NDZRIMA 20
Nambiloko Ku Ni Nkaneto “A Zritu [Dzra Yehovha] Dzri Ye Mahlweni Dzri Hangalaka Dzri Tlhela Dzri Hlula”
A ntizro wa Apolosi na Pawulo wu yentxa leswaku madzrungula lamanene ma ya mahlweni
Dzrungula Ledzri Dzri Seketeliwe Ka Mintizro 18:23–19:41
1, 2. a) He dzrini khombo ledzri Pawulo ni vanghanu vake va kumaniki na dzrone a Efesa? b) I yini leswi hi taka swi kambisisa ka ndzrima leyi?
KA XITARATU xa le Efesa ku twala pongwe ledzrikulu dzra xitsrhungu lexi bandlukanaka na xi tsrutsruma. A xitsrhungu xolexo xi pfuxa mpfilumpfilu yikulu! Vanghanu vabidzri va mupostola Pawulo va khomiwa va tlhela va kokoviseliwa hi xitsrhungu lexi. Vhanu hinkwavu lava a va li kone ka xitaratu lexi xa ku xavisela ka xone, va tsrutsrume va ya tipatsra ni xitsrhungu lexi a xi mpfhumpfha hi mahlundzru, va ya nghena ka mbangu wa mintlangu wa doropa ledzro, lani a ku yanela kolomu ka 25.000 wa vhanu hi ku kula ka wone. A ntalu wa vone ni ku swi tiva a va swi tivi leswaku hi kola ka yini ku pfuke mpfilumpfilu yoleyo, kambe ku ni lexi xi va byelaka leswaku a tempele ni xikwembu xavu xa xisati Artemisi swi le khombyeni. Hiloko va sungula ku bandlukana va ku: “I mukulu Artemisi, xikwembu xa Vaefesa!”—Mint. 19:34.
2 Ni ka khambi ledzri, Sathana a dzringisa ku tizrisa xitsrhungu lexi nga ni tihanyi akuva a sivela ku hangalasiwa ka madzrungula lamanene ya Mfumu wa Xikwembu Nkulukumba. Swi le livaleni leswaku Sathana a ngo gamela ka ku tizrisa tihanyi. Ka ndzrima leyi hi ta kambisisa mazrengu ya ku hambanahambana lawa Sathana a ma tizrisiki akuva a dzringisa ku yimisa ntizro wa ku zrezra kun’we ni wumun’we bya vakriste va le dzaneni dzra ku sungula. Kambe xa lisima ngopfu lexi hi taka xi vona hi leswaku mazrengu ya Sathana ma be hansi, hikusa ‘hi kola ka ntamu wa Yehovha a zritu dzrake dzri ye mahlweni dzri hangalaka dzri tlhela dzri hlula’. (Mint. 19:20) Ha yini vakriste lavayani va hlulile? Va pfuniwe hi leswi na hine swi hi pfunaka namunhla. Swi le livaleni leswaku swi koteka hi ntamu wa Yehovha ku nga li wezru, kambe ku fana ni vakriste va le dzaneni dzra ku sungula, na hine hi fanela ku yentxa xa kukazri. Hi ku pfuniwa hi moya wa ku xwenga wa Yehovha, hi nga txutxela matsrhamela lawa ma taka hi pfuna kuva hi humelela a ntizrweni wezru wa ku zrezra. A hi zrangeni hi ku kambisisa xikombiso xa Apolosi.
“A A Ma Tiva Ha Hombe Matsralwa” (Mintizro 18:24-28)
3, 4. I yini lexi Akila na Prisila va xi xiyiki mayelanu ni wutivi bya Apolosi, nakone va game va yentxa yini?
