisiwa akuva swi ya bekiwa mbangwini wa swone a ndlwini ka Xikwembu Nkulukumba.’

6 “Xileswo, wene Tatenayi govhernadori wa muganga lowu nga ka Tlhelo dzra le Mpeladambu dzra Nambu wa Ewufrata ni vatizrikuloni, ku nga malandzra ya govhernadori wa muganga lowu nga ka Tlhelo dzra le Mpeladambu dzra Nambu wa Ewufrata, fambelani kule na kone. 7 Mi nga ngheneleli ka ntizro wa ku yaka yindlu ya Xikwembu Nkulukumba. A govhernadori ni vakulukumba va Vayuda va ta pfuxeta yindlu ya Xikwembu Nkulukumba a mbangwini lowu a yi li ka wone a ku sunguleni. 8 Xileswo, ni humesa nawu mayelanu ni leswi mi faneliki ku swi yentxa akuva a vakulukumba va Vayuda va kota ku pfuxeta yindlu leyo ya Xikwembu Nkulukumba, a madixpeza ya vavanuna volavo ma ta tekela ku hakeliwa hi wukosi bya le wuhosini, leswi liki, hi tinemba leti kumiwaka ka muganga lowu nga ka Tlhelo dzra le Mpeladambu dzra Nambu wa Ewufrata, akuva a ntizro wa ku yaka wu nga yimisiwi. 9 Va nyikani hinkwaswu leswi va swi vilelaka: Swihon’wana, tihamba ta xinuna ni swihambana, akuva va ta yentxela Xikwembu Nkulukumba wa le matilweni a magandzrelo ya ku hisiwa, ku patsra ni trigu, munyu, vhinyu ni mafuzra hi lani vaprista lava nga Yerusalema va taka hlaya ha kone; va nyikani siku ni siku na mi nga phazami, 10 akuva nkama ni nkama va nyikela magandzrelo lawa ma nyonxisaka Xikwembu Nkulukumba wa le matilweni, ni kuva va khongota akuva hosi ni vana va yone va hanya masiku ya ku leha. 11 Ni leleta ni leswaku a ku susiwi mhandzri ya vhiga dzra le kaya kwake a va a hayekiwa* ka yone, nakone a kaya kwake a ku ve xikoti xa vhanu hinkwavu,* hi mhaka ya leswi a tluliki nawu lowu. 12 Nakone ingiki Xikwembu Nkulukumba, lweyi a yentxiki leswaku vito dzrake dzri tsrhama mbangwini luwani, a nga wisa hosi yin’wana ni yin’wana kumbe vhanu lava tlulaka nawu lowu ni ku zama ku helisa a yindlu leyo ya Xikwembu Nkulukumba, leyi nga Yerusalema. Hi mine Dariyosi ni humesaka nawu lowu, nakone a wu landzriwi hi ku kahlula.”

13 Hiloko Tatenayi govhernadori wa muganga lowu nga ka Tlhelo dzra le Mpeladambu dzra Nambu wa Ewufrata, Xetari-bozenayi ni vatizrikulobye, va tekela ku yentxa hinkwaswu leswi Hosi Dariyosi a va byeliki swone. 14 Kutani a vakulukumba va Vayuda hi ku tiyisiwa hi mazritu ya muprofeta Hagayi na Zakariya ntukulu wa Idido, va ya mahlweni va yaka nakone a ntizro a wu tsrutsruma; va hete ku yaka hi ku landzra nawu wa Xikwembu Nkulukumba wa Israyele ni hi ku landzra nawu wa Khorexe, Dariyosi na Artaxerxi Hosi ya Persiya. 15 Va hete ku yaka tempele hi siku dzra wuzrazru, hi hweti ya Adari* a lembeni dzra wu 6 dzra ku fuma ka Hosi Dariyosi.

16 Hiloko Vaisrayele, vaprista, Valevhi ni hinkwavu lava buyiki hi le wukazraweni, hi ku nyonxa va tlangela ku khanguliwa ka tempele dzra Xikwembu Nkulukumba. 17 A ku khanguliweni ka yindlu ya Xikwembu Nkulukumba va nyikele 100 wa tihomu, 200 wa tihamba ta xinuna, 400 wa swihambana ni 12 wa swiphongo swanga gandzrelo dzra xidoho hi ku ya hi nhlayu ya tinxaka ta Israyele. 18 Nakone va yave vaprista hi ku ya hi mintlawa yavu ni Valevhi hi ku ya hi mintlawa yavu, akuva va tizrela Xikwembu Nkulukumba a Yerusalema, hi lani swi tsraliwiki ha kone ka buku dzra Moxe.

