Yehovha A Mu Lehisele Mbilu Yonasi

Ninivha a ku li doropa ledzri a dzri kumeka a tikweni dzra Asiriya. A vhanu va doropa ledzro a va yentxa mintxhumu leyi bihiki ngopfu swinene. Hi kola ka leswo, Yehovha a zruma muprofeta Yonasi akuva a ya va byela leswaku va fanela ku tisola. Kambe a matsrhan’wini ya ku ya a Ninivha, Yonasi a khwela boti a kongoma doropeni dzra le Taraxixi, ledzri dzri kumekaka kule ngopfu swinene ni Ninivha.

Na va li ku yendzreni hi boti, ku sungula xidzedze lexikulu. A vafambisi va boti va txhava ngopfu swinene va va va khongota ka swikwembu swavu va tlhela va vutisa va ku: ‘Ha yini hi humeleliwa hi khombo ledzri?’ Kutani Yonasi a byela vafambisi va boti a ku: ‘Hi mine ni nga ni nandzru hikusa Yehovha a ni zrume ku yentxa swa kukazri kambe a matsrhan’wini ya kuva ni swi yentxa ne tsrutsruma. Loko mi ni txukumetela a lwandle, a xidzedze xi ta yima.’ A vafambisi va boti a va nga swi djuli ku yentxa leswo kambe Yonasi a va sindzrisa leswaku va mu txukumetela a lwandle, hiloko va mu txukumetela xi va xidzedze xi yima.

Kutani Yonasi a sungula ku mbombomela a va a tibyela leswaku a ta fa, xileswo a khongota ka Yehovha. Hi nkama wolowo, Yehovha a zrumela hlampfi ya yikulu yi tlhasa yi minta Yonasi kambe a nga fanga. Yonasi a khongota na a li ndzreni ka hlampfi a ku: ‘Yehovha na ku dumbisa leswaku ku sukela namunhla ku ya a mahlweni ni ta ku yingiseta minkama hinkwayu.’ A tsrhame khuzrini dzra hlampfi ku dzringana masiku mazrazru. Ntsrhaku ka leswo, Yehovha a yentxa leswaku a hlampfi yi hlanta Yonasi a handle ka lwandle ka misava leyi yi womiki.

Xana leswo a swi djula ku hlaya leswaku Yonasi a a fanela ku muka? Im-him! Yehovha a tlhele a zruma Yonasi akuva a ya Ninivha. Kambe ka khambi ledzri, Yonasi a yingisetile. Loko a tlhasa doropeni dzra Ninivha, a byela vhanu lava a va yentxa mintxhumu ya ku biha a ku: “Ke sala 40 wa masiku ntsena, Ninivha a ta helisiwa.” Kambe ku yentxeke ntxhumu lowu a wu nga yimeliwanga hi mhunu, a vhanu va le Ninivha va tisolile. A hosi ya le Ninivha yi te: ‘A hi kombeleni Xikwembu Nkulukumba akuva a hi dzrivalela, kumbexana a ta hi twela wusiwana a nga hi helisi.’ Loko Yehovha a vona leswaku a vhanu va le Ninivha va tisolile, a va twela wusiwana a va a nga va helisi. Kambe Yonasi a hlundzruka ngopfu swinene hi kola ka leswi Yehovha a va tweliki wusiwana.

Yehovha a lehisele Yonasi mbilu kambe Yonasi a hluleke ku lehisela Vaninivha mbilu. A matsrhan’wini ya leswo, a hume doropeni na a hlundzruke ngopfu swinene a ya tsrhamisa hansi ka xinsinyana xa kukazri. A xinsinyana lexo xi game xi fa, leswo swi yentxe leswaku Yonasi a kwata ngopfu swinene. Kutani Yehovha a dondzrisa Yonasi a dondzro ya lisima hi ku mu byela a ku: ‘U xi twele wusiwana xinsinyana xa ku a hi wene u xi byaliki nakone u khunguvanyekile loko xi fa, xana a vhanu va le Ninivha a hi va lisima ku tlula xinsinyana?’