Tempele Dzra Yehovha

Ntsrhaku ka loko Solomoni a ve hosi ya Israyele, Yehovha a mu vutise leswi: ‘I yini leswi u navelaka leswaku ni ku yentxela swone?’ Hiloko Solomoni a hlamula a ku: ‘Hosi Yehovha, mine na ha li mumpshwa a ni swi tivi leswi ni fanelaka ku swi yentxa. Na ku kombela, ni nyiki wutlhazri akuva ni ta kota ku lulamisa timhaka ta Vaisrayele hi ndlela leyi yi nga yone.’ Kutani Yehovha a mu byela a ku: ‘Leswi u kombeliki wutlhazri, ni ta ku yentxa lweyi a tlhazrihiki ngopfu swinene ku tlula vhanu hinkwavu a misaveni. Ni ta tlhela ni ku yentxa u va lweyi a ganyiki ngopfu swinene. Loko u ni yingiseta, u ta hanya malembe manyingi.’

Hiloko hosi Solomoni a sungula ku yaka tempele. A tizrise woru, prata, timhandzri ni mazribye. Vavanuna ni vavasati va vanyingi lava a va ni wuswikoti, va tizrile ka ku yaka tempele. Ntsrhaku ka 7 wa malembe a tempele dzri helile va va va dzri nyiketela ka Yehovha. A ku ni altari nakone va hambe magandzrelo ka dzrone. Kutani Solomoni a khinsama mahlweni ka altari a va a khongota a ku: ‘We Yehovha, a tempele ledzri a hi dzrikulu nakone a dzri xonganga ngopfu lakakuva a dzri ku faneli, kambe hi kombela u yamukela wugandzreli byezru ni ku tlhela u yingiseta swikhongoto swezru.’ Xana Yehovha a titwise kuyini hi tempele ni hi xikhongoto lexi hosi Solomoni a xi yentxiki? Nkama lowu Solomoni a nga gama ku khongota, ku xike ndzrilo hi le tilweni wu hisa magandzrelo a henhla ka alitari. Lexo a a li xikombiso xa leswaku Yehovha a dzri yamukelile tempele, kutani Vaisrayele va nyonxa ngopfu swinene loko va vona leswo.

Hosi Solomoni a a tiviwa ngopfu a tikweni hinkwadzru dzra Israyele ku patsra ni le mimbangwini ya le kule hi kola ka wutlhazri byake. A vhanu va mimbangu hinkwayu a va ta ka Solomoni akuva va tlhantlheliwa swikazratu swavu. Nambi hi hosi ya xisati ya le Xeba yi tile akuva yi ta mu dzringa hi swivutiso swa ku kazrata, kambe loko yi yingele tinhlamulo ta Solomoni yi te: ‘Leswi vhanu a va swi hlaya mayelanu na wene a ni nga swi kholwi, kambe swoswi na swi vona leswaku a wutlhazri byaku byi tlula ni leswi va swi hlayiki. Nakunene Yehovha Xikwembu Nkulukumba waku awa ku tovokisa.’ A wutomi a byi va fambela ha hombe Vaisrayele, a va nyonxile! Kambe a mintxhumu a yi li kusuhi ni ku txintxa.