19 Kutani lava buyiki he wukazraweni va tlangele Paxkwa hi siku dzra wu 14 ka hweti ya ku sungula. 20 A vaprista ni Valevhi a va basile, hikusa ka Xikwembu Nkulukumba hinkwavu a va tibasisile. Va tidlayela gandzrelo dzra Paxkwa, va dlayela vapristakulobye kun’we ni hinkwavu lava buyiki hi le wukazraweni. 21 Kutani a Vaisrayele lava buyiki hi le wukazraweni va de gandzrelo kun’we ni hinkwavu lava tipatsriki na vone, lava tsrhikiki ku yentxa mintxhumu leyi kalaka yi nga basanga leyi a yi yentxiwa hi matiko lawa a va vundzramane na wone, akuva va kota ku gandzrela* Yehovha, Xikwembu Nkulukumba wa Israyele. 22 Hi ku nyonxa va tlangele ni Nkhuvu wa Mapawu Lawa ma Kalaka ma Nga Txheliwanga Fermentu ku dzringana 7 wa masiku, hikusa Yehovha a a yentxe leswaku va nyonxa ni ku yentxa leswaku a hosi ya Asiriya yi yima na vone, lakakuva yi seketele ntizro wa ku yaka yindlu ya Xikwembu Nkulukumba wa ntiyiso, ku nga Xikwembu Nkulukumba wa Israyele.

7 Ntsrhaku ka mintxhumu leyi, a ku fumeni ka Artaxerxi Hosi ya Persiya, Ezra a tlhelelile. Ezra* a a li n’wana wa Seraya, n’wana wa Azariya, n’wana wa Hilkiya, 2 n’wana wa Xalumu, n’wana wa Sadoki, n’wana wa Ahitubi, 3 n’wana wa Amariya, n’wana wa Azariya, n’wana wa Merayoti, 4 n’wana wa Zerakiya, n’wana Uzi, n’wana wa Buki, 5 n’wana wa Abixuwa, n’wana wa Feniyasi, n’wana wa Eliyazari, n’wana wa Aroni muprista lwenkulu. 6 Ezra lweyi a a buya hi le Babilona, a a li mukopiyari* lweyi a a ni wutivi byinyingi ngopfu swinene bya* Nawu wa Moxe lowu nyikeliwiki ha Yehovha Xikwembu Nkulukumba wa Israyele. Yehovha Xikwembu Nkulukumba wake a a mu pfuna, lakakuva a hosi yi mu nyike hinkwaswu leswi a swi kombeliki.

7 A lembeni dzra wu 7 dzra ku fuma ka Hosi Artaxerxi, a Vaisrayele va kukazri, vaprista, Valevhi, vayimbeleli, vazrindzri va tinyangwa ni malandzra ya le tempeleni* va tlhantuke va ya Yerusalema. 8 Kutani Ezra a tlhase Yerusalema hi hweti ya wuntlhanu, a lembeni dzra wu 7 dzra ku fuma ka hosi. 9 A suke Babilona hi siku dzra ku sungula ka hweti ya ku sungula a va a tlhasa Yerusalema hi siku dzra ku sungula ka hweti ya wuntlhanu, hikusa Xikwembu Nkulukumba wake a a li na yene.* 10 Ezra a a lulamisele mbilu yake* akuva a kambisisa Nawu wa Yehovha ni ku hanya ha wone ni kuva a dondzrisa nawu wake ni swiboho swa wuyavanyisi a Israyele.

11 A papela ledzri Hosi Artaxerxi a dzri nyikiki Ezra lweyi wa muprista ni mukopiyari, lweyi a a ni wutivi byinyingi mayelanu ni swileleto swa Yehovha ni milawu leyi a a yi nyike Vaisrayele, hi ledzri:

12 *“Mine Artaxerxi hosi ya tihosi, ni tsralela Ezra muprista ni mukopiyari* wa Nawu wa Xikwembu Nkulukumba wa le matilweni, ni ku: Ingiki a ku zrula loku hetisekiki ku nga va na wene. 13 Ni humese nawu wa ku pfumelela leswaku a Vaisrayele hinkwavu lava nga mfun’wini wanga, ku patsra ni vaprista ni Valevhi, va nga famba na wene a Yerusalema loko va swi djula. 14 Hikusa u zrumiwa ha mine hosi ni 7 wa vatlhavukanyisi vanga akuva u ya kambisisa leswaku a Nawu wa Xikwembu Nkulukumba lowu u nga na wone a mavokweni wa landzriwa a Yuda ni le Yerusalema kumbe im-him, 15 u fanela ku teka prata ni woru ledzri mine ni vatlhavukanyisi vanga hi dzri nyikeliki hi ku swi zrandzra ka Xikwembu Nkulukumba wa Israyele, lweyi a tsrhamaka a Yerusalema, 16 ku patsra ni prata hinkwadzru ni woru leswi u taka swi yamukela a xifundzreni hinkwaxu xa Babilona, kun’we ni minyikelo leyi vhanu ni vaprista, hi ku swi zrandzra, va yi nyikeliki akuva yi tizrisiwa a ndlwini ka Xikwembu Nkulukumba, a Yerusalema. 17 Nakone hi mali leyi, u fanela kuva hi ku kahlula u xava tihomu, tihamba ta xisati ni ta xinuna ni magandzrelo ya tinhleke ni ya swa ku nwa, lawa ma yelanaka na swone nakone u fanela ku swi nyikela ka altari ledzri nga ndlwini ka Xikwembu Nkulukumba waku a Yerusalema.

18 “Kasi a prata ni woru leswi taka sala, wene kun’we ni vamakwenu mi nga swi yentxa leswi mi swi vonaka na swi yampswa hi ku ya hi ku zrandzra ka Xikwembu Nkulukumba wenu. 19 A swibya hinkwaswu leswi mi nyikiwiki swone, u fanela ku swi nyikela a mahlweni ka Xikwembu Nkulukumba a Yerusalema akuva swi tizrisiwa a ndlwini ka Xikwembu Nkulukumba waku. 20 Nakone a mintxhumu leyin’wana hinkwayu leyi u fanelaka ku yi nyikela ka yindlu ya Xikwembu Nkulukumba waku, u ta yi xava hi wukosi bya le wuhosini.

21 “Mine Hosi Artaxerxi ni leleta n’wine hinkwenu vakhomi va mali va muganga lowu nga ka Tlhelo dzra le Mpeladambu dzra Nambu wa Ewufrata, leswaku hi ku kahlula mi fanela ku nyika Ezra, lweyi wa muprista ni mukopiyari* wa Nawu wa Xikwembu Nkulukumba wa le matilweni, hinkwaswu leswi a mi kombelaka swone, 22 Mi fanela ku mu nyika ku ya tlhasa ka 3.420 wa makilu ya prata,* 16.000 wa makilu ya trigu,* 2.200 wa malitru ya vhinyu,* 2.200 wa malitru ya mafuzra* ni munyu hi lani va djulaka ha kone. 23 Hinkwaswu leswi Xikwembu Nkulukumba wa matilo a leletiki leswaku swi yentxiwa mayelanu ni yindlu yake a swi yentxiwi hi ku hiseka akuva a nga hlundzrukeli vana va hosi ni vhanu lava nga mfun’wini wa yone. 24 Nakone swi tivani leswaku a swi pfumeleliwi kuva vaprista, Valevhi, vayimbeleli, vazrindzri va tinyangwa, malandzra ya le tempeleni,* kumbe vatizri va yindlu liyani ya Xikwembu Nkulukumba va hakelisiwa muxaka wun’wana ni wun’wana wa tinemba.

25 “Kutani, wene Ezra, hi ku landzra wutlhazri lebyi Xikwembu Nkulukumba waku a ku nyikiki byone,* beka vazrangeli va tribunali ni vayavanyisi akuva va yavanyisa vhanu hinkwavu lava tsrhamaka ka muganga lowu nga ka Tlhelo dzra le Mpeladambu dzra Nambu wa Ewufrata, leswi liki, hinkwavu lava tivaka Nawu wa Xikwembu Nkulukumba waku, nakone mi fanela ku wu dondzrisa hinkwavu lava kalaka va nga wu tivi. 26 Futsrhi lweyi a taka kala a nga wu landzri Nawu wa Xikwembu Nkulukumba waku ni nawu wa hosi, a fanela ku tekela ku khatisiwa, ku nga ha va hi lifu, hi ku hlongoliwa tikweni, ku hakelisiwa multa kumbe ku pfaleliwa a djele.”

27 A ku dzrumisiwi Yehovha, Xikwembu Nkulukumba wa vakokwana vezru, lweyi a susumeteliki mbilu ya hosi akuva yi navela ku xongisa yindlu ya Yehovha, leyi nga a Yerusalema! 28 Hi lizrandzru dzrake dzra ku dumbeka a yentxe leswaku ni nyonxeliwa hi hosi, vatlhavukanyisi va yone ni vazrangeli lava nga ni swikhundla leswi tlakukiki. Xileswo, swanga hi leswi a ni pfuniwa ha Yehovha Xikwembu Nkulukumba wanga, ni ve ni xixixi ni va ni hlengeleta vazrangeli va Israyele akuva ni famba na vone.

