MIKIYA
1 A zritu dzra Yehovha ledzri Mikiya* wa le Morexeti a dzri yamukeliki a xivonisweni mayelanu na Samariya na Yerusalema a masikwini ya tihosi ta Yuda Yotamu, Akazi na Ezekiya, hi ledzri:
2 “N’wine hinkwenu yingelani!
Yingiseta, Wene misava ni hinkwaswu leswi nga kwaku,
Nakone Yehovha Hosi Leyi Tlakukiki a a mi yavanyisi,
Yehovha a a mi yavanyisi na a li tempeleni dzrake dzra ku xwenga.
3 Lavisani! Yehovha awa suka mbangwini wake;
A ta xika nakone a ta kandzretela mimbangu leyi tlakukiki ya misava.
4 A tinhava ti ta nyivilika a hansi kwake,
Ni minkova yi ta nyivilika
Ku fana ni xipapa xa wulombe bya tinyonxi a ndzrilweni,
Ku fana ni mati lawa ma tsrutsrumaka a mbangwini wa ku ngirimela.
5 Hinkwaswu leswo swi ta yentxeka hi mhaka ya wupfukeli bya Yakobe,
Hi mhaka ya swidoho swa yindlu ya Israyele.
I mani a nga ni nandzru hi kola ka wupfukeli bya Yakobe?
Xana a hi vhanu va le Samariya?
He yini mimbangu leyi ku gandzreliwaka ka yone swikwembu a Yuda?
Xana a hi Yerusalema?
6 Ni ta yentxa leswaku Samariya a va zrumbi,
A va mbangu wa ku byala ka wone minsinya ya mawuvha;
Ni ta txhulula mazribye yake a nkoveni
Nakone ni ta yentxa leswaku a masungulo yake ma voneka.
7 A swithombe swake hinkwaswu swi ta helisiwa,
Nakone a swihiwa hinkwaswu leswi a swi yamukeliki swanga hakelo* swi ta hisiwa.
Ni ta helisa swithombe swake hinkwaswu.
Hikusa a hlengelete mintxhumu leyi hi muholo wa wunghwavana,
Nakone yi ta tlhela yi va muholo wa tinghwavana.”
8 Hi mhaka ya leswo ni ta dzrila, ni ta ba nyandha,
Ni ta famba na ni nga yambalanga ntxhumu minkondzrweni ni le mizrini.
A xidzrilo xanga xi ta fana ni xa timbyana ta nhova,
Nakone a nyandha yanga yi ta fana ni ya maavhextruji.*
9 Hikusa a xilondzra xake a xi daheki;
Xi kule xi za xi ya tlhasa a Yuda.
A ntungu wu hangalake wu za wu ya tlhasa a Yerusalema, lani a vhanu vanga va tsrhamaka kone.
10 “Leswo mi nga swi tivisi a Gati;
Mi nga txhuki mi dzrila nikutsrongo.
Vumbulukelani ntsrhuzrini a Beti-afra.*
11 Yanani mahlweni na mi nga yambalanga ntxhumu, nakone na mi ni tingana, N’wine vayaki va le Xafiri.*
A vayaki va le Zanani a va humanga.*
Ku ta va ni xidzrilo a doropeni dzra Beti-ezeli, nakone a dzri nga ha ti mi seketela.
12 A vayaki va le Maroti a va yimela leswinene,*
Kambe Yehovha a yentxe leswaku wubihi byi xikela nyangweni wa Yerusalema.
13 Khungani n’qolo ka makavhalu, N’wine vahanyi va le Lakixi.
U ve masungulo ya xidoho ka n’wana wa xisati wa Siyoni,
Hikusa kwaku ku kumiwe swiyentxo swa wupfukeli swa Israyele.
14 Hi mhaka leyo u ta nyika Morexeti-gati swihiwa swa ku mu lelela ha swone.
A vhanu va le Akezibi va kanganyise tihosi ta Israyele.
15 Na ha ta mi tisela lweyi a taka mi hlula, N’wine vayaki va le Marexa.
A lidzrumu dzra Israyele dzri ta ya tlhasa ni le Adulamu.
