‘Yentxani Hinkwaswu Hi Ku Twalisa Xikwembu Nkulukumba’

SWANGA vatizreli va Xikwembu Nkulukumba lava tinyiketeliki, hi fanela ku kombisa ku phatima ka Yehovha ka hinkwaswu leswi hi swi hlayaka ni leswi hi swi yentxaka. Mupostola Pawulo a nyikele nsinya wa nawu lowu kongomisaka, loko a ku: ‘Nambi n’wi da, nambi n’wi nwa, nambi n’wi yentxa yini na yini, yentxani hinkwaswu hi ku twalisa Xikwembu Nkulukumba.’ (1Ko 10:31) Leswo swi patsra ku namazrela milawu ya Yehovha ya mahanyela ya ku lulama, leyi nga xikombiso xa wumhunu byakwe lebyi hetisekiki. (Kl 3:10) Swanga vhanu lava xwengiki, hi fanela ku yetisela Xikwembu Nkulukumba.​—Ef 5:1, 2.

² Loko mupostola Petrosi a byela vakriste hi mhaka leyi, a tsrale leswi: ‘Swanga hi vana va ku yingiseta, n’wi nga yi hi ku navela kwenu ka khale, loko n’wi nga si tiva ntxhumu. Kambe swanga hi leswi lweyi a n’wi vitaniki a xwengiki, hi swoswo na n’wine xwengani a mahanyeleni yenu hinkwawu, hikusa ku tsraliwe leswaku: Xwengani leswi ni xwengiki.’ (1Pe 1:14-16) Ku fana ni le Israyeleni wa khale, hinkwavu a bandleni dzra wukriste va fanela ku tsrhama na va xwengile. Leswi swi hlaya leswaku a va fanelanga ku va ni bati, nambi ku ntxhimisiwa hi xidoho ni moya wa misava. Hi ndlela leyo, va va na va bekiwa hi tlhelo leswaku va hamba ntizro wa ku xwenga.​—Eks 20:5.

³ Mhunu a tsrhama na a xwengile hi ku hlayisa milawu ni minsinya ya milawu ya Yehovha leyi nga livaleni a Matsralweni ya ku Xwenga. (2Tm 3:16) Loko hi dondzre Bibele, hi dondzrisiwe mayelanu na Yehovha ni tindlela takwe, kutani hi navela ku va vanghanu vakwe. Ku dondzra loku ku hi yentxe hi vona xivileleko xa ku zrangisa Mfumu wa Xikwembu Nkulukumba ku sungula ni ku yentxa ku zrandzra ka Yehovha ku va ka lisima swinene a wuton’wini byezru. (Mt 6:33; Ro 12:2) Leswo swi djule leswaku hi yambala wumhunu lebyimpshwa.​—Ef 4:22-24.

KU BASA HE MOYENI NI LE MAHANYELENI

⁴ A hi nkama hinkwawu swi nabyalaka ku namazrela milawu ya Yehovha ya ku lulama. Nala wezru Sathana Diyavulosi, a djula ku hi tsrhindzreta kule ni xihlayelamfuzri. Nhlohlotelo wa ku biha wa misava leyi ni ku talela kwezru a xidohweni swi yentxa mintxhumu yi kazrata minkama yin’wana. Ku hanya hi ku pfumelelana ni ku tinyiketela kwezru swi djula hi tlhelo dzrezru hi lwa yimpi ya moya. A Matsralwa ma hi byela leswaku hi nga hlamali loko hi kumana ni tinxanisa kumbe loko hi dzringiwa. Hi ta xanisiwa hi kola ka leswa ku lulama. (2Tm 3:12) Hi nga nyonxa loko hi kumana ni mindzringo, hi ku tiva leswaku a mindzringo leyo i xikombiso xa leswaku hi yentxa ku zrandzra ka Xikwembu Nkulukumba.​—1Pe 3:14-16; 4:12, 14-16.

⁵ Nambi leswi Yesu a a hetisekile, a dondzre ku yingiseta ka mintxhumu leyi a xanisekiki ha yone. A ngi ngi sama a pfumela ku hluliwa hi mindzringo ya Sathana kumbe ku kulisa ku navela ka misava. (Mt 4:1-11; Yh 6:15) Yesu a nga vanga na yone mimpimiso ya ku yentxa swa ku biha. Nambi leswi misava a yi mu venga hi kola ka ku dumbeka kwakwe, kambe a tame a namazrela milawu ya Yehovha ya ku lulama. Mahlweninyana ka lifu dzrakwe, Yesu a byele vadondzrisiwa vakwe leswaku misava a yi ta va venga. Ku sukela nkama wolowo valandzreli va Yesu va lavisane ni nhlomulo, kambe va ve ni xixixi hi ku tiva leswaku a N’wana wa Xikwembu Nkulukumba a hlule misava.​—Yh 15:19; 16:33; 17:16.