8 A tinhloko ta mindangu ni lava xaxametiwiki na tone hi ku ya hi mindangu, lava humiki na mine a Babilona hi nkama wa ku fuma ka Hosi Artaxerxi, hi leti: 2 ka vana va Feniyasi: Gerixomu; ka vana va Itamari: Daniyele; ka vana va Davhida: Hatuxi; 3 ka vana va Xekaniya, ka vana va Paroxi: Zakariya, lweyi a tsralisiwiki ni 150 wa vavanuna; 4 ka vana va Pahati-mowabi: Eliyeho-enayi n’wana wa Zerakiya, na a ni 200 wa vavanuna; 5 ka vana va Zatu: Xekaniya n’wana wa Yakaziyele, na a ni 300 wa vavanuna; 6 ka vana va Adini: Ebedi n’wana wa Yonathani na a ni 50 wa vavanuna; 7 ka vana va Elamu: Yexaya n’wana wa Ataliya, na a ni 70 wa vavanuna; 8 ka vana va Xefatiya: Zebadiya n’wana wa Mikayele, na a ni 80 wa vavanuna; 9 ka vana va Yowabu: Obadiya n’wana wa Yehiyele, na a ni 218 wa vavanuna; 10 ka vana va Bani: Xelomiti n’wana wa Yoxifiya, na a ni 160 wa vavanuna; 11 ka vana va Bebayi: Zakariya n’wana wa Bebayi, na a ni 28 wa vavanuna; 12 ka vana va Azigadi: Yohanani n’wana wa Hakatani, na a ni 110 wa vavanuna; 13 ka vana va Adonikamu, a mavito ya lava va viki va wugamu ku tlhelela hi lawa: Elifeleti, Yeyiyele na Xemaya, na va ni 60 wa vavanuna; 14 ni ka vana va Bigivhayi: Utayi na Zabudi, na va ni 70 wa vavanuna.

15 Ni va tlhanganise a nambyeni lowu tsrutsrumaka wu ya Ahavha nakone hi dzime mintxhatxha kolanu ku dzringana masiku mazrazru. Kambe loko ni kambele vhanu ni vaprista a ni kumanga Mulevhi ni mun’we. 16 Kutani ni zrumise leswaku ku ya vitaniwa Eliyezere, Ariyele, Xemaya, Elinathani, Yaribi, Elinathani, Natani, Zakariya na Mixulamu, lava a va li vazrangeli, na Yoyaribi na Elinathani lava va li vadondzrisi. 17 Hiloko ni va zrumela ka Idido muzrangeli wa mbangu lowu wu vitaniwaka Kasifiya. Ni va byela leswaku va ya kombela Idido ni vamakwavu, ku nga malandzra ya le tempeleni* lawa a ma le Kasifiya, akuva va hi buyisela malandzra leswaku ma ta tizra a ndlwini ka Xikwembu Nkulukumba wezru. 18 Leswi Xikwembu Nkulukumba a a li na hine, va hi buyisele wanuna wa ku tlhazriha ka vana va Makhili ntukulu wa Levhi n’wana wa Israyele, ku nga Xerebiya kun’we ni vanake ni vamakwavu, a va li 18 wa vavanuna; 19 na Haxabiya, na a na Yexaya ka va ka Merari, kun’we ni vamakwavu ni vanavu, a va li 20 wa vavanuna. 20 Nakone a ku ni 220 wa malandzra ya le tempeleni,* lawa Davhida ni vazrangeli va ma nyikeliki akuva ma pfuna Valevhi a ntizrweni wavu, hinkwavu a va tsralisiwe hi mavito yavu.

21 Hiloko ni huwelela leswaku hi titsrona swakuda a nambyeni wa Ahavha, akuva hi titsrongahata a mahlweni ka Xikwembu Nkulukumba wezru, ni ku kombela nkongomiso mayelanu ni liyendzro ledzri a hi ta dzri yentxa ni vanezru ni mintxhumu yezru hinkwayu. 22 Ni ve ni tingana ta ku kombela hosi leswaku yi hi nyika masotxha ni vakhandzriyi va makavhalu akuva va hi sizrelela ka valala vezru a ndleleni, hikusa a hi byele hosi hi ku: “Xikwembu Nkulukumba wezru a sizrelela hinkwavu lava va mu dumbaka, kambe a mahlundzru yake ni ntamu wake swi lwisana ni hinkwavu lava va mu tsrhikaka.” 23 Hi mhaka ya leswo, hi titsrone swakuda ni ku hamba swikombelo mayelanu ni mhaka leyi ka Xikwembu Nkulukumba wezru, nakone a swi twile swikombelo swezru.

