Valaviseli Lava Byisaka Ntlhambi

LOKO a ha li ntizrweni wakwe lani misaveni, Yesu a swi kombisile leswaku a a li ‘mubyisi lwemunene’. (Yh 10:11) Loko a vona switsrhungu na swi mu landzra hi mbilu hinkwayu, ‘a swi twela wuzrombe hikusa a swi xanisekile, swi hangalakile, swanga hi tihamba leti ngeke na mubyisi’. (Mt 9:36) Petrosi ni vapostola vambeni va swi vonile leswaku Yesu a a kazrateka hikusa a a ni lizrandzru. Ha kunene, Yesu a a hambane ngopfu ni vabyisi va Israyele va wukanganyisi, lava a va nge na mhaka ni ntlhambi lakakuva tihamba ti hangalaka ti tlhela ti sika hi ndlala ya moya! (Ezk 34:7, 8) Xikombiso lexinene xa Yesu xa ku dondzrisa ni ku hlayisa tihamba, lakakuva a nyikela ni wutomi byakwe hi mhaka ya tone, xi dondzrise vapostola ndlela ya ku pfuna vhanu va lipfumelo ku tlhelela ka Yehovha, ‘mubyisi ni mulaviseli wa mahika [yavu]’.​—1Pe 2:25.

² Khambi dzrimbeni loko a vulavula na Petrosi, Yesu a kandzrakanye lisima dzra ku disa ni ku byisa tihamba. (Yh 21:15-17) A swi ganaganekisi leswaku Petrosi a khumbeke ngopfu hi mhaka leyi lakakuva hi ku famba ka nkama a gama a dzrimuxa vakulu a bandleni dzra ku sungula dzra wukriste, a ku: ‘Byisani ntlhambi wa Xikwembu Nkulukumba, lowu nga ku n’wine, n’wi wu lavisela, ku nge ha ku sindzrisiwa, ka ku va hi ku pfuna ntsena; ku nge ha ku tizrela bindzru, ka ku va hi ku swi zrandzra; n’wi nga hambi swanga n’wi fuma mapfindla [ya Xikwembu Nkulukumba, NM], n’wi hamba ku va swikombiso swa ntlhambi.’ (1Pe 5:1-3) Mazritu ya Petrosi ma tizra ni le ka valaviseli va bandla namunhla. Hi ku yetisela Yesu, vakulu va tizra hi ku swi zrandzra va tlhela va va xikombiso ka ntlhambi, va zrangela a ntizrweni wa Yehovha.​—Hb 13:7.

³ Ha va tlangela valaviseli lava bekiwiki hi moya a bandleni. Hi kuma mabindzru manyingi hi ku hlayisiwa ha vone. Hi xikombiso, valaviseli va zron’weka va tlhela va tiyisa ha mun’we-mun’we a bandleni. Vhiki dzrin’wana ni dzrin’wana, va zrangela mintlhanganu ya bandla hi ku hiseka, lani hinkwavu va wundliwaka a lipfumelweni. (Ro 12:8) Ku tikazrata kwavu leswaku va sizrelela ntlhambi ka minkutxetelo ya ku biha, ku fana ni ya vhanu lavamfani, ku yentxa leswaku hi sizreleleka. (Eza 32:2; Ti 1:9-11) Wuzrangeli byavu a ntizrweni wa nsimu bya hi tiyisa leswaku hi khinyela a ku zrezreni ka madzrungula lamanene hi ku hiseka hweti yin’wana ni yin’wana. (Hb 13:15-17) Hi ku tizrisa ‘vhanu [swanga] swihiwo kumbe swihanano’, Yehovha a yentxe leswaku a bandla dzri yakiwa.​—Ef 4:8, 11, 12.

TIMFANELO LETI DJULEKAKA KA VALAVISELI

⁴ Akuva ku tiyisekisiwa leswaku a bandla dzri hlayisiwa ha hombe, vavanuna lava hlawuliwaka leswaku va va valaviseli va fanela ku hetisisa timfanelo leti longoloxiwiki a Zritwini dzra Xikwembu Nkulukumba. Ntsena loko va ti hetisisa hi kone ku nga hlayiwaka leswaku va bekiwe hi moya wa ku xwenga. (Min 20:28) I ntiyiso leswaku timfanelo ta Matsralwa leti djuliwaka ka mulaviseli lwa nga mukriste ti tlakukile, swanga hi leswi ku va mulaviseli ku nga liki matlangwana. Kambe a ti tlakukanga lakakuva wanuna wa mukriste, lweyi a zrandzraka Yehovha hakakunene a tlhela a navela ku tizrisiwa ha yene, a nga hluleka ku ti tlhaselela. Swi fanela ku va livaleni ka hinkwavu leswaku a valaviseli i vhanu lava hanyaka hi milawu ya Bibele a wuton’wini byavu bya siku ni siku.

⁵ Ka papela dzrakwe dzra ku sungula ka Timotewu, ni ka ledzri a tsraleliki Tito, mupostola Pawulo a longoloxe timfanelo ta ntshima leti djulekaka ka valaviseli. Ka 1 Timoteo 3:1-7, hi dondzra leswi: ‘Loko mhunu a djula wulaviseli, a navela ntizro lowa hombe. Hi leswo ke, swi fanekeli a mulaviseli a va lwa pfumalaka xisandzru, a va nuna wa nsati mun’we, a va lwa tikhomaka, lwa tlhazrihiki, lwa nga ni malwandla, lwa zruzrelaka vayeni, lwa tivaka ku dondzrisa, a nga vi lwa tinyiketaka ku nweni, kumbe lwa baka; kambe a a ve lwe wa ku nabyala, lwa nga lwikiki, lwa nga zrandzrikiki mali, lwa fumaka yindlu yakwe swinene kumbe hi ndlela leyinene, a bekisaka vana a ku yingiseteni, kun’we ni le swihluweni hinkwaswu. (Hikusa loko mhunu a nga swi koti ku fuma yindlu yakwe, a nga ku yini a mabekisela ya [bandla] dzra Xikwembu Nkulukumba xana?) a nga vi lweyi a haka ku pfumela, suka a tikukumuxa, a weliwa hi ku yavanyisiwa ka Diyavulosi. Mfuzri swi faneli leswaku a nkhensiwa hi lava nga handle, suka a wela ku zrukiweni ni le ntlhan’wini wa Diyavulosi.’

