Yehoyada A Kombise Xixixi

Yezabele a ve ni n’wana wa xisati lweyi a mu txhuliki vito dzra ku Ataliya. Ataliya a a li mhunu wa tihanyi ku fana ni mamana wake nakone a txhatiwe hi hosi ya le Yuda. Loko hosi leyi yi file, a n’wana wa Ataliya a bekiwe ku va hosi, a pfaleta papayi wake. Kambe na yene n’wana wa Ataliya a game a fa, kutani Ataliya a sungula ku fuma a Yuda. Nambitanu akuva leswo swi koteka, a dlaye hinkwavu lava a va ni mfanelo ya ku fuma, ku patsra ni vatukulu vake. Phela vhanu hinkwavu a va mu txhava Ataliya hi leswi a a ni tihanyi!

Muprista Lwenkulu Yehoyada kun’we ni nkatake Yehoxeba, a va swi tiva leswaku hinkwaswu leswi Ataliya a a swi yentxa a swi bihe ngopfu. Ha wubidzri byavu va kombise xixixi hi kuva va tumbeta mun’we wa vatukulu va Ataliya a tempeleni, lweyi a a vitaniwa Yehowaxi, nakone va mu wundle ku dzringana nkama wa kukazri.

Na Yehowaxi a ni 7 wa malembe, Yehoyada a tlhanganise vavanuna hinkwavu lava a va zrangela Yuda a va a va byela leswi: ‘Vonelelani tinyangwa ta tempele nakone mi nga tsrhiki mhunu a nghena.’ Kutani Yehoyada a beka Yehowaxi akuva a va hosi ya le Yuda a va a mu tlhanteka ngiyana ya wuhosi a nhlokweni. Hiloko xitsrhungu xa le Yuda xi sungula ku huwelela xi ku: ‘A yi hanyi hosi!’

Loko hosi ya xisati Ataliya a yingela xitsrhungu na xi huwelela, a ya tempeleni hi ku tsrutsruma. Loko a vona hosi leyimpshwa a sungula ku huwelela a ku: ‘N’wine mi vapfukeli! Mi vakanganyisi!’ Hiloko vavanuna va kukazri va khoma Ataliya va mu humesa handle ka tempele va va va mu dlaya. Hi wugamu swi kotekile kuva Yehowaxi a huluka ku dlayiwa hi vhovho wake Ataliya lweyi a a ni tihanyi. Kambe a ka ha ni moya wa ku biha a tikweni. Xana Yehoyada a a ta yentxa yini akuva a lulamisa mhaka leyi?

Yehoyada a pfune xitsrhungu akuva xi hamba xipfumelelanu na Yehovha, ka xipfumelelanu lexo a xitsrhungu xi dumbise ku tizrela Yehovha ntsena. Xileswo va hohlota tempele dzra Bali kun’we ni swithombe swa swikwembu swa madzrimi. Ntsrhaku ka leswo Yehoyada a hlawula vaprista, Valevhi ni vazrindzri va tinyangwa leswaku va tizra a tempeleni dzra Yehovha. Hi ndlela leyo a vhanu va kote ku tlhela va gandzrela Yehovha hi ndlela leyinene. Kutani Yehoyada kun’we ni vavanuna van’wana va teka Yehowaxi va mu yisa ndlwini ya wuhosi va va va mu beka a xitsrhan’wini xa wuhosi. Xileswo vhanu hinkwavu va le Yuda va nyonxa ngopfu swinene hikusa a swi koteka kuva va gandzrela Yehovha na va nga hingeleteliwi hi Ataliya ni hi wugandzreli bya Bali. Xana wa yi vona ndlela leyi a xixixi lexi Yehoyada a xi kombisiki xi pfuniki vhanu vanyingi ha yone?