3 Loko Pawulo a li ndleleni ya ku ya doropeni dzra le Efesa ka liyendzro dzrake dzra wuzrazru dzra wuzrumiwa, wanuna wa kukazri lweyi a vitaniwaka Apolosi a tlhase ka doropa dzroledzro. Apolosi a a li Muyuda, nakone a a pswaliwe ka doropa dzra ndhuma dzra Alexandriya, a Egipta. A a ni matsrhamela manyingi lamanene nakone a a ni nyiko ya ku vulavula. Handle ka ku vulavula ha hombe mahlweni ka vhanu, Apolosi “a a ma tiva ha hombe Matsralwa”, nakone a a “hiseka ngopfu hi ku pfuniwa hi moya wa Xikwembu Nkulukumba”. Hi ku hiseka, Apolosi a a vulavula mahlweni ka Vayuda a sinagogeni na a nga txhavi ntxhumu.—Mint. 18:24, 25.
4 Akila na Prisila va yingele wukaneli bya kukazri bya Apolosi. Handle ka ku ganaganeka va kutxeke ngopfu loko va mu yingela a dondzrisa “mintxhumu hi ndlela leyi nga yone mayelanu na Yesu”. Leswi a swi hlayiki mayelanu na Yesu a a li ntiyiso. Vatekani lava va tekele ku swi vona leswaku a wutivi bya Apolosi a byi nga helelanga hikusa yene “a o tiva ntsena a babatiso dzra Yohane”. A vatekani lava va ku titsrongahata, lava ntizro wavu a wu li wa ku hamba matende, a va pfumelanga leswaku nyiko ya Apolosi ya ku vulavula ni wutivi byake swi va txhavisa. A matsrhan’wini ya leswo, vatekani lava ‘va mu teke va famba na yene va mu tlhamuxela ndlela ya Xikwembu Nkulukumba ha hombe’. (Mint. 18:25, 26) Xana wanuna lweyi, lweyi a a ni nyiko ya ku vulavula ha hombe a tlhela a dondzra ngopfu a yangulise kuyini? Swi tikomba na Apolosi a kombise dzrin’we dzra matsrhamela ya lisima ngopfu lawa mukriste a nga ma txutxelaka, a nga ku titsrongahata.
5, 6. I yini lexi nga yentxa leswaku Apolosi a tizrisiwa ngopfu ha Yehovha, nakone hi nga dondzra yini ka xikombiso xake?
5 Hi ku va a yamukele mpfunu wa Akila na Prisila, Apolosi a ndzruluke nandzra lweyi a tizrisiwiki ngopfu ha Yehovha. A yendzre a ya doropeni dzra Akaya, lani a ‘pfuniki ngopfu’ vamakwezru. Ndlela leyi a a zrezra ha yone yi va pfune ngopfu Vayuda va muganga luwani lava a va sindzrisa va hlaya leswaku Yesu a a nga li Mesiya lweyi a dumbisiwiki. Luka a dzrungula leswi: “A livaleni ni hi ku tiyimisela lokukulu a a tiyisekisa Vayuda hi ku helela leswaku va phazama, hi ku va komba Matsralweni leswaku Yesu i Kriste.” (Mint. 18:27, 28) Apolosi a ve tovoko dzrikulu! Xileswo, a ve xin’we xa swivangelo lexi yentxiki leswaku ‘a zritu dzra Yehovha’ dzri tama dzri hlula. Xana hi nga dondzra yini ka xikombiso xa Apolosi?
6 Ku txutxela ku titsrongahata i swa lisima ka vakriste. Hinkwezru hi tovokisiwe hi tinyiko ta ku siyanasiyana. Ku nga ha va wuswikoti bya mapswaliwa, mfambu wa wutomi kumbe wutivi lebyi he ke byi dondzra. Kambe a xa lisima ka tinyiko leto hinkwatu i ku titsrongahata, hikusa loko hi nga titsrongahati, tinyiko letinene ti nga ha yentxa leswaku hi tikulisa. (1 Kor. 4:7; Yak. 4:6) Loko hakakunene hi titsrongahata hi ta tikazratela ku vona van’wana na va tlakukile ku hi tlula. (Filp. 2:3) A hi nge ti khunguvanyeka kumbe ku va ni mbilu ya khongoloti loko va hi kawuka, kumbe hi tiwomisa tinhloko loko vhanu van’wana va hi dondzrisa swa kukazri. Nakone a hi nge ti va ni nkanu, hi womelela ka mavonela yezru loko hi tsrumbula leswaku a ma fambisani ni minkongomiso leyimpshwa ya moya wa ku xwenga. Loko hi titsrongahata hi ta tizrisiwa hi Yehovha ni n’wanake.—Luk. 1:51, 52.