⁶ Pawulo a tsralele Tito a ku: ‘Leswi ndzri nga ku siyela swone Kreta, hi leswaku u lulamisa leswi saliki, ni ku beka vakulu mitini hinkwayu, swanga hi leswi ndzri nga ku leletisa xiswone: Loko ku ni mhunu lwa ngeke na xisandzru, a nuna wa nsati mun’we, a ni vana lava pfumelaka, lava ngeke na ku soliwa hi nkonta ya swihila kumbe swihena leswa ku biha, lava ngeke lava nga yingisetikiki. Hikusa swi fanekeli a mulaviseli a va lwa ngeke na xisandzru, swanga hi nandzra wa Xikwembu Nkulukumba; a nga vi lwe wa ku nonoha, a nga vi lwe wa ku hlundzruka, a nga vi wa ku tinyiketa ku nweni, a nga vi lwe wa ku tekisa ku ba, kumbe ku bindzrula hi ku delela; kambe a a ve muzruzreli wa vayeni, muzrandzri wa leswinene, lwe wa ku tikhoma, wa ku lulama, wa ku xwenga, wa ku tikhwavela, lwe a namazrelaka a Zritwini ledzra ku dumbeka dzra dondzro, akuva a ta kota ku luleka hi dondzro leyinene ni ku tshinya vakaneti.’​—Tito 1:5-9.

⁷ Nambi leswi a timfanelo ta Matsralwa, leti djuliwaka ka valaviseli, ti nga ha vonekaka ingiki ta bindzra, vavanuna lava nga vakriste a va fanelanga ku khondla mavoko, va nga naveli ku ti tlhaselela. Loko valaviseli va kombisa timfanelo letinene ta wukriste leti djuliwaka ka valaviseli, va kutxa vambeni a bandleni ku va yetisela. Pawulo a tsrale leswaku swihiwo kumbe swihanano leswo, leswi nga vhanu, swi nyikeliwa ‘akuva tinsasi ti hetiseka, va ta tizra wutizreli, akuva ku yakiwa mizri ya Kriste; hi kondzra hi txhikela kumbe hi tlhasela hinkwezru a vumun’weni bya wupfumeli ni bya ku tiva ka Xikwembu Nkulukumba, ni le nuneni lwe wa ku hetiseka, a mpin’weni wa xiyimu lexi hetisekiki xa Kriste’.—Ef 4:8, 12, 13.

⁸ Valaviseli a hi vapfana kumbe vavanuna lava haka ku pfumela. A matsrhan’wini ya leswo, i vhanu lava wupfiki a wuton’wini bya wukriste, va tivaka Bibele swinene, va twisisaka Matsralwa hi wuyenti va tlhela va zrandzra bandla ha kakunene. Va ni xivindzri xa ku vulavula ni ku luleka vadohi, xileswo, va sizrelela tihamba ka mani na mani lweyi a nga ha ti xololaka. (Eza 32:2) Valaviseli va voniwa hi ku nabyala hi hinkwavu a bandleni swanga vavanuna lava wupfiki hi le moyeni, lava zron’wekaka hi ntlhambi wa Xikwembu Nkulukumba.

⁹ Lava va fanelekaka ku bekiwa swanga valaviseli va kombisa wutlhazri lebyi pfunaka a wuton’wini byavu. Loko a txhatile, mulaviseli a fanela ku hetisisa milawu ya wukriste mayelanu ni wukati, ku fana ni ku va nuna wa nsati mun’we, lwa fumaka yindlu yakwe swinene kumbe hi ndlela leyinene. Loko mulaviseli a ni vana lava pfumelaka, lava ngeke na ku soliwa hi nkonta ya swihila kumbe swihena leswa ku biha, bandla dzri nga mu tsrhindzrekelela na dzri ntsrhunxekile dzri kombela swilayu ni ku tlhazrihisiwa mayelanu ni wutomi bya ndangu ni bya wukriste. Mulaviseli a tlhela a va lwa ngeke na xisandzru nakone a tlhela a nkhensiwa nambi hi lava nga handle. A nga fanelanga ku va ni xivangelo lexi twalaka xa ku mu sola, lexi nga honaka vito dzra bandla. A nga fanelanga a khwaveliwile swoswinyana hi kola ka xidoho lexikulu. Vambeni a bandleni va susumeteleka ku yetisela xikombiso xakwe lexinene mfuzri va titwa va nyonxile hi ku tiva leswaku a ta byi hlayisa ha hombe a wumoya byavu.​—1Ko 11:1; 16:15, 16.

¹⁰ Vavanuna lavo, lava fanelekaka, va ni wuswikoti bya ku tizrela bandla dzra wukriste ka mintizro ya ku fana ni ya vakulu va le Israyele, lava a va vitaniwa ‘lava tlhazrihiki, lava nga ni ku tiva, lava tiviwaka [lava wupfiki, NM]’. (Dt 1:13) Vakulu lava nga vakriste a va hetisekanga, kambe va tiviwa a bandleni ni le mugangeni swanga vavanuna lava lulamiki ni lava txhavaka Xikwembu Nkulukumba, lava va swi kombisiki ku dzringana nkama wa kukazri leswaku va hanya hi minsinya ya milawu ya Nkulukumba. Ku va va pfumala nandzru swi va nyika ntsrhunxeko wa ku vulavula a mahlweni ka bandla.​—Ro 3:23.

¹¹ Vavanuna lava fanelaka ku bekiwa swanga valaviseli va tikhoma ka mikhuva yavu ni le ka ndlela leyi va tizrisanaka ha yone ni vambeni. A va hisekeli swa kukazri ku tlula mpimu. A matsrhan’wini ya leswo, va dzringanisela va tlhela va tikhoma a mahanyeleni yavu. Ku dzringanisela kwavu ku tikomba a ku deni, a ku nweni, a ku hungateni ni le ka leswi va hungataka ha swone. Va dzringanisela ka manwela ya byala leswaku va nga tinyiketeli ku nweni kutani va voniwa swanga timpopswi kumbe lava nwaka ngopfu. Mhunu lweyi a miyanakanyu yakwe yi nga tizrikiki ha hombe hi kola ka byala swi nga vevuka ku hluleka ku tikhoma; xileswo a nga faneleki ku langusela swivileleko swa moya swa bandla.

¹² Ku langusela bandla swi djula leswaku mhunu a va ni malwandla kumbe a hleleka. Swihena swakwe leswinene swi tikomba ka ndlela leyi a langusekaka ha yone, muti wakwe ni mintizro yakwe ya siku ni siku. Mhunu wa malwandla a nga beketeli ntizro; a vona leswi djulekaka a va a swi yentxa. A namazrela minsinya ya milawu ya Nkulukumba.