⁶ Akuva hi nga hambi tlhelo dzra misava, ku djuleka hi namazrela milawu ya Yehovha ya ku lulama, ku fana ni muzrangeli wezru. Handle ka ku tingawula ku titwananisa ni politika ni timhaka ta misava, hi fanela ku lwisana ni moya wa yone wa mahanyela lama honekiki. Hi xi tekela nhlokweni xilayu lexi kumekaka ka Yakob 1:21: ‘Ke, txukumetani a xambya hinkwadzru ni mona lowu hundzrisaka, n’wi yamukela hi ku nabyala a zritu ledzri byaliwiki, ledzri kotaka ku huluxa mimoya yenu.’ Loko hi dondzra ni ku va kone a mintlhanganwini, hi nga titwa na hi “byala” zritu dzra xihlayelamfuzri a miyanakanywini ni le mbilwini yezru, nakone hi nge ti sungula ku navela leswi misava yi nyikelaka swone. Mudondzrisiwa Yakobe a tsrale a ku: ‘A n’wi swi tivi xana, leswaku a wunakulobye bya misava i wulala ku Xikwembu Nkulukumba xana? Hi leswo ke loko nha mhunu a zrandzra ku va nakulobye wa misava, a tiyentxa nala ku Xikwembu Nkulukumba.’ (Yk 4:4) Hi ndlela leyo, Bibele dzri hi kutxa ngopfu akuva hi khomelela ka milawu ya Yehovha ya ku lulama ni ku tama hi va lava hambaniki ni misava.

⁷ Zritu dzra Xikwembu Nkulukumba dzri hi ba ndleve leswaku hi tivonela ku tipeta ka mahanyela ya tingana. Dzri hi byela leswi: ‘Ke, a wumbuye, ni wuwoswi ni ku felela [ni makwanga, NM], swi nga hlayiwe ni kan’we a makazri kwenu, swanga hi leswi swi fanekelaka tinsasi.’ (Ef 5:3) Xileswo a hi fanelanga ku pfumelela miyanakanyu yezru yi tsrhamela ku yanakanya mintxhumu ya manyala, ya tingana kumbe leyi humiki ndleleni, nambi ku khanela ha yone ka mabulu yezru. Hi ndlela leyo hi va na hi kombisa leswaku hi navela ku hanya hi milawu ya Yehovha ya ku lulama ni leyi basiki.

KU BASA HI TLHELO DZRA NYAMA

⁸ Handle ka ku basa hi tlhelo dzra moya ni dzra mahanyela, vakriste va tlhela va twisisa lisima dzra ku basa hi tlhelo dzra nyama. A Israyeleni wa khale, Xikwembu Nkulukumba wa wuxwengi a a djula leswaku a nxaxa wu tsrhama na wu basile. Na hine hi fanela ku basa akuva Yehovha a nga ‘voni kwezru leswa nhlamba’.​—Dt 23:14.

⁹ A Bibeleni, ku xwenga ni ku basa hi tlhelo dzra nyama swa yelana. Hi xikombiso, Pawulo a tsrale leswi: ‘A hi tihlampsweni xambya hinkwadzru dzra mizri ni dzra moya, hi hetisela ku xwenga kwezru a ku txhaveni ka Xikwembu Nkulukumba.’ (2Ko 7:1) Xileswo, vakriste va xinuna ni va xisati, va fanela ku tikazratela ku tsrhama na va hlambe mizri va basa va tlhela va hlampswa mpahla yavu. Nambi leswi swiyimu swi siyanaka hi ku ya hi tiko, swi nga koteka ku kuma sabawu ni mati ya ku hlamba hi basa hi tlhela hi tiyiseka leswaku a vana vezru na vone va tsrhama na va basile.