7. Xana Pawulo na Apolosi va hi siyele xikombiso xa ku titsrongahata hi ndlela yini?
7 A ku titsrongahata ku nga tlhela ku hi pfuna ku dlaya moya wa ku phikisana. Yanakanya ndlela leyi Sathana a a swi djula ha yone ku byala ku yavana makazri ka vakriste va ku sungula. A a ta va a nyonxe ngopfu loko a e kota ku yentxa leswaku Apolosi na Pawulo, vamakwavu lava a va ni nkhinkhi ngopfu a ntiyisweni, va ndzruluka valala va tlhela va tidjulela ndhuma a mabandleni hi ku susumetiwa hi matsrhoho. A swi ta nabyala kuva leswo swi yentxeka, hikusa a doropeni dzra Korinte, a vakriste van’wana a va ku: “Mine ni wa Pawulo”, van’wana va ku: “Mine ni wa Apolosi.” Xana Pawulo na Apolosi a va hlohlotela moya wolowo wa ku yavana ndzreni ka bandla? Nikutsrongo! A matsrhan’wini ya leswo, Pawulo a a wu nyika lisima ntizro wa Apolosi a ku zrezreni ka madzrungula lamanene, lakakuva a mu nyika mintizro ya lisima. Apolosi na yene a a landzra minkongomiso ya Pawulo. (1 Kor. 1:10-12; 3:6, 9; Tit. 3:12, 13) Lexi i xikombiso xa ku xonga xa ndlela leyi hi nga kombisaka ku titsrongahata loko hi tizra kun’we ni vamakwezru.
“A Yanakanyisisa Na Vone Hi Ndlela Ya Ku Va Kholwisa Mayelanu Ni Mfumu Wa Xikwembu Nkulukumba” (Mintizro 18:23; 19:1-10)
8. He yini ndlela leyi Pawulo a yi tizrisiki akuva a tlhelela a Efesa nakone ha yini?
8 Pawulo a a dumbise ku tlhela a ya Efesa, nakone a xi hetisisile xidumbiso xake.a (Mint. 18:20, 21) Kambe xiyisisa ndlela leyi a yi tizrisiki akuva a tlhelela Efesa. Leswi a a li Antiyokiya wa Siriya, a ndlela ya ku tsrema a a li ku hamba liyendzro dzra ku goma a ya Selukiya, a gama a khwela boti a kongoma Efesa. Kambe a matsrhan’wini ya leswo, Pawulo a yendzre “hi makazri ka miganga ya le Aziya”. Hi ku ya hi dzrungula ledzri kumekaka ka Mintizro 18:23 na 19:1, ku dzringanisiwa leswaku swi nga yentxeka Pawulo a yendzre mpfhuka wa kolomu ka 1.600 wa makilometru. Ha yini Pawulo a hlawule ku yendzra hi ndlela yoleyo ya ku hlwela? A hlawule ndlela leyo hikusa a a djula ku “tiyisa vadondzrisiwa hinkwavu”. (Mint. 18:23) Hi lani swi yentxekiki ha kone ka liyendzro dzra ku sungula ni dzra wubidzri dzra Pawulo, a liyendzro dzra wuzrazru na dzrone a dzri djula leswaku a tizra hi nkhinkhi. Kambe Pawulo a a swi tiva leswaku ntizro wake a wu nga li wa mahala. Namunhla, a valaviseli va miganga ni vasati vavu va ni ku tiyimisela loku fanaka. Hi dzri tlangela ngopfu lizrandzru dzravu dzra ntiyiso.
9. Ha yini ntlawa wa kukazri wa vadondzrisiwa a wu fanela ku tlhela wu babatisiwa, nakone hi nga dondzra yini ka xikombiso xavu?
