Xikhongoto Xa Ana

A ku ni wanuna wa kukazri lweyi a a vitaniwa Elkana. Lembe ni lembe yene ni ndangu wake a va yendzra va ya Xilo akuva va ya gandzrela Yehovha, ku nga lani a tabernakela a dzri li kone. Elkana a a ni vasati vabidzri, ku nga Ana na Penina, kambe a a zrandzra ngopfu Ana. Penina a a ni vana kambe Ana ni wa mun’we a a nga li na yene. Kutani Penina a a tsrhamela ku poyilela Ana hi leswi a a nga pswali. Siku dzrimbeni, loko va li Xilo, Elkana a vone leswaku Ana a a vaviseke ngopfu swinene, kutani a ku: ‘Na ku kombela Ana, u nga dzrili, u na mine nakone ni ku zrandzra ngopfu swinene!’

Ntsrhaku ka nkamanyana, Ana a ya khongota ka Yehovha na a dzrila, nakone a a nga swi koti ku miyela nkama lowu a kombelaka mpfunu wa Yehovha. Ana a dumbisa Yehovha a ku: ‘Yehovha Hosi yanga, loko wo ni nyika n’wana, ni ta mu nyikela a ndlwini yaku nakone yene a ta ku tizrela wutomi byake hinkwabyu.’

Muprista lwenkulu Eli a a nga swi xiyi leswaku Ana a le ku khongoteni, a a pimisa leswaku e popswa. Hiloko Ana a mu byela a ku: ‘Im-him hosi yanga, a ni popswanga, ne kazrateka, hi mhaka leyo ni lani akuva ni khongota ka Yehovha.’ Eli a swi vona leswaku a phazamile, kutani a byela Ana a ku: ‘Yehovha a a ku nyiki leswi u swi djulaka!’ Hi ndlela leyo, Ana a muka na a nyonxile. Na lembe dzri nga si na hela, Ana a va ni n’wana a va a mu txhula vito dzra ku Samuwele. Ana a nyonxe ngopfu swinene, a hi swone?

Xana Ana a xi dzrivalile xidumbiso lexi a xi yentxeliki Yehovha? A nga xi dzrivalanga hikusa loko Samuwele a yime ku nyan’wa, Ana a mu nyikele a tabernakeleni akuva a ya tizrela Yehovha. Loko Ana a nyikela n’wana ka muprista lwenkulu Eli, a mu byele leswi: ‘Wa ha xi dzrimuka xikombelo lexi ni xi yentxeliki Yehovha? A ni hlamulile, a ni nyike n’wana nakone n’wana lweyi a ta mu tizrela wutomi byake hinkwabyu.’ Lembe dzrin’wana ni dzrin’wana, Ana na Elkana a va ya pfuxela Samuwele futsrhi a va mu nyika mpahla ya nyiwana. Hi ku famba ka nkama, Yehovha a tlhele a nyika Ana 5 wa vana ku nga madjaha mazrazru ni van’hwanyana vabidzri.