¹³ Mulaviseli a fanela ku nabyala. A fanela ku kota ku tizrisana ni huvo ya vakulu hi ntwanano. A nga fanelanga ku titlakuxa ka vambeni nambi ku va koxa ku tlula mpimu. Swanga mhunu lweyi a dzringaniselaka, mulaviseli a nga zrangisi mavonela yakwe, a ma vona na ma li ya lisima ku tlula ya vakulu-kulobye. Vambeni va nga ha va ni timfanelo timbeni kumbe wuswikoti lebyi yene a nga liki na byone. Nkulu a kombisa ku nabyala loko a seketela swiboho swakwe a Matsralweni ntsena a tlhela a lwela ku yetisela xikombiso xa Yesu Kriste. (Flp 2:2-8) Nkulu a nga fanelanga ku lwa nambi ku ba kambe a bekela vambeni xitxhavu, a va vona na va mu tlula. A nga vi lwe wa ku nonoha, minkama hinkwayu a sindzrisa leswaku ku pfumeliwa mavonela yakwe. A nga vi lwe wa ku hlundzruka, kambe a fanela ku va wa ku zrula ka ndlela leyi a tizrisanaka ha yone ni vambeni.

¹⁴ Hi ku fanana, lweyi a fanelekaka ku tizra swanga mulaviseli a bandleni i mhunu lwe a tlhazrihiki. Leswi liki awa kambisisa, a nga gigisekeli ku teka swiboho. A yi twisisa ha hombe minsinya ya milawu ya Yehovha ni matizrela ya yone. Mhunu lweyi a tlhazrihiki awa swi yamukela swilayu ni nkongomiso. A nga fihli leswi a nga swone.

¹⁵ Pawulo a dzrimuxe Tito leswaku a mulaviseli a fanela ku va muzrandzri wa leswinene. A fanela ku va mhunu wa ku lulama ni lweyi a dumbekaka. Wumhunu lebyi byi voneka ka ndlela leyi a hanyisanaka ha yone ni vambeni ni ka ndlela leyi a womelelaka ha yone ka leswi nga swa ku lulama ni leswi nga swinene. A fanela ku va lweyi a tiyiki a ku tinyiketeleni kwakwe ka Yehovha nakone a khomelela ka minsinya ya milawu ya Yehovha. Awa swi kota ku bekisa xihundla. Hi lwe a zruzrelaka vayeni a tlhela hi ku tizrandzrela a nyikela hi nkama ni leswi a nga naswu leswaku a pfuna van’wana.​—Min 20:33-35.

¹⁶ Akuva a hetisisa xiyavelo xakwe hi ndlela ya hombe, mulaviseli a fanela ku va lwa tivaka ku dondzrisa. Hi ku ya hi mazritu ya Pawulo ka Tito, mulaviseli a fanela ku va ‘lwa namazrelaka Zritwini le dzra ku dumbeka dzra dondzro, akuva a ta kota ku luleka hi dondzro leyinene ni ku tshinya vakaneti’. (Ti 1:9) Awa swi kota ku yanakanyisisa, a seketela mhaka yakwe hi wumboni, a hlula vakaneti a tlhela a kombisa matizrela ya Matsralwa hi ndlela leyi taka kholwisa vayingiseti ni ku tiyisa lipfumelo dzravu. A mulaviseli a tizrisa wuswikoti lebyo bya ku dondzrisa nambi loko xiyimu xi bindzra kumbe xi nabyala. (2Tm 4:2) A lehisa mbilu loko a laya akuva a kota ku khwavela hi moya wa ku zrula lava hoxaka kumbe ku kholwisa lweyi a ganaganekaka akuva a mu kutxa ku yentxa mintizro leyinene leyi seketeliwiki ka lipfumelo. Mulaviseli a kombisa leswaku awa faneleka hi ku kota ku dondzrisa ntlawa wa vhanu kumbe hi ku bulisana ni mhunu mun’we hi ku kongoma.

¹⁷ I swa lisima kuva vakulu va hiseka a nsin’wini. Swi fanela ku va livaleni leswaku va tikazratela ku yetisela Yesu, lweyi a a zrangisa ntizro wa ku zrezra madzrungula lamanene. Yesu a a zron’weka hi vadondzrisiwa vakwe, hi ku va pfuna ku va vazrezri lavanene va evhangeli. (Mr 1:38; Lk 8:1) Ku tiyimisela ka vakulu ku heta nkama a ku zrezreni nambi loko va khomekile swi kutxa hinkwavu a bandleni akuva va hiseka hi ndlela leyi fanaka. Nakone loko vakulu va zrezra ni swizro swa mindangu yavu, ni vambeni a bandleni, va kota ku ‘khongotelana’.​—Ro 1:11, 12.

¹⁸ Hinkwaswu leswi swi nga ha voneka ingiki ku yimeliwa swinyingi ka lweyi a tizraka swanga mulaviseli. I ntiyiso leswaku a nga kone mulaviseli lweyi a tlhaselaka timfanelo hinkwatu leti tlakukiki ta Bibele hi ndlela leyi hetisekiki, kambe a ku na nkulu lwa bekiwiki a bandleni a fanelaka ku kiyeleliwa hi mfanelo ni yin’we ka leti lakakuva swi za swi soleka ngopfu. Swi nga ha yentxeka vakulu vambeni va li ni timfanelo ta kukazri leti xiyekaka ngopfu na kasi vambeni va nga ha va ni timfanelo timbeni ta ku va tlula. Mabindzru ya kone hi leswaku a huvo ya vakulu swanga mizri yin’we yi ta va ni timfanelo letinene leti djulekaka akuva yi vonelela bandla hi ndlela ya kone.