¹⁰ Hi ntolovelo hi tiviwa ngopfu a mugangeni wezru hi kola ka ntizro wezru wa ku zrezra. Ku tsrhama na hi basise hi tlhela hi hlayisa muti wezru a ndzreni ni le handle, na swone i ndlela ya ku zrezrela vavundzramani. I ntxhumu lowu ndangu hinkwawu wu nga wu yentxaka. Vamakwezru va xinuna va fanela ku zron’weka swinene hi ku hlayisa yindlu ni kintazri, na va tiva leswaku muti lowu basiki wu tlhela wu hlayiseka wu nyikela wumboni byinene ka vambeni. Loko tinhloko ta mindangu ti yentxa leswo ti tlhela ti zrangela a timhakeni ta moya, swi kombisa leswaku ti zrangela miti ya tone hi ndlela leyinene. (1Tm 3:4, 12) Vamakwezru va xisati na vone va ni wutiyanguleli bya ku bekisa mintxhumu, ngopfu-ngopfu a ndzreni ka muti. (Ti 2:4, 5) Vatsrongwana lava dondzrisiwiki hi ndlela leyinene va hamba xiyenge xavu hi ku va va tihlayisa na va basile, va tlhela va basisa ni ku hlayisa lomu va yetlelaka kone. Xileswo ndangu hinkwawu wa tizrisana leswaku wu va ni xihena xa ku basisa lexi taka fambisana swinene ni misava leyimpshwa a hansi ka Mfumu wa Xikwembu Nkulukumba.

¹¹ Namunhla, vhanu vanyingi va Yehovha va tizrisa swa ku famba ha swone leswaku va ya mintlhanganwini. A mimbangwini yimbeni swo sindzrisa ku ya nsin’wini hi movha. Movha wu fanela ku tsrhama na wu basile wu tlhela wu lulamisiwa hi ndlela leyinene. Miti yezru ni swa ku famba ha swone swi fanela ku kombisa leswaku hi hamba tlhelo dzra vhanu va Yehovha lava basiki va tlhela va xwenga. Hi fanela ku yentxa hi ndlela leyi fanaka hi paxta dzrezru dzra nsimu ni Bibele.

¹² Mayambalela yezru ni ndlela leyi hi tibekisaka ha yone swi fanela ku fambisana ni minsinya ya milawu ya Xikwembu Nkulukumba. A hi nge pimisi hi ku yambala hi ndlela ya ku nyakapfala kumbe leyi nga khensekiki na hi djula ku vulavula ni mhunu wa xiyimu xa le henhla. Hi fanela ku zron’weka hi ndlela leyi tlulisaka loko hi yimela Yehovha a ntizrweni wa ku zrezra ni loko hi beka wukaneli! Mayambalela yezru ni ndlela leyi hi tibekisaka ha yone swi nga khumba ndlela leyi vambeni va vonaka wugandzreli bya Yehovha ha yone. Ku hlaya ntiyiso, a hi swinene ku pfumala ku dzringanisela kumbe kuva u nge na mhaka ni vambeni. (Mik 6:8; 1Ko 10:31-33; 1Tm 2:9, 10) Hi ndlela leyo, loko hi tilulamisela ku ya nsin’wini kumbe a mintlhanganwini ya bandla, a tinhlengeletanwini ta muganga ni ta xifundzra, hi fanela ku swi tekela nhlokweni leswi Matsralwa ma swi hlayaka mayelanu ni ku basa hi tlhelo dzra nyama ni ku languseka hi ndlela leyi dzringaniselekiki. Minkama hinkwayu hi djula ku kombisa xitxhavu ka Yehovha ni ku mu dzrumisa.

¹³ Swi fanela ku va hi ndlela leyi fanaka loko hi pfuxela ntsindzra wa misava hinkwayu kumbe hofisi dzra zrwavi dzra Timboni ta Yehovha. Dzrimuka leswaku vito ledzri liki Betele dzri li “Yindlu ya Xikwembu Nkulukumba”. Xileswo hi fanela ku yambala hi tlhela hi tikhoma hi ndlela leyi fanaka ni loko hi ya a Ndlwini ya Mfumu.

¹⁴ Nambi loko hi le ku hungateni, hi djula ku kambela ndlela leyi hi yambalaka ni ku tibekisa ha yone. Hi fanela ku tivutisa leswi: “Xana ni nga biwa hi tingana loko no djula ku nyikela wumboni bya xitxhuketa hi mhaka ya ndlela leyi ni yambaliki ha yone?”

