Exteri A Huluxa Valekwavu

Exteri a a li n’hwanyana wa Muyuda, lweyi a a tsrhama Xuxani, ku nga doropa dzra le Persiya. Ka malembe ya le ntsrhaku, a ndangu wavu wu susiwe a Yerusalema hi masotxha ya hosi Nebukadnetsara. Exteri a wundliwe hi primu wake Mordekayi lweyi a a tizrela Ahasuwerusi hosi ya le Persiya.

Hosi Ahasuwerusi a a djula hosi ya xisati leyimpshwa. Xileswo, a vatizri vake va mu heketele vavasati va ku xonga ngopfu swinene va le mfun’wini wake, ku patsra na Exteri. Xana wa swi tiva leswaku a hosi yi hlawule mani? Yi hlawule Exteri. Kambe Mordekayi a mu byele leswaku a nga byeli mhunu leswaku yene i Muyuda.

A ku ni wanuna wa kukazri lweyi a a tibyela, a vito dzrake a a li Hamani. A a li muzrangeli wa tihosana hinkwatu. A a djula leswaku hinkwavu loko va mu vona va mu khinsamela. Kambe Mordekayi a a nga pfumeli ku mu khinsamela. Leswo swi mu yentxe a hlundzruka lakakuva a djula ku dlaya Mordekayi. Xileswo, loko Hamani a gungula leswaku Mordekayi i Muyuda, a yanakanya hi ku dlaya Vayuda hinkwavu. Hiloko Hamani a byela hosi a ku: ‘A Vayuda a hi vanene, swa yampswa hi va helisa.’ Loko hosi Ahasuwerusi a yingela mhaka leyo, a nyika Hamani wutiyanguleli bya kuva a humesa nawu lowu a wu hlaya leswaku a Vayuda hinkwavu va ta dlayiwa hi siku dzra wu 13 ka hweti ya Adari. Kambe Yehovha a a swi vona leswi a swi yentxeka.

Exteri a a nga wu tivi nawu lowu humesiwiki. Xileswo, Mordekayi a mu zrumelela kopiya dzra nawu lowo. Exteri a hlamula a ku: ‘Loko mhunu a ya mahlweni ka hosi na a nga vitaniwanga a ta dlayiwa. Ku khaluta hweti na ni nga si vitaniwa kambe ni ta famba. Loko hosi yi tlakuxa nhonga ya yone a ni nge ti fa. Kambe loko hosi yi nga ni tlakuxeli nhonga ya yone ni ta dlayiwa.’

Kutani Exteri a ya a ndlwini ya wuhosi. Loko hosi Ahasuwerusi a vona Exteri a mu tlakuxela nhonga yake. Xileswo Exteri a nghena a ya lani hosi Ahasuwerusi a a li kone. A hosi yi mu vutisa yi ku: ‘Hosi ya xisati Exteri, ni nga ku pfuna hi yini?’ Exteri a hlamula a ku: ‘A ni nyonxela ku ku zramba, wene na Hamani akuva hi laleleni xikan’we.’ A nkama lowu a va lalela, Exteri a tlhele a zramba hosi Ahasuwerusi na Hamani akuva va tlhela va lalela xikan’we siku dzrimbeni. Loko siku ledzro dzri tlhasile, a hosi yi tlhela yi vutisa Exteri yi ku: ‘Ni nga ku pfuna hi yini?’ Kutani Exteri a yi hlamula a ku: ‘Ku ni mhunu lweyi a djulaka ku dlaya mine kun’we ni vamakwezru. Na ku kombela, hi pfune.’ Kambe a hosi yi hlamula yi ku: ‘Muzrandzriwa, i mani lweyi a djulaka ku ku dlaya?’ Exteri a hlamula a ku: ‘I Hamani, wanuna lweyi wa ku biha mbilu.’ Hiloko hosi Ahasuwerusi a hlundzruka ngopfu swinene lakakuva a zrumela leswaku ku dlayiwa Hamani.

Kambe a ku nga na mhunu lweyi a a ta txintxa a nawu wa Hamani. Nambi hi hosi a yi nga ti swi kota ku yentxa leswo. Xileswo hosi Ahasuwerusi a yentxa leswaku Mordekayi a va muzrangeli wa tihosana nakone a mu pfumelela ku a humexa nawu wumbeni. A nawu lowo a wu nyika Vayuda mpfumelelo wa ku tilwela loko va hlaseliwa. Xileswo hi siku dzra wu 13 ka hweti ya Adari, a Vayuda va hlula valala vavu. Ntsrhaku ka leswo, lembe ni lembe a Vayuda a va tlangela siku ledzriyani hi leswi va hulukiki ha dzrone.