9 Loko Pawulo a tlhasa a Efesa a kume ntlawa wa kolomu ka 12 wa vadondzrisiwa va Yohane Mubabatisi. Ntlawa lowo, a wu babatisiwe hi babatiso dzra Yohane hi nkama lowu babatiso ledzro a dzri nga ha tizri. Handle ka leswo, a swi tikomba va tiva switsrongo kumbe va nga tivi ntxhumu mayelanu ni moya wa ku xwenga. Pawulo a va tlhamuxele matwisisela lamampshwa, nakone ku fana na Apolosi, va kombise ku titsrongahata va tlhela va tiyimisela ku dondzra. Ntsrhaku ka loko va babatisiwe hi vito dzra Yesu, va yamukele moya wa ku xwenga ni tinyiko ta kukazri ta ku yentxa mintxhumu ya ku hlamalisa. Leswo swi beka livaleni leswaku loko hi landzra minkongomiso ya nhlengeletanu ya Yehovha hi ta tovokisiwa.—Mint. 19:1-7.
10. Ha yini Pawulo a hume sinagogeni a ya zrezra xikole, nakone hi nga yetisela xikombiso lexo a ntizrweni wezru wa ku zrezra hi ndlela yini?
10 Hi ku landzrela, ku ve ni xikombiso xin’wana lexi xi swi bekiki livaleni leswaku ntizro wa ku zrezra a wu ya wu kula. Ku dzringana tihweti tizrazru, Pawulo a zrezre hi xixixi a sinagogeni. Nambileswi a ‘yanakanyisisiki na vone hi ndlela ya ku va kholwisa mayelanu ni Mfumu wa Xikwembu Nkulukumba’, van’wana va tiwomise tinhloko va va va ndzruluka vakaneti. A matsrhan’wini ya kuva a hete nkama ni lava a va “vulavula ku biha mayelanu ni Ndlela”, Pawulo a hambe malulamiselo ya kuva a ya zrezra ka xikole xa kukazri. (Mint. 19:8, 9) Lava a va navela ku hluvuka hi tlhelo dzra moya a va fanela ku huma sinagogeni va ya ka mbangu wolowo. Ku fana na Pawulo, n’waninkama swi nga ha djula hi tsremelisa mabulu loko hi xiya leswaku lweyi hi mu zrezrelaka a nga djuli ku hi yingiseta kumbe o djula ku hi holovisa ntsena. Ka ha ni vhanu vanyingi lava fanaka ni tihamba, lava djulaka ku yingiseta dzrungula dzrezru ledzri kutxanaka!
11, 12. a) Xana Pawulo a hi siyele xikombiso muni a mhakeni ya ku titwananisa ni swiyimu ni ku tizra hi nkhinkhi? b) Xana Timboni ta Yehovha ti tikazrata hi ndlela yini akuva ti tizra hi nkhinkhi ni ku titwananisa ni swiyimu a ntizrweni wa ku zrezra?
11 Swi nga yentxeka Pawulo a a zrezra ka mbangu luwani siku ni siku ku sukela hi ma 11 wora ku ya ka ma 16 wora. (Vona nota de estudo ka Mint. 19:9, TNM) Swi nga yentxeka lowo a wu li wone nkama wa ku zrula wa kone, nakone vhanu a va yima ku tizra akuva va da ni ku wisa hikusa a dambu a dzri hisa swinene. Loko a li leswaku Pawulo a landzre xiyimiso lexo ku dzringana malembe mabidzri, a hete ku tlula 3.000 wa mawora na a dondzrisa zritu dzra Xikwembu Nkulukumba, leswi liki a a hamba 125 wa mawora hi hweti.b Lexo i xin’we xa swivangelo lexi yentxaka leswaku zritu dzra Yehovha dzri tama dzri hangalaka ni ku hlula. Pawulo a a tizra hi nkhinkhi nakone a a titwananisa ni swiyimu. Xileswo a twananise xiyimiso xake xa ku zrezra ni swivileleko swa vhanu lava a va tsrhama ka muganga wolowo. Ma ve wani mabindzru ya leswo? A dzrungula dzri li: “Hinkwavu lava a va hanya a xifundzreni xa Aziya, Vayuda ni Vagriki, va twa zritu dzra Hosi.” (Mint. 19:10) Handle ka ku ganaganeka, a nyikele wumboni hi ku helela!