16 Tsremetani misisi, nakone tsremetani mpandlha hi kola ka vanenu lava zrandzrekaka.
Vanani ni timpandlha ku fana ni magama,
Hikusa va yisiwe wukazraweni kule na n’wine.”
2 “Khombo ka lava va kunguhataka leswi kalaka swi nge swinene,
Lava kunguhataka leswi bihiki loko va yetlelile!
Loko byi xa va swi hetisisa,
Hikusa va ni ntamu ni wuswikoti bya ku hetisisa leswi va swi kunguhatiki.
2 Loko va djula masimu, vo ma teka;
Loko va navela yindlu, vo yi teka;
Va tizrisa wukanganyisi akuva va teka yindlu ya mhunu mun’wana,
Ni kuva va teka pfindla dzrake.
3 Xileswo, Yehovha a li:
‘Ni lulamiselela vhanu lava a khombo ledzri va nga tiki swi kota ku huluka ka dzrone.
A va nge he tikulisi hikusa ku ta va nkama wa khombo.
4 Hi siku ledzro, vhanu va ta hlaya xihlayahlaya mayelanu na wene
Nakone va ta dzrila ngopfu swinene hi kola ka xiyimu xaku.
Va ta ku: “Hi helisiwe hi ku helela!
A teke tiko dzrezru a dzri nyika vhanu van’wana, a hi tekele dzrone!
A masimu yezru a ma yavela vhanu lava kalaka va nga dumbeki.”
5 Xileswo, a u nge ti va ni mhunu lweyi a taka va ni ngoti ya ku pima ha yone
Akuva a yavela vhanu va* Yehovha tiko.
6 Vone va li: “Tsrhikani ku zrezra!”
“Mi nga ha tlheli mi vulavula hi mhaka leyi;
Hine a hi nge ti daniseka!”
7 N’wine tinxaka ta* Yakobe mi li:
“Xana a moya wa Yehovha wo kala wu nga ha lehisi mbilu?
Xana nakunene a ta yi yentxa mintxhumu leyi?”
Ma swi tiva leswaku ni dumbisa ku va yentxela mintxhumu leyinene lava va ni yingisetaka?
8 Kambe vhanu vanga, va ha ku ni pfukela ingiki hi loko vo va valala vanga.
Na mi nga tlhoti, mi susa xa ku xongisa ha xone xa lisima ka mpahla
Ya lava fambaka hi ku tikulisa ku fana ni vavanuna lava buyaka hi le yimpini na va hlulile.
9 Mi hlongola vavasati va vhanu va tiko dzranga ka tiyindlu tavu leti zrandzrekaka;
Mi tekela vanavu mintxhumu leyi ni va tovokisiki ha yone mi va mi nga ha va tlheliseli.
10 Sekelekani mi famba, hikusa a ku na mbangu wa ku wisela ka wone a tikweni ledzri.
Hikusa hi mhaka ya ku nyama ka dzrone dzri ta helisiwa, ku helisiwa loku vavisaka.
11 Loko mhunu a hlongolisela moya ni wukanganyisi a va a hemba a ku:
“Ni ta ku zrezrela mayelanu ni vhinyu ni byala lebyi popswanaka”,
Lweyo a ta va muzrezri lwemunene ka vhanu lava!
12 Nakunene ni ta mi hlengeleta hinkwenu, We Yakobe;
Handle ka ku ganaganeka, ni ta hlengeleta Vaisrayele lava taka sala.
Ni ta va yentxa leswaku va va ni wumun’we ku fana ni tihamba a xib’ayeni,
Ku fana ni ntlhambi a mbangwini wa ku byisela ka wone;
Kone ku ta va ni pongwe dzra vhanu vanyingi.’
13 Lweyi a pfulaka ndlela a ta va zrangela;
Va ta pfula ndlela va tsremakanya nyangwa, nakone va ta huma ha wone.
A hosi yavu yi ta khaluta hi le mahlweni kwavu;
Yehovha a ta va zrangela.”