¹⁹ Loko vakulu swanga huvo va hlawula vavanuna leswaku va va valaviseli, va fanela ku dzrimuka mazritu ya Pawulo, lama liki: ‘Ndzri byela mun’wana ni mun’wana lwa nga makazri kwenu, a nga txhuki a tipimela hi ku tlula leswi fanekelaka, a a pimise hi ku tikhoma, a mun’wana ni mun’wana hi mpimu wa ku pfumela lowu Xikwembu Nkulukumba a mu yaveliki wone.’ (Ro 12:3) Nkulu mun’wana ni mun’wana a fanela ku tivona swanga lwentsrongo ka van’wana. A nga kone lwa fanelaka ku tivona swanga ‘lwa tlhazrihiki ku tlulisa’ loko a kambisisa timfanelo ta vambeni. (Ekl 7:16) Loko huvo ya vakulu yi ti tiva ha hombe timfanelo ta Matsralwa leti djuliwaka ka valaviseli, yi ta swi kota ku vona leswaku makwezru lweyi a kambeliwaka awa ti tlhaselela timfanelo toleto hi lani swi djulekaka ha kone kumbe im-him. Loko va yanakanyela ku pfumala ku hetiseka ka van’wana va tlhela va va kule ni xihlawuhlawu ni wukanganyisi, vakulu va ta hlawula hi ndlela leyi kombisaka leswaku va yi bekela xitxhavu milawu ya Yehovha, leswi taka pfuna bandla. Loko va bula hi lava va nga va hlawulaka, va khongota ni ku landzrela nkongomiso wa moya wa ku xwenga wa Nkulukumba. Lebyi i byin’we bya wutiyanguleli lebyi va nga na byone, nakone va fanela ku swi yentxa hi ku pfumelelana ni xitsratsriyo xa Pawulo lexi liki: ‘U nga hatli u tlhanteka mhunu mavoko.’​—1Tm 5:21, 22.

MHANDZRU WA MOYA

²⁰ Vavanuna lava fanekelaka hi le moyeni va swi kombisa hi swiyentxo leswaku va kongomisiwa hi moya wa ku xwenga nakone va kombisa mhandzru wa moya a wuton’wini byavu. Pawulo a longoloxa matsrhamela ya moya lama hambaka 9, ku nga: ‘Lizrandzru, ni ku tsrhava, ni ku zrula, ni ku tiyisela, ni ku tsrhavelana, ni wunene, ni ku dumbeka, ni ku nabyala ni ku tikhoma.’ (Ga 5:22, 23) Valaviseli va ku tanu va pepisa vamakwavu va tlhela va pfuna bandla ku va ni wumun’we a ku hambeni ka ntizro wa ku xwenga. Hanyela dzravu ni mihandzru ya mintizro yavu swi kombisa leswaku va bekiwa hi moya wa ku xwenga.​—Min 20:28.

VAVANUNA LAVA KONDLETELAKA WUMUN’WE

²¹ I swa lisima kuva vakulu va tizrisana akuva va kondletela wumun’we a ndzreni ka bandla. Swi nga ha yentxeka va hambana ngopfu hi wumhunu byavu, kambe va hlayisa wumun’we bya huvo hi ku yingisetana hi xitxhavu nambi loko va hambana hi mavonela ka timhaka leti va bulaka ha tone. Loko ku nga tsrhoviwi nawu wa Bibele, nkulu ha mun’we a fanela ku va ni moya wa ku zrangisa mavonela ya vambeni ni ku seketela xiboho xa wugamu xa huvo ya vakulu. Loko a ni moya wa ku zrangisa vonela dzra vambeni, a kombisa leswaku a kongomisiwa hi ‘wutlhazri lebyi pfaka henhla’ lebyi nga ni ‘ku zrula ni ku nabyala’. (Yk 3:17, 18) A nga kone nkulu lwa fanelaka ku tivona na a tlakukile ka vambeni, nambi ku dzringisa ku fuma vambeni. Vakulu va va na va tizrisana na Yehovha loko hi xivone va tizrisana swanga huvo, ku nga leswi taka pfuna bandla.​—1Ko, ndzrima 12; Kl 2:19.

LWELA KU FANELEKA

²² Vavanuna lava nga vakriste lava wupfiki va fanela ku navela ku va valaviseli. (1Tm 3:1) Nambitanu, ku tizra swanga nkulu swi djula ku tikazrata ni ku titsrona swa kukazri. Swi hlaya ku tinyikela leswaku u pfuna vamakwezru ni ku zron’weka hi swivileleko swavu swa moya. Ku lwela ku faneleka ku va mulaviseli swi hlaya ku lwela ku hetisisa timfanelo leti longoloxiwiki a Matsralweni.

SWIYIMU SWA MHUNU SWI NGA HA TXINTXA

²³ Makwezru lweyi a buyaka na a tizrela hi ku dumbeka hi malembe ya ku tala a nga ha vabya hi tlhelo dzra nyama kumbe a nga ha swi koti ku tizra. Kumbexana hi kola ka ntanga, swi nga ha yentxeka a nga ha swi koti ku hetisisa wutiyanguleli bya ku va nkulu. Nambitanu, a fanela ku tama a kombisiwa xitxhavu ni ku tama a voniwa swanga nkulu, loko a ha tizra swanga nkulu. A nga sindzriseki ku tsrhika wutiyanguleli byakwe hi kola ka ku hluleka swimbeni. A ha faneliwa hi xitxhavu lexi yandzrisiwiki kabidzri lexi kombisiwaka ka vakulu hinkwavu lava tikazrataka hi lani va kotaka ha kone leswaku va byisa ntlhambi.

²⁴ Kambe loko makwezru a vona leswaku swi nga yapswa kuva a yima ku tizrela hi kola ka swiyimu swa ximhunu leswi txintxiki, leswi hikaka wuswikoti byakwe, a nga ha tihlawulela ku yentxa tanu. (1Pe 5:2) A ha fanela ku bekeliwa xitxhavu. A ha swi kota ku yentxa swinyingi leswinene a bandleni, nambi loko a nge he nkulu.

MINTIZRO LEYI YENTXIWAKA A BANDLENI

²⁵ Vakulu va yentxa mintizro ya ku hambana-hambana a bandleni. Ku ni mutlhanganisi wa huvo ya vakulu, matsralana, mulaviseli wa ntizro, mufambisi wa Dondzro ya Xihondzro Xa Ku Zrindzra ni mulaviseli wa Ntlhanganu Wa Wutomi Ni Wutizreli. Vakulu vanyingi va tizra swanga valaviseli va mintlawa ya nsimu. Vakulu va tizra ka swiyavelo leswi hi nkama lowu nga pimiwangakiki. Nakunene, loko makwezru a zruzra, kumbe loko a nga ha swi koti ku hetisisa wutiyanguleli lebyi hi kola ka mavabyi, kumbe loko a suseliwa timfanelo hi kola ka ku va a nga ha hetisisi swivileleko swa Matsralwa, ku hlawuliwa nkulu mumbeni leswaku a mu siva. Ka mabandla lawa a valaviseli va nga vatsrongo, swi nga ha djula kuva nkulu a hamba mintizro yibidzri kumbe ku tlula, ku kondzra ku yimisiwa vamakwezru lava fanelekaka ku tizra swanga vakulu.

