Xana A Wu Swi Tiva?

Xana Varoma a va pfumelela leswaku mhunu lweyi a dlayeliwiki a mhandzrini ku fana na Yesu a lahliwa a sizreni ku fana ni vhanu van’wana?

VANYINGI va dzri tiva dzrungula dzra leswaku Yesu a dlayeliwe mhandzrini, makazri ka swigevengu swibidzri. (Mt 27:35-38) Vanyingi va hlaya leswaku a Bibele a dzri hlayi ntiyiso loko dzri ku a ntsrumbu wa Yesu wu game wu lulamiseliwa wu va wu lahliwa sizreni.—Mr 15:42-46.

Vakambisisi van’wana va tiyevhangeli, va ganaganeka leswaku mhunu lweyi a dlayeliwiki mhandzrini a nga va ni xilahlo lexi tolovelekiki, kumbe ku lahliwa sizreni. Va kholwa leswaku vhanu va xiyimu lexo a va lahliwa hi ndlela yin’wana. Ka revhixta dzra Smithsonian, jornalixta lweyi a vitaniwaka Ariel Sabar, a hlaye leswi yentxaka leswaku vhanu lavo va va ni ku ganaganeka loko. A te: “Vhanu lava a va yentxa swa ku biha ngopfu a tikweni, a va khatisiwa hi ku hayekiwa mhandzrini. Kutani swidondzreki swin’wana swi hlaya leswaku Varoma a va nga pfumeleli leswaku mhunu lweyi a yentxiki swa ku biha a va a gongondzreliwa mhandzrini, a lahliwa hi ndlela leyi tolovelekiki.” Varoma a va yentxa hinkwaswu leswaku va susa xintsrhuti mhunu lweyo, hi ku tsrhika ntsrumbu wake a mhandzrini akuva wu diwa hi swihazri. Leswi a swi siyiwa hi swihazri, ku patsra ni mazrambu a swo gama swi txukumetiwa.

Kambe vayimbuli, kumbe vhanu lava fambaka va handzra mintxhumu ya khale, va gungule ntxhumu wa ku hlamalisa mayelanu ni vhanu lava dlayeliwiki mhandzrini. Hi 1968 va gungule mazrambu ya wanuna wa kukazri lweyi a dlayiwiki a minkameni ya Yesu. Mazrambu lawo, ma kumiwe ndzreni ka bokisi ledzri a dzri li ndzreni ka sizra ledzri a dzri lumba ndangu wa kukazri wa vayuda, a kusuhi ni Yerusalema. Ka mazrambu lawo, va kume zrambu dzra xizrendzre ledzri a dzri gongondzreliwe xipikiri xa 11,5 wa masentimetro. Sabar a li: “Xizrendzre xolexo, a xi li xa wanuna wa kukazri lweyi a a vitaniwa Yehochanan. Ku tsrumbuliwa ka mazrambu lawo, ku yentxe leswaku vhanu lava a va ni ku ganaganeka va kholwa leswaku hakunene Yesu a lahliwile hi lani swi hlayiwaka ha kone ka dzrungula dzra tiyevhangeli. Mazrambu ya Yehochanan ma nyikela wumboni bya leswaku Varoma a va pfumelela leswaku mhunu lweyi a dlayeliwiki mhandzrini, a lahliwa hi ku ya hi lahlela dzra Vayuda.”

I ntiyiso leswaku zrambu ledzro dzra xizrendzre dzri yentxa vhanu va va ni mavonela manyingi mayelanu ni ndlela leyi Yesu a gongondzreliwiki ha yone. Kambe hi nga tiyiseka leswaku mhunu lwa dlayeliwiki a mhandzrini, a swi koteka leswaku a lahliwa a sizreni a matsrhan’wini ya ku txukumetiwa. Swi le livaleni leswaku Bibele dzri hlaya ntiyiso loko dzri ku Yesu a lahliwe a sizreni, nakone leswi swi gunguliwiki swi seketela leswi Bibele dzri swi hlayaka.

Xa lisima ngopfu, hi leswaku Yehovha hi yene lwa profetiki leswaku Yesu a a ta lahliwa a sizreni dzra mhunu wa ku ganya, nakone a nga kone lwa nga yentxaka leswaku Zritu dzra Xikwembu Nkulukumba dzri nga hetiseki.—Eza 53:9; 55:11.