3 Ni te: “Na kombela, yingelani n’wine tinhloko ta mindangu ya Yakobe,
Na n’wine vazrangeli va vhanu va Israyele.
Xana a mi nga fanelanga mi tiva leswi lulamiki?
2 Kambe n’wine mi nyenya leswi nga swinene mi zrandzra leswi bihiki;
Mi yevula xikhumba xa vhanu vanga mi va mi susa nyama ka mazrambu yavu.
3 Mi tlhela mi da vhanu vanga
Nakone mi yevula xikhumba xavu,
Mi tsrhovelela mazrambu yavu mi ma yentxa swikhemukhemu,
Ku fana ni leswi swi swekiwaka hi panela, ku fana ni nyama leyi nga paneleni dzra ku sweka hi dzrone.
4 Wa ta nkama lowu va taka kombela mpfunu ka Yehovha,
Kambe a nge ti va hlamula.
Hi nkama wolowo a nge ti va pfuna,
Hi mhaka ya wubihi byavu.
5 Yehovha a hlaya leswi mayelanu ni vaprofeta lava hambukisaka vhanu vanga,
Lava liki: “Ku zrula!” Loko va nyikiwa xa kukazri akuva va da,*
Kambe va pfuxa yimpi ni lweyi a kalaka a nga peti ntxhumu a non’wini wavu va ku:*
6 ‘Mi ta va munyameni ku fana ni le wusikwini;
Kwenu ku to va munyama ntsena, a mi nge he pfhumbati.
A vaprofeta va ta peleliwa hi dambu,
Nakone a nhlikanhi kwavu wu ta ndzruluka munyama.
7 A vavoni va swivoniso va ta daniseka.
Nakone lava pfhumbataka va ta khomiseka tingana.
Hinkwavu swi ta djula va tipfala minomu,
Hikuva Xikwembu Nkulukumba a nge ti va hlamula.’”
8 Loko ku li mine ni ve ni ntamu ngopfu swinene hi kola ka moya wa Yehovha,
Ni wululami ni xixixi,
Akuva ni byela Yakobe a wupfukeli byake, ni kuva ni byela Israyele a xidoho xake.
9 Ni kombela mi yingela leswi, n’wine tinhloko ta mindangu ya tinxaka ta Yakobe,
Na n’wine vazrangeli va vhanu va Israyele,
Mi nyenyaka leswi lulamiki nakone mi soholotaka hinkwaswu leswi nga swinene,
10 Akuva mi yaka Siyoni mi halata ngati, akuva mi yaka Yerusalema mi hamba mintxhumu leyi kalaka yi nga lulamanga.
11 A vazrangeli venu va yavanyisa ntsena loko va xaviwile,
A vaprista venu va dondzrisa ntsena loko vhanu va va hakelile,
Nakone a vaprofeta venu va pfhumbata ntsena loko vhanu va va hakela mali.
Nambitanu, va ha tama va hlaya leswaku va pfuniwa ha Yehovha, va ku:
“Xana Yehovha a nga na hine?
A ku na khombo ni dzrin’we ledzri taka hi wela.”
12 Xileswo, hi mhaka yenu
Siyoni a ta dzrimiwa ku fana ni masimu,
Yerusalema a ta va zrumbi,
Nakone a nhava ya yindlu* ya Xikwembu Nkulukumba yi ta fana ni mimbangu leyi tlakukiki a nhoveni.
4 A masikwini ya wugamu,
A nhava ya yindlu ya Yehovha
Yi ta simekiwa yi tiya a henhla wugan’wini bya tinhava
Nakone yi ta tlakuxiwa a henhla ka switsrunga,
Futsrhi a switsrhungu swi ta ya ka yone.
2 Matiko manyingi ma ta ya ku yone nakone ma ta ku:
“Tanani, a hi tlhantukeleni nhaveni ya Yehovha
Ni le ndlwini ya Xikwembu Nkulukumba wa Yakobe.
Yene a ta hi dondzrisa tindlela take,
Nakone hi ta famba tindleleni take.”
Hikusa nawu wu ta huma Siyoni,
Ni zritu dzra Yehovha dzri ta huma Yerusalema.
