Ku Yakiwa Ka Mimbangu Ya Wugandzreli

VAGANDZRELI va xihlayelamfuzri va Yehovha va leletiwa ku hlengeletana leswaku va dondzrisiwa ni ku kutxanana. (Hb 10:23-25) A mbangu wa ku sungula wa vagandzreli lava hlawuliwiki va Xikwembu Nkulukumba, ku nga va-Israyele, a wu vitaniwa ‘tende dzra nhlengeletanu’. (Eks 39:32, 40) Hi ku famba ka nkama, n’wana wa Davhida, Salomoni, a yake Yindlu, kumbe tempele, akuva ku dzrumisiwa Xikwembu Nkulukumba. (1Th 9:3) Loko tempele yi hohlotiwile hi 607 M.N.Y., va-Yuda a va hamba va tlhangana akuva va dzrumisa Xikwembu Nkulukumba ka tiyindlu leti vitaniwaka masinagoga. Hi ku famba ka nkama, tempele yi pfuxetiwile, kolanu yi tlhele yi tizra swanga ntsindzra wa wugandzreli bya xihlayelamfuzri. Yesu a dondzrise ka masinagoga ni le tempeleni. (Lk 4:16; Yh 18:20) Yesu a hambe ntlhanganu nambi a nhaveni.​—Mt 5:1–7:29.

² A ntsrhaku ka lifu dzra Yesu, vakriste a va tlhangana a mimbangwini ya mani na mani ni le makaya ya vamakwezru akuva va dondzrisa Matsralwa ni ku tikholisa hi wumun’we ni vapfumeli-kulobye. (Min 19:8, 9; Ro 16:3, 5; Kl 4:15; Flm 2) Hi minkama yimbeni a swi sindzrisa leswaku vakriste va ku sungula va tlhangana ka mimbangu leyi tumbeliki akuva va huluka ku khomiwa hi valala vavu. Nakunene, malandzra ya Xikwembu Nkulukumba ya ku dumbeka ya le nkameni lowu khalutiki a ma navela hi mbilu ku tlhangana a mimbangwini ya wugandzreli akuva ma va ‘vadondzrisiwa va Yehovha’.​—Eza 54:13.

³ Namunhla nakone, mimbangu ya mani na mani ni makaya ya vamakwezru swi tizriseliwa ku hamba mintlhanganu ya wukriste. A makaya ya vamakwezru ma talisa ku tizriseliwa ku hamba ntlhanganu wa nsimu. Lava va nyikelaka makaya yavu akuva ku hambeliwa kone mintlhanganu leyi va swi vona na ku li tovoko. Vanyingi va titwe na va pfunekile hi tlhelo dzra moya hi kuva va nyikele miti yavu leswaku yi tizrisiwa hi ndlela leyi.

YINDLU YA MFUMU

⁴ A mbangu wa ntshima lowu a Timboni ta Yehovha ti tlhanganaka ka wone he Ndlwini ya Mfumu. Hi ntolovelo, ku xaviwa mbangu kutani ku yakiwa Yindlu ya Mfumu leyimpshwa kumbe ku pfuxetiwa yindlu leyi nga ha vaka kone. Akuva ku hlayisiwa mali ni kuva ku londzrovotiwa hi ku helela miyaku yezru, mabandla manyingi ma nga ha tizrisa Yindlu yin’we ya Mfumu loko swi koteka. Ka mimbangu yimbeni, swi sindzrisa ku lugara yindlu. Tiyindlu ta Mfumu letimpswha ni leti pfuxetiwiki hi ndlela leyikulu swa fanela kuva ti nyiketeliwa. Nambitanu, loko Yindlu Ya Mfumu yi pfuxetiwa hi ndlela leyitsrongo a swi vileleki leswaku yi nyiketeliwa.

⁵ A Yindlu ya Mfumu a yi fanelanga ku yakiwa hi nkongometo wa ku hlamalisa van’wana. Nambi leswi ndlela leyi yi yakiwaka ha yone yi nga ha hambanaka hi ku ya hi mbangu, a nkongometo wezru i kuva hi yi tizrisa. (Min 17:24) Hi ku ya hi tsrhamela dzra mbangu wolowo, yi fanela ku va mbangwini wunene ni lowu fanelekaka akuva ku hambeliwa kone mintlhanganu ya wukriste.

