Yesu A Daha Mhunu Hi Siku Dzra Savata

A Vafarisi a va mu nyenya Yesu nakone a va djula xivangelo xa ku mu khoma. A va hlaya leswaku Yesu a a nga fanelanga a daha vhanu hi siku dzra Savata. Siku dzrin’wana hi Savata, Yesu a kuma wanuna wa kukazri lweyi a fiki matihlo na a kombela zimola a xitaratwini. Hiloko Yesu a byela vadondzrisiwa vake a ku: ‘Vonani ndlela leyi ntamu wa Xikwembu Nkulukumba wu taka pfuna wanuna lweyi ha yone.’ Hiloko Yesu a pfuva madaka hi mazri yake kutani a tota wanuna lweyo a matihlweni, a gama a mu byela a ku: ‘Famba u ya hlamba matihlo a matini ya Silowama.’ A wanuna lweyo a yentxa leswi Yesu a mu byeliki swone, xileswo hi khambi dzra ku sungula a wuton’wini byake a sungula ku vona.

Hiloko vhanu va hlamala, va gama va ku: ‘Xana lweyi a hi yene wanuna lweyi a a talisa ku tsrhama xitaratwini a kombela zimola? Kutani wanuna lweyo a va hlamula, a ku: ‘Hi mine, ni pswaliwe na ni nga voni.’ Va tlhela va mu vutisa va ku: ‘Swi yentxekise kuyini kuva matihlo yaku ma pfuleka?’ Loko a va byela leswi humeleliki, va mu teka va mu yisa ka Vafarisi.

A wanuna lweyo a byela Vafarisi a ku: ‘Yesu a pfuve madaka a ni tota ka matihlo ni gama ni ya hlamba matihlo kutani ni sungula ku vona!’ Loko Vafarisi va yingela leswo, va mu byela va ku: ‘Loko Yesu a daha hi siku dzra Savata, a ntamu lowu a dahaka ha wone a nga wu kumi ka Xikwembu Nkulukumba.’ Kutani van’wana va ku: ‘Swi nga yentxekisa kuyini kuva mhunu a yentxa mahlolana ya ku fana ni lawa nakasi i mudohi?’

Hiloko Vafarisi va vitana vapswele va wanuna lweyo, kutani va va vutisa va ku: ‘Swi yentxekisa kuyini kuva n’wanenu swoswi a vona?’ A vapswele va wanuna lweyo a va txhava hikusa a Vafarisi a va hlaye leswaku mun’wana ni mun’wana lweyi a a ta kombisa lipfumelo ka Yesu a a ta hlongoliwa a sinagogeni. Xileswo, a vapswele va wanuna lweyo va hlamula va ku: ‘A hi swi tivi leswaku swi yentxekise kuyini, vutisani yene.’ Xileswo a Vafarisi va tlhela va vutisa wanuna lweyo, kutani a va hlamula a ku: ‘Ni mi byele hinkwaswu leswi ni swi tivaka, ha yini mi tlhela mi ni vutisa? Kutani Vafarisi va hlundzruka swinene lakakuva va mu hlongola sinagogeni.

Yesu a ya ka wanuna lweyi a a fe matihlo a mu vutisa a ku: ‘Xana wa pfumela ka Mesiya?’ Kutani wanuna lweyo a mu hlamula a ku: ‘Loko a no swi tiva leswaku i mani Mesiya a ni ta pfumela ka yene.’ Hiloko Yesu a mu byela a ku: ‘Hi mine Mesiya.’ Xana leswi a swi kombisi leswaku Yesu a a ni wunene? Yesu a nge daha wanuna lwiyani ntsena, kambe a tlhele a mu pfuna leswaku a va ni lipfumelo.