3 A ta yavanyisa a xikazri ka matiko manyingi
A ta lulamisa timhaka ta matiko ya ntamu lawa ma nga kusuhi ni lawa ma nga kule.
Va ta ndzruluta swipada swavu swi va swikomu,*
Ni matlhazri yavu ma va masikela.
A ku na tiko ledzri taka lwa ni tiko dzrin’wana,
Futsrhi a va nge he ti dondzrela ku lwa yimpi.
4 Mun’wana ni mun’wana a ta tsrhama hansi ka nsinya wake wa mawuvha ni le hansi ka nkuwa wake,
Na ku nge na mhunu lweyi a va txhavisaka,
Hikusa *Yehovha wa makhandzra a hlaye swoswo.
5 Hikusa vhanu hinkwavu va ta famba, mun’wana ni mun’wana hi vito dzra xikwembu xake,
Kambe hine hi ta famba hi vito dzra Yehovha Xikwembu Nkulukumba wezru, hi lani ku nga helikiki.
6 “Hi siku ledzro”, ku hlaya Yehovha,
“Ni ta hlengeleta lava a va khuta,
Nakone ni ta hlengeleta lava a va hangalakile,
Kun’we ni lava ni va khatisiki.
7 Ni ta yentxa leswaku lava a va khuta va sala,
Ni leswaku lava yisiwiki kule va va tiko dzra ntamu;
Nakone Yehovha a ta va fuma na a li Nhaveni ya Siyoni,
Ku sukela swoswi ni hi lani ku nga helikiki.
8 Loko ku li wene, Wene xihondzro lexi sizrelelaka ntlhambi,
Nhava ya n’wana wa xisati wa* Siyoni,
A mfumu wa le ku sunguleni wu ta tlhela, ina, wu ta tlhela wu va waku,
Mfumu lowu lumbaka n’wana wa xisati wa Yerusalema.
9 Ha yini u huwelela?
Xana a wu na hosi?
Ke fa mutlhavukanyisi waku?
Xana hi leswo swi ku yentxiki u twa ku vavisa ku fana ni wansati lweyi a nga ku phulukeni?
10 Konya, Wene n’wana wa xisati wa Siyoni,
Ku fana ni wansati lweyi a nga ku phulukeni,
Hikusa swoswi u ta huma doropeni u ya tsrhama ntlhaveni,
U ta famba u ya tlhasa Babilona,
Nakone kohala u ta ntsrhunxiwa;
Kohala, Yehovha a ta ku tizrula a mavokweni ya valala vaku.
11 A matiko manyingi ma ta hlengeletiwa akuva ma lwa na wene;
Wone ma ta ku: ‘Siyoni a a danisiwi,
Nakone ingiki hi nga swi vona na swi mu yentxekela.’
12 Kambe a va swi tivi leswaku i yini leswi Yehovha a swi pimisaka,
Nambi ku twisisa nkongometo wake;
A ta va hlengeleta ku fana ni tinyandzra ta trigu leti ta ha ka ku tsremiwa, a ti yisa mbangwini wa ku hehezrela ka wone.
13 Wene n’wana wa xisati wa Siyoni, sekeleka nakone hula trigu;
Hikusa ni ta yentxa leswaku timhondzro taku ti va ta nsimbi
Ni masondzro yaku ma va ya kobri,
Kutani wene u ta gindletela vhanu vanyingi.
U ta nyika Yehovha pfindla dzravu ledzri va ndzri kumiki hi wukanganyisi,
Nakone a mintxhumu yavu u ta yi nyika Hosi ya ntiyiso ya misava hinkwayu.”
5 “N’wine mi le ku titsremeleleni,
N’wine vayaki va doropa ledzri hlaseliwaka;
Hi tsrandzreliwile.
Mi ba wuso bya muyavanyisi wa Israyele hi nhonga.
2 Nakone Wene Betlehema wa Efrata,
Wene u nga ntsrongo ngopfu swinene akuva u hamba xiyenge xa madoropa ya Yuda,
Kwaku ku ta huma lweyi a taka va mufumi wa Israyele,
Lweyi a masungulo yake ma nga ya khale ngopfu swinene.
