Ku Humelele Voko Dzri Tsrala A Khumbini

Loko nkama wu ya wu famba, Belxatsara a ve hosi ya Babilona. Ka wusiku bya kukazri, hosi Belxatsara a hamba nkhuvu a tlhela a zramba vhanu va xiyimu xa le henhla va le Babilona. Kolanu, hosi Belxatsara a zruma vatizri vake leswaku va ya teka tikopo ta woru leti hosi Nebukadnetsara a ti tekiki a tempeleni dzra Yehovha. Hosi Belxatsara kun’we ni vhanu hinkwavu lava a va li ka nkhuvu lowo a va nwa ka tikopo ta woru na va dzrumisa swikwembu swa madzrimi. Xileswo, na va nga swi yimelanga, ku humela voko dzra kukazri dzri tsrala a khumbini lani a va li kone; dzri tsrala mazritu lawa a ma nga tolovelekanga.

Hi ku vona leswo, hosi Belxatsara a sungula ku txhava ngopfu swinene. Kutani a vitana vangoma lava a va tizra mfun’wini wake, a va dumbisa a ku: ‘Lweyi a taka ni byela ntlhamuxelo wa mazritu lawa a ta va mufumi wa wuzrazru ka mfumu wa Babilona.’ A valoyi hinkwavu va dzringise ku mu tlhamuxela, kambe ni wa mun’we kwavu a nga swi kotanga. Xileswo, a hosi ya xisati yi byela hosi Belxatsara yi ku: ‘Ku ni wanuna wa kukazri lweyi a vitaniwaka Daniyele lweyi a a tolovela ku tlhamuxela hosi Nebukadnetsara mintxhumu ya ku fana ni leyi. A nga swi kota ku ku byela ntlhamuxelo wa mazritu lawa.’

Hiloko Daniyele a famba a ya khanela na hosi Belxatsara. Kutani hosi yi mu byela yi ku: ‘Daniyele, loko u swi kota ku dondzra ni ku tlhamuxela mazritu lawa, ni ta ku nyika kolari dzra woru ni tlhela ni ku beka swanga mufumi wa wuzrazru a tikweni dzra Babilona.’ Daniyele a ku: ‘A ni swi djuli swihiwa swaku, kambe ni ta ku byela ntlhamuxelo wa mazritu lawa. Papayi waku Nebukadnetsara a a tikulisa, kambe Yehovha a mu tsrongahatile. Nambileswi a u swi tiva hinkwaswu leswi swi yentxekeli papayi waku, u tame u nwa ka tikopo ta le tempeleni dzra Yehovha. Yehovha a nga swi nyonxelanga leswo, hi leswo swi yentxaka a tsrala mazritu lawa a khumbini: Mene, Mene, Tekele na Parisini. Swi tlhamuxela leswaku a mfumu wa Vamedo ni wa Vapersiya wu ta hlasela Babilona. Wene hosi yanga, u ta tsrhika ku va hosi.’

A swi tikomba ingiki a ku nga na mfumu lowu a wu ta hlula Babilona. A doropa ledzro, a dzri tsrandzreliwe hi makhumbi ya makulu ya ku tiya ngopfu swinene ni nambu lowu yentiki ngopfu swinene. Kambe ka wusiku lebyo a masotxha ya Vamedo ni Vapersiya ma hlasele doropa ledzro. A hosi ya Persiya, leyi vitaniwaka Khorexe, yi djikise mati ya nambu leswaku masotxha ya yone ma kota ku nghena ka doropa ledzro dzra Babilona. Hiloko masotxha ma kuma swipfalu swa doropa na swi pfulekile! Kutani ma nghena ma hlasela, ma patsra ni ku dlaya hosi Belxatsara. Xileswo hosi Khorexe a sungula ku fuma Babilona.

Ntsrhaku ka lembe, hosi Khorexe a tivisa leswi: ‘Yehovha a ni zrume kuva ni ta pfuxeta tempele a Yerusalema. Vayuda hinkwavu lava va swi nyonxelaka ku tlhelela va nga famba.’ A Vayuda vanyingi va tlhelelile loko ku khalute 70 wa malembe na Yerusalema a helisiwile, hi lani Yehovha a a dumbise ha kone. Hosi Khorexe a tlhelise tikopo ta woru ni ta prata a tempeleni, leswi hosi Nebukadnetsara a a swi susile. Xana wa yi vona ndlela leyi Yehovha a tizrisiki hosi Khorexe akuva a pfuna Vayuda ha yone?