Hine hi tikazratela ku kuma vhanu a mimbangwini hinkwayu leyi va kumekaka ka yone
12 Namunhla, Timboni ta Yehovha na tone ti tizra hi nkhinkhi ti tlhela ti titwananisa ni swiyimu. Hi tikazratela ku zrezrela vhanu hi nkama ni mbangu lowu va kumekaka ka wone. Hi nyikela wumboni a switaratwini, mabazara ni lomu ku yimisiwaka kone mimovha. Hi nga ha va zrezrela hi ku tizrisa matelefoni kumbe makarta. Nakone ka nsimu ya muti ni muti hi tikazratela ku va yendzrela hi nkama lowu swi taka nabyala ku va kuma makaya.
“A Zritu [dzra Yehovha] . . . Dzri Ye Mahlweni Dzri Hangalaka Dzri Tlhela Dzri Hlula” Nambiloko Ku Ni Nkaneto Wa Mademona (Mintizro 19:11-22)
13, 14. a) Xana Yehovha a nyike Pawulo ntamu wa ku yentxa yini? b) He xini xihoxo lexi yentxiwiki hi vana va Skevha, lexi swizro swa wukhongoti bya madzrimi swa ha tamaka swi xi yentxa namunhla?
13 Luka a hi dzrungulela leswaku ku ve ni nkama lowu ku nga yentxeka mintxhumu ya ku hlamalisa, hikusa Yehovha a nyike Pawulo ntamu wa ku yentxa “mahlolana lamakulu”. Ntsena hi kuva va teka mpahla leyi Pawulo a a tizra ha yone ni tipanu leti a ti khumbe mizri wake va swi yisa ka vhanu lava vabyaka a va daheka, nambi mademona a ma huma.c (Mint. 19:11, 12) Ku hluliwa koloko ka Sathana a ku xiyeka vhanwini, kambe a hi hinkwavu lava a va ku nyonxela.
14 “Vayuda van’wana lava a va fambafamba va hlongola mademona”, va zame ku yetisela mahlolana ya Pawulo. Van’wana ka Vayuda volavo va dzringise ku hlongola mademona hi ku tizrisa vito dzra Yesu ni dzra Pawulo. Luka a vulavula hi xikombiso xa 7 wa vana va Skevha lava a va li swizro swa ndangu wa wuprista, lava dzringisiki ku yentxa leswo. A demona dzri va byele leswi: “Na mu tiva Yesu, na ye Pawulo ni mu tolovelile, kambe n’wine mi vamani?” Xileswo wanuna lweyi a a ni demona a va tlulela ingi hi loko o va xihazri xa nhova, a va dliva ha mun’wemun’we, lakakuva va huma va tsrutsruma na va nga yambalanga ntxhumu futsrhi na va vavisiwile. (Mint. 19:13-16) A ‘zritu dzra Yehovha’ dzri hlulile dzri tlhela dzri swi beka livaleni leswaku ku hambana ni swizro leswiyani swa wukhongoti bya madzrimi, Pawulo a a nyikiwe ntamu. Vhanu vanyingi namunhla va phazama, va yanakanya leswaku swi dzringanile ku tizrisa vito dzra Yesu kumbe ku tihlaya “vakriste”. Kambe Yesu a kombise leswaku lava nga ni ku lavisela ka ntiyiso mayelanu ni wumundzruku o va lava yentxeka ku zrandzra ka papayi wake ntsena.—Mat. 7:21-23.
15. Xana hi nga va yetisela hi ndlela yini Vaefesa loko swi ta mhakeni ya wungoma ni mintxhumu leyi fambisanaka ni wudemona?