24 Hiloko ni hlawula 12 wa vazrangeli va vaprista, ku nga Xerebiya, Haxabiya ni 10 wa vamakwavu. 25 Kutani ni va pimela prata, woru ni swibya, ku nga minyikelo ya hosi, vatlhavukanyisi va yone, vazrangeli ni Vaisrayele hinkwavu lava a va li kone kolanu, leyi va yi nyikeliki akuva yi tizrisiwa a ndlwini ka Xikwembu Nkulukumba wezru. 26 Ni pime ni va ni va nyika 22.230 wa makilu* ya prata, 100 wa swibya swa prata leswi a swi peza 68 wa makilu,* 3.420 wa makilu ya woru,* 27 na ku nga kontiwi 20 wa switijelana swa woru, leswi a swi dzringana 1.000 wa madariko* ni swibya swibidzri swa kobri ledzri basisiwiki swa ku pswhuka loku phatimaka, leswi nga ni lisima dzra ku fana ni dzra woru.

28 Hiloko ni va byela ni ku: “N’wine mi xwengile ka Yehovha, a swibya na swone swi xwengile nakone a prata ni woru i swihanano swa ku tizrandzrela, leswi nyikiwiki Yehovha, Xikwembu Nkulukumba wa vakokwana venu. 29 Yi bekisani ha hombe mintxhumu leyi ku ya tlhasa loko yi pimiwa a mimbangwini ya ku dela ka yone a ndlwini ka Yehovha, a mahlweni ka vazrangeli va vaprista, ka Valevhi ni le mahlweni ka vazrangeli va tinhloko ta mindangu ya Israyele, a Yerusalema.” 30 Kutani a vaprista ni Valevhi va yamukele prata, woru ni swibya leswi a swi pimiwile, akuva va swi yisa a Yerusalema a ndlwini ka Xikwembu Nkulukumba wezru.

31 Hi wugamu, hi siku dzra wu 12 ka hweti ya ku sungula, hi suke a nambyeni wa Ahavha hi ya Yerusalema, Xikwembu Nkulukumba wezru a a hi sizrelela nakone a hi huluxile ka valala vezru ni le ka mintlhamu a ndleleni. 32 Kutani hi tlhase Yerusalema hi va hi tsrhama kone ku dzringana masiku mazrazru. 33 Hi siku dzra wumune hi pime prata, woru ni swibya a ndlwini ka Xikwembu Nkulukumba wezru, hi va hi swi nyiketa muprista Meremoti n’wana wa Uriya, lweyi a a na Eliyazari n’wana wa Feniyasi ni Valevhi lava: Yozabadi n’wana wa Yexuwa, na Nowadiya n’wana wa Binuyi. 34 Hinkwaswu swi kontiwile ni ku pimiwa, wu va mpimu wa swone wu tsraliwa. 35 Lava va humiki wukazraweni, ku nga lava buyiki hi le wukazraweni, va nyikele magandzrelo ya ku hisiwa ka Xikwembu Nkulukumba wa Israyele, va humese 12 wa swihon’wana va swi humesela Vaisrayele hinkwavu, 96 wa tihamba ta xinuna, 77 wa swihamba ni 12 wa swiphongo, akuva swi va gandzrelo dzra xidoho; hinkwaswu swanga gandzrelo ledzri hiseliwiki Yehovha.

36 Hiloko hi nyikela swileleto swa hosi ka masatrapa ya hosi* ni vagovhernadori va muganga lowu nga ka Tlhelo dzra le Mpeladambu dzra Nambu wa Ewufrata, kutani va seketela vhanu ni ku nyikela leswi a swi vileleka a ndlwini ka Xikwembu Nkulukumba wa ntiyiso.

9 Ntsrhaku ka loko ku yentxiwe mintxhumu leyi, a vazrangeli va ni tela va tlhasa va ni byela va ku: “A vhanu va Israyele, vaprista ni Valevhi a va titsravuxanga ka vhanu va matiko lawa hi vundzramaniki na wone ni ka mintizro yavu ya ku nyenyentsa, mintizro ya Vakanana, Vaheti, Vaperezi, Vayebusi, Vaamoni, Vamowabu, Vaegipta ni ya Vaamori. 2 Va teke van’we ka vana va xisati va matiko wolawo akuva va va vasati vavu ni vasati va vanavu, kutani vone lixaka ledzri xwengiki, va tipatsre ni vhanu va matiko lawa hi vundzramaniki na wone. A vazrangeli ni malandzra ya govhernadori hi vone va yi yentxiki ngopfu mintxhumu leyi.”