²⁶ A mutlhanganisi wa huvo ya vakulu a tizra swanga mufambisi wa mintlhanganu ya huvo ya vakulu. A fanela ku tizra hi ku titsrongahata kun’we ni vakulu vambeni a ku hlayiseni ka ntlhambi wa Xikwembu Nkulukumba. (Ro 12:10; 1Pe 5:2, 3) A fanela ku va muhleli wa hombe a tlhela a zrangela hi ku hiseka.​—Ro 12:8.

²⁷ Matsralana a hlayisa dzrungula dzra bandla a tlhela a tivisa vakulu timhaka ta lisima. Loko swi vileleka, nkulu mumbeni kumbe nandzra wa wutizreli lweyi a nga ni wuswikoti a nga ha bekiwa ku va mupfunisi wakwe.

²⁸ A xiyimiso xa ntizro wa nsimu ni timhaka timbeni leti yelanaka na wone, swi laviseliwa hi mulaviseli wa ntizro. Minkama hinkwayu a hamba xiyimiso xa ku pfuxela mintlawa hinkwayu ya nsimu kan’we hi hweti hi ku hela ka vhiki. Ka mabandla lawa ku nga ni mintlawa yitsrongo ya nsimu, a nga ha pfuxela ntlawa ha wun’we kabidzri hi lembe. Loko a yentxa liyendzro ledzro, a fambisa mintlhanganu ya ntizro wa nsimu, a tizra nsin’wini ni ntlawa, a hamba timpinda ni ku fambisa swidondzro swa Bibele ni vazrezri.

VALAVISELI VA MINTLAWA

²⁹ Dzrin’we dzra matovoko lamakulu lawa ma nga kone a bandleni i dzra ku tizra swanga mulaviseli wa ntlawa. Wutiyanguleli byakwe byi patsra 1) ku zron’weka swinene hi wumoya bya mhunu ha mun’we ka ntlawa wa ntizro wa nsimu; 2) ku pfuna ha mun’we ka ntlawa akuva a nga pfumaleki a nsin’wini, a hiseka a tlhela a nyonxa; 3) ku pfuna ni ku wupfisa malandzra ya wutizreli lawa ma nga ntlawini akuva ma fanelekela ku kuma wutiyanguleli lebyi yengeselekiki a bandleni. Huvo ya vakulu hi yone yi vonaka leswaku he vani vakulu lava fanelekaka ngopfu ku hetisisa mintizro leyo hinkwayu.

³⁰ Hi kola ka matsrhamela ya xiyavelo xa kone, loko swi koteka, valaviseli va mintlawa va fanela ku va vakulu. Kambe a nandzra wa wutizreli lweyi a fanelekaka a nga tizra ku za ku kumeka nkulu leswaku a mu siva. A nandzra wa wutizreli lweyi a tizrelaka ka xiyimu lexo a vitaniwa nandzra wa ntlawa, swanga hi leswi a nga liki mulaviseli a bandleni. A tizrela a hansi ka nkongomiso wa vakulu.

³¹ Ntxhumu wa lisima ka ntizro wa mulaviseli wa ntlawa i ku zrangela a ntizrweni wa nsimu. Ku va kone kwakwe nkama hinkwawu, ku hiseka ni nkhinkhi yakwe swi ta kutxa vambeni ka ntlawa. Swanga hi leswi vazrezri va swi zrandzraka ku tiyisiwa ni ku kuma mpfuno hi ku tizra xikan’we, swi nga va swinene ku va a xiyimiso xa nsimu xi fambisana ni lavanyingi. (Lk 10:1-16) Mulaviseli wa ntlawa a fanela ku tiyiseka leswaku minkama hinkwayu ku ni nsimu leyi yanelaka. Hi ntolovelo hi yene a fambisaka ntlhanganu wa ntizro wa nsimu ni ku yava vazrezri hi siku ledzro. Loko a nge ti va kone, a nga ha hlela kuva nkulu mumbeni kumbe nandzra wa wutizreli a zrangela. Loko hinkwavu va nge ti va kone, a nga ha hlela kuva muzrezri lwa fanelekaka a fambisa ntlhanganu akuva vazrezri va kuma nkongomiso lowu djulekaka.

³² Mulaviseli wa ntlawa a fanela ku hamba malulamiselo ya liyendzro dzra mulaviseli wa ntizro, hi ku byela ntlawa wakwe mayelanu ni liyendzro ledzro ni ku va yentxa va nyonxela mabindzru lawa va taka ma kuma. Loko hinkwavu a ntlawini va dzri twisisa ha hombe lulamiselo ledzro, va nga dzri seketela hi ku hiseka.

³³ A mintlawa ya ntizro wa nsimu yi yentxiwa yi va yitsrongo ha vomu. Leswo swi pfuna mulaviseli wa ntlawa ku va tiva ku yapswa hinkwavu lava lumbaka ntlawa wakwe. Swanga mubyisi lwa nga ni lizrandzru, a zron’weka swinene hi mun’wana ni mun’wana. A lwela ku nyikela mpfuno ka mhunu ha mun’we ni ku mu kutxa ku ya mahlweni ni ntizro wa ku zrezra a tlhela a va kone a mintlhanganwini ya bandla. A tlhela a nyonxela ku yentxa hinkwaswu leswi fanelekaka akuva a pfuna ha mun’we ka ntlawa ku tiya hi le moyeni. Lava vabyaka kumbe lava tsrhovekiki mbilu va pfuneka loko va yendzreliwa. Mavonela ya kukazri kumbe xilayu xa lizrandzru swi nga kutxa vambeni leswaku va lwela ku tlhaselela wutiyanguleli lebyi yengeselekiki a bandleni, lani va taka pfuna vamakwavu. Swi le livaleni leswaku mulaviseli wa ntlawa a lwela ku pfuna ngopfu-ngopfu lava nga ka ntlawa wakwe. Nambitanu, swanga nkulu ni mubyisi, a zron’weka hi hinkwavu a bandleni nakone a tiyimisele ku pfuna mani na mani lweyi a nga ha vilelaka mpfuno.​—Min 20:17, 28.

³⁴ Byin’we bya wutiyanguleli bya mulaviseli wa ntlawa i ku yamukela swibiko swa ntizro wa nsimu ka lava lumbaka ntlawa wakwe. Swibiko leswo swi nyikeliwa ka matsralana. Vazrezri va nga pfuna mulaviseli wa ntlawa hi ku hatla va nyikela swibiko swavu. Va nga ha swi yentxa hi ku nyiketa mulaviseli wa ntlawa hi ku kongoma kumbe hi ku swi peta ka bokisi dzra swibiko swa ntizro wa nsimu a Ndlwini ya Mfumu loko hweti yin’wana ni yin’wana yi hela.