3 Xileswo, Xikwembu Nkulukumba a ta va tsrhika
Ku ya tlhasa nkameni lowu lweyi a fanelaka ku phuluka a taka phuluka ha wone.
Nakone vamakwavu lava saliki va ta tlhelela ka vhanu va Israyele.
4 A ta yima, nakone a ta byisa vhanu vake hi ntamu wa Yehovha,
Hi wukulu bya vito dzra Yehovha Xikwembu Nkulukumba wake.
Kutani va ta hanya na va sizrelelekile,
Hikusa a wukulu byake byi ta tlhasa ni le mimbangwini ya le kule swinene ya misava.
5 Nakone a ta tisa ku zrula.
Loko Muasiriya a hlasela tiko dzrezru ni ku gilhita swihondzro swezru leswi tiyisiwiki,
Hi ta simeka 7 wa vabyisi, ina, 8 wa vazrangeli va vhanu akuva va lwa na yene.
6 Va ta byisa tiko dzra Asiriya hi xipada,
Ni tiko dzra Nimirodi a tinyangweni ta* dzrone.
Nakone a ta hi ntsrhunxa ka Muasiriya,
Loko a hlasela tiko dzrezru ni ku nghena mbangwini wezru.
7 A vatukulu va Yakobe lava taka sala va ta va xikazri ka vhanu vanyingi,
Ku fana ni mbezre leyi pfaka hi ka Yehovha,
Ku fana ni mpfula leyikulu leyi nelaka swimilana,
Na yi nga zrumiwanga hi mhunu
Nambi ku lawuliwa hi vhanu.
8 A vatukulu va Yakobe lava saliki va ta va xikazri ka matiko,
A xikazri ka vhanu vanyingi,
Ku fana ni nghonyama leyi nga xikazri ka swihazri swa nhova,
Ku fana ni xinghonyamana lexi nga xikazri ka ntlhambi wa tihamba,
Leswi khalutaka swi hlasela ni ku hahlulela;
Nakone a nga kone lweyi a taka va huluxa.
9 U ta hlula lava lwisanaka na wene,
Nakone a valala vaku hinkwavu va ta helisiwa.”
10 “Hi siku ledzro”, ku hlaya Yehovha,
“Ni ta helisa makavhalu yenu a makazri kwenu nakone ni ta helisa tin’qolo tenu ta yimpi.
11 Ni ta helisa madoropa ya le tikweni dzraku
Nakone ni ta helisa mimbangu yenu hinkwayu leyi tiyisiwiki.
12 Ni ta helisa wuloyi lebyi u byi yentxaka,*
Futsrhi a xikazri kwaku a ku nge ti sala ni mun’we lweyi a hambaka masalamusi.
13 Ni ta helisa swithombe leswi vatliwiki ni tinsika* tenu ta ku xwenga a makazri kwenu,
Nakone a mi nge he swi khinsameli swithombe leswi mi swi hambiki.
14 Ni ta simula timhandzri tenu ta ku xwenga* a makazri kwenu
Nakone ni ta helisa madoropa yenu.
15 Na ni hlundzruki ngopfu swinene,
Ni ta khatisa matiko lawa ma kalaka ma nga ni yingiseti.”
6 Ni kombela mi yingiseta leswi Yehovha a swi hlayaka.
Sekelekani mi hlaya mhaka yenu a mahlweni ka tinhava,
Nakone ingiki a maganga ma nga yingela zritu dzrenu.
2 Yingelani mhaka ya Yehovha N’wine tinhava,
N’wine masungulo lama tiyiki ya misava,
Hikusa Yehovha a ni mhaka leyi a lwisanaka ni vhanu vake ha yone;
A ta lwisana na Israyele hi ku hlaya leswi:
3 “Vhanu vanga, ne mi honela yini?
Ne yentxa yini akuva ni mi kazralisa?
Nyikelani wumboni lebyi kanetanaka na mine.