3 Loko ni twe leswo ni handzrule mpahla yanga ni tsruvula misisi ni malepfu ni va ni tsrhamisa hansi na ni vaviseke ngopfu swinene. 4 Hiloko hinkwavu lava a va txhava mazritu ya Xikwembu Nkulukumba wa Israyele va hlengeletana va ni tsrandzrela, hi kola ka leswi vhanu lava tlheliki hi le wukazraweni va kalaka va nga dumbekanga, ni tame ni tsrhama na ni vaviseke ngopfu swinene ku ya tlhasa loko ku nyikeliwa gandzrelo dzra tinhleke dzra le madambyeni.

5 Loko ku tlhase nkama wa ku nyikela gandzrelo dzra tinhleke dzra le madambyeni, ni sekelekile na ni le xidzrilweni xanga ni mpahla yanga ya ku handzruka, ni khinsama ni tlakuxa mavoko ka Yehovha Xikwembu Nkulukumba wanga. 6 Ni va ni ku: We Xikwembu Nkulukumba wanga, ni dana ngopfu swinene lakakuva a ni tivoni na ni faneleka ku tsrhindzrekela a mahlweni kwaku hi xikhongoto, we Xikwembu Nkulukumba wanga, hikusa swidoho swezru i swinyingi ngopfu swinene nakone a minandzru yezru yi bulekelanile* yi za yi tlhasa matilweni. 7 Ku sukela a masikwini ya vakokwana vezru ku ta tlhasa ni namunhla a nandzru wezru i wukulu ngopfu swinene nakone hi kola ka swihoxo swezru, swa tihosi tezru ni swa vaprista vezru, hi tsrhamela ku nyikeliwa a mavokweni ya tihosi ta matiko man’wana hi dlayiwa hi xipada, hi yisiwa wukazraweni, hi tekeliwa mintxhumu yezru ni ku danisiwa, hi lani swi nga ha kone namunhla. 8 Kambe swoswi we Yehovha, Xikwembu Nkulukumba wezru, u hi kombe timpswalu swa nkamanyana, hi ku pfumelela leswaku ku va ni lava hulukaka ni ku hi nyika mbangu lowu sizrelelekiki a mbangwini waku wa ku xwenga, akuva we Xikwembu Nkulukumba wezru u hi yentxa hi nyonxa ni ku hi wisisanyana a wukazraweni byezru. 9 Hikusa nambileswi hi nga swikazrawa, we Xikwembu Nkulukumba wezru a u hi tsrhikanga a wukazraweni; kambe hi kola ka lizrandzru dzraku dzra ku dumbeka ha hine u yentxe leswaku tihosi ta Persiya ti hi komba timpswalu, akuva u hi nyika ntamu leswaku hi ku yakela yindlu we Xikwembu Nkulukumba wezru, ni ku pfuxeta mazrumbi leswaku hi va a Yuda ni le Yerusalema ku fana ni loko hi li ndzreni ka muru wa mazribye.

10 “Kambe swoswi, we Xikwembu Nkulukumba wezru, ntsrhaku ka mintxhumu leyi hinkwayu hi ta hlaya swa ku yini? Hikusa hi tsrhike milawu yaku, 11 leyi u hi nyikiki yone hi ku tizrisa malandzra yaku, ku nga vaprofeta, u ku: ‘A tiko ledzri mi nghenaka ka dzrone akuva mi dzri teka i tiko ledzri nyamiki, hi mhaka ya ku nyama ka vhanu va matiko lawa ma vundzramaniki na dzrone, hi kola ka swiyentxo swavu swa ku nyenyentsa va tate tiko hinkwadzru hi ku nyama kwavu. 12 Xileswo, mi nga nyikeli vanenu va xisati ka vanavu va xinuna nambi ku teka vanavu va xisati mi va nyika vanenu va xinuna; nakone mi nga txhuki mi yentxa ntxhumu lowu taka yentxa va va ni ku zrula ni kuva swi va fambela ha hombe kutani mi ta va ni ntamu, mi ta da leswinene leswi tiko dzri swi bindzrulaka, ni ku titekela dzrone dzri va dzra vanenu hi lani ku nga helikiki.’ 13 Kambe ntsrhaku ka hinkwaswu leswi swi hi humeleliki hi kola ka swiyentxo swezru swa ku biha ni hi kola ka nandzru wezru lowukulu, we Xikwembu Nkulukumba wezru a u hi khomanga hi ku ya hi swihoxo swezru, nakone u pfumelele leswaku hine hi nga lani hi huluka, 14 xana hi ta tlhela hi tlula milawu yaku hi kuva hi tekana ni vhanu* lava yentxaka mintxhumu leyi ya ku nyenyentsa? Xana a u nge ti hi hlundzrukela ngopfu swinene lakakuva u hi helisa hi ku helela ku nga sali ni mun’we wezru? 15 We Yehovha, Xikwembu Nkulukumba wa Israyele, u lulamile, hikusa u yentxe leswaku van’we vezru va huluka ku ta ta tlhasa ni namunhla. Hi lani mahlweni kwaku swanga lava nga ni nandzru, hikusa a swi koteki ku yima mahlweni kwaku hi mhaka ya xidoho lexi.”

