Masotxha Ya Yehovha Lawa Ma Nga Ni Ntamu

Beni-hadadi hosi ya Asiriya, a dzringise ku hlasela tiko dzra Israyele hi makhambi ya ku siyanasiyana. Minkama hinkwayu muprofeta Elixa a a tivisa hosi ya Israyele loko Beni-hadadi a djula ku hlasela Vaisrayele. Hi kola ka leswo, a hosi a yi kota ku huluka ka nhlaselo wa Beni-hadadi. Xileswo, Beni-hadadi a zrumela masotxha ya le Asiriya leswaku ma ya ka doropeni dzra Dothani akuva ma ya khoma Elixa.

Hiloko masotxha ya Asiriya ma tlhasa a Dothani ni wusiku. Hi mundzruku ka kone, a nandzra wa Elixa a vona leswaku a doropa dzri tsrandzreliwe hi masotxha ya manyingi. Hiloko a sungula ku txhava ngopfu swinene a va a huwelela hi zritu ledzri tlakukiki a ku: ‘Yowee hosi yanga, hi ta yentxa yini xana?’ Kutani Elixa a mu hlamula a ku: ‘U nga txhavi, hikusa lava va nga na hine i vanyingi ku tlula lava va nga na vone.’ Hi nkama wolowo Yehovha a pfula matihlo ya nandzra wa Elixa, hiloko a sungula ku vona leswaku a tinhava hinkwatu leti a ti tsrandzrele doropa, ti tale hi makavhalu ni tin’qolo ta yimpi leti pfuzraka ndzrilo.

Loko masotxha ya Asiriya ma dzringisa ku khoma Elixa, Elixa a khongota a ku: ‘Yehovha, na ku kombela, yentxa leswaku masotxha lawa ma fa matihlo.’ A masotxha a ma fanga matihlo hakakunene kambe me suketana ma nga ha wu tivi mbangu lowu a ma li ka wone. Kutani Elixa a ma byela a ku: ‘A hi dzrone doropa ledzri mi djulaka dzrone, ni landzrani ni ta mi yisa ka mhunu lweyi mi mu djulaka.’ A masotxha ya Asiriya ma landzra Elixa ku ya tlhasa a Samariya ku nga doropa ledzri hosi ya Israyele a yi tsrhama ka dzrone.

A nkama lowu Vaasiriya va voniki leswaku a va le Samariya a va nga ha na ndlela ya ku tlhelela ntsrhaku. A hosi ya Israyele yi vutisa Elixa yi ku: ‘Xana ni fanela ku va dlaya?’ Elixa a a ta va a londzrovote mukhandlu lowo akuva a tidzrihisela. Kambe xana wa swi tiva leswi a swi yentxiki? A te: ‘U nga va dlayi vavanuna lava kambe va nyiki swakuda u va u va tsrhika va famba.’ Xileswo, a hosi ya Israyele yi zruma malandzra ya yone akuva ma lulamisela swakuda leswaku a masotxha ya le Asiriya ma ta da. Ntsrhaku ka leswo, a byela masotxha ya le Asiriya leswaku ma muka.