4 Hikusa ni mi humese tikweni dzra Egipta
Nakone ni mi tizrule a tikweni dzra wukazrawa;
Ni zrume Moxe, Aroni na Miriyamu akuva va mi zrangela.
5 Vhanu vanga, ni kombela mi dzrimuka leswi Balaki hosi ya Mowabu a swi dumbisiki,
Ni leswi Balama n’wana wa Beyori a mu hlamuliki swone,
Leswi yentxekiki ku sukela a Xitimi ku ya tlhasa a Giligala,
Akuva mi tiva swiyentxo swa Yehovha leswi lulamiki.”
6 Ni ta ya mahlweni ka Yehovha na ni tamele yini?
Ni ta khinsama mahlweni ka Xikwembu Nkulukumba lweyi a tsrhamaka henhlahenhla na ni ni yini?
Xana ni ta ya mahlweni kwake na ni ni magandzrelo ya ku hisiwa,
Ni swihon’wana swa lembe dzrin’we?
7 Xana Yehovha a ta nyonxisiwa hi ku va tihamba ti li tinyingi,*
Ni mafuzra ya manyingi ngopfu swinene ya ku fana ni milambu?
Xana ni ta nyikela n’wananga wa mativula hi mhaka ya wupfukeli byanga,
Ni ta nyikela n’wananga hi mhaka ya xidoho xanga?
8 Wene mhunu, Yehovha a ku byelile leswi nga swinene.
Kasi i yini leswi a swi djulaka kwaku?
A djula ntsena leswaku u yentxa leswi lulamiki, u zrandzra wunene,*
Ni kuva u famba na Xikwembu Nkulukumba waku hi ku titsrongahata!
9 A zritu dzra Yehovha dzra huwelela a doropeni,
Lava va nga ni wutlhazri va ta txhava vito dzraku,
Yingisetani xikhatiso ni lweyi a xi nyikeliki.*
10 Xana a kaya ka mhunu lweyi a yentxaka mintxhumu ya ku biha ka ha ni wukosi lebyi a byi kumiki hi ku yentxa mintxhumu leyi bihiki,
Ni mpimu wa efa* lowu pumbiwiki nakone wu nyenyentsaka?
11 Xana ni nga va lweyi a basiki na ni ni balansa ledzri kanganyisaka,
Na ni ni nkwama wa mazribye ya ku pima ha wone lawa ma kanganyisaka?
12 Hikusa vhanu lava ganyiki va doropa ledzro va tale hi madzolonga,
Nakone lava va tsrhamaka ka dzrone va hemba;
Hi minomu yavu va vulavula madzrimi.
13 “Xileswo ni ta ku ba ni va ni ku vavisa,
Ni ta ku siya na wu hohlokile hi mhaka ya swidoho swaku.
14 U ta da, kambe a u nge ti xuzra.
U ta tama u twa ndlala,
U ta zama ku beka mintxhumu yaku ka mbangu lowu hlayisekiki, kambe a u nge ti swi kota ku yi huluxa,
Nakone leswi u taka kota ku swi teka, ni ta tsrhika valala vaku va swi helisa.
15 U ta byala mbewu kambe a u nge ti tsrhovela.
U ta pswanyetela mihandzru ya nsinya wa nhlwazri yi* humetela mafuzra kambe a u nge ti ma tizrisa mafuzra ya kone;
U ta pswanyetela mawuvha kambe a u nge ti nwa vhinyu dzra kone.
16 Hikusa n’wine mi landzrela swileleto swa Omiri ni swiyentxo hinkwaswu swa yindlu ya Akabe,
Nakone mi famba hi ku landzra swileleto swavu.
Xileswo, a vhanu va ta txhava hi mhaka ya leswi ni taka ku yentxa swone,
Nakone lava va tsrhamaka ka dzrone va ta beliwa minoti*
Kutani mi ta yeyisiwa hi vhanu.”
7 Khombo kwanga! Ni fana ni lweyi,
Ntsrhaku ka loko ku tsrhoveliwe mihandzru ya malanga
Ni ku hlengeleta mawuvha lama saliki ntsrhaku ka ntsrhovelo,
A kalaka a nga kumi nambi xitxatxa xin’we xa mawuvha akuva a da,
Nambi kuwa ledzri wupfiki ledzri a dzri* navelaka ngopfu swinene.