10 Na Ezra a ha khongota ni ku hlaya swidoho swa vhanu vake, a dzrila na a khinsamile a mahlweni ka yindlu ya Xikwembu Nkulukumba wa ntiyiso, a xitsrhungu lexikulu xa Israyele, ku nga vavanuna, vavasati ni vana, xi hlengeletana xi mu tsrandzrela, nakone vhanu a va dzrila ngopfu swinene. 2 Hi kola ka leswo, Xekaniya n’wana wa Yehiyele wa vana va Elamu, a byela Ezra a ku: “A hi dumbekanga ka Xikwembu Nkulukumba wezru hi kuva hi teka* vavasati va matiko lawa hi vundzramaniki na wone, nambitanu ka ha ni dumbo a Israyele. 3 Kutani a hi hambeni xipfumelelanu na Xikwembu Nkulukumba wezru akuva hi hlongola vavasati hinkwavu ni vanavu, hi ku landzra nkongomiso wa Yehovha ni lava va txhavaka* milawu ya Xikwembu Nkulukumba wezru. Hi ta yentxa hi ku landzra Nawu. 4 Sekeleka, hikusa a mhaka leyi yi le ka wutiyanguleli byaku, kutani hine hi ta ku seketela. Vana ni xixixi u va u yentxa xa kukazri.”

5 Hiloko Ezra a sekeleka a va a yentxa leswaku a vazrangeli va vaprista, Valevhi ni Vaisrayele hinkwavu va hlambanya leswaku a va ta yentxa hi lani va hlayiki ha kone, xileswo va hamba xihlambanyu. 6 Kutani Ezra a suka mahlweni ka yindlu ya Xikwembu Nkulukumba wa ntiyiso a ya ka sala dzra* Yehohanani n’wana wa Eliyaxibi. Nambileswi a yiki kohala, a nga danga swakuda* nambi ku nwa mati swanga xikombiso xa leswaku a ha le xidzrilweni hi kola ka leswi vhanu lava va buyiki hi le wukazraweni va kalaka va nga dumbekanga.

7 Hiloko va huwelela a Yuda ni le Yerusalema akuva hinkwavu lava va buyiki hi le wukazraweni va tlhangana a Yerusalema; 8 Nakone hi kuya hi xiboho lexi tekiwiki hi vazrangeli ni vakulukumba, lweyi a a nge ti humelela a ndzreni ka masiku mazrazru a a ta tekeliwa mintxhumu yake nakone a a ta hlongoliwa ka nhlengeletanu ya vhanu lava va buyiki hi le wukazraweni. 9 Xileswo, a ndzreni ka masiku mazrazru, leswi liki hi siku dzra wu 20 ka hweti ya wu 9, vavanuna hinkwavu va le Yuda ni va le Benjamini va hlengeletanile a Yerusalema. Vhanu hinkwavu va tsrhame a gqekeni dzra yindlu ya Xikwembu Nkulukumba wa ntiyiso, na va zruzrumela hi kola ka mhaka leyi ni hi kola ka leswi a ku na mpfula ya yikulu.

10 Hiloko Ezra lweyi wa muprista a sekeleka a va a va byela a ku: “N’wine a mi dumbekanga, hikusa mi teke vavasati vamatiko, hi ndlela leyi mi yengesele nandzru wa Israyele. 11 Kutani hlayani swihoxo swenu ka Yehovha Xikwembu Nkulukumba wa vakokwana venu nakone yentxani ku zrandzra kwake, titsravuxani ka vhanu va matiko lawa hi vundzramaniki na wone ni ka vavasati volavo vamatiko.” 12 Hiloko nhlengeletanu hinkwayu yi hlamula hi zritu ledzri tlakukiki yi ku: “Hi ta yentxisa xiswoswi u hi byelisiki xiswone. 13 Nambitanu, ku ni vhanu vanyingi lani nakone hi le ka nguva ya timpfula. A swi koteki kuva hi tsrhama lani handle, nakone a mhaka leyi a hi ya ku lulamisiwa hi siku dzrin’we kumbe mabidzri, hikusa hi mu dohele ngopfu Xikwembu Nkulukumba a mhakeni leyi. 14 Xileswo, hi kombela leswaku ku sala vazrangeli ntsena va yimela nhlengeletanu hinkwayu nakone ingiki hinkwavu lava nga madoropeni yezru, lava tekiki vavasati vamatiko, va nga ta hi siku ledzri taka tsrimbiwa, kun’we ni vakulukumba ni vayavanyisi va doropa dzrin’wana ni dzrin’wana, ku ya tlhasa loko mahlundzru lamakulu ya Xikwembu Nkulukumba wezru lawa ma vangiwiki hi mhaka leyi ma hela.”