15 A ku danisiwa ka vana va Skevha ku yentxe leswaku vhanu vanyingi va hlonipha Xikwembu Nkulukumba va tlhela va ndzruluka vakriste, va tsrhika swihena leswi fambisanaka ni wungoma. A doropa dzra le Efesa a dzri tale hi mintxhumu leyi fambisanaka ni wudemona. A wuloyi ni mintxhumu leyi a yi tizrisiwa ka wudemona ya ku fana ni mabuku ni mintxhumu yin’wana a swi tolovelekile ka doropa ledzro. Vahanyi vanyingi va le Efesa va vone swi yampswa kuva va hlengeleta mabuku yavu ya wungoma va ma hisa na va voniwa hi vhanu van’wana, nambileswi a ma dula ngopfu swinene.d Luka a dzrungula leswi: “Hi kola ka ntamu wa Yehovha a zritu dzrake dzri ye mahlweni dzri hangalaka dzri tlhela dzri hlula.” (Mint. 19:17-20) Lebyo a ve wumboni bya leswaku a ntiyiso wu hlule wukhongoti bya madzrimi ni wudemona! A vahanyi va le Efesa va hi siyele xikombiso xa ku xonga. Na hine hi hanya ka misava leyi ngheniki hi nhloko ka wudemona. Loko hi txhuka hi tsrumbula leswaku hi ni ntxhumu wa kukazri lowu fambisanaka ni wudemona hi fanela ku yetisela Vaefesa, hi tekela ku huma ka wone. Hi ta yentxa hinkwaswu leswi vilelekaka akuva hi fambela kule ni mintxhumu leyo ya ku nyenyentsa.
“Ku Va Ni Mpfilumpfilu Yikulu” (Mintizro 19:23-41)
“Vavanuna, mi swi tiva ha hombe leswaku hi za hi ganya hi ku tasi hi mhaka ya ntizro lowu.”—Mintizro 19:25
16, 17. a) Tlhamuxela ndlela leyi Demetriyo a vangiki mpfilumpfilu ha yone a Efesa. b) Xana vhanu va le Efesa va kombise leswaku a va hisekela ku gandzrela swithombe hi ndlela yini?
16 Swoswi hi ta kambisisa zrengu dzra Sathana ledzri tlhamuxeliwaka ku sunguleni ka ndzrima leyi. Luka a a vulavula ntiyiso loko a ku ‘ku ve ni mpfilumpfilu yikulu mayelanu ni Ndlela’.e (Mint. 19:23) Wanuna wa kukazri lweyi a a vitaniwa Demetriyo, lweyi a a tizra hi prata, hi yene a sunguliki mpfilumpfilu leyo. A byele vhanu van’wana lava na vone a va tizra hi prata leswaku va ze va ganya va ku tasiya hi kola ka ku xavisa swithombe. A tlhele a hlaya leswaku a dzrungula ledzri Pawulo a a dzri zrezra a dzri wisa manegosiyu yavu hikusa vakriste a va nga gandzreli swithombe. Hi wugamu a byele vayingiseti vake lava a va tikulisa va tlhela va tikhuza hi doropa dzravu leswaku loko a vo yingiseta dzrungula dzra Pawulo, a xikwembu xavu xa xisati Artemisi kun’we ni tempele ledzri a dzri dumile misaveni hinkwayu a ‘swi ta voniwa swi nga ha li swa ntxhumu’.—Mint. 19:24-27.