2 Lweyi wa ku dumbeka a nga ha li kone misaveni;
A nga kone lweyi a lulamiki xikazri ka vhanu.
Hinkwavu va tumbelela vhanu van’wana akuva va va dlaya.
Mun’wana ni mun’wana a hlota* makwavu akuva a mu phasa hi nkukutu.*
3 A mavoko yavu ma lulamele ku yentxa swa ku biha;
A muzrangeli a koxa swihiwa,
A muyavanyisi a djula ku xaviwa akuva a yavanyisa
A mhunu wa xiyimu xa le henhla a hlaya leswi a swi djulaka,*
Nakone vone va kunguhata leswo na va li xikan’we.
4 A wa munene wa kone kwavu a fana ni mitwa,
A wa ku lulama ku tlula hinkwavu a bihe ku tlula ni muru wa mitwa.
Dzri ta tlhasa siku ledzri tivisiwiki hi vazrindzri vavu ni siku dzra ku yavanyisiwa kwavu.
Xileswo hinkwavu va ta txhava ngopfu swinene.
5 U nga vi ni lipfumelo ka munghanu waku
Nambi ku dumba munghanu waku wa le kusuhi.
U nga byeli wansati lweyi a yetleliki a xifuveni xaku a swihundla swaku.
6 Hikusa a n’wana wa xinuna a yeyisa papayi wake,
A n’wana wa xisati a lwisana ni mamana wake,
A n’wingi a lwisana ni n’wingi wake
A valala va mhunu va ta va va ndangu wake.
7 Kambe loko ku li mine, ni ta zrindzra ni yimela *Yehovha.
Hi ku lehisa mbilu, ni ta yimela Xikwembu Nkulukumba lweyi a ni huluxaka,
Xikwembu Nkulukumba wanga a ta ni yingela.
8 U nga nyonxi hi mhaka yanga, We nala* wanga.
Nambileswi ni wiki, ni ta sekeleka;
Nambileswi ni tsrhamaka a munyameni, Yehovha a ta va livaningu dzranga.
9 Ni ta tiyisela mahlundzru ya Yehovha,
Hikusa ni mu dohelile,
Ku ya tlhasa loko a ni yimelela ni ku ni komba wululami.
Yene a ta ni yisa livaningwini;
Ni ta vona wululami byake.
10 Nala wanga na yene a ta swi vona leswo,
Lweyi a ni byeliki leswi:
“A kwini Yehovha Xikwembu Nkulukumba waku?” A ta daniseka.
Ni ta mu lavisa
Kutani a ta kandzreteliwa ku fana ni madaka a ndleleni.
11 Ku ta va siku dzra kuva a mimuru yaku ya mazribye yi yakiwa;
Hi siku ledzro a ndzrelekanu wu ta yengeseliwa.*
12 Hi siku ledzro va ta ta kwaku
Ku sukela a Asiriya ni ka madoropa ya Egipta,
Ku sukela a Egipta ku ya tlhasa a Nambyeni;*
Ku sukela ka lwandle dzrin’wana ku ya ka lwandle dzrin’wana ni ku sukela ka nhava yin’wana ku ya ka nhava yin’wana.
13 Nakone a tiko dzri ta sala na dzri li zrumbi hi mhaka ya vahanyi va dzrone,
Hi mhaka ya leswi va swi yentxiki.*
14 Hi nhonga yaku, byisa vhanu vaku ni ntlhambi wa pfindla dzraku,
Lowu tsrhamaka wuswawone a nhoveni, a xikazri ka nsimu ya minsinya leyi pswalaka mihandzru.
A va di a Baxani ni le Giliyadi ku fana ni khale.
15 “Ni ta ku komba mintxhumu ya ku hlamalisa,
Ku fana ni masiku lawa u humiki ha wone a tikweni dzra Egipta.
16 A matiko ma ta swi vona nakone ma ta daniseka nambileswi ma nga ni ntamu.
Ma ta tikhoma xihlaya;*
Ma ta fa tindleve.