XIHUBYANA XA NTIZRO XA BANDLA

³⁵ Ku ni mintizro ya kukazri leyi laviseliwaka hi Xihubyana xa Ntizro xa Bandla, lexi vumbiwaka hi mutlhanganisi wa huvo ya vakulu, matsralana ni mulaviseli wa ntizro. Hi xikombiso, xihubyana xa ntizro xi pfumelela ku tizrisiwa ka Yindlu ya Mfumu loko ku ni mitxhatu ni swilahlu, nakone xi ni wutiyanguleli bya ku yavela vazrezri ka mintlawa ya nsimu. Xihubyana xi tlhela xi pfumelela swikombelo swa wuphayona bya nkama hinkwawu ni bya ku pfunisa, ni ka swiyenge swimbeni swa ntizro. Xihubyana xa ntizro xi tizra a hansi ka nkongomiso wa huvo ya vakulu.

³⁶ Wutiyanguleli bya vamakwezru lava​—kun’we ni bya mufambisi wa Dondzro ya Xihondzro Xa Ku Zrindzra, bya mulaviseli wa Ntlhanganu Wa Wutomi Ni Wutizreli, kun’we ni bya vambeni lava vumbaka huvo ya vakulu—​byi tlhamuxeliwa hi zrwavi.

³⁷ Huvo ya vakulu a bandleni dzrin’wana ni dzrin’wana ya tlhangana hi minkama yimbeni leswaku yi bulisana hi timhaka leti khumbaka nhluvuku wa bandla hi tlhelo dzra moya. Handle ka ntlhanganu lowu vakulu va wu hambaka loko va yendzreliwa hi mulaviseli wa muganga, vakulu va tlhela va tlhangana ntsrhaku ka tihweti tizrazru na a va yendzrelile. Nakunene, nkama wini na wini vakulu va nga ha swi vona swi vileleka ku tlhangana hi kola ka xivangelo xa kukazri.

TITSRONGAHATE

³⁸ Valaviseli a va hetisekanga. Nambitanu, hinkwavu a bandleni va kutxiwa ku tibeka hansi kwavu hikusa ledzri i lulamiselo dzra Yehovha. A ta yavanyisa valaviseli hi ku ya hi mintizro yavu. Va yimela yene ni mfumu wakwe wa le tilweni. Ba-Heberu 13:7 yi li: ‘Yingisetani vafambisi venu, n’wi tibeka hansi kwavu, hikusa vone va hitekela mahika yenu, swanga hi leswi va taka vutisiwa wone; akuva va swi tizra hi ku tsrhava, na va nga konyi, hikusa a swi nga ti n’wi pfuna leswo.’ Swanga hi leswi Yehovha a tizrisaka moya wa ku xwenga leswaku a hlawula wanuna, Yehovha a ta tlhela a tizrisa moya wolowo wa ku xwenga leswaku a susa wanuna lweyi a nga kombisikiki mhandzru wa moya, nakone mahanyela yakwe ma nga fambisaniki ni timfanelo ta Matsralwa.

³⁹ Xana a hi wu tlangeli na swi huma mbilwini ntizro lowukulu ni xikombiso lexinene xa valaviseli va bandla? Loko a tsralela bandla dzra le Thesalonika, Pawulo a kutxe vamakwezru a ku: ‘Ha n’wi tsratsriya, vamakwezru, leswaku n’wi va ni swihluwa ku lava tizraka makazri kwenu, lava n’wi byisaka Hosini, lava n’wi lulekaka; va zrandzrani ngopfu hi nkonta ya ntizro wavu.’ (1Te 5:12, 13) Ntizro wunyingi lowu bindzraka, lowu valaviseli va bandla va wu yentxaka, wu yentxa swi hi nabyalela swi tlhela swi nyonxisa ku tizrela Xikwembu Nkulukumba. Handle ka leswo, ka papela dzrakwe dzra ku sungula ka Timotewu, Pawulo a vulavula hi moya lowu lava nga bandleni va fanelaka ku wu kombisa ka valaviseli, a ku: ‘A vakulu lava byisaka ha hombe, va fanekela hi ku yentxeliwa hi swihluwa leswi tlulaka ha kubidzri, ngopfu lava tizraka hi ntamu a Zritwini, ni le ku dondzriseni.’​—1Tm 5:17.

MINTIZRO YIMBENI YA WUTIYANGULELI A NHLENGELETANWINI

⁴⁰ Minkama yimbeni ku hlawuliwa vakulu leswaku va tizra swanga swizro swa Ntlawa Wa Ku Pfuxela Timbabyi. Vambeni va tizrela ka Tindzrawulo ta ku Vulavulisana ni Swipiritana, va pfuxela swipiritana ni vadahi leswaku va ya mahlweni va daha Timboni ta Yehovha na va nga tizrisi ngati. Valaviseli vambeni va yisa mahlweni ntizro wa Mfumu hi ku pfunisa a ku yakeni ni le ku bekiseni ka Tiyindlu ta Mfumu ni ta Tinhlengeletanu, kumbe hi ku tizra swanga swizro swa Swihubyana swa Tinhlengeletanu ta Swifundzra. Ku tikazrata ka vamakwezru lava ni ku navela kwavu ku yentxa leswi yengeselekiki a timhakeni leti ku tlangeliwa swinene hi hinkwavu a nhlengeletanwini. Ina, hi kombisa ‘swihluwa ku lava ku tanu’.​—Flp 2:29.

MULAVISELI WA MUGANGA

⁴¹ Huvo leyi Zrangelaka yi hlela leswaku ku bekiwa vakulu lava fanelekaka leswaku va tizra swanga valaviseli va miganga. Va bekiwa hi zrwavi leswaku va yendzrela mabandla lawa ma nga ndzreni ka muganga wavu, hi ntolovelo kabidzri hi lembe. Va tlhela va va ni xihena xa ku pfuxela maphayona lawa ma tizrelaka ka nsimu ya le kule. Va tihambela xiyimiso va gama va tivisa mabandla hinkwawu na ka ha sale nkama lowu dzringanaka akuva ma ta pfuneka swinene hi liyendzro ledzro.