17 Demetriyo a swi kotile ku hetisisa kungu dzrake. Vhanu lava a va tizra hi prata va sungule ku bandlukana va ku: “I mukulu Artemisi, xikwembu xa Vaefesa!” Leswo swi yentxe leswaku ku va ni mpfilumpfilu a doropeni, leyi vumbiki ntlawa lowu hi vulavuliki ha wone a ku sunguleni ka ndzrima leyi. f Leswi Pawulo a a li mhunu lweyi a tinyiketeliki, a dzringise ku nghena ka mbangu luwani a ku hambeliwa ka wone mintlangu akuva a vulavula ni xitsrhungu, kambe vadondzrisiwa va sindzrise leswaku a nga tipeti nghozini. Wanuna wa kukazri lweyi a vitaniwaka Alexandri, a yime mahlweni ka xitsrhungu a dzringisa ku vulavula. Leswi a a li Muyuda swi nga yentxeka a a swi navela ku tlhamuxela ku hambana loku a ku li kone makazri ka Vayuda ni vakriste lavayani. Kambe xitsrhungu lexiyani a xi nga na mhaka ni mintlhamuxelo yake. Loko xitsrhungu xi tsrumbule leswaku a a li Muyuda xi sungule ku bandlukana xi ku: “I mukulu Artemisi, xikwembu xa Vaefesa!” Hi ndlela leyo xi yentxa leswaku mazritu ya Alexandri ma nga ha twali. A xitsrhungu xi yentxe leswo ku dzringana kolomu ka mawora mabidzri. Ku sukela nkama luwani, vhanu lava hisekelaka swa wukhongoti a va si txintxa, va ha tama va yentxa leswaku vhanu van’wana va nga djuli ku twa ntxhumu hi dzrungula dzra Mfumu.—Mint. 19:28-34.
18, 19. a) Xana adminixtradori wa doropa dzra le Efesa a miyete xitsrhungu hi ndlela yini? b) Xana minkama yin’wana, mimfumu yi sizrelela vhanu va Yehovha hi ndlela yini, nakone mahanyela yezru ma nga hi pfuna hi ndlela yini akuva hi kuma nsizrelelo wolowo?
18 Hi wugamu, adminixtradori wa doropa a kote ku miyeta xitsrhungu. Leswi a a ni wulawuli, hi ndlela ya wutlhazri a tiyisekise xitsrhungu leswaku a xikwembu xavu xa xisati kun’we ni tempele a swi nga li khombyeni hi kola ka vakriste lavayani, ni leswaku Pawulo kun’we ni lava a va yendzra na yene a va nga dohelanga tempele dzra xikwembu xavu xa xisati Artemisi. A tlhela a va byela leswaku loko va djula ku bula na yene hi mhaka leyo a va fanela ku swi yentxa hi ku ya hi nawu. Swi nga yentxeka lexi pfuniki ngopfu a ku miyeteni ka xitsrhungu lexo a ve ku xi dzrimuxa leswaku a xi ta tidjulela ku khatisiwa hi mfumu wa Roma hi kola ka ntlhanganu lowo, lowu a wu nga li nawini wu tlhela wu nga lawuleki. Hi ndlela leyo, a kote ku miyeta xitsrhungu. Nambileswi a xi hlundzrukile, hi ku kahlula xitsrhungu lexo xi zrulile ntsrhaku ka loko xi yingela mazritu lawo ya wutlhazri.—Mint. 19:35-41.
19 Ledzri a dzri vanga khambi dzra ku sungula lani wanuna lweyi a nga ni wulawuli ni miyanakanyu leyinene a yentxiki xa kukazri akuva a pfuna valandzreli va Kriste, nakone a dzri vanga dzra wugamu. Ku hlaya ntiyiso, ka xivoniso xa kukazri mupostola Yohane a kombiwe leswaku ka masiku lawa ya wugamu, a swizro leswi tlakukiki swa mimfumu ya misava leyi, a swi ta “minta” minhlaselo yinyingi ya Sathana. (Mpful. 12:15, 16) Leswo hakunene swa yentxeka. Makhambi manyingi, vayavanyisi lava kalaka va nga na xihlawuhlawu va sizrelela timfanelo ta Timboni ta Yehovha a mhakeni ya kuva ti tlhangana akuva ti gandzrela ni ku zrezrela van’wana madzrungula lamanene. Swi le livaleni leswaku mahanyela yezru ma pfuna ngopfu akuva ku tekiwa swiboho leswo. Swi tikomba na mahanyela ya Pawulo ma yentxe leswaku van’wana ka lava a va ni wulawuli a doropeni dzra le Efesa va mu zrandzra va tlhela va mu hlonipha lakakuva va djula ku mu vona na a sizrelelekile. (Mint. 19:31) A hi tameni hi yentxa leswaku mahanyela yezru ya ku dumbeka ni ya xihlonipho na wone ma tama ma xiyeka ka vhanu van’wana. Leswo swi nga ha hi pfuna a nkameni lowu taka.
