Ntsrumi Gabriyele Yi Yendzrela Mariya

A ku ni n’hwanyana lweyi a a vitaniwa Mariya lweyi a a tsrhama a doropeni dzra Nazareta a Galileya. A a li xaka dzra Elizabeti nakone a a dumbisiwe mutxhatu ha Yosefa lweyi a a li muvatli. Loko ntsrumi Gabriyele yi ya khanela na Mariya, Elizabeti a a ni nyimba ya 6 wa tihweti. Loko a ntsrumi yi tlhase ka Mariya yi te: ‘Xawani Mariya, wene lweyi a nyonxeliwaka ngopfu swinene ha Yehovha.’ Kambe Mariya a nga swi twisisanga leswi ntsrumi a yi djula ku hlaya swone hi mazritu wolawo. Xileswo ntsrumi Gabriyele yi mu tlhamuxele yi ku: ‘U ta va ni nyimba nakone u ta pswala n’wana wa djaha, u ta mu txhula vito dzra ku Yesu. Yene a ta va hosi ya Mfumu lowu taka fuma hi lani ku nga helikiki.’

Mariya a hlamula a ku: ‘Ni n’hwanyana, a ni ngi sama ni yetlela ni wanuna, kutani swi ta kotekisa kuyini kuva ni va ni n’wana? A ntsrumi yi mu byela yi ku: ‘Yehovha a nga hluliwi hi ntxhumu. A ta tizrisa moya wa ku xwenga leswaku u va ni n’wana wa djaha. Nambi xaka dzraku Elizabeti kutani a ni nyimba.’ Hiloko Mariya a hlamula ntsrumi a ku: ‘Ni nandzra wa Yehovha! A swi yentxeki hi ku ya hi mazritu yaku.’

Mariya a sukile a ya pfuxela Elizabeti. Loko Mariya a losa Elizabeti, kutani Elizabeti a twa xibebetana lexi a xi li khuzrini dzrake na xi txhukatxhuka, kutani Elizabeti a tala hi moya wa ku xwenga a ku: ‘Mariya, wene u wansati lweyi a tovokisiwiki ha Yehovha, i ndjombo yikulu kwanga ku yendzreliwa hi mamana wa Hosi yanga.’ Mariya a ku: ‘U tiyisile Elizabeti, phela ni mu tlangela ngopfu swinene Yehovha hi kola ka tovoko ledzri.’ Mariya a hete tihweti tizrazru na a li kaya ka Elizabeti, ntsrhaku ka leswo a timukela kaya kwake a Nazareta.

Loko Yosefa a tive leswaku Mariya a ni nyimba, a djule ku mu tsrhika. Kambe na Yosefa a le ku yetleleni, ku humelele ntsrumi a lozrweni yi vulavula na yene yi ku: ‘U nga txhavi ku tekana na Mariya hikusa a nga yentxanga ntxhumu wa ku biha.’ Xileswo, Yosefa a txhate na Mariya a va a muka na yene a kaya kwake.