Ruti Na Nawomi

Hi nkama lowu a ku ni ndlala a Israyele, wansati wa kukazri lweyi a a vitaniwa Nawomi a zruzrele ka tiko dzra le Mowabu xikan’we ni nuna wake ni vana vavu vabidzri va xinuna. Hi ku famba ka nkama, nuna wa Nawomi a file. A vanake va txhate ni van’hwanyana vabidzri va le Mowabu, ku nga Ruti na Orpa. Khombo dzra kone, ntsrhaku ka nkamanyana, a vana lavabidzri va Nawomi na vone va file.

Loko Nawomi a tive leswaku ndlala a yi helile a Israyele, a vone swi yampswa ku tlhelela kaya. Ruti na Orpa va fambe na yene, kambe na va ha li ndleleni Nawomi a va byele leswi: ‘N’wine mi ve vavasati lavanene ka vananga nakone mi ve vingi lavanene kwanga. Xileswo ni nyonxela leswaku mi tlhela mi txhata. Tlhelelani kaya ka vapswele venu.’ Kambe vone va te: ‘A hi nge ti ku tsrhika hikusa hi ku zrandzra ngopfu swinene!’ Nawomi a tame a sindzrisa Ruti na Orpa leswaku va tlhela. Hi wugamu Orpa a hlawule ku tlhelela kaya ka vapswele vake kambe Ruti a salile. Hiloko Nawomi a byela Ruti leswaku a famba na Orpa. Kambe Ruti a a mu zrandzra swinene Nawomi, xileswo a mu byele leswi: ‘Ni nga ti ku tsrhika. A maxaka yaku ma ta va maxaka yanga, Xikwembu Nkulukumba waku a ta va Xikwembu Nkulukumba wanga.’ U vona leswaku Nawomi a titwise kuyini loko a yingela mazritu ya Ruti?

Ruti na Nawomi va tlhase a Israyele. Siku dzrin’wana, Ruti a sukile a ya zrolela leswi a swi siyiwa hi vatsrhoveli ka masimu ya wanuna lweyi a a vitaniwa Bowasi, lweyi a a li n’wana wa Rahabi. Bowasi a same a yingela leswaku Ruti lweyi a a li Mumowabu, a a tiyimisele ku tsrhama na Nawomi. Hi mhaka leyo a byele vatizri vake leswaku va tsrhika Ruti a zrolela leswi siyiwaka, hi lani a a kota ha kone.

Loko Ruti a tlhase kaya a wusikwini, Nawomi a mu vutise leswi: ‘Ruti, namunhla a u tizrela kwini?’ Kutani Ruti a mu hlamule a ku: ‘Ka masimu ya wanuna lweyi a vitaniwaka Bowasi.’ Hiloko Nawomi a ku: ‘Bowasi i xaka dzra nkatanga, yana mahlweni u zrolela a masin’wini yake ni malandzra yake ya xisati. A nga kone lweyi a taka ku kazrata.’

Ruti a ye mahlweni a tizra a masin’wini ya Bowasi ku ya tlhasa loko ntsrhovelo wu hela. Bowasi a xiye leswaku Ruti a a li wansati lwenene nakone a a swi zrandzra ku tizra. A masikwini wolawo, loko a wanuna wa kukazri a fa na a nge na n’wana, a xaka dzrake a dzri ta txhata ni wansati lweyi a feliwiki hi nuna. Hiloko Bowasi a tekana na Ruti, va va va pswala n’wana lweyi va mu txhuliki vito dzra ku Obede. Obede a ve vhovho wa hosi Davhida. A vanghanu va Nawomi va nyonxe ngopfu va va va mu byela leswi: ‘Yehovha a sungule hi ku ku nyika Ruti, lweyi a ku pfunaka ngopfu swinene, nakone swoswi a ku nyike ntukulu. A hi dzrumiseni Yehovha hi kola ka hinkwaswu leswi a ku yentxeliki swone.’