⁶ Mabandla hinkwawu ya Timboni ta Yehovha ma pfunisa hi swihanano swa ku tizrandzrela akuva ku kota ku tizrisiwa ni ku bekisiwa Yindlu ya Mfumu leyi ma yaveliwiki ku hlengemela ka yone. A ku hambiwi minhlengo nakone a ku kombeliwi timali. Ku ni bokisi dzra swihanano akuva hinkwavu lava va nga kone a mintlhanganwini va kota ku nyikela swihanano leswaku ku hakeleliwa swivileleko swa yindlu. Va yentxa leswo hi ku swi zrandzra ni hi mbilu hinkwayu.​—2Ko 9:7.

⁷ Hinkwavu a ndzreni ka bandla va swi vona na ku li tovoko ku seketela Yindlu ya Mfumu hi ku swi zrandzra, hi timali ni hi ku tinyiketa hi ku tizra akuva ku tsrhama na ku basile ni ku hlayiseka. Hi ntolovelo, ku hlawuliwa nkulu kumbe nandzra wa wutizreli leswaku a hamba xiyimiso xa wubasisi lebyo. A wubasisi byi kotisa ku hambiwa hi mintlawa ya nsimu, na yi kongomisiwa hi mulaviseli wa yone wa ntlawa kumbe hi mupfunisi. Yindlu ya Mfumu yi fanela ku yimela Yehovha ni nhlengeletanu yakwe hi ndlela leyinene he ndzreni ka yone ni le handle.

⁸ Lani ku tlhanganaka mabandla mabidzri kumbe ku tlula, vakulu va mabandla lama patsrekaka va fanela ku simeka Xihubyana ya ku Bekisa Yindlu ya Mfumu, lexi taka tizrisana ka timhaka leti khumbaka yindlu ni leswi nga kone. A tihuvo ta vakulu ti hlawula makwezru lweyi a taka tizra swanga mutlhanganisi wa Xihubyana xa ku Bekisa Yindlu ya Mfumu. Xihubyana ya ku Bekisa Yindlu ya Mfumu xi fanela ku tizra a hansi ka nkongomiso wa vakulu loko ku hambiwa wubasisi xi tlhela xi tiyiseka leswaku yindlu yi hlayisiwa ha hombe ni leswaku ku ni switizro leswi dzringanaka akuva ku yentxiwa mintizro leyo. Leswo swi djula ku va ni ku tizrisana lokunene a xikazri ka mabandla lawa ma patsrekaka.

⁹ Loko mabandla manyingi ma tizrisa Yindlu yin’we ya Mfumu, ku fanela ku hambiwa xiyimiso xa ku txintxana minkama ya mintlhanganu. Vakulu va ta yentxa leswo hi moya wa ku twelana ni hi lizrandzru dzra wumakwezru. (Flp 2:2-4; 1Pe 3:8) A ku na bandla dzri fanelaka ku tivona na dzri ni mfanelo ya ku tekela mabandla mambeni swiboho. Loko mulaviseli wa muganga a yendzrela dzrin’we dzra mabandla lama tizrisaka yindlu yoleyo ya Mfumu, mabandla lawa mambeni ma ta txintxa siku ni nkama wa mintlhanganu hi vhiki ledzro loko swi djuleka.

¹⁰ Yindlu ya Mfumu yi nga ha tizrisiwa loko ku ni mitxhatu ni swilahlu, hi ku pfumeleliwa hi Xihubyana xa Ntizro xa Bandla. Vakulu lava va kambisisa xikombelo hi wunyaminyami kutani va teka xiboho hi ku ya hi nkongomiso lowu va nyikiwaka hi zrwavi.

¹¹ Ku languseliwa leswaku lava va pfumeleliwaka ku tizrisa Yindlu ya Mfumu akuva va hetisisa swiyentxakalu leswo, va fanela ku tikhoma hi ndlela leyi faneliki vakriste va Xihlayelamfuzri. A ku fanelanga ku yentxiwa ntxhumu a Ndlwini ya Mfumu lexi nga soliwaka hi bandla kumbe xi tisa xizruku ka Yehovha ni vito ledzrinene dzra bandla. (Flp 2:14, 15) Hi ku landzra nkongomiso wa zrwavi, Yindlu ya Mfumu yi nga tizriseliwa ka mintizro yimbeni ya moya, ya ku fana ni Xikole xa Wutizreli bya le Tilweni ni Xikole xa Ntizro wa Wuphayona.

