8 Wa Vhanu Lava Hulukiki

Nowa ni ndangu wake kun’we ni swihazri va nghena ngalaweni. Yehovha a pfala xipfalu ku va ku sungula ku na mpfula. Ku ne mpfula ya yikulu ngopfu swinene lakakuva misava hinkwayu yi tala hi mati ni ngalawa yi sungula ku mbekuka. A Vhanu hinkwavu lava a va yentxa swa ku biha va file. Kambe Nowa ni ndangu wake a va sizrelelekile a ngalaweni. Wa yi yanakanya ndlela leyi va titwiki ha yone?

Ku ne mpfula ku dzringana 40 wa masiku, wusiku ni nhlikanhi, yi gama yi yima. Kutani a mati ma sungula ku pshwa ha katsrongokatsrongo yi va ngalawa yi yima henhla ka nhava. A misava a ya ha tale hi mati ngopfu swinene, xileswo Nowa ni ndangu wake swi djule kuva va tsrhama ndzreni ka ngalawa ku dzringana nkama wa ku leha.

Hi wugamu a mati hinkwawu ma pshwile. Nowa ni ndangu wake va hete ku tlula lembe na va li ngalaweni. Hiloko Yehovha a va byela leswaku va huma. A nkama lowu va humaka, a swo fana ni loko va nghena a misaveni leyimpshwa! Wubihi hinkwabyu ni tihanyi a swi nga ha li kone. Nowa ni ndangu wake va nyonxe ngopfu swinene hikuva Yehovha a va huluxile, xileswo va hambele Yehovha magandzrelo.

Yehovha a nyonxe ngopfu swinene hi kola ka leswi va swi yentxiki, kutani a va dumbisa leswaku a a nge he ti tlhela a tizrisa ndhambhi akuva a helisa vhanu va ku biha lani misaveni. Akuva Nowa ni ndangu wake va tama va dzrimuka xidumbiso lexo, Yehovha a yentxe leswaku ku humelela nkwangulatilo wa ku sungula. U sama u wu vona nkwangulatilo? Minkama hinkwayu loko u vona nkwangulatilo a tilweni dzrimuka xidumbiso lexi xa Yehovha.

Ntsrhaku ka ku hamba xidumbiso lexo, Yehovha a byele Nowa ni ndangu wake a ku: ‘Pswalani vana mi tata misava.’