Hi Wani Madzrungula Lamanene Mayelanu Ni Wukhongoti?

1. Xana wukhongoti hinkwabyu i byinene?

Ku ni vhanu va timbilu letinene ka wukhongoti hinkwabyu. Swa nyonxisa ku tiva leswaku Xikwembu Nkulukumba awa va vona vhanu lavo nakone awa va zrandzra. Kambe, ya ku biha hi leswaku wukhongoti byi tizriseliwe ku yentxa mintxhumu ya ku biha. (2 Ba-le-Korinte 4:3, 4; 11:13-15) Wudzrunguli byin’wana byi hlaya leswaku wukhongoti byimbeni byi seketela wugevenga bya ku lwela ku fuma, ku dlayiwa ka lixaka, tiyimpi ni ku yentxa vana nsele. Leswo swi vavisa njhani ka lava kholwaka ka Xikwembu Nkulukumba!​—Dondzra Mattheo 24:3-5, 11, 12.

Wukhongoti bya ntiyiso byi dzrumisa Xikwembu Nkulukumba, kambe wukhongoti bya madzrimi bya mu nyenyentsa. Byi dondzrisa miyanakanyu leyi ngeke kone a Bibeleni, ku patsra ni tindondzro ta madzrimi mayelanu na Xikwembu Nkulukumba ni mayelanu ni vafi. Kambe Yehovha a djula leswaku vhanu va tiva ntiyiso mayelanu na yene.​—Dondzra Ezekiel 18:4; 1 Timoteo 2:3-5.

2. Hi wani madzrungula lamanene mayelanu ni wukhongoti?

Ya ku nyonxisa hi leswaku Xikwembu Nkulukumba a nga kanganyisiwi hi wukhongoti lebyi hlayaka leswaku bya mu zrandzra na kasi hi ntshima-ntshima byi zrandzra misava ya Sathana. (Yakob 4:4) Zritu dzra Xikwembu Nkulukumba dzri li wukhongoti hinkwabyu bya madzrimi i “Babilona Lwenkulu”. Babilona khale ka kone a ku li doropa ledzri wukhongoti bya madzrimi byi tumbulukiki ka dzrone ntshraku ka Ndhambi ya le masikwini ya Nowa. Ku nga li khale, Xikwembu Nkulukumba hi xitxhuketa a ta helisa wukhongoti lebyi kanganyisaka byi tlhela byi hlupha vhanu.​—Dondzra Apfuletelo 17:1, 2, 5, 16, 17; 18:8.

Hi leyi ndzrava yin’wana ya ku nyonxisa. Yehovha a nga dzrivalanga vhanu va timbilu letinene lava hangalakiki makazri ka wukhongoti bya madzrimi a misaveni hinkwayu. A tlhanganisa vhanu lava hi ku va dondzrisa ntiyiso.​—Dondzra Mika 4:2, 5.

3. Xana vhanu va timbilu letinene va fanela ku yentxa yini?

Yehovha awa zron’weka hi vhanu lava zrandzraka mintxhumu ya ntiyiso ni ya yinene. A va tsratsriya leswaku va huma ka wukhongoti bya madzrimi. Vhanu lava zrandzraka Xikwembu Nkulukumba va tibekisele ku txintxa akuva va mu nyonxisa.​—Dondzra Apfuletelo 18:4.

Ka dzana dzra ku sungula, loko vhanu va timbilu letinene va yingele madzrungula lamanene ka vapostola, va nyonxe swinene. Va dondzre ndlela yimpswha ya wutomi ka Yehovha, ku nga ndlela ya wutomi lebyi nga ni nkongometo ni dumbo. I xikombiso lexinene ka hine namunhla hikusa va kombise leswaku va ma yamukela madzrungula lamanene hi ku zrangisa Yehovha a wuton’wini byavu.​—Dondzra 1 Ba-le-Thesalonika 1:8, 9; 2:13.

Lava tsrhikaka wukhongoti bya madzrimi Yehovha a va hoyozela a ndangwini wakwe wa vagandzreli. Loko u yamukela xizrambu xa Yehovha xa lizrandzru, u ta va munghanu wakwe, u ta va xizro xa ndangu wumpswha lowu nga ni lizrandzru wa vagandzreli-kuloni va Yehovha, u tlhela u kuma wutomi lebyi nga helikiki.​—Dondzra Marka 10:29, 30; 2 Ba-le-Korinte 6:17, 18.

4. Xana Xikwembu Nkulukumba a ta buyisa ku nyonxa ka matiko hinkwawu hi ndlela yini?

Ku yavanyisiwa loku taka ka wukhongoti bya madzrimi i madzrungula lamanene. Ku ta yentxa leswaku misava hinkwayu yi wisa ku hluphiwa. Wukhongoti bya madzrimi a byi nge he ti tlhela byi kanganyisa ni ku tsravukanisa lixaka dzra vhanu. Hinkwavu vhanu va ta tlhanganisiwa ku gandzreleni ka Xikwembu xin’we ntsena xa ntiyiso.​—Dondzra Apfuletelo 18:20, 21; 21:3, 4.