Korneliyu A Yamukela Moya Wa Ku Xwenga

A doropeni dzra le Khezariya a ku ni wanuna wa kukazri lweyi a a li muzrangeli wa masotxha ya Varoma, a vito dzrake a a li Korneliyu. Nambileswi a a nga li Muyuda, a Vayuda a va mu hlonipha ngopfu swinene. Korneliyu a a li mhunu lweyi a a hanana nakone a a swi zrandzra ngopfu ku pfuna swisiwana. A a pfumela ka Yehovha futsrhi a a khongota kwake minkama hinkwayu. Siku dzrin’wana ku humelela ntsrumi a mahlweni kwake yi mu byela yi ku: ‘Xikwembu Nkulukumba a swi yingelile swikhongoto swaku. Zruma vhanu va ya Yopa, lani Petro a tsrhamaka kone, va ya mu kombela leswaku a buya halenu.’ Hi ku kahlula Korneliyu a zruma vavanuna vazrazru va ya sul, ku nga mpfhuka wa kolomu ka 48 wa makilometru ku ya tlhasa kone.’

Hi nkama wolowo na a le Yopa, Petro a va ni xivoniso. Ka xone, a vona swihazri leswi Vayuda a va nga fanelanga va swi da. Hiloko a twa zritu dzri ku: ‘Dana.’ Kambe Petro a yala a ku: ‘A ni nge swi yentxi leswo, hikusa a ni ngi ngi da ntxhumu lowu nyamiki nakone wu kalaka wu nga basanga.’ Hiloko zritu dzri ku: “Tsrhika ku hlaya mintxhumu leyi Xikwembu Nkulukumba a yi basisiki u ku yi nyamile.” Dzri tlhela dzri mu byela leswi: “Ku ni vavanuna vazrazru va ku djuletelaka, xileswo xika u famba na vone.” Hiloko Petro a xika a ya xipfalwini a tlhasa a va vutisa a ku: “Ni nga mi pfuna hi yini?” Va mu hlamula va ku: ‘Hi zrumiwe hi Korneliyu, muzrangeli wa masotxha ya Varoma akuva hi ta ta ku vitana u ya kaya kwake, a Khezariya.’ Hiloko Petro a va zramba akuva va yetlela a kaya kwake ka wusiku byolebyo swanga vayeni vake. Hi mundzruku ka kone, a yendzra na vone a ya Khezariya na a li xikan’we ni vakriste va kukazri va le Yopa.

Loko Petro a tlhasa a Khezariya, Korneliyu a mu vona a gama a khinsama mahlweni kwake. Kambe Petro a ku: ‘Sekeleka, hikusa na mine ni mhunu ku fana na wene. Nambileswi a Vayuda va kalaka va nga ngheni a makaya ya vhanu va tinxaka timbeni, Xikwembu Nkulukumba a ni zrume kwaku. Ni kombela u ni byela leswaku u ni vitanela yini.’

Korneliyu a byela Petro a ku: ‘Ka mune wa masiku lawa ma khalutiki, a ni le ku khongoteni ka Xikwembu Nkulukumba, ku suketana ku humelela ntsrumi yi ni byela leswaku ni ya ku vitana. Hi kombela u hi dondzrisa mayelanu na Yehovha.’ Petro a mu hlamula a ku: “Swoswi ni swi twisisa ha hombe leswaku Xikwembu Nkulukumba a nga na xihlawuhlawu, kambe a matikweni hinkwawu mhunu mun’wana ni mun’wana lweyi a mu txhavaka nakone a yentxaka leswi lulamiki awa yamukeleka kwake.” Kutani Petro a sungula ku va dondzrisa mintxhumu ya yinyingi mayelanu na Yesu. Hiloko Korneliyu kun’we ni hinkwavu lava a va li na yene, va yamukela moya wa ku xwenga va va hinkwavu va babatisiwa.