20. a) U titwisa kuyini hi leswi Zritu dzra Yehovha dzri hluliki a dzaneni dzra ku sungula ni leswi dzra ha tamaka dzri hlula namunhla? b) Swanga hi leswi Yehovha a hlulaka masikwini yezru, u tiyimisele ku yentxa yini?
20 Swi nyonxisa ngopfu ku vona ndlela leyi ‘zritu dzra [Yehovha] dzri yiki mahlweni dzri hangalaka dzri tlhela dzri hlula’ ha yone a dzaneni dzra ku sungula. Nakone swi nyonxisa ngopfu ku vona ndlela leyi Yehovha a seketelaka ha yone ku hlula kwezru namunhla. Wene ke, a wu swi naveli ku hlengela ka ku hlula koloko? Kutani ke, dondzra hi swikombiso leswi hi swi kambisisiki. Titsrongahati, fambisana ni nhlengeletanu ya Yehovha, tama u tizra hi nkhinkhi, fambela kule ni swa wungoma, nakone yentxa hinkwaswu leswi u nga swi kotaka akuva u nyikela wumboni hi mahanyela yaku ya ku dumbeka ni ya xihlonipho.
a Vona bokisi ledzri liki “Efesa—Doropankulu Dzra Aziya”, ka pajina 183.
b Pawulo a tlhele a tsrala buku dzra 1 Vakorinte hi nkama lowu a a li Efesa.
c Swi nga yentxeka tipanu leto a a li mintuzru leyi Pawulo a a yi tsrimba ka ximombo akuva loko a bahla, nyuku wake wu nga xikeli matihlweni. Leswi ku hlayiwaka leswaku Pawulo a a yambala mpahla ya ku tizra ha yone hi nkama wolowo, swi kombisa leswaku yene a a tizra hi ku hamba matende hi nkama wa ku wisa, kumbexana a mpundzrwini.—Mint. 20:34, 35.
d Luka a hlaye leswaku leswi va nga swi hisa a swi dzringana 50.000 wa mamuweda ya prata. Loko a li leswaku a a vulavula hi denari, a mutizri lweyi a tolovelekiki a a ta heta 50.000 wa masiku, kumbe kolomu ka 137 wa malembe na a tizra siku ni siku akuva a kuma mali leyo.
e Van’wana va hlaya leswaku Pawulo a a vulavula hi xiyentxakalu lexi loko a byele Vakorinte leswaku ‘swi hi bindzrele ngopfu swi tlula ni ntamu wezru lakakuva hi nga ha dumbi leswaku hi ta huluka’. (2 Kor. 1:8) Kambe swi nga yentxeka a a yanakanya hi mhaka yin’wana leyi a yi txhavisa ku tlula liyani. Loko Pawulo a hlaye leswaku a “lwe ni swihazri swa nhova a Efesa”, swi nga yentxeka a a vulavula hi xiyentxakalo xin’wana lexi djuliki leswaku a lwa ni swihazri swa nhova ka mbangu wa ku hambela ka wone mintlangu. Kumbe a a vulavula hi nkaneto wa vhanu va ku leva. (1 Kor. 15:32) Swiyimu leswi ha swibidzri swi nga yentxeka a lavisane na swone.
f Mintlawa ya ku fana ni leyo a yi tolovelekile nkama luwani a doropeni dzra le Efesa. Hi xikombiso, ntsrhaku ka kolomu ka 100 wa malembe, ntlawa wa lava a va hamba mapawu wu pfuxe mpfilumpfilu leyi fanaka a doropeni dzra le Efesa.