SWIHUNGATISO LESWINENE

¹⁵ Ku wisa ni ku hungata swa djuleka akuva hi va ni wutomi lebyinene. Khambi dzrimbeni Yesu a zrambe vadondzrisiwa vakwe leswaku va ya tsrhama wuswavu a mbangwini wa kukazri va ‘wisa kutsrongo’. (Mr 6:31) Ku wisa ni swihungatiso leswinene swi nga yentxa mhunu a wisisa miyanakanyu. Swi nga pepisa mhunu leswaku a kota ku ya mahlweni a hamba ntizro wakwe lowu tolovelekiki.

¹⁶ Leswi ku nga ni mixaka yinyingi ya swihungatiso namunhla, vakriste va fanela ku tiva ku hlawula, va tizrisa wutlhazri lebyi humaka ka Xikwembu Nkulukumba ka leswi va swi yentxaka. Nambi leswi ku hungata ku djulekaka, a ku fanelanga ku zrangisiwa a wuton’wini. Hi dzrimuxiwa leswaku a ‘masikwini ya wugamu’, vhanu a va ta va ‘lava zrandzraka ku titsrhavisa va nga zrandzri Xikwembu Nkulukumba’. (2Tm 3:1, 4) Ku tala ka leswi vitaniwaka swihungatiso ni mintlangu a swi yamukeleki ka lava va navelaka ku hanya hi milawu ya Yehovha ya ku lulama.

¹⁷ Vakriste va dzana dzra ku sungula a va fanela ku lwisana ni mahanyela lama nga basangakiki ya vhanu va le masikwini yavu lava a vo djula ku hungata ntsena. Ka ma palku ya mintlangu ya le Roma, vahlaleli a va hungatisiwa hi ku vona vambeni loko va xanisiwa. Madzolonga, ku halatiwa ka ngati ni wuwoswi a swi kombisiwa a palku leswaku ku nyonxisiwa vahlaleli, kambe vakriste va dzana dzra ku sungula a va fambela kule ni mintxhumu leyo. Namunhla, ku tala ka swihungatiso swa misava swi kombisa mintxhumu leyi fanaka, nakone swi londzrovota ku navela loku bihiki ka vhanu. Hi fanela ku tivonela ka ndlela leyi hi fambaka ha yone, hi fulazrela swihungatiso leswi honaka. (Ef 5:15, 16; Ps 11:5) Nambi loko xihungatiso xi nga soleki, swi nga ha yentxeka lava va nga kone va nge na mahanyela ya wukriste.​—1Pe 4:1-4.

¹⁸ Ku ni swihungatiso swinyingi swa swinene ni mintlangu leyi vakriste va nga tikholisaka ha yone. Vanyingi va pfuneka hi ku landzra nkongomiso wa Matsralwa ni mavonela lama dzringaniselekiki lawa ma nga kumiwaka a mabukwini yezru.

¹⁹ Minkama yimbeni, mukriste a nga ha zramba mindangu ya ku hambana-hambana ya vakriste-kulobye leswaku yi hungata xikan’we. Kumbe vamakwezru va xinuna ni va xisati va nga ha zrambiwa a nkhubyini wa mutxhatu kumbe ka xiyentxakalu lexi fanaka. (Yh 2:2) Lweyi a va zrambiki hi yene a nga ni wutiyanguleli bya leswi taka yentxeka. Nakunene, lomu ku nga ni vhanu vanyingi swi djula ku tivonela. Ndlela leyi vambeni va titwaka na va ntsrhunxeke ha yone ka mintlhanganu leyo yi va yentxe va tlula mindzrilakana ya mahanyela ya wukriste, va da va tlhela va nwa ku tlula mpimu, va tlhasela nambi ku yentxa xidoho lexikulu. Akuva va tingawula leswo, vakriste lava tlhazrihiki va vone swi li swinene ku pimela ntsrengo wa vazrambiwa ni nkama lowu taka hetiwa nkhubyini. Loko ku ta va ni byala, byi fanela ku nwiwa hi ndlela leyi dzringaniselekiki. (Flp 4:5) Loko ku yentxiwa minzamu hinkwayu akuva ku tiyisekisiwa leswaku mintlhanganu leyo yi va yinene yi tlhela yi pepisa hi tlhelo dzra moya, swakuda ni swa ku nwa a swi nge ti va swa lisima ngopfu.

