Yosiya A A Zrandzra Nawu Wa Xikwembu Nkulukumba

Yosiya a sungule ku fuma tiko dzra Yuda na a ni 8 wa malembe. A nkameni luwani a vhanu a va yentxa mintxhumu ya ku biha a mahlweni ka Yehovha. A va hamba masalamusi va tlhela va gandzrela swikwembu swa madzrimi. Loko Yosiya a tlhanganise 16 wa malembe, a djuletele ku tiva ndlela leyinene ya ku gandzrela Yehovha. Nakone loko a tlhanganise 20 wa malembe a gilhite maaltari ni swithombe swa madzrimi leswi a swi li a Yuda. Kutani loko a ve ni 26 wa malembe a pfuxete tempele dzra Yehovha.

Muprista lwenkulu Hilkiya a kume buku dzra Nawu wa Yehovha a tempeleni, ledzri kumbexana dzri tsraliwiki hi Moxe. Kutani Xafani, matsralana wa hosi, a teke Buku ledzro a ya dzri dondzrela hosi. Loko Yosiya a yingela leswi swi tsraliwiki a bukwini dzra nawu, a gungule leswaku vhanu a va nga yi landzri milawu ya Yehovha ku dzringana malembe manyingi. Kutani Yosiya a byela Hilkiya a ku: ‘Yehovha a hi kwatele ngopfu, famba u ya khanela na yene, kutani a ta ku byela leswi hi fanelaka ku swi yentxa.’ Ntsrhaku ka loko Hilkiya a khanele na Yehovha, Yehovha a mu byela leswi: ‘A vhanu va le Yuda va ni pfukelile, xileswo va ta xaniseka. Kambe leswo swi to yentxeka ntsrhaku ka loko Yosiya a file hikusa a dondzre milawu yanga a tlhela a yentxa leswi swi nga swinene.’

Loko Yosiya a yingela nhlamulo ya Yehovha, a tlhanganisa vhanu hinkwavu a tempeleni, a va a dondzra Nawu wa Yehovha hi zritu dzra le henhla a mahlweni ka hinkwavu. Yosiya kun’we ni xitsrhungu va dumbisa ku yingiseta Yehovha hi mbilu hinkwayu.

A tiko dzra Yuda a dzri nga ha tlangeli Paxkwa ku dzringana malembe manyingi. Kambe loko Yosiya a dondzre buku dzra Nawu, a xiye leswaku a Paxkwa a dzri fanela ku tlangeliwa lembe ni lembe. Hiloko a byela tiko a ku: ‘Hi ta hambela Yehovha Paxkwa.’ Kutani Yosiya a lulamiselela Yehovha a Paxkwa. A nyikela swihazri swa swinyingi swanga magandzrelo a va a beka vhanu akuva va yimbelela tinsimu a tempeleni. Ntsrhaku ka Paxkwa, a vhanu va le Yuda va tlhela va hamba nkhuvu wa 7 wa masiku, ku nga Nkhuvu wa Mapawu lawa ma kalaka ma nga txheliwanga Fermentu. A khambi dzra wugamu ledzri a Vayuda va hambiki Paxkwa dzra ku fana ni ledzri dzri hambiwiki hi Yosiya, a ve ledzri dzri hambiwiki a masikwini ya muprofeta Samuwele. Nakunene, Yosiya a a wu zrandzra ngopfu nawu wa Yehovha. Wene ke, wa swi zrandzra ku dondzra mayelanu na Yehovha?