⁴² Mutlhanganisi wa huvo ya vakulu hi yene a zrangelaka ka malulamiselo ya liyendzro leswaku dzri kota ku pfuna hinkwavu hi le moyeni. (Ro 1:11, 12) Loko a tivisiwa hi ta liyendzro ni swivileleko swa ximhunu swa mulaviseli ni nkatakwe (loko a txhatile), mutlhanganisi wa huvo ya vakulu a ta tizrisana ni vamakwezru va ku hambana-hambana leswaku a lulamisela ka ku mu zruzrela kone ni swivileleko swimbeni. A tiyisekisa leswaku hinkwavu, ku patsra ni mulaviseli wa muganga, va ma tiva malulamiselo lawa.

⁴³ Mulaviseli wa muganga a ta bulisana ni mutlhanganisi wa huvo ya vakulu mayelanu ni xiyimiso xa mintlhanganu, ku patsra ni mintlhanganu ya ntizro wa nsimu. Swiyimiso leswi swi ta hambiwa hi ku ya hi mavonela ya mulaviseli wa muganga ni nkongomiso wa hofisi dzra zrwavi. Hinkwavu va fanela ku byeliwa na ka ha ni nkama mayelanu ni mbangu ni nkama wa mintlhanganu ni bandla, ni maphayona, ni vakulu kun’we ni malandzra ya wutizreli, ku patsra ni mbangu ni nkama wa mintlhanganu ya nsimu.

⁴⁴ Hi Wawubidzri ni nhlikanhi, mulaviseli wa muganga a kambisisa Makartawu ya Vazrezri Va Bandla (Registo de Publicador de Congregação), nhlayu ya lava hlalelaka mintlhanganu, swibiko swa nsimu, ni xiyimu xa timali. Leswi swi ta mu nyika dzrungula dzra kukazri mayelanu ni loko bandla dzri djula mpfuno wa kukazri ni ndlela leyi a nga ha va pfunaka ha yone lava va nga ni wutiyanguleli bya ku hlayisa swibiko leswo. Mutlhanganisi wa huvo ya vakulu a fanela ku hamba malulamiselo ya leswaku mulaviseli wa muganga a kuma dzrungula ledzro hinkwadzru na ka ha ni nkama.

⁴⁵ Loko a pfuxela, mulaviseli wa muganga a tinyika nkama wa ku bulisana ni vamakwezru hi ku kongoma hi lani a nga kotaka ha kone—a mintlhanganwini, a nsin’wini, a ku fihluleni ni hi minkama yimbeni. Handle ka leswo, a tlhangana ni vakulu ni malandzra ya wutizreli akuva a va komba swidzrimuxo swa Matsralwa leswi fanelekaka, mavonela, ni ku va tiyisa hi ndlela leyi taka va pfuna ku byatsrha wutiyanguleli byavu bya ku byisa ntlhambi lowu nga mavokweni yavu. (Pr 27:23; Min 20:26-32; 1Tm 4:11-16) A tlhela a tlhangana ni maphayona leswaku a ma tiyisa a ntizrweni wa wone ni ku pfuna hi ku kongoma phayona ledzri kumbexana dzri langusanaka ni swikazratu swini na swini a wutizrelini.

⁴⁶ Loko ku ni timhaka ta kukazri leti djulaka ku bekisiwa, mulaviseli wa muganga a ta lwela ku pfuna hi lani a nga kotaka ha kone hi vhiki ledzro. Loko ti nga heli hi vhiki ledzro, mulanguseli wa muganga a nga pfuna vakulu kumbe vhanu va kone ku hamba wusetxhi bya Matsralwa lama khanelaka hi mhaka ya kone. Loko swi vilela ku landzriwa hi zrwavi, mulaviseli ni vakulu va ta byela zrwavi a dzrungula dzra kone hi wutsrhokotsrhoko.

⁴⁷ Loko a pfuxela bandla, mulaviseli wa muganga a hlalela mintlhanganu ya bandla leyi tolovelekiki. Minkama yimbeni mintlhanganu leyo yi nga ha lulamisiwa hi ku ya hi nkongomiso wa hofisi dzra zrwavi. A ta beka wukaneli lebyi nga ni nkongometo wa ku dondzrisa, ku kutxa ni ku tiyisa bandla. A lwela ku va yentxa va kulisa lizrandzru dzravu ha Yehovha, Yesu Kriste ni nhlengeletanu.

⁴⁸ Wun’wana wa minkongometo ya liyendzro dzra mulaviseli wa muganga i ku kutxa bandla leswaku dzri hlengemela hi ku hiseka a ku zrezreni ni ku va komba mayentxela lama pfunaka. Vanyingi a bandleni va nga ha lulamisa matizrela yavu leswaku va kota ku seketela a ntizro wa nsimu hi ku helela hi vhiki ledzro, kumbexana hi ku teka wuphayona bya ku pfunisa hi hweti ya liyendzro dzra mulaviseli. Mun’wana ni mun’wana lweyi a navelaka ku tizra na yene kumbe ni nkatakwe a nga titsralisa. Ku na swinyingi swa swinene leswi nga yentxiwaka hi ku famba ni mulaviseli wa muganga kumbe ni nkatakwe ka swidondzrana swa Bibele ni ka timpinda. Ku tikazrata kwaku loku yengeselekiki leswaku u seketela hi ku helela a xiyenge lexi xa liyendzro ku tlangeliwa hi mbilu hinkwayu.​—Pr 27:17.

⁴⁹ Lembe ni lembe, ku hambiwa tinhlengeletanu tibidzri ta muganga ka muganga wun’wana ni wun’wana. Mulaviseli wa muganga hi yene a nga ni wutiyanguleli bya ku hlela nhlengeletanu leyi loko ku tlhasa nkama. Mulaviseli wa muganga a beka mulaviseli wa nhlengeletanu ni mupfunisi wa mulaviseli wa nhlengeletanu. Va fanela ku tizrisana ni mulaviseli wa muganga a ku bekiseleni ka nhlengeletanu. Leswo swi yentxa mulaviseli wa nhlengeletanu a kota ku tinyiketela hi ku helela ka nongonoko wa nhlengeletanu. Mulaviseli wa muganga a tlhela a beka vavanuna vambeni lava nga ni wuswikoti leswaku va lavisela tindzrawulo ta ku hambana-hambana. A tlhela a beka lweyi a fanelaka ku kambela tinkonta ta muganga loko nhlengeletanu yin’wana ni yin’wana yi hela. Yin’we ya tinhlengeletanu ta muganga yi ta yamukela muyimeli wa zrwavi, lweyi a taka va xikaneli lexi va yendzreliki. Tinhlengeletanu timbeni ta muganga ti yaviwa hi swiyenge, lani xiyenge ha xin’we xa nhlengeletanu xi khomiwaka wuswaxone hi kola ka kuva a mbangu wa tinhlengeletanu wu li wutsrongo kumbe hi kola ka mpfhuka.

⁵⁰ Mulaviseli wa muganga a zrumela ntizro wakwe wa nsimu hi ku kongoma ka zrwavi hi ku hela ka hweti yin’wana ni yin’wana. Loko ku ni swa kukazri leswi djulaka ku hakeleliwa​—ku fana ni swa liyendzro, swakuda, ka ku yetlela, ni swivileleko swimbeni leswaku a hetisisa ntizro wakwe—​leswi bandla ledzri a dzri yendzreliki dzri nga swi hakelelangakiki, a nga ha swi tsralela zrwavi. Vayimeli lava famba-fambaka va ni ku dumba ka leswaku loko va zrangisa timhaka ta Mfumu wa Yehovha, a swivileleko swavu swa nyama swi ta kumeka, hi lani Yesu a dumbisiki ha kone. (Lk 12:31) Swi ta va swinene akuva mabandla ma twisisa leswaku i ndjombo kuva ma kombisa malwandla ka vhanu lava va tinyiketeliki leswaku va ma tizrela.​—3Yh 5-8.

XIHUBYANA XA ZRWAVI

⁵¹ Ka zrwavi dzrin’wana ni dzrin’wana dzra Timboni ta Yehovha a misaveni hinkwayu, vavanuna vazrazru kumbe ku tlula, lava wupfiki va tlhela va faneleka hi tlhelo dzra moya, va tizra swanga Xihubyana xa Zrwavi lexi languselaka ntizro wa ku zrezra a tikweni kumbe a matikweni lawa ma nga hansi ka nkongomiso wa xone. Xizro xin’we xa xihubyana xi tizra swanga mutlhanganisi wa xihubyana xa zrwavi.

⁵² Lava va tizrelaka ka Xihubyana xa Zrwavi va khoma timhaka leti khumbaka mabandla lawa ma nga a mugangeni wa zrwavi. Xihubyana xi langusela ntizro wa ku zrezra madzrungula lamanene ya Mfumu a mugangeni hinkwawu wa zrwavi xi tlhela xi tiyisekisa leswaku a mabandla ni miganga swi hleliwa hi ndlela ya kuva swi kota ku langusela swivileleko swa nsimu hi lani swi djulekaka ha kone. Xihubyana xa Zrwavi xi tlhela xi langusela nsimu ya vazrumiwa ni ntizro wa maphayona ya ku kheteka, ya nkama hinkwawu ni ya ku pfunisa. Loko ku ni tinhlengeletanu ta miganga ni tinhlengeletanu letikulu ta swifundzra, xihubyana xi hamba malulamiselo xi tlhela xi nyikela swiyavelo leswaku ‘hinkwaswu swi yentxiwa hi mfanelo ni hi nawu’.​—1Ko 14:40.

⁵³ A matikweni mambeni ku bekiwa Xihubyana xa Tiko, lexi zrangeliwaka hi Xihubyana xa Zrwavi xa tiko dzrimbeni. Leswi swi nabyalisa ku vonelela ntizro lomu ku tizraka xihubyana xa tiko. Xi bekisa timhaka leti fambelanaka ni Muti wa Betele ni tihofisi, mapapela ni swibiko; nakone hi ntolovelo xi tlhela xi bekisa ntizro wa nsimu. Xihubyana xa tiko xi tizrisana ni Xihubyana xa Zrwavi leswaku swi yisa mahlweni a timhaka ta mfumu.

⁵⁴ Huvo Leyi Zrangelaka hi yone yi bekaka hinkwavu lava tizrelaka ka Xihubyana xa Zrwavi ni le ka Xihubyana xa Tiko.

VAYIMELI VA NTSINDZRA WA TIMBONI TA YEHOVHA

⁵⁵ Nkama ni nkama, Huvo Leyi Zrangelaka yi hamba malulamiselo leswaku vamakwezru lava fanelekaka va pfuxela zrwavi ha dzrin’we a misaveni hinkwayu. Makwezru lweyi a hambaka ntizro lowo a tiviwa swanga muyimeli wa ntsindzra wa Timboni ta Yehovha. A ntizro wakwe wa ntshima i ku tiyisa ndangu wa Betele ni ku pfuna Xihubyana xa Zrwavi ku lulamisa timhaka kumbe ku hlamula swivutiso leswi xi nga ha vaka naswu a ntizrweni wa ku zrezra ni ku yentxa vadondzrisiwa. Makwezru lweyi a tlhela a kumana ni valaviseli va miganga lava hlawuliwiki, nakone minkama yimbeni a kumana ni vazrumiwa. Loko va kumana, a bulisana na vone hi swikazratu ni swivileleko swavu, a va tiyisa hi lani swi djulekaka ha kone mayelanu ni ntizro wavu lowu nga wa lisima ku tlula hinkwaswu, ku nga ku zrezra hi Mfumu ni ku yentxa vadondzrisiwa.

⁵⁶ Muyimeli wa ntsindzra wa Timboni ta Yehovha a zron’weka ngopfu hi leswi yentxiwaka nsin’wini, swa ku fana ni ku zrezra madzrungula ya Mfumu ni mintizro yimbeni leyi khumbaka mabandla. Loko nkama wu mu pfumelela, a nga ha tlhela a pfuxela tihofisi ta wundzruluteli. Loko muyimeli wa ntsindzra wa Timboni ta Yehovha a pfuxela zrwavi, a tlhela a ya a ku zrezreni ka Mfumu hi lani a nga kotaka ha kone.

WULANGUSELI BYA LIZRANDZRU

⁵⁷ Hi pfuneka ngopfu hi ntizro lowukulu ni nhlayiseko wa lizrandzru lowu hi wu kumaka ka vavanuna lava nga vakriste, lava wupfiki. Loko hi ya mahlweni hi titsrongahata ka valaviseli lava bekiwiki leswaku va byisa ntlhambi, hi ta va ni wumun’we na Kriste Yesu, ku nga Nhloko ya bandla. (1Ko 16:15-18; Ef 1:22, 23) Swanga mihandzru, moya wa Xikwembu Nkulukumba wa tizra a mabandleni a misaveni hinkwayu, nakone Zritu dzra Xikwembu Nkulukumba dzri tizrela ku kongomisa ntizro a misaveni hinkwayu.​—Ps 119:105.