15 Kambe Yonathani n’wana wa Asahele, na Yahizeya n’wana wa Tikivha a va pfumelelananga na yone mhaka leyi, nakone Mixulamu na Xabetayi lava a va li Valevhi va va seketelile. 16 Kambe lava buyiki hi le wukazraweni va yentxe hi lani swi tsrimbiwiki ha kone; nakone Ezra lweyi wa muprista ni tinhloko ta mindangu, ku nga hinkwavu lava tsralisiwiki hi mavito, va hlengeletanile akuva va kambisisa mhaka leyi hi siku dzra ku sungula ka hweti ya wu 10; 17 kutani hi siku dzra ku sungula ka hweti ya ku sungula, va hete ku lulamisa timhaka ta vavanuna lava a va teke vavasati vamatiko. 18 Nakone ku gunguliwe leswaku van’we ka vana va vaprista a va teke vavasati vamatiko; ka vana va Yexuwa n’wana wa Yehozadaki, ni vamakwavu, ku tsrumbuliwe lava: Mahaseya, Eliyezere, Yaribi na Gedaliya. 19 Kambe va dumbise leswaku a va ta hlongola vasati vavu, nakone leswi a va ni nandzru, mun’wana ni mun’wana wavu a a ta susa hamba ya xinuna a ntlhambini wake a yi nyikela swanga gandzrelo dzra ku hakela nandzru.

20 Ka vana va Imeri a ku na Hanani na Zebadiya; 21 ka vana va Harimi a ku na Mahaseya, Eliya, Xemaya, Yehiyele na Uziya; 22 ka vana va Paxahuru a ku na Eliyohenayi, Mahaseya, Iximayele, Nethanele, Yozabadi na Eliyasa; 23 ka Valevhi a ku na Yozabadi, Ximeyi, Kelaya (leswi liki, Kelita), Petahiya, Yuda na Eliyezere; 24 ka vayimbeleli a ku na Eliyaxibi; ka vazrindzri va tinyangwa a ku na Xalumu, Telemu na Uri.

25 Nakone ka Vaisrayele, ka vana va Paroxi, a ku na Ramiya, Iziya, Malikiya, Miyamini, Eliyazari, Malikiya na Benaya; 26 ka vana va Elamu a ku na Mataniya, Zakariya, Yehiyele, Abidi, Yeremoti na Eliya; 27 ka vana va Zatu a ku na Eliyohenayi, Eliyaxibi, Mataniya, Yeremoti, Zabadi na Aziza; 28 ka vana va Bebayi a ku na Yehohanani, Hananiya, Zabayi na Atalayi; 29 ka vana va Bani a ku na Mixulamu, Maluki, Adaya, Yaxubi, Xeyali na Yeremoti; 30 ka vana va Pahati-mowabi a ku na Adhina, Kelali, Benaya, Mahaseya, Mataniya, Bezalele, Binuyi na Manasi; 31 ka vana va Harimi a ku na Eliyezere, Yixiya, Malikiya, Xemaya, Ximeyoni, 32 Benjamini, Maluki na Xemariya; 33 ka vana va Haxumi a ku na Matenayi, Matatahi, Zabadi, Elifeleti, Yeremayi, Manasi na Ximeyi; 34 ka vana va Bani a ku na Mahadayi, Amiramu, Uwele, 35 Benaya, Bedeya, Keluhi, 36 Vhaniya, Meremoti, Eliyaxibi, 37 Mataniya, Matenayi na Yahasu; 38 ka vana va Binuyi a ku na Ximeyi, 39 Xelemiya, Natani, Adaya, 40 Makhinadebayi, Xaxayi, Xarayi, 41 Azarele, Xelemiya, Xemariya, 42 Xalumu, Amariya na Yosefa; 43 nakone ka vana va Nebo a ku na Yeyiyele, Matitiya, Zabadi, Zebina, Yadayi, Yuwele na Benaya. 44 Hinkwavu lava a va teke vavasati va matiko nakone va hlongole vasati ni vanavu.