Xikwembu Nkulukumba A Hamba Matilo Ni Misava

Yehovha Xikwembu Nkulukumba i Muvumbi wezru. A tumbuluxe mintxhumu hinkwayu, ku sukela ka mintxhumu leyi hi kotaka ku yi vona ku ya tlhasa ni le ka mintxhumu leyi hi kalaka hi nga koti ku yi vona. Ku sungula, Xikwembu Nkulukumba a hambe tintsrumi ta tinyingi ngopfu swinene. Wa swi tiva leswaku i yini tintsrumi? A tintsrumi i vhanu lava fanaka na Xikwembu Nkulukumba nakone va tsrhamaka a matilweni. Hine a hi swi koti ku vona tintsrumi, ku fana ni leswi hi kalaka hi nga swi koti ku vona Xikwembu Nkulukumba. A ntsrumi ya ku sungula leyi Yehovha a yi hambiki yi ve mupfunisi wake. Yone yi pfune Yehovha ku hamba tinyeleti, maplaneta ni mintxhumu yin’wana. Dzrin’we dzra maplaneta lawa i misava, ku nga mbangu wa ku xonga lowu hi tsrhamaka ka wone.

Ntsrhaku ka leswo, Yehovha a lulamisele misava akuva vhanu ni swihazri va tsrhama ka yone. A hambe dambu akuva dzri vaningela misava. Ntsrhaku ka leswo a hamba tinhava, malwandle ni milambu.

Wa swi tiva leswi yentxekiki ntsrhaku ka leswo? Yehovha a te: ‘Ni ta hamba byanyi ni minsinya.’ Xileswo a misaveni ku sungula ku va mihandzru ya ku siyanasiyana, matsavu ni swiluva. Hi ku landzrela, Yehovha a hamba swihazri swa mixaka hinkwayu. Wa swi zrandzra swihazri wene? He xini xihazri lexi u xi zrandzraka ngopfu? Phela hi Yehovha a hambiki swihazri hinkwaswu leswo! Swihazri leswi fambafambaka, leswi hahaka, leswi hlambetaka ni leswi fambaka hi khuzri. Yehovha a hambe ni swihazri leswitsrongo swa ku fana ni mimpfundla ni swihazri swa swikulu swa ku fana ni tindlopfu.

Ntsrhaku ka leswo, Yehovha a byela ntsrumi ya ku sungula leyi a yi hambiki a ku: ‘A hi hambi vhanu akuva va tsrhama misaveni.’ Vhanu lava a va ta hambana ni swihazri, a va ta kota ku hamba mintxhumu ya ku siyanasiyana, ya ku fana ni ku khanela, ku hleka ni ku bula na Xikwembu Nkulukumba. Nakone a va ta hlayisa misava ku patsra ni swihazri. Wa swi tiva leswaku i mani wanuna wa ku sungula? Hi ta swi vona ka dondzro leyi landzrelaka.