Swi Sukeli Ka Mabixkoitu Ya Timbyana
“SIKU dzrin’wana a ku sunguleni ka 2014, a no tifambela ni timbyana tanga a doropeni dzra lomu ni tsrhamaka kone,” ku tsrale Nick lwa tsrhamaka Oregon, Estados Unidos de América. “Hi ntolovelo Timboni ta Yehovha a ti talisa ku yima ko lahaya a ni tolovela ku khaluta ha kone na ti ni xikarinyana xa mabuku. Minkama hinkwayu a ti yambala hi ndlela leyinene, nakone a ti losa mun’wana ni mun’wana lweyi a a khaluta, na ti n’wayitela.
“Timboni ta Yehovha a ti ngo zrandzra vhanu ntsena a ti zrandzra nambi timbyana tanga. Siku dzrin’wana Elaine, lweyi a a li ka xikarinyana xa mabuku, a nyike timbyana tanga mabixkoitu. Ntsrhaku ka leswo, makhambi hinkwawu loko ni khaluta hi lahaya, a ti tsrutsrumela ka xikarinyana akuva ti ya nyikiwa ‘mabixkoitu’.
“Loko tiwheti ti ya ti famba. A timbyana a ti zrandzra ku ya da mabixkoitu, kasi mine a ni zrandzra ku bula ni Timboni ta Yehovha hi nkamanyana wutsrongo. A ni nga djuli mabulu ya ku leha. A ni ni 70 wa malembe nakone a ni nga swi tivi leswi Timboni ta Yehovha a ti pfumela ka swone. Leswi ni nga sama ni kanganyisiwa hi wukhongoti bya ku siyanasiyana a no djula ku tidondzrela Bibele ha wuswanga.
“A nkameni wolowo, a ni talisa ku vona Timboni ta Yehovha a mimbangwini yin’wana ya doropa, na ti ni swikarinyana swa mabuku. Na tone a tini xinghanu. Minkama hinkwayu a ti hlamula swivutiso swanga hi ku tizrisa Bibele, nakone leswo, swi yentxe ni ya ni ti dumba.
“Siku dzrin’wana Elaine a ni vutise leswi, ‘Xana wa kholwa leswaku a swihazri i swihiwa leswi pfaka ka Xikwembu Nkulukumba?’ Ni mu hlamule ni ku, ‘Ina, u tiyisile!’ Hiloko Elaine a ni Dondzrela Ezaya 11:6-9. Leswo swi ni yentxe ni djula ku dondzra leswi yengetelekiki hi Bibele kambe a ni nga djuli ku yamukela mabuku ya Timboni.
“Ku sukela kolanu ni ve ni mabulu ya ku nyonxisa na Elaine kun’we ni nkatake, Brent. Va ni kutxe ku va ni dondzra buku dzra Matewu ku ya ka dzra Amintiṛo akuva ni tiva leswaku i yini ku va mukriste wa ntiyiso. Ni swi yentxile leswo nakone na swi nga hlwelanga, ni pfumele kuva va ni fambisela xidondzro xa Bibele. Leswo swi yentxeke hi 2016.
“A ni swi zrandzra ku dondzra na vone Bibele ni ku ya mintlhanganwini vhiki ni vhiki. A ku li tovoko nakone a swi ni nyonxisa ngopfu ku dondzra leswi Bibele dzri swi dondzrisaka hakunene. Ntsrhakunyana ka lembe ni babatisiwile swanga Mboni ya Yehovha. Swoswi ni ni 79 wa malembe nakone ni nyonxe ngopfu hi leswi ni kumiki ntiyiso. Yehovha a ni tovokisile hi ku ni yentxa xizro xa ndangu wake wa le misaveni hinkwayu.”