A Ntsrumi Ya Yehovha Yi Sizrelele Ezekiya

A mfumu wa Asiriya wu wutle mfumu wa tinxaka ta 10 ta Israyele, nakone Senakeribi hosi ya Asiriya a a djula ku wutla ni mfumu wa tinxaka tibidzri ta Yuda. A sungule ku hlasela madoropa ya Yuda, ha dzrin’wedzrin’we. A doropa ledzri a a swi djula ngopfu ku dzri hlasela a ku li Yerusalema, kambe leswi Senakeribi a a nga swi tivi hi leswaku Yehovha a a sizrelela Yerusalema.

Ezekiya hosi ya le Yuda, a nyike Senakeribi mali ya yinyingi akuva a nga hlaseli doropa dzra Yerusalema. Nambileswi Senakeribi a yamukeliki mali yoleyo, a zrume masotxha akuva ma ya hlasela doropa dzra Yerusalema. A vhanu lava a va tsrhama a doropeni ledzro va sungule ku txhava ngopfu swinene hikusa a masotxha ya le Asiriya a ma ya ma tsrhindzrekela. Kutani Ezekiya a byela vhanu a ku: ‘Mi nga txhavi, nambileswi a Vaasiriya va nga ni ntamu, Yehovha a ta hi pfuna ku va hi va ni ntamu ku va tlula.’

Senakeribi a zrumela Rabuxaki nandzra wake a Yerusalema akuva a ya poyila ni ku txhavisela Vaisrayele. Loko Rabuxaki a tlhasa a Yerusalema a yima hi ka tlhelo dzra le handle dzra doropa a va a sungula ku huwelela a ku: ‘Yehovha a nge ti mi pfuna, Ezekiya o mi kanganyisa. A xi kone xikwembu ni xin’we lexi nga kotaka ku mi sizrelela.’

Hiloko Ezekiya a vutisa Yehovha leswi a fanelaka ku swi yentxa. Kutani Yehovha a mu hlamula a ku: ‘U nga swi txhavi leswi Rabuxaki a swi hlayiki hikusa Senakeribi a nge ti za a hlula Yerusalema.’ Ntsrhaku ka loko ku khalute nkama wa kukazri, Ezekiya a yamukela mapapela lawa a ma ta he ka Senakeribi. A mapapela wolawo a ma ku: ‘Tinyikelani, hikusa Yehovha a nge mi huluxi.’ Xileswo, Ezekiya a khongota a ku: ‘Ha ku kombela Yehovha, hi huluxi, akuva vhanu hinkwavu va ta swi tiva leswaku hi wene ntsena Xikwembu Nkulukumba wa ntiyiso.’ Kutani Yehovha a hlamula Ezekiya a ku: ‘A hosi ya Asiriya a yi nge ti nghena a Yerusalema, hikusa ni ta sizrelela a doropa dzranga.’

Phela Senakeribi a a tiyiseka leswaku a ta teka doropa dzra Yerusalema. Kambe hi wusiku byin’we ntsena, Yehovha a zrumela ntsrumi yi ya lani masotxha ya Senakeribi a ma gwimbe kone matende yi tlhasa yi dlaya 185.000 wa masotxha ya Vaasiriya hi wusiku byolebyo. Senakeribi a luzekeliwa hi masotxha yake hinkwawu, a a nga ha na xa ku xi yentxa loko ku nga li ku tlhelela kaya hikusa a a hluliwile. Yehovha a sizrelele Ezekiya ni doropa dzra Yerusalema hi lani a a dumbise ha kone. Loko wene a wo va Yerusalema a nkameni wolowo, xana a u ta va u mu dumbile Yehovha?