¹² Nkama hinkwawu a bandla dzri fanela ku bekela xitxhavu mbangu lowu dzri tlhanganelaka ka wone. Mayambalela ni ndlela leyi hi tibekisaka ha yone swi fanela ku kombisa xitxhavu lexi fambisanaka ni wugandzreli bya Yehovha. (Ekl 5:1; 1Tm 2:9, 10) Loko hi tizrisa swilayu leswi hi nyikiwaka swone a mhakeni leyi, hi kombisa leswaku ha yi tlangela mintlhanganu yezru ya wukriste.

¹³ I swa lisima kuva hi hleleka loko mintlhanganu yi famba. Vana va byeliwa leswaku va tsrhama ni vapswele vavu. Vapswele lava nga ni vana lava nga vatsrongo va nga kutxiwa ku tsrhama lomu va nge tiki hingeleta ngopfu vambeni loko swi sindzrisa ku huma-huma va ya laya vanavu kumbe loko va ya bekisa swivileleko swimbeni swa vanavu.

¹⁴ Vamakwezru lava fanelekaka va bekiwa ku tizra swanga vakongomisi a mintlhanganwini a Ndlwini ya Mfumu. Va fanela ku va vhanu lava tlhazrihiki, va xinghanu va tlhela va va ni wuxiyaxiya. Wutiyanguleli byavu byi patsra ku losa lavampshwa ni ku va yentxa va titwa va yamukelekile, ku pfuna lava xweliki ku kuma ka ku tsrhama, ku konta lava hlalelaka mintlhanganu, ku vonelela swa ku pepelisa ni ku pfula kumbe ku pfala majanela ya Yindlu ya Mfumu. Loko swi vileleka, vakongomisi va dzrimuxa vapswele leswaku va vonelela vatsrongwana hi ndlela ya kone akuva va nga tsrutsruma-tsrutsrumi loko mintlhanganu yi nge si na sungula ni loko yi helile kumbe ku khandzriya a plataforma. Hi ndlela ya lizrandzru, mukongomisi a nga ha kombela mpswele wa n’wana lweyi a nga tsrhamisekiki leswaku a huma handle ni n’wana lweyo akuva lava va yingisetaka mintlhanganu va nga hingeletiwi ku tlula mpimu. A ntizro wa mukongomisi wu pfuna swinene leswaku hinkwavu va tikholisa hi mintlhanganu. I swinene loko ku tizrisiwa vakulu va bandla ni malandzra swanga vakongomisi.

KU YAKIWA KA TIYINDLU TA MFUMU

¹⁵ Hi dzana dzra ku sungula, vakriste vambeni a va pfundzrile hi tlhelo dzra nyama ku tlula vambeni, xileswo mupostola Pawulo a tsrale leswi: ‘Kambe a ku dzringana a ku ve kone. A nkameni wa swoswi, a ndzralo yavu yi ta pfuna vusiwana byenu; ka ha nga va ni ku dzringana.’ (2Ko 8:14) Ni namunhla ka ha ni ku dzringanisela. A mali leyi nyikeliwaka hi mabandla a misaveni hinkwayu yi kongomisiwa a ku pfuneni ka ku yaka ni ku pfuxeta Tiyindlu ta Mfumu. Nseketelo wa ku tizrandzrela wa vamakwezru a misaveni hinkwayu wu tlangeliwa swinene hi nhlengeletanu ni hi mabandla lama pfunekaka hi swihanano leswo.

¹⁶ Hi ku ya hi swivileleko swa muganga, a xikritori xa zrwavi dzri leleta mabandla leswaku ma khoma mintlhanganu ka tiyindlu ta kukazri ta Mfumu. A xikritori xa zrwavi dzri tlhela dzri hlawula nkama ni mbangu lowu ku nga yakeliwaka kone a tiyindlu ta Mfumu letimpshwa ni ku pfuxeta leti nga kone a ndzreni ka muganga wa zrwavi. Loko ku humelela timhangu, ku yentxiwa malulamiselo akuva ku pfuxetiwa tiyindlu ta Mfumu leti honekiki ni tiyindlu ta vamakwezru loko swi vileleka.

¹⁷ A xikritori xa zrwavi dzri tlhela dzri tizrisana ni vatizri va ku tizrandzrela akuva va pfunisa ku kuma mbangu, mpfumelelo wa ku yaka, ku tsrala matsrhamela ya yindlu ya Mfumu, ku yaka, ni ku yi bekisa. Leswi ku nga ni xivileleko xikulu xa Tiyindlu ta Mfumu a mimbangwini yinyingi, ku vileleka vatizri vanyingi. Vazrezri hinkwavu lava babatisiwiki, lava fanelekaka na va navela ku pfunisa va kutxiwa ku tsrala papela dzra xikombelo va nyiketa Xihubyana xa Ntizro xa Bandla dzravu. Nambi ku li vazrezri lava nga siki babatisiwa va nga pfunisa a ku yakeni ni le ku pfuxeteni ka yindlu yavu ya Mfumu.

TIYINDLU TA TINHLENGELETANU

¹⁸ Vakriste va dzana dzra ku sungula a va hlengeletana hi mintlawa ya yitsrongo. Nambitanu, a va pfana va hlengeletana na va li ‘xitsrhungu lexikulunyana’. (Min 11:26) Hi ku fanana, vhanu va Yehovha namunhla va tlhangana hi mintlawa ya yikulu leswaku va hamba tinhlengeletanu ta muganga ni tinhlengeletanu letikulu ta xifundzra. Minkama yinyingi ku lugariwa miyaku ya le mugangeni leswaku ku hambeliwa kone tinhlengeletanu, kambe loko yi nge kone kumbe yi nga faneleki, ku nga ha hambiwa mbangu wa wugandzreli lowu vitaniwaka Yindlu ya Tinhlengeletanu.

¹⁹ Minkama yimbeni, ku xaviwa yindlu, yi pfuxetiwa, yi tizrisiwa swanga Yindlu ya Tinhlengeletanu. Nambitanu, hi ntolovelo, ku djuliwa mbangu ku yakiwa yindlu yimpshwa. A Tiyindlu ta Tinhlengeletanu ta siyana hi ku kula ka tone, hi ku ya hi swivileleko swa muganga. A xikritori xa zrwavi hi dzrone dzri hambaka xiboho xa ku xava kumbe ku yaka tiyindlu leto ntsena ntsrhaku ka ku kambisisa ha hombe timali leti ti taka djuleka ni leswaku yi ta tizrisiwa kangani hi lembe.

²⁰ A xikritori xa zrwavi dzri beka vamakwezru leswaku va vonelela matizrisela ni ku lulamisa Yindlu ya Tinhlengeletanu. Ku hambiwa malulamiselo leswaku a miganga yi basisa nkama ni nkama loko ku hela nhlengeletanu, ku basisiwa hi wuyenti kabidzri hi lembe, ni ku lulamisa leswi vilelekaka na swi nge si na honeka ngopfu. Swa pfuna loko vamakwezru va tinyikela leswaku va pfunisa a ntizrweni lowu. Xileswo, mabandla ma kutxiwa ku seketela malulamiselo lawa hi mbilu hinkwayu.​—Ps 110:3; Mlk 1:10.

²¹ Minkama yimbeni, Tiyindlu ta Tinhlengeletanu ti nga ha tizriseliwa ku hamba mintizro yimbeni ya moya, ku fana ni swikole swa Bibele ni mintlhanganu ya ku kheteka ya valaviseli va miganga. Ku fana ni Yindlu ya Mfumu, a Yindlu ya Tinhlengeletanu i mbangu lowu nyiketeliwiki wa wugandzreli. Loko hi tlhangana ka Yindlu ya Tinhlengeletanu, swiyentxo swezru, mayambalela ni ndlela leyi hi tibekisaka ha yone swi fanela ku kombisa xitxhavu, ku fana ni loko hi tlhangana a Ndlwini ya Mfumu leswaku hi gandzrela.

²² Vanyingi va ya va hamba xiyenge xa nhlengeletanu ya Xikwembu Nkulukumba a masikwini lawa ya wugamu. Lexo i xikombiso xa matovoko ya Yehovha. (Eza 60:8, 10, 11, 22) Xileswo, hi djula ku seketela lulamiselo dzra ku kuma ni ku bekisa mimbangu ya wugandzreli leswaku yi tsrhama na yi basile yi tlhela yi nyonxisa. Loko hi yentxa leswo, hi kombisa leswaku ha tlangela ntizro lowu miyaku leyi yi hi yentxelaka wone, wa ku hi pfuna ku tlhangana leswaku hi kutxana hi lani ku yengeselekiki swanga hi leswi hi vonaka siku dzri tsrhindzrekela.