“A Mfumu Waku A Wu Te”

Yehovha a dumbise leswi: Ku xukuvala, ku vaviseka, mavabyi ni lifu a swi nge he ti va kone. Ni ta sula minyembeti ka matihlo ya vhanu hinkwavu nakone a nge he ti va kone lweyi a taka dzrimuka mintxhumu ya ku biha.

Yehovha a a djula leswaku Adamu na Evha va hanya hi ku nyonxa ni hi ku zrula a jardim dzra le Edeni. A va fanela ku gandzrela Xikwembu Nkulukumba va tlhela va pswala vana vanyingi va tata misava. Adamu na Evha a va mu yingisetanga Yehovha, kambe Yehovha a ha djula leswaku misava yi va paradeyisi. Ka buku ledzri hi vone leswaku Xikwembu Nkulukumba a hetisisa hinkwaswu leswi a swi dumbisaka. Nakone a Mfumu wa Xikwembu Nkulukumba wu ta tisa mintxhumu hinkwayu leyinene leyi Yehovha a yi dumbisiki Abrahamu.

Diyavulosi, mademona ni vhanu hinkwavu lava yentxaka swa ku biha, ku nga li khale va ta helisiwa. Vanhu hinkwavu a tilweni ni lani a misaveni va ta gandzrela Yehovha. A nga kone lweyi a taka vabya nambi ku fa. Siku ni siku hi ta pfuka na hi nyonxile hi tlhela hi va ni lihanyu ledzrinene. A misava yi ta va paradeyisi! Vhanu hinkwavu va ta va ni swakuda leswinene ni tiyindlu leti sizrelelekiki na va nga txhavi ntxhumu. A ku nge ti va ni vhanu va ku yentxa swa ku biha kumbe lava xanisaka van’wana. A swihazri a swi nge he ti hi txhava, na hine a hi nge ti swi txhava.

Swi ta nyonxisa ngopfu swinene loko Yehovha a sungula ku pfuxa vhanu lava fiki! Hi ta kota ku tiva vhanu vanyingi lava hanyiki a nkameni wa khale, va ku fana na Abele, Nowa, Abrahamu, Sara, Moxe, Ruti, Davhida na Exteri. Vhanu lava va ta hi pfuna ku yentxa misava yi va paradeyisi. Minkama hinkwayu hi ta va ni mintizro yinyingi leyi nyonxisaka!

Yehovha a djula leswaku u va kone a paradeyisini! U ta ya u mu tiva ngopfu swinene ku tlula ndlela leyi u mu tivaka ha yone swoswi. Xileswo tama u tsrhindzrekela kusuhi na Yehovha. Hi ndlela leyo, u ta va munghanu wa Yehovha ku sukela swoswi ni hi lani ku nga helikiki!