Yehovha A Lwela Yehoxafati

Yehoxafati hosi ya le Yuda a helise wugandzreli bya Bali ni swithombe hinkwaswu a tikweni. Leswi a a djula leswaku vhanu va tiva Nawu wa Yehovha, a zrume tihosana ni Valevhi a tikweni hinkwadzru dzra Yuda akuva va dondzrisa vhanu milawu ya Yehovha.

A matiko lawa a ma li kusuhi ni Yuda a ma txhava ku hlasela Vayuda hikusa a ma swi tiva leswaku Yehovha a na vone. Va patsre ni ku nyika hosi Yehoxafati swihanano. Kambe a masotxha ya Vamowabu, ya Vaamori kun’we ni masotxha ya muganga wa Seyiri, ma ye hlasela tiko dzra Yuda. Hosi Yehoxafati a a swi tiva leswaku a a wu vilela mpfunu wa Yehovha, xileswo a tlhanganisa vavanuna, vavasati ku patsra ni vana a Yerusalema. Na a li mahlweni kwavu a khongota a ku: ‘Yehovha, handle ka mpfunu waku a hi nge swi koti ku hlula valala vezru. Ha ku kombela, hi byeli leswi hi fanelaka ku swi yentxa.’

Yehovha a hlamula xikhongoto xake a ku: ‘U nga txhavi, ni ta mi pfuna. Yimani mi tiya, mi va mi vona ndlela leyi ni taka mi huluxa ha yone.’ Xana Yehovha a va pfune hi ndlela yini?

Hi siku ledzri landzreliki, hosi Yehoxafati a langa vayimbeleli va kukazri, kutani a va byela leswaku va zrangela na masotxha ma va landzra hi le ntsrhaku. Hiloko va yentxa swoleswo, va famba hi milenge ku sukela a Yerusalema ku ya tlhasa a Tekowa, ku nga mbangu lowu a ku ta lweliwa ka wone.

Nkama lowu vayimbeleli va dzrumisaka Yehovha hi zritu dzra ku tlakuka na va nyonxile, Yehovha a lwela Vayuda. A yentxa leswaku a masotxha ya Vaamori ni ya Vamowabu ma dlayanana hi xiwone nakone a ku salanga ni sotxha ni dzrin’we. Yehovha a sizrelele vhanu hinkwavu, vaprista ni masotxha ya Vayuda. Kutani loko matiko ya le kusuhi ma yingela leswi Yehovha a swi yentxiki, ma vhela ma swi tiva leswaku Yehovha a a sizrelela vhanu vake. Xana Yehovha a sizrelela malandzra yake hi ndlela yini? A tizrisa tindlela ta ku siyanasiyana, nakone a nga vileli mpfunu wa vhanu akuva a yentxa leswo.