Ku Khatisiwa Ka Hosi Ya Xisati Leyi A Yi Yentxa Swa Ku Biha

Na a li ka janela dzra yindlu ya wuhosi a Yezriyele, hosi Akabe a a kota ku vona nsimu leyi a yi lumba wanuna lweyi a a vitaniwa Naboti. Hosi Akabe a a yi djula nsimu liyani xileswo a zame ku yi xava ka Naboti. Kambe Naboti a yala ku yi xavisa hikusa ku xavisa nsimu leyi a siyeliwiki hi ndangu wake swanga pfindla, a swi lwisana ni Nawu wa Yehovha. Leswi Naboti a swi yentxiki a swi li swinene, kambe xana hosi Akabe a a swi vona hi ndlela leyo? Im-him! A hlundzruke ngopfu swinene lakakuva a a yala nambi ku huma a kwartu a ya da.

Nsati wa hosi Akabe ku nga hosi ya xisati Yezabele, lweyi swiyentxo swake a swi nga li swinene, a te: ‘Wene u hosi ya Israyele, u nga kuma hinkwaswu leswi u swi djulaka. Ni ta yentxa leswaku a nsimu leyi u yi djulaka yi va yaku.’ Hiloko Yezabele a tsralela vakulukumba va doropa mapapela lawa a ma hlaya leswaku Naboti a zruke Xikwembu Nkulukumba ni leswaku a a fanela ku khandliwa hi mazribye a za a fa. Hiloko a vakulukumba va doropa va yentxa leswi Yezabele a swi hlayiki. Yezabele a byela hosi Akabe a ku: ‘Naboti a file, ku sukela swoswi a nsimu leyi a yi mu lumba i yaku.’

Wa tiva, Naboti a a nga li mhunu wa ku sungula lweyi a nga dlayiwa na a nga na nandzru hi Yezabele. Yezabele a dlaye vhanu vanyingi lava a va zrandzra Yehovha. Phela a a gandzrela swikwembu swa madzrimi nakone a a yentxa mintxhumu ya ku biha. Kambe Yehovha a a yi vona mintxhumu hinkwayu ya ku biha leyi Yezabele a a yi yentxa. Kutani i yini leswi Yehovha a a ta swi yentxa hi hosi leyo ya xisati?

Ntsrhaku ka loko hosi Akabe a file, n’wanake Yehoramu a sungule ku fuma. Yehovha a zrume wanuna lweyi a a vitaniwa Yehu akuva a ya khatisa hosi ya xisati Yezabele ni ndangu wa yone.

Yehu a khwela ka n’qolo yake a ya Yezriyele, ku nga lomu Yezabele a a tsrhama kone. Hiloko Yehoramu a mu tlhangaveta a va a mu vutisa a ku: ‘Xana ku ni ku zrula makazri kwezru?’ Yehu a hlamula a ku: ‘A ku nge vi na ku zrula makazri kwezru na mamana waku a tama a yentxa mintxhumu ya ku biha.’ A nkama lowu Yehoramu a zamaka ku djikisa n’qolo yake akuva a tsrutsruma, Yehu a mu txopa hi wugubu a fela kolanu.

Yehu a ya ndlwini ya wuhosi lani Yezabele a a tsrhama kone. Loko Yezabele a yingela leswaku Yehu a kusuhi ni ku tlhasa, a tixongisa a patsra ni ku lunghisa ni misisi, a gama a ya yima ka janela dzra andari dzra le henhla. Loko Yehu a tlhasa, Yezabele a mu losa hi ndlela leyi nga liki yinene. Hiloko Yehu a huwelela ka malandzra ya Yezabele lawa a ma li tlhelweni kwake a ku: ‘Mu txukumetelani hi janela, a wa hansi!’ Kutani a malandzra ma txhovha Yezabele hi le janeleni, a wa a tekela ku fela kolanu.

Ntsrhaku ka leswo, Yehu a dlaya 70 wa vana va hosi Akabe, a va a helisa wugandzreli bya Bali a Israyele. Hi dondzra yini ka mhaka leyi? Hi dondzra leswaku Yehovha a vona mintxhumu hinkwayu, nakone hi nkama lowunene a khatisa hinkwavu lava yentxaka mintxhumu ya ku biha.