Hi Yini A Ndlela Leyinene Ya Ku Lulamisela Mintlhanganu?

Loko u dondzra Bibele ni mun’we wa Timboni ta Yehovha, swi nga ha yentxeka u dzringisa ku pfuxeta leswi taka dondzriwa ka dondzro yin’wana ni yin’wana. I swa lisima ku yentxa leswi fanaka na u nga si ya mintlhanganwini ya bandla akuva u ta susa londzrovoto ledzrikulu. Hi kuma mabindzru makulu loko hi va ni mukhuva lowunene wa ku pfuxeta.

Bekisa siku ni mbangu wa ku dondzra. Xana hi wini nkama lowu u nga hambaka u dondzra ha wone na u pepile miyanakanyu? Xana ku nga va mpundzrwini na u nga si na sungula ku tizra kumbe wusikwini loko vanaku va ye ku yetleleni? Nambi loko u nga ti swi kota ku dondzra hi nkama wa ku leha, tibekele nkama wa ku dondzra nakone dzringisa ku kala u nga pfumeleli ntxhumu wu ku hingeleta. Djula mbangu lowu zruliki, u susa hinkwaswu leswi nga ku hingeletelaka, hi ku tima radiyo, televhizawu ni selulari. Ku khongota na u nga si na sungula ku dondzra swi ta ku pfuna ku pumba ku hlatiyela hi swa siku akuva u kota ku talelisa miyanakanyu ka Zritu dzra Xikwembu Nkulukumba.​—Ba-le-Filipi 4:6, 7.

Funga tinhlamulo u tlhela u lulamela ku hlamula. Sungula hi ku kuma mongo wa dondzro hinkwayu. Yanakanyisisa hi nhloko-mhaka kumbe ndzrima, u vona leswaku swinhlokwana-mhaka swa kone swi yelanisa kuyini ni dondzro, u gama u kambisisa a mifoto hinkwayu leyi nga kone ka dondzro yoleyo ni swivutiso swa mpfuxeto leswi khanyisaka tinhla-nkulu. Kutani dondzra yava ha dzrin’we u tlhela u djuletela nhlamulo ya xivutiso lexi nga ka dondzro. Pfula u va u dondzra tindzrimana leti nyikeliwiki, u tlhela u pimisa hi ndlela leyi ti seketelaka dondzro ha yone. (Amintiṛo 17:11) Loko u kuma nhlamulo, funga kumbe u tsrala ntsrhati hansi ka mazritu matsrongo kumbe swiga swi tameliki mongo wa yava dzroledzro akuva swi ta ku pfuna ku dzrimuka loko u li ntlhanganwini. Lanu ke, loko u li ntlhanganwini, u nga ha tlakuxa voko loko u swi djula akuva u hlamula hi ku gomisa hi mazritu yaku.

Loko u kambisisa timhaka ta ku hambana-hambana leti dondzriwaka vhiki ni vhiki a mintlhanganwini, u ta yengetela miyanakanyu leyimpswha a ‘wukosini’ byaku bya wutivi bya Bibele.​—Mattheo 13:51, 52.

• Xana u nga tibekela mukhuva wini akuva u lulamisela mintlhanganu?

• Xana u nga tilulamisela hi ndlela yini leswaku u hlamula a ntlhanganwini?