Namani Ni Xin’hwanyatana Xa Muisrayele

A tikweni dzra Siriya, ku nga tiko ledzri a dzri kumeka kule ni tiko dzra Israyele, a ku tsrhama xin’hwanyatana xa kukazri xa Muisrayele. Xi tekiwe ka maxaka ya xone hi masotxha ya Vaasiriya xi va xi sungula ku tizra kaya ka Namani lweyi a a li muzrangeli wa masotxha ya Vaasiriya. A xin’hwanyatana xa Muisrayele a ko va xone ntsena lexi a xi gandzrela Yehovha a tikweni dzra Siriya.

Namani a a ni mavabyi ya nhlokonho lawa a ma vavisa ngopfu swinene. A xin’hwanyatana lexi, a xi swi djula ngopfu ku mu pfuna. Hiloko xi ya vulavula ni nsati wa Namani xi ku: ‘Ni tiva mhunu lweyi a nga dahaka n’winyi wanga. A Israyele ku ni muprofeta wa Yehovha lweyi a vitaniwaka Elixa. A nga swi kota ku daha n’winyi wanga ka mavabyi lawa.’

Xileswo, a nsati wa Namani a ya bulela nuna wake leswi xin’hwanyatana xa Muisrayele xi mu byeliki swone. Namani a a swi djula ngopfu ku dahiwa mavabyi yake, xileswo a suka a ya kaya ka Elixa a tikweni dzra Israyele. Leswi Namani a a tivona na a li wa lisima, a a yimela leswaku Elixa a huma a ndlwini akuva a ya khanela na yene. Kambe a matsrhan’wini ya leswo, Elixa a zruma nandzra wake akuva a ya byela Namani a ku: ‘Famba u ya hlamba ka 7 a nambyeni wa Yordani, u ta hanya ka mavabyi yaku.’

A mazritu lawo a ma mu nyonxisanga Namani. A te: ‘A ni pimisa leswaku a muprofeta lweyi a a ta ni daha hi ku va a khongota ka Xikwembu Nkulukumba wake na a nalavute mavoko a henhla kwanga. Kambe a matsrhan’wini ya leswo e ni zruma kuva ni ya hlamba ka nambu wa lani Israyele. Phela a minambu ya le Siriya ya yampswa ku tlula minambu ya le Israyele. Ha yini a nga ni zrumanga akuva ni ya hlamba a Siriya?’ Ntsrhaku ka leswo, Namani a suka kaya ka Elixa na a kwate ngopfu.

Kambe a malandzra yake ma bula na yene ma ku: ‘Hosi yanga, u hlaye leswaku u ta yentxa hinkwaswu leswi u swi kotaka akuva u dahiwa, kutani ha yini u nga dzringisi ku yentxa leswi muprofeta a ku byeliki swone? Phela swi tikomba na swi nga kazrati.’ Xileswo Namani a yentxa hi lani malandzra yake ma mu byeliki ha kone, a ya nambyeni wa Yordani a tlhasa a hlamba ka 7. Loko a huma a matini ka khambi dzra wu 7, a vona leswaku a mavabyi yake a ma dahekile hakakunene. Namani a nyonxa ngopfu swinene a va a ya tlangela Elixa. A byela Elixa a ku: ‘Swoswi na swi tiva leswaku Yehovha i Xikwembu Nkulukumba wa ntiyiso.’ Yanakanya ndlela leyi xin’hwanyatana xa Muisrayele xi titwiki ha yone loko xi vona Namani a tlhelela a kaya na a dahiwile!