Muzrangeli Lwemumpshwa Ni Vavasati Vabidzri Va Xixixi

Ntsrhaku ka kuva a zrangele vhanu va Yehovha ku dzringana malembe manyingi, Yoxuwa a file na a ni 110 wa malembe. Na a ha hanya, a Vaisrayele hinkwavu a va gandzrela Yehovha. Kambe ntsrhaku ka loko a file, va sungule ku gandzrela swithombe ku fana ni Vakanana. Hi kola ka leswi va mu fulazreliki, Yehovha a pfumelele hosi ya le Kanana leyi a yi vitaniwa Yabini akuva yi xanisa Vaisrayele. Kutani Vaisrayele va kombele mpfunu ka Yehovha, xileswo Yehovha a va nyike muzrangeli lwemumpshwa, ku nga Baraki. A a ta pfuna vhanu akuva va tlhelela ka Yehovha.

Leswi Baraki a a nga swi tivi leswi a a fanela ku swi yentxa, Yehovha a zrumele muprofeta wa xisati Debora akuva a ya khanela na yene. Debora a byele Baraki a ku: ‘Hlawula 10.000 wa masotxha u khwela nhava ya Tabori na wone. Ntsrhaku ka leswo, u ta ya lwa ni masotxha ya hosi Yabini a nambyeni wa Kixoni. Ku ta va mbangwini wolowo lani u taka hlula Sisera, muzrangeli wa masotxha ya Yabini.’ Hiloko Baraki a byela Debora a ku: ‘Ni nga famba, kambe ntsena loko wene u famba na mine.’ Debora a mu hlamula a ku: ‘Ni ta famba na wene, kambe Yehovha a hlaye leswaku a hi wene u taka dlaya Sisera, i wansati lweyi a taka yentxa leswo.’

Hi ku landzrela, Debora a fambe na Baraki kun’we ni 10.000 wa masotxha a nhaveni ya Tabori akuva va ya tilulamisela ku lwa. Loko Sisera a tive leswo, a hlengelete masotxha lawa a ma ni ntamu ku patsra ni tin’qolo take ta yimpi, a va a ya kumana ni Vaisrayele a nambyeni wa Kixoni. Hiloko Debora a byela Baraki a ku: ‘Namunhla mi ta hlula hikusa Yehovha a na n’wine!’ Baraki ni 10.000 wa masotxha va xike hi ku tsrutsruma a nhaveni va ya lwa na Sisera ni masotxha yake.

Yehovha a yentxe leswaku a nambu wa Kixoni wu tala hi mati, leswi yentxiki leswaku a tin’qolo ta yimpi ta Sisera ti nga ha fambi hikusa a ku tale hi madaka. Baraki ni masotxha yake va hlule masotxha ya Sisera. O va ku Sisera a xike ka n’qolo yake a va a panda, a ye tumbela a tendeni dzra wansati lweyi a a vitaniwa Yayele. Yayele a nyike Sisera a leiti leswaku a nwa, a gama a mu nyika swa ku funekela. Leswi Sisera a a kazrale ngopfu swinene, e vhela a khomiwa hi wuzrongo. A hiloko Yayele a nyanimela, a va a tlhava nhloko ya Sisera hi nhonga leyi ga ni ponta, Sisera a fisa xiswoswo.

Baraki a fambe a djuletela Sisera. Hiloko Yayele a huma a tendeni dzrake a va a mu byela leswi: ‘Baraki, phela a mhunu lweyi u mu djuletelaka hi lweyi.’ Hiloko Baraki a nghena a tendeni a va a kuma Sisera na a file. Ina, Vaisrayele va swi kotile ku hlula valala vavu. Kutani Baraki na Debora va yimbelele lisimu na va tlangela Yehovha hi mpfunu lowu a va nyikiki wone. Nakone a Vaisrayele va hanye hi ku zrula ku dzringana 40 wa malembe.