17 Ma ta nampswa ntsrhuzri ku fana ni tinyoka;
Ku fana ni swihazri leswi kokovaka swa misava, ma ta huma na ma zruzrumela a mimbangwini leyi ma tumbeliki ka yone.
Ma ta ta ka Yehovha Xikwembu Nkulukumba wezru na ma txhava ngopfu swinene,
Nakone ma ta ku txhava.”
18 I mani lweyi a nga Xikwembu Nkulukumba ku fana na wene,
Lweyi a dzrivalelaka xihoxo ni ku tlula ka nawu ka vhanu vake lava saliki?*
A nge ti va hlundzrukela hi lani ku nga helikiki,
Hikusa a nyonxisiwa hi lizrandzru dzra ku dumbeka.
19 A ta tlhela a hi komba timpswalu; a ta hlula swihoxo swezru.
U ta txukumeta swidoho swavu hinkwaswu a nsingeni* wa lwandle.
20 U ta kombisa wudumbeki ka Yakobe,
Ni lizrandzru dzra ku dumbeka ka Abrahamu,
Hi lani u va hlambanyeliki ha kone vakokwana vezru ku sukela khale.
I ndlela leyi gomisiwiki ya vito dzra ku Mikayele (ledzri tlhamuxelaka leswaku “I Mani Lweyi A Fanaka Na Xikwembu Nkulukumba?”) kumbe Mikaya (ledzri tlhamuxelaka leswaku “I Mani Lweyi A Fanaka Na Yehovha?”).
Kumbe: “swanga muholo hinkwawu wa wunghwavana byake”.
Kumbe: “tiyintxa”.
Kumbe: “a kaya ka Afra”.
Hi ku kongoma: “Wene wansati lweyi a tsrhamaka Xafiri”.
Hi ku kongoma: “wansati lweyi a tsrhamaka a Zanani a nga humanga”.
Hi ku kongoma: “Wansati lweyi a tsrhamaka Maroti a a yimela leswinene”.
Hi ku kongoma: “nhlengeletanu ya”.
Hi ku kongoma: “yindlu ya”.
Kumbexana: “Loko va ni xa kukazri akuva va ntxakunha”.
Hi ku kongoma: “va xwengisa yimpi”.
Kumbe: “ya tempele”.
Hi ku kongoma: “swi va mantinyo ya gedjo”.
Hi ku kongoma: “Hikusa nomu wa”.
Kumbe: “ya vhanu va”.
Kumbe: “a mindzrelekanwini ya”.
Hi ku kongoma: “lebyi nga vokweni dzraku”.
Kumbe: “mapilari”.
Vona Ntlhamuxelo Wa Mazritu.
Hi ku kongoma: “hi magidigidi ya tihamba ta xinuna”.
Kumbe: “u zrandzra wudumbeki”. Hi ku kongoma: “u zrandzra lizrandzru dzra ku dumbeka”.
Hi ku kongoma: “Yingisetani nhonga ni lweyi a yi nyikeliki”.
Yana Ka Dondzra Swin’wana B14.
Kumbe: “mahlwazri ma”.
Swi tikomba na minoti leyo a ku li ndlela ya ku kombisa xiyeyiso kumbe ku hlamalisiwa.
Kumbe: “ledzri a hika dzranga dzri dzri”.
Kumbe: “a zingela”.
Kumbe: “hi redi”.
Kumbe: “leswi naveliwaka hi hika dzrake”.
Kumbe: “ni ta kombisa moya wa ku zrindzrela”.
Hi Xiheberu, a zritu ledzri liki “nala”, ledzri tizrisiwiki lani dzri kombetela ka wa xisati.
Kumbexana: “a nawu wu ta va kule”.
Leswi liki, nambu wa Ewufrata.
Hi ku kongoma: “Hi mhaka ya mihandzru ya swiyentxo swavu”.
Kumbe: “Ma ta hlamala”.
Hi ku kongoma: “ka lava saliki va pfindla dzrake”.
Kumbe: “a mbangwini wa ku yenta”.