²⁰ I swinene kuva mhunu a va ni malwandla. (1Pe 4:9) Loko hi zramba vakriste vambeni a kaya kwezru leswaku hi da, hi nwa, hi hungata ni ku hamba wunghanu na vone hi fanela ku dzrimuka ni lava pfumalaka. (Lk 14:12-14) Loko hi zrambiwa ka swiyentxakalu leswo, matikhomela yezru ma fanela ku fambisana ni xilayu lexi kumekaka ka Marka 12:31. Minkama hinkwayu i swinene kuva hi tlangela wunene bya vambeni.

²¹ Vakriste va nyonxa hi swihanano swa Xikwembu Nkulukumba ni hi ku tiva leswaku va nga ‘da, va nwa, va titsrhavela ntizrweni wavu hinkwawu’. (Ekl 3:12, 13) Loko hi ‘yentxa hinkwaswu hi ku twalisa Xikwembu Nkulukumba’, a vinyi va muti kun’we ni vazrambiwa va nga dzrimuka mintlhanganu leyo ya ku tihungata na va nyonxile hi leswi va pepisiwiki he moyeni.

MINTIZRO YA XIKOLE

²² Vana va Timboni ta Yehovha va pfuneka hi tindondzro ta ntshima ta xikole xa misava. Loko va ha dondzra xikole, va tikazratela ku tiva ku dondzra ni ku tsrala ha hombe. Tindondzro timbeni ta xikole ti nga pfuna vampshwa lava djulaka ku tlhaselela makungu ya moya. Na va ha dondzra xikole, va ta lwela ku yentxa leswi va nga swi kotaka akuva va ‘yanakanya Muvumbi wavu’ hi ku zrangisa mintxhumu ya moya.​—Ekl 12:1.

²³ Loko u li mumpshwa lweyi a ha dondzraka xikole, tivonele ku titlhanganisa ni vampshwa va misava na swi nga vileleki. (2Tm 3:1, 2) Leswi Yehovha a ku nyikaka nsizrelelo lowu djulekaka, u nga yentxa swinyingi leswaku u bakanya nhlohlotelo wa misava. (Ps 23:4; 91:1, 2) Xileswo akuva u tisizrelela, londzrovota malulamiselo ya Yehovha.​—Ps 23:5.

²⁴ Akuva va nga titwananisi ni misava loko va ha dondzra xikole, vampshwa vanyingi lava nga Timboni va hlawula kuva va nga tipeti ka mintizro leyi nga fambisaniki ni xikole. Swi nga ha kazrata kuva vadondzri-kulobye ni vadondzrisi va swi twisisa. Nambitanu, ku nyonxisa Xikwembu Nkulukumba hi swone swi nga swa lisima. Leswo swi tlhamuxela leswaku u fanela ku tizrisa lipfalu dzraku ledzri dondzrisiwiki hi Bibele u tlhela u tiyimisela kuva u nga tipeti ka mimphikizanu ya misava kumbe ka ku khuzela tiko. (Ga 5:19, 26) Loko mi yingiseta swilayu swa Matsralwa leswi humaka ka vapswele lava zrandzraka Xikwembu Nkulukumba ni ku va ni vanghanu lavanene a bandleni, n’wine vampshwa mi nga swi kota ku hanya hi milawu ya Yehovha ya ku lulama.

NTIZRO WA KU TIHANYISA NI VANGHANU

²⁵ Hi ku ya hi Matsralwa, tinhloko ta mindangu ti ni wutiyanguleli bya ku wundla mindangu ya tone. (1Tm 5:8) Nambitanu, swanga vazrezri, va swi twisisa leswaku va fanela ku zrangisa swivileleko swa Mfumu ku tlula ntizro wa ku tihanyisa. (Mt 6:33; Ro 11:13) Loko va tinyiketela a ku txhaveni ka Xikwembu Nkulukumba, va tlhela va yaneliseka hi swakuda ni swiyambalo leswi va nga naswu, va ta kota ku tingawula ku hlatiyela ni mintlhamu ya ku djula wupfundzri bya wutomi.​—1Tm 6:6-10.

²⁶ Vakriste hinkwavu lava hambaka ntizro wa ku tihanyisa va fanela ku yanakanya hi minsinya ya milawu ya Matsralwa. Ku tihanyisa hi ndlela ya ku dumbeka swi tlhamuxela leswaku hi yala ku tipeta ka mintizro leyi tsrhovaka nawu wa Xikwembu Nkulukumba kumbe nawu wa tiko. (Ro 13:1, 2; 1Ko 6:9, 10) Ha ma tiva makhombo ya ku titlhanganisa ni vanghanu va ku biha. Swanga masotxha ya Kriste, hi tingawula ku tipeta ka mintizro ya mabindzru leyi tlulaka milawu ya Xikwembu Nkulukumba, wukala-tlhelo byezru bya wukriste kumbe ku beka khombyeni wumoya byezru. (Eza 2:4; 2Tm 2:4) Handle ka leswo a hi tizrisani na ‘Babilona Lwenkulu’, ku nga wukhongoti lebyi nga nala wa Xikwembu Nkulukumba.​—Mpf 18:2, 4; 2Ko 6:14-17.

²⁷ Ku khomelela ka milawu ya ku lulama ya Xikwembu Nkulukumba swi ta hi sivela ku tizrisa mintlhanganu ya moya leswaku hi fambisa mintizro ya mabindzru kumbe mintizro yimbeni ya ximhunu. A nkongometo wa ku tlhangana kwezru ni vambeni a mintlhanganwini ya wukriste, tinhlengeletanwini ta muganga ni ta xifundzra i ku gandzrela Yehovha ntsena. Hi dela a mezeni lowu wa moya hi tlhela hi tikholisa hi ku ‘khongotelana kumbe ku kutxanana, NM’. (Ro 1:11, 12; Hb 10:24, 25) Ku hlengeletana koloko ku fanela ku famba hi ndlela ya moya ntsena.

KU HANYA HI WUMUN’WE SWANGA VAKRISTE

²⁸ Milawu ya Yehovha ya ku lulama yi tlhela yi djula leswaku vhanu vakwe va ‘bekisa wumun’we bya moya ni pindzra dzra ku zrula’. (Ef 4:1-3) A matsrhan’wini ya ku lwela ku tinyonxisa, mun’wana ni mun’wana a lwela ku yentxela vambeni leswinene. (1Te 5:15) A swi ganaganekisi leswaku lowo i moya lowu u wu kumaka a bandleni dzraku. A swi na mhaka leswaku hi va lixaka muni, tiko, xiyimu xezru xa timali, hi dondzrile kumbe im-him, hinkwezru hi kongomisiwa hi milawu ya wululami leyi fanaka. Nambi vhanu va le handle va ma vona mahanyela lama hlamalisaka ya vhanu va Yehovha.​—1Pe 2:12.

²⁹ Loko Mupostola Pawulo a ya mahlweni a kandzrakanya xivangelo xa ku va ni wumun’we a te: ‘Ku ni mizri yin’we, ni moya wun’we, swanga hi leswi mi vitaniwelaka a ku dumbeni kun’we ka vitaniwo dzrenu. Hosi i yin’we, ni ku pfumela i kun’we, ni babatiso i dzrin’we; Xikwembu Nkulukumba i mun’we, a nga Tatana wa hinkwavu, lwa nga henhla ka hinkwavu, ni le makazri ka hinkwavu, ni le ndzreni ka hinkwavu.’ (Ef 4:4-6) Akuva leswo swi koteka, hi fanela ku twisisa tindondzro ta Bibele ta masungulo hi ndlela leyi fanaka, ku patsra ni tindondzro ta Bibele leti yentiki, akuva hi twisisa wukulu bya wuhosi bya Yehovha. Nakunene, Yehovha a nyike vhanu vakwe lidzrimi ledzri xwengiki dzra xihlayelamfuzri, ku nga leswi va pfunaka ku tizra hi wumun’we.​—Tsf 3:9.

³⁰ Wumun’we ni ku zrula loku nga bandleni dzra wukriste swi pepisa hinkwavu lava gandzrelaka Yehovha. Hi vona ku hetiseka ka xidumbiso lexi xa Yehovha: ‘Ndzri ta va beka kun’we swanga hi tihamba a zrangeni.’ (Mik 2:12) Hi djula ku hlayisa wumun’we lebyo, lebyi kondletelaka ku zrula, hi ku khomelela ka milawu ya Yehovha ya ku lulama.

³¹ Va nyonxa lava yamukeliwiki a bandleni dzra Yehovha ledzri basiki! Ku vitaniwa hi vito dzra Yehovha i swinene ngopfu ku tlula yini na yini lexi hi nga ha titsronaka xone. Loko hi hlayisa wuxaka byezru bya lisima na Yehovha, hi ta ya hi tikazratela ku hanya hi milawu yakwe ya ku lulama hi tlhela hi yi byela